You are here
Home > World News > USA PRESIDENT TLAN DAN – Dr.Lip

USA PRESIDENT TLAN DAN – Dr.Lip

USA PRESIDENT TLAN DAN – Dr.Lip

ZAWHNA; USA President an thlan dan khu chiang deuhvin han sawi teh- Pu P.K.Lalhluna

us-president-thlan-dan

CHHANNA: USA hian Israel a țan tlat avangin a fakawm ka ti a, chu bakah khawvel super power zingah pawh Number  One a ni a, “ Tumah ka chunga leng an awm lo, muvanlai a leng a, ka kap thla si” ti ngam a ni tlat. Tin, khawvela remna leh muanna a awm theihna tura thawh hlawk ber a ni bawk, tih hi hniak phawi lovin kan sawi thei a, chuvangin Pathian thu tih lohah chuan ka sawi chak ber a tling a ni.

Thlawhbawk pa puan veng tawrh pawhin vawk chaw vil paha an hriatthiam theih tur khawpa mawlin sawi ka han tum ang e aw: –

Thawh khatna : Primary Election an zo chiah. Party candidate tur thlanna a ni a, Caucas an ti bawk. USA khu party lian 2 awmna a ni a, Republican party leh Democrat party an awm a, an inchak chhawk zak zak thin. India leh Mizoram angin an nawi nuai nuai ve lo a nih chu. Party khatah pawh ka ding dawn ti 2 emaw 3 emaw an awm thei. State hrang hrangah an han campaign kual a, tlin beisei chu an kal zel a, inbeisei lo chu an bang leh mai țhin. Tichuan thawsaphulkaiin, thuthunamin, chemtliak rim nam rum rumin an campaign a, a tawpah chuan Republican party candidate atan Donald Trump a tling a, Democrat candidate atan Hillary Clinton a tling ta a, anni pahnih hian chem nei lo khawpa lal President nih an inchuh dawn ta a ni. Campaign nan hian dollar maktaduai 50 vel an seng thin.

hranghrima

Thawhhnihna : Inthlan tak tak, a nawlpuia mipui vote thlak hun chu Noveber ni 8, 2016 Thawhlehni vawi 2-na a ni ang. Thawhlehni vawikhatna Novemnber ni 1 a ni a, vawihnihna kher a ni tur a ni. Mipui vote hmu tam zawk kha a tling tihna a ni mai lo tlat. Tling turin dan kikawi chekhnawk a awm a, chu chu hei hi a ni:-

          Mipui aiawh thlan tlinsa state 50-ah an awm a, chu chu Electoral College an ti. Chi 2 an awm a, India rama kan Lok Sabha ang deuh House of representative an tih member 438 an awm a, kan MP neih ang deuh hian State lian leh teah member neih zat a inang ta lo a ni.

Tin, kan Rajya Sabha member ang deuh state 50 atangin 2 zel member 100 an awm bawk a, heng hi Senator an ti. Tichuan House of Representative Member 428 leh Senator 100 te- an vaiin 538 te dinhmun hian awmzia a nei thui hle dawn a ni. Hengho hi Electoral College an ti a, an vote awmkhawm hi Electoral Vote an ti thung. Mipui vote erawh chu Popular vote an ti thung. Hei hi vawng tlat rawh u.

Tichuan candidate 2 te vote hmuh an chhut dan chu Popular vote an chhiar phawt a, an vote hmuh ve ve bakah an chakna state-a electoral vote awm zawng zawng an belh leh ve ve a, hmu tam zawk chu chak leh tling a ni ta. Senator chu kan sawi tak ang khian State 1 ah 2 zel a ni mai a. MP member erawh state lianin an nei tam a, state te-in an nei tlem ta a ni. Chuvangin state liana chak kha a hlawk ta bik a ni.

Inthlan hun hi khuai anga khel lovin Leap Year kum, November thla Thawhlehni vawi 2-na, a ni zel a, a danglam thei lo. A tling zawk chu nakkum 2017 January 20-ah lak luh a ni ang. Lak luh hma chuan President Elect a ni rih phawt ang. He hun ruak tlazep hi ka ngaihtuah laiin ka rilrua lo lut thu turu fu a awm a, ka han sawi nghe nghe teh ang.

