You are here
Home > CCT Robawm > ZUCHHIP SAKEI HUAISAR A KAP HLUM – Familia Fanai Lalţansanga

ZUCHHIP SAKEI HUAISAR A KAP HLUM – Familia Fanai Lalţansanga

ZUCHHIP SAKEI HUAISAR A KAP HLUM – Familia Fanai Lalţansanga

VANHNUAITHANG PASALŢHA HRANGHLEIA; Episode 23

 sakei kah thu

Hranghleia Zuchhip khuaa a awm lai bawk hian vawi khat chu  keipui huaisar leh chimawm zet  mai a tla a. Mi an la tlemin ĩn a tlem bawk si a, feh kal fal  ngam an awm ta lo hial a, ran a seh fo mai bawk si.

7318414-3x2-940x627

Hmeichhe zing tuichawi kalho lah fei leh silai nena ven  ngai reng nen, an mangang hle ta mai a. Zanah sakei huaisar tak chuan khua a vel thur thur reng mai si! Dai a velin a huk khawk rum rum reng mai  a. Mite chuan  “Aw….Pasalţha Hranghleia chu awm sela aw….” an ti vawng vawng mai a. A khat tawkin sa a tla reng mai bawk si nen. Hranghleia ertute chuan, “Hranghleia pawh awm se, eng a ti thei bik hlei lawng e, silai a tiri ang a, an tikawlh ting mai ang, sapui chu a la kal bo ve leh chek ang,” an lo ti ve chhen bawk a. Chutih lai chuan Hranghleia zin chu a lo haw ta hlauh mai a. Chutia a khuate sapui huaisar deuh maiin a lo tithlabar nasa chu a huat zawng tak mai a nih avangin mipui tithlabartu chu kahhlum ngei tumin a inbuatsaih ta nghal a.

post-tur

Zanah thla a eng em em mai a, keipui huaisar tak mai chuan khua a velin a huk  ri dum dum reng a, nunaute chuan tap kil an chuh nak nak hlawm a, sialin inhnuai an chuh rawk rawk  a, vawk lah chu an tang hru hru a, an dak voh voh a, an hawk hruih hruih a.

Van copy

 Sapui chu tlang dung lamah a kal a, a meiin  lei leh a dul a hem ri pup pup  ri pawh khua atang chuan a hriat theih a. A khat tawkin a huk ri chher chhuai chhuai reng a. Pasalţha Hranghleia chu an khualzin hah pawh sawi thei lovin, a silai a buatsaih malh malh a, zen tam tak a bun chhuak a, tam tawk a thun ta a. Keipui huaisarin nunauho a lo tihthlabarte  thlamuanna  hla do  chham turin luhkapuiah a lawn a;

          “Kha! keimah Hranghleia, Vanhnuaithang ka si ngai e,

          Mi-ah Hranghlei sing e, sa-ah Hranghlei sing e.

          Keipui rawl lian pa ka hawng thawk e”

          Hranghleia hla do chham, keipui rawl lian a han cho zet  chuan nunauho a thlamuan chiang ngei e.

          Pasalţha Hranghleia chuan dai a vel ta thauh thauh mai le. Chutih lai chuan sial lâ hi a awn ta rawng rawng mai a. Chu sial mangang bu ri chhuahna lam chu  Hranghleia chuan fimkhur takin a pan ding ta nghal a. Keipui chuan a sial sehhlum hlim hlawl a lo la ţhutchilh lai chu a va phawk ta mai! Sakei huaisar tak chuan lo rum ţhaih ngur ngur  chungin a insaseng hman ta hlauh va. Chu sakei huaisar leh lung fing zet mai chuan Hranghleia chu seh ngei tumin tlangdung kawngpui fai laiah a lo chang a, zuan nghal thut thei turin a bawk phek ta duai a. Sapui rum ri leh thawm leh a huk ri hian mihring tiril a tikhur duh hle mai a, thauvah hian mi a man a, mi pangngai tan chuan tha a khur der der thei thin a ni ngai a. Pasalţha Vanhnuaithang mihrang Hranghleia  erawh a zam lo! A zam chhe te eih lo va, a tha a khur na hek lo! Sakeiin a sa chan a zuan dawn hian a mei a tiche ngulh ngulh ţhin a, chutiang chiah chuan Hranghleia zuan tum chuan a mei a tiche vual vual ta mai! Zawhte ang maia thawm dim thiam leh mit var pasalţha Hranghleia chuan chu keipui  chu a hmuh ţhelh bik miah lo va, keipui thil tum pawh a hai bil nem!

Original_WW21967

          Chutah le! “Kawlphe-ah pawh a rang pawl a ni awm mang e!” tih palh awl tur khawpa rangin Hranghleia chuan a silai chu tin pawh tin ţha hman lovin, a kawng  bawr aţang chuan a silai barrel sei pui chu a tipuak ta dur! Amah zuan tumtu keipui huai sar chu pasalţha ngen mu-in a sahuat lai taka  a han deng fuh zet chu a tawm chawih! A khur ta chur chur! A khur muang.. tual…tual……! A chatthla ta!

“Kawl khua e, eng hlah seh law,

Valpa ka kal lai ni a chhuak e;

Kawl i e, sa bawih le maw,

Mal za e, tlun lang e,

Kan run an e”

Pawpi rawl lian ze ţial pa,

Chhip khawpui dai i vel sual e,

Hranghlei sing e, mi-ah Hranghlei sing e

Sa-ah Hranghlei sing e’

tiin keipui huaisar,  a lu a kah hek bui ruang tlawh chhanin zan reh reih ruih tak maiah chuan hla do a chham ri ta vang vang chu khaw chhung nunauho pawh chuan an lo hre ta a. Nunau leh nau lo pawh awm lovin a khaw nawtin silai rikna leh hla do chham ri an hriatna lamah chuan a chimin an chim thla ta ruih ruih mai a. Sakei mei sat thlatu nih an tum fur a, a mei sah thlak hi a bawp man ang a ni. Khuaah an zawn chho ta a, lanu valrual nui ri leh naupang lawm ţe ri nen an ri chel chul ta mai a, an hlimin an lawm ngei mai. “Pasalţha Hranghleia chu tluk loh rim a lo nam ngei mai” an ti huai huai mai a ni.

HRANGHLEIA - Copy (2)

Vanhnuaithang Mihrang Hranghleia hian sakhi chin chung lam pawh sa 300 chuang a kap a. A tir lam phei chuan sakhi hi a kap duh ngai  lova, tleirawlho inzirna awm tawk lekah a ngai mai ţhin a. Mahse sakhi hian zu hran a nei a, sakhi  kap ve lo te chuan sakhi aihna zu hi an in thiang ve lo va, zu a chan phah fo avang leh thangchhuahna atan sa kah ngaiah a tel ve avang chauhvin sakhi hi a kap leh hnuhnawh mai mai a ni. Pasalţha Hranghleia hian ram lamah thang vawi hnih a chhuah a ni.

Similar Articles

Top