You are here
Home > World News > WHITE HOUSE LUAH TURA INBEIHNA A NA SA SAWT HLE : HILLARY CLINTON VS DONALD J. TRUMP

WHITE HOUSE LUAH TURA INBEIHNA A NA SA SAWT HLE : HILLARY CLINTON VS DONALD J. TRUMP

June 16: Tunlai chu Democrat Hillary Clinton leh Republican Donald J.Trump ten White House luah tuma an inbeihna chuan tuipui lian mek ang maiin, zual lam a pan zel avangin thuthar maksak danglam an nei deuh reng ta mai. Mizo Special Report-online international reporter te pawhin kan ziak vek seng dawn lo.

Donald Trump chuan US President anih chuan, North Korea dictator Kim Jung-un chu America-ah a mikhual (host) a tum thu a sawi leh ta chheu mai ! US politician tam tak chuan North Korea chu luhlul leh khawvel leh Korean Peninsula muanna tiderthawngtu tiin, UN kal tlanga hrek leh hrem zel an duh thung.

Trump (kei chuan Penglengpunga tiin a hming ka phuah mai a-CT) chuan, niminah Atlanta hmuna a campaign-naah Muslim hoten US an pem theih loh nan khap bur a duh thu uar taka sawi zelin, muslim mosque-sakhaw biak buk leh an chenna hmun te pawh enthlak zel tha a tih thusawiin, “Muslim hote chu America hun lo kal tura harsatna thlentu tur an ni a, kan rama lut tur kan khap loh chuan Orlando-a thil thleng ang hi alo thleng nawn leh thin ang” a ti.

He thu hi “Crooked Hillary” an tih mai chuan chhangletin, “Donald Trump butut (bully)a thiltih tum hian ISIS a ti pawngpawrh ang. Trump a ngaihdan angin engtizawng mahin Orlando inbeihna-mass shooting hi tihtawp chi a ni lo. Tuma nunna mah a chhanhim lovang e. Muslim pem khap (ban) hi mi beih tihtawpna a ni lo. Engtinnge bang a inhung vek pawhin internet chu tihtawp a nih theih ang?” tiin, a campaign-na hmun Hampton, Virginia state ah a sawi.

CBS Newspoll chuan American mipui tam zawkin Trump-a ngaihdan chu an thlawplo tih anih laiin, Hillary Clinton chuan +2pc in ram pumah Trump aiin hma a hruai niin a sawi.

Kumin 2016-a US Presidential election thupui (key issue) ber chu “Ram chhung venhimna” (national security) a ni dawn a ni. Trump hian a foreign policy tur a sawiah pawh “America first” tiin, “America kan siam ropui leh ang” tiin, auhla a nei a; he thupui hian American mipui thinlung a hmin hle a ni. Muslim tan viautu President Barack Obama chuan vawiin June 16 ah Orlando panin, Afghan-American Omar Mateen an LGBT’s night club-Pulse hmuna mi 49 a kahhlumte sunna thu a sawi ang. Kum 8 chhunga mass shooting inthahnaa vawi 15 zet a thusawina tur a ni. Obama hian Trump chu a thusawi vangin nasa takin a bei let (blistering rebuttal) a, Trump hian firfiakte nena inzawmna (league with terrorist) neiah Obama hi puhin, “radical islam” tih leh “jihadist” tih tawngkam hmang duh lova puhin, “Kal mai teh!” tiin, President atanga bang (resign) turin a phut a ni.

PRIMARY ELECTION AN ZO THAWKHAT TA

Democratic party leh Republican party chuan an party aiawh tur thlanna-primary election chu an nei zo thawkhat ta. He primary election ah hian mi maktaduai 60 velin vote an thlak a, Republican ah maktaduai 30.7 leh Democrat maktaduai 30 chuang vote thlak belhkhawm chu maktaduai 61 vela ngaih a ni. Kum 2008 inthlan hnuhnung ber ah khan maktaduai 58-59 inkarin vote an thlak a ni.

Trump hian tawngkam mak sak leh hriam tak tak a hmang thin a, hei vang hian miten amah hi an ngaihven phah a; a haw vek vek chuan an duh lovin, an ngei em em mai a ni. Media-hote pawh kawm ngeih leh tihthat a tum chuang lo ! Heng The Washington Post, Des Mones Register, Univision TV, Buzzfeed, Politico tih hote hi a campaign thuhla diklo taka chhuah ching tiin, a campaign vel lai chanchin ziako turin a khap hmiah mai a ni, pa mak dangdai tak chu a ni phawt mai.

