You are here
Home > World News > US-A INKAHHLUMNA RAPTHLAK BER!

US-A INKAHHLUMNA RAPTHLAK BER!

America ram Florida State Orlando gay nightclub, Pulse-a inkahna-ah mi 50 kahhlum an ni a, mi 53 laiin hliam an tuar a, CNN sawi dan chuan America rama inkahhlumna rapthlak ber a ni. He thil rapthlak tak hi America ram Chawlhni zing lam dar 2 vela thleng a ni.

Orlando Police Chief John Mina chuan he tualthahna hi ruahmanna fel leh fumfe tak nei sa diama tih a nih thu a sawi a, silai metpuaktu hian mi kahhlum chiamna tur hmanrua engkim a lo inruahman lawk vek niin a lang a ni, a ti. Tualthattu, Omar Mateen hi kahhlum a ni tawh. Mateen-a pa Mir Seddique-a’n thutharlakhawmtute a hrilh dan chuan, sakhuana lam nena inhnamhnawihna a neih a rin loh thu a sawi a, Miami khuaa neih inang mi pahnih khawlaia infawp lai a hmuh chuan a thin a tirim hle a nih a rin thu a sawi a, NBC News thung chuan Mateen hian thil rapthlak tak a tih hma hian emergency services a bia a, Islamic State (IS) militant group a thlawpzia lantir nan chet lak a tum thu a hrilh niin a puang a, Islamic State (IS) news agency, Amaq chuan an pasaltha leh sipai huaisen thil tih, attack a nih thu an puang a ni. 

He tualthattu thusawi avang hian IS hi he tualthahna-ah hian an inrawlh e tihna chu a ni hran lo va, tualthattu ngaihdan tawrawt neihtirtu chu an ni thei e, tihna mai a ni.

US President Barack Obama chuan mi pawisawi reng reng lo tam tak thahna rapthlak tak hi a dem tak zet thu sawiin inhuatna avanga a hleihluak leh firfiaka chetna a ni a, tuai leh patil neih inang inkawp pawl, LGBT community tan phei chuan ni vanduaithlak tak leh ni lungchhiatthlak tak a ni, a ti.

Orlando Mayor Buddy Dyer chuan Orlando khua bik atan state of emergency a puang nghal a, Florida state governor pawh state of emergency puang nghal tura a beisei thu a sawi bawk a ni.

AMERICA RAMA KUM 25 CHHUNGA INKAHNA RAPTHLAK ZUALTE,

• 2016- Omar Mateen chuan Florida, Orlando khuaa gay club-ah mi 50 a kaphlum.
• 2007- Zirlai Seung-Hui Cho chuan Virginia Tech university-a college zirlai 32 a kahhlum hnu-ah amah a inkaphlum .
• 2012- Adam Lanza chuan naupang kum 6-7 vel a upa 20 leh puitling 6 a kahhlum hnu-ah amah a inkaphlum leh.
• 1991-George Hennard chuan Texas state Killen khuaa Café bang chu na takin a motorin a su phawt a, silai chelekin mi a pawngkah chiam a, mi 22 a kahhlum hnu-ah amah a inkaphlum ve leh.
• 2015- Syed Rizwan Farook and Tashfeen Malik te chuan San Bernardino-a an thawhpuite awmkhawm lai an kap a, mi 14-in nunna an chan.
• 2009- Maj Nidal Malik Hasan chuan Texas, Fort Hood army base-a sipaite a kap a, mi 13 an thi.
• 2009- Jiverly Wong chuan New York immigrant centre-ah mi a pawngkah chiam a, a hnu-ah amah a inkaphlum leh. Mi 13-in nunna an chan.
• 1999- Eric Harris leh Dylan Klebold te chuan Colorado, Littleton khuaa Columbine High School zirlaite leh zirtirtu an kap a, mi 13 an thi.

Similar Articles

Top