You are here
Home > Asia News > UKIL ROPUI RAM JETHMALANI A CHAWL DAWN TA

UKIL ROPUI RAM JETHMALANI A CHAWL DAWN TA

India rama ukil ropui leh hmingthang, kum 94 tling mai tawh tur Ram Jethmalani chu Supreme Court-ah kum 74 teh meuh huaisen taka a din hnu-in a hna legal practice chawlhsan a tum thu a puang.

Ram Jethmalani hi mi huaisen tak niin tu mitmei mah veng lovin a ngaihdan hi tlang takin a sawichhuak phiar phiar thin a, India ramah thubuai lian tam takah hnehna changing mi țhenkhat chuan ramhuai ukil an ti hial thin a, sorka laipui kalphung dik lo laite a sawichhuak thin a, a thu chhakchhuah hi a chang chuan khawpui ri angin a ring a, a chang chuan țek tla angin a ring a, a chang chuan lirnghing ang maiin India ram hi a sawi nghing thin a ni.

Chutiang mi a nih avang chuan a chang chuan mi lawm a hlawhin parthi a dawng nasa a, a chang chuan lunga vawmhlum duh pawl an awm hial thin a ni.

Supreme Court Bar Association (SCBA) president RS Suri chuan, Supreme Court-a thawk ukilte chuan Ram Jethmalani chawl tawh mai tur hi kan ui hle a, ani hi dan lama kan zirtirtu mai ni lovin, sual duh lo mi, sual do tlat mi crusader ropui a ni e, a ti a. Ram Jethmalani chuan ukil hna hi chawlhsan mah ila,sual do hna hi chu ka dam chhungin ka thawk dawn a, eiruk ching politiciante bei tur hian ka inhawng reng a, țanpui ngai ukil in awm chuan min rawn pun zel rawh u, ka lo țanpui nghal var zel ang che u. Sorkar hmasa  Congress kaihhruai UPA leh tuna kan hrawn mek BJP kaihhruai NDA sorkar hi an țhalo ve ve a,  ram an tichhe nasa a, ukilte hian eiruk ching politiciante hi kan beih zel an ngai a ni,a ti.

Ram Jethmalani hi a naupan laiin lehkha a thiam thei lutuk a, a zawna pawl bawhkan zelkhawpin a thiam a, kum 17 mi a nihin LL.B degree a zir zo der a, a naupan avangin Bar-ah hna a thawk thei lo va, thuneitute dan a siamdanglamtirin ukil hna a thawk thei ta a, a thubuai hmasa berah a ruaitu hnen atangin ukil rawih man Rs.1 chiah a la a ni.

Kum 1988 khan Rajya Sabha member a ni a, kum 1996 khan Atal Bihari Vajpayee kaihhruai BJP sorkar hmasaah Union Minister of Law, Justice and Company Affairs atan lak luh a ni zawk a,  kum 1999 Union Minister for Law, Justice & Company Affairs atan lakluh leh a ni a, mahse Chief Justice of India, Mr. Adarsh Sein Anand leh Attorney General of India, Mr. Soli Sorabjee te nen  ngaihdan inan lohna avangin minister atanga bang turin an ngen a, a hnuah Home minister Lal Krishna Advani rawtna angin Cabinet minister atan lak luh leh a ni ta tho a ni.

Union Minister a nih lai pawhin a inti-vaițingtang ve lem lo va, standard-issue Ambassador car var an pe a, a chuang duh lo va, ama mimal motor, Mercedes Benz a chuang mai zawk a ni.

Ka mi ngaihsan em em Ram Jethmalani chawlh a tum thu ka hriat rual ruala ka rilrua ka thil ngiahtuah tak ber chu: Engtin nge Vai mifingho hi tar at an neih ve loh le? Engtin nge an hriselna țha reng tur hian an rilru leh an taksa an enkawl uluk bik ang le? tih zuk ni daih a!

A thil ngaituah pakhat hi mak ka ti hle bawk a, naupang sualna nei lo rethei barkberh a hmuh hian a lainat thei lutuk a, siamtu Pathian hi a sual em ni aw? a ti bawk a ni.

Similar Articles

Top