Orlando inthahna chuan nasa takin US President inthlanna lo awm tur chu a nghawng danglam a, gun-control law chu Senate ah pawh chaih laih laih phah a ni. uS ah ni 1,260 chhungin mass shooting vawi 1.000 thlengin, mi 1,135 in nunna an chan phah a; hliam 3,944 an awm.

“MAKE AMERICA GREAT AGAIN- DONALD TRUMP”

Penglengpunga (Trump) chu New York khawpuia mihausa tawntaw- billionaire tiin, real estate mogul ni mahse, leiba a nei teuh mai. Primary election ah khan a khingpui Republican “Kei ka ni” inti pha chin 16 zet te chu a dah nil vek mai a ! A campaign ah pawh mahni sum intum chawp-self funded tiin a hmel a uang viau na in, CNN chuan leiba-sum puk US$ maktaduai 36 zet a nei tawh a, US$ maktaduai 12 erawh chu a campaign nana a thupui-slogan ” Make America Great Again” tih baseball lukhuma chhut hralna atangin a hmu thei a, mahse, Democratic party aiawh Hillary Clinton chu general election Nov 8 a khing turin sum tam zawk ala mamawh dawn a ni.

Hillary Clinton hian US$ maktaduai 180 zet campaign nan a hmu tawh a, Super Pacs atang ringawtin $ maktaduai 76 a huilut a ni. Trump hian general election hmachhawn turin a buildings thenkhat hralh a tum tih a ni. Trump hian hun rei tak atanga Democrat donor ni thin, Goldman Sachs veteran leh, Hollywood movies investor Mnuchu chu a fun-raiser turin a hmang dawn a ni. Tin, Super Pac-ah “Great America” tih hmangin Republican Strategist Ed Rollins chu a hmangchho bawk anga; Trump chuan US$ tluklehdingawn 1 zer chu Republican Party tan sum hui chhuak thei turah a in ngai.

Republican National Committee (RNC) chuan Trump hi election campaign nan sum tuak pui turin – joint fund raising inremna ala siampui lova, inremna an neih theih chuan concerts te huaihawtin, dollar maktaduai tel hmuh theih an beisei.

Mitt Romney khan 2012 kuma Barack Obama a khin khan RNC chuan US$ maktaduai 40 zet chu general election atan sum an tuak pui thei a, amah Romney khan primary election atan US$ maktaduai 87 lai a huilut thung.

Trump chuan Policy Adviser atan Sentor Sam Clovis of Iowa a hmang a, Stephan Miller pawh a Foreign Policy & National Security Advisers zingah a telh a; Dr. Ben Carson chu Model of UN Conference advisers zingah a dah bawk. Ben Carson hian political office ala luah ngai lova, primary election-a Trump hneh lotute zinga mi kha a ni.

Trump hi CNN palai Wolf Blitzer chuan, Puerto Rico State leiba harsatna chungchang engtinnge chin fel i tum tih a zawh khan, chhan ngaihna a hre vak lova; “Puerto Rico chuan dan hmang se, leiba tihniam se a ni mai” tiin a chhang liam ringawt. “Bat tam chu changkanna” tih ang deuh a ni awm e!

Hillary Clinton hi a liberal viau na in, international level-ah experience a nei tha in, a tawn hriatten a hawiher a tizangkhai fu lawi a ! Kum 2009-2013 khan US Secy of State/ (Foreign Minister ang hi), kum 2011-2009 ah New York State atangin Senator a ni a; 1993-2011 ah US First Lady niin, a pasal President Bill Clinton vangin khawvel hmel hriat hlawh tak a lo ni tawh a ni.

US Congress House Speaker hlui leh President nih tum tawh Republican New Gingrich chuan Donald Trump chu, “Miss Universe buai pui thin, The Apprentice, Trump Towers, constructions, Golf Courses leh Casinos, ties, Hotels dintu- tuktin tha taka tih tur hriaa enkawl thei chuan, President a tlinloh a rinawm lo ve” ati.

Similar Articles

Top