You are here
Home > CCT Robawm > TUMPANG LU INCHUH THU – Familia Fanai Lalţansanga

TUMPANG LU INCHUH THU – Familia Fanai Lalţansanga

TUMPANG LU INCHUH THU – Familia Fanai Lalţansanga

Chawngtlaia an awm tawh hnuin Bungzung ramah tumpang chal zet a lut tih hriat a ni a. Lal Nikuala’n beih phalna a pek hnu chuan Hranghleia leh pasalţha dangte chuan a hnu an chhui ta a. An rin aia a lo kal hlat hman avangin an beidawng lek lek hman hial a. Vanneihthlak takin Hranghleia chuan a hnu thar a hmu leh ta hlauh va, a chhui ta zar zar a, a thawm pawh a hre pha tan ta a. A meiin a pang a vaw ri pawp pawp pawh chu a hre pha ta hial a. A thli beng lo zawng aţangin a veh ta ţhem ţhem a.

IMG_0002e

Mahse, tumpang a hmuh theih hmain an inkarah sazuk a lo tla hlauh mai si.  A kah chuan tumpang a titlan palh ang tih a hlauh avangin chemtum nen zukpui chu a veh ta rih a. Hranghleia danglam bik em emna chu lasi a zawl em ni tih tur hialin varung ram tla lai te, a bu awp lai te a kan thauh thauh thei a, vazar rual tla duah duahte pawh an meiah a pawtin a man nalh nalh thei hi a ni a. Thawm a dim thiam bawk a, a hnaih hriau hriau va, zukpui kaihza tha a sat chat ta thut mai a! Tumpang chu a veh leh ta zawk a, a nakah tak a kap kaw huau mai a, tumpang chu a tlanchhe ta buan buan mai a, thui fe a um hnu chuan a tuk lama beih zui atan a kirsan ta a. Zukpui a kaihza tha a chhahsak kha a sat hlum a, a chhawlchhin a.

hranghleia

          A tukah chuan a hote nen sa hliam hnu chu an chhui ta char char a, Vanzau ram kal pelin Dungtlang ramah a lut a, an chhui zel a, Zawlsei ramah a lut leh a. Sailo lal ropui Vuttaia in hrang fapa Lalkhuma Sailo khuate ramchhuak chuan tumpang hliam an lo kap hlum zo hlim hlawt chu Hranghleia te chuan an va nangching ta a. Pasalţha Hranghleia chuan “Kha, keimah Hranghleia Vanhnuaithang ka ni a, ka sa hliam Bungzung ram aţangin ka rawn um zui a ni. A lu hi ka ta, a sa chu ka sem ve ang che u,” a ti a. Hranghleia chuan hla do a han chham ta vang vang a;

          “Hranghlei sing e, mi-ah Hranghlei sing e;

          Sa-ah Hranghlei sing e, Nikual khua ka si

          Do ka lak ing e” a han ti a.

tumpang leh sele ki

Sawi-lu-bunga sele kah ki, Theiriat, Lungleia an la kawl that chu.
Sawi-lu-bunga sele kah ki, Theiriat, Lungleia an la kawl that chu.

Tumpang pang tlawh chhanin;

          “Vui tum e, phai kip kartu,

          Tlang le u fungki ţial mawi,

          Lung tum e, thulh lo Valpa-

          Buan bang ka hlum awk e,”

tiin hla do a han chham nawn leh ngat a. Sa lu chu a chang ta nge nge a ni. “Buan bang ka hlum awk e” tih hi inbuana keuh thlu ta angin fungki mawi ka keuh tlu thei ta e,” a tihna a ni.

Excerpts from Vanhnuaithang Pasaltha Hranghleia by Familia Fanai Laltansanga 

Similar Articles

Top