Hmannah; US President awmnem Jimmy Carter hun tawpah Cowboy pension President awmkhauh Pesgan a tling a nih kha. Carter hun tawpah Iran in USA zirlai 120 a hreng a, an chhuah duh lo tlat. Carter kha an Nuthuri zuam deuh a ni. Reagan-a’n charge a lak hma 1981 kum tir khan, “ Iran-in kan ram zirlai 120 a hren Carter-a chhan chhuah theih lohte hi engtia tih nge it um?” tiin an zawt a. Reagan chuan, “ President charge ka la la lo va, ka sawi thei lo. charge ka lak ni la la-in ka tih dan chu khawvelin a hre mai dawn a ni.” a ti.

Pistol vilik zei tak Cowboy pension President Elect țawngkam  rum lem lo, awmze thuk tak nei si chuan Iran thinlung khauh a tinem ta a, charge a lak hma ni chiahin an zirlai hrente chu an se zawl chhuah ta tawp mai zu nia. He pa lukhum parh khum țhin hi chuan mi dek na ngam mai tak tak dawn, “ an ti niin a lang. President pahnihte hi Phawthira leh Hrangchala ral veng an ang viau ta ve ang. Dawih aw leh huai aw hi a hriat hran theih a lo ni. Chuvangin Ronald Wilson Reagan chu Term 2 (1981-1989) President-ah an thlang tling ta a ni.

Chu chauh a la ni lo, ka ti dawn. Reagan hi Russia hruaitu Gorbachev nek memtu leh communist kulhpui su chim pherh phirsitu kha a ni tlat. An RV –Camp David ah an inbe zauh zauh a, USA aia ropui tum Russia chu ram 10 velah țhendarh a lo ni ta. hei hi chunglam remruat a nih kei chuan ka ring nghet bur mai zu nia.

Awle, USA President hmasa ber chu George Washington 1789-1797 term hnih chhung a ni a, a hnuhnung ber 44-na chu Barak Hussein Obama 2008-2016 term 2 bawk a ni. Term 2 bak chelh theih a nih loh avangin kumin tum tawp lamah a aiawhtu tur an thlang dawn ta a, chu chu Prresident 45-na a ni ang. Mipa Trump nge Minu Hillary tih a ni dawn. Hillary hi a tlin vaih chuan Minu president hmasa ber a ni ang a, Chhei khawraw, tiin kan lo thlir a niang chu!

Hlawh: US Presiden thla khat hlawh hi India pawisain cheng maktaduai 50-60 thuartham a ni a, hetiang zat vel hi hamțhatna (benefits) chi hrang hrang a keng tel bawk. Inchuh tham, buaipui tham, khukpui tham a ni chiang hle.

 A hote : India-ah chuan PM hnuaiah minister 5—60 an awm țhin. USA-ah chuan President hnuaiah Secretary (Minister ang hi) 13 chiah an awm. A va thora ve kan ti em? USA hian mikhual mak tih zawng an ngaina a, numbe vanduai kan tih 13 zat kher kher engti zia nge? kan ti mai thei. A chhan chu USA khuan Independence a hmuh hlima sawrkar a din tirh khan state 13 an ni a, an flag ah pawh arsi 13 a chuang. a pung zel a, tunah state 50 an lo ni ta. A lunglen thlak hle a ni.

Tlangkawmna : A aia bul lunglen thlak lehzualin a tlang ka kawm dawn. USA hi 1776 July 4 kha an Independence Day a ni. Kum 1620 khan England atangin Puritan kohhran member 120 te chu Mayflower lawngin America-ah an pem thla a, America khawmual an han rap chu kutsuihin an ding tlar a, an țawngțai a, “ In the names of God, Amen.” tiin chu ram chu Pathian hnenah an hlan a ni. chu ram chu tunah khawvela ram hausa leh ropui ber a lo ni ta.

Thuvawn : Chungnungbera chuan mihringte lalna ram chungah thu a nei a, a duh apiang a pe țhin a ni” – Dan. 4.32

Courtesy; Makedonia Evangelical Weekly

Similar Articles

Top