You are here
Home > Zoram > UNION RAILWAY MINISTER-IN SAIRANG-AH RAILWAY STATION LUNGPHUM A PHUM

UNION RAILWAY MINISTER-IN SAIRANG-AH RAILWAY STATION LUNGPHUM A PHUM

UNION RAILWAY MINISTER-IN SAIRANG-AH RAILWAY STATION LUNGPHUM A PHUM

Sorkar laipuia Railways Minister Pu Suresh Prabhakar Prabhu chuan vawiin khan Sairang-ah Railway Station building sak tur lungphum a rawn phum a, he hunah hian Mizoram Governor Lt Gen (Rtd) Nirbhay Sharma, PVSM, UYSM, AVSM, VSM leh Mizoram Chief Minister Pu Lal Thanhawla te chuan Khualzahawm chan an chang a. Union Minister hi Union MoS Railways Pu Rajen Gohain-in a tawiawm a; Mizoram sorkar atangin Transport Minister Pu John Rotluangliana, LAD Minister Pu PC Lalthanliana, Parliamentary Secretary Pu TT Zothansanga bakah Railways Ministry leh NE Frontier Railways officials leh Mizoram sorkar officials pawimawh engemawzat an tel.

img_8522_1478858196

Union Railways Minister Pu Suresh Prabhakar Prabhu chuan sorkar laipuiin hmarchhak bial tihchangtlunna tur leh hmarchhak state te chu ramchhung hmun dangte nena inkalpawhna tha zawk an neih hi a ngaih pawimawh hmasak berte zingah a tel a, hmarchhak state capital zawng zawngte railway hmangin thlunzawm vek tum a ni, a ti. Mizoram chu ramchhunga state ralmuang ber a nihna fakin Mizo khawtlang inrelbawl dan leh mipuite chu faina leh taihmakna kawngah ramchhung hmundangte tan entawntlak nia a hriat thu sawiin Pu Suresh Prabhu chuan railway station danga an dah loh medical facility leh thildang tam tak Sairang Railway Station-ah dah an tum thu a sawi. Mizoram chu kawng hrang hranga tehin duhthusamna tam tak nei mahse hmasawnna ruangam (infrastructure) lamah a la hniamna chu sorkar laipui pawhin a hria a, Mizoram leh a mipuite hmasawnna tura mamawh ang infrastructure chu rawn siam sak zel an nih tur thu a puang bawk. Hmarchhak biala an hmalakna tur reng rengah a chhunga cheng mipuite mamawh dik tak bakah an hnam zerang leh leilung nena inmil zela hnathawh chu sorkar laipui duhdan a ni, a ti. Hmarchhak bial hmasawnna tur nasa taka thawh a nih rual hian sorkar laipui chuan ‘Vision 2030’ a ngaihtuah mek a, hetah pawh hian hmarchhak bial chu kaltlangna hmun (transit point) ni lovin hmasawnnain a thlen tawpna (destination) hmun a nih ngei theihna turin theihtawp chhuah a ni ang, a ti. Mizoram phei chu Myanmar leh Bangldesh nena ramri intawm a nih avangin engkima intodelha siam leh tihchangtlun chu tih makmawhah sorkar laipui chuan a ngai a, ramchhunga hmun pawimawh berte zinga tel pha turin chei a ni dawn a ni, a ti.

img_8448_1478858164

Khualzahawm Mizoram Governor chuan Mizoram leh ramchhung hmundangte inpawhna tur kawng pakhat chauh a awm a, sorkar laipui hmalakna zarah Mizoram hmun laili tak Sairang-ah rel kawng a rawn thleng tur chu thil lawmawm tak a ni a ti a. India ram mai ni lo South East Asia bialchhungah Mizoram in hmun pawimawh a luah chhoh zel turah hian Mizoram atanga ramchhung hmun dang leh Myanmar lam kawngpui leh inkalpawhna dangte tihchangtlun chu a pawimawh hlea a hriat thu a sawi bawk. Bairabi atanga Sairang thleng relkawng an siamna turah mimal ram tam tak kaltlang a ngai a, hemi chungchangah ram neitute phal taka ram an sahthlak leh mipuite inpekna chuan Mizoram chu state ralmuang ber leh hmasawn tlak a nihzia a lantir a ni, a ti. Sorkar laipuiin hmarchhak bial tihhmasawn leh tihchangtlun chu ngaih pawimawh hmasakah a nei ang tih Prime Minister Pu Narendra Modi-in a tiam kha a taka a chantir zel avangin a chungah pawh lawmthu a sawi a. Sairang Railway Station awmna tur hmunah hian damdawiin changtlung tak leh Central School pawh din turin sorkar laipui chuan hma la se tih a duh thu Mizoram Governor chuan Union Minister hnenah a thlen nghal bawk a ni.

img_8529_1478858201

Khualzahawm Mizoram Chief Minister Pu Lal Thanhawla chuan vawiin hi Mizoram tan ni chhinchhiah tlak a ni tiin sorkar laipuiin hmarchhak state-te tihhmasawn nana chak taka a hmalaknaah lawmthu a sawi a. Relkawng hmanga Mizoram leh ramchhung leh pawn hmun dangte inzawmkhawm tur hian Mizo mipuite tan zin veivahna bakah nitin mamawh leh sumdawnna thil lakluh pawh nasa takin a awlsam phah dawn a, a chuan man pawh a tlawm avangin relkawng tha tak neih chu a lawmawm hle a ni, a ti. Mizoram-ah relkawng a rawn luh tlang theih nana hma lo latu Union Minister hlui Pu Ram Vilas Paswan chungah pawh lawmthu sawiin Chief Minister chuan Mizorama a rawn zin tuma a hnenah Sairang leh Mizoram chhim thleng pawha relkawng luhtlang theihna tura sorkar laipuiin hma rawn la se tia a thlen thu a sawilang bawk a. Nakumah Tuirial Hydel Project leh Sainik School hawng turin prime Minister Pu Narendra Modi chu Mizoramah lo kal turin sawm a nih tur thu a tarlang a, rampuma sum veivir thenfaina leh hlemhletna dona kawngah tun hnai a Prime Minister-in Rs.500 leh Rs.1000 tihhlum a nih thu a puang kha hmalakna fakawm tak a ni, a ti bawk.

img_8495_1478858173

Railways Minister of State Pu Rajen Gohain pawhin thu sawiin Sairang Railway Station building sak hna chu chak taka kalpui a nih mek thu leh a theih chuan a zawhfel hun tur March 2019 hma ngeia hawn theih tura peih hman tum a ni, a ti.

img_8520_1478858187

Vawiin Sairang Railway Station building sak tur lungphum inkhawmah hian MP (LS) Pu CL Ruala leh Mizoram Transport Minister Pu John Rotluangliana te pawhin thusawiin Mizoram chhungah relkawng rawn lut tur chuan boruak danglam leh Mizotena an hmelhriat loh thildang tam tak a rawn ken luh tur lakah mipuite thinlung lo inpeih tur leh lo lawm lut thiam turin an chah.

img_8576_1478858204

Bairabi-Sairang relkawng siam tura thil chhinchhiah tlak leh langsarte chu :

  1. Length – 50.38km
  2. Year of sanction – 2008-09
  3. Sanctioned cost – Rs.2384.34 cr.
  4. No. of tunnels – 23
  5. Length of tunnels – 9.175 km
  6. No. of Major Bridges – 38
  7. No. of tall bridges – 6
  8. No. of Minor Bridges – 98
  9. ROBs – 13
  10. No. of stations – 4 (Hortoki, Kawnpui, Mualkhang & Sairang)

WRITTEN BY MINA ZOLIANI, MIS, PIO TO GOVERNOR

DATED: 11TH NOVEMBER 2016, 3:26 PM | LANGUAGE: MIZO

 

Similar Articles

Top