You are here
Home > CCT Robawm > TUMPANG CHAL LEH HRANGHLEIA – Familia Fanai Lalţansanga

TUMPANG CHAL LEH HRANGHLEIA – Familia Fanai Lalţansanga

TUMPANG CHAL LEH HRANGHLEIA – Familia Fanai Lalţansanga

Lungdup ramah bawk hian ţum khat chu tumpang chal a lut a, pasalţha tam takin kah an tum ţhin a, an hlawhchham fo mai a. Hranghleia chu bei turin a inbuatsaih ve ta a.

Indian_Bison_(Gaur)_1_by_N._A._Naseer copy

 Hranghleia danglamna chu thawm a dim thiam em em hi a ni a, tumpang a veh pawh hian hnai fe thlengin a veh thei a, a lu-ah tak  kah a tum a, silai a hmet puak ta thawr  a! A lo thle hman si a. Hranghleia chuan a silai mu a thun hman tawh bik si lo va, tumpangin a rawn nangching chu a phin let tawp a, a thi der ta ringawt mai a. Tumpang ir fual duai mai leh tho vir huai huai te chu a hmu reng a, rei tawk tak thaw a ip fan fan a, a arpuimitmen  diar diar  a. Tumpang chal kawlh thinrim  chu a inhrosa dur dur a, a bul vela saitluang te chu a nawrin a phin leng ur ur mai a. Hman lai pasalţhaho ramvak reng reng chuan  kawr an ha ngai lo va, hrenpereng te reuh tê an kaih a, an serh chiah an tuam a ni deuh ber mai. Sa hliam an chhui tak tak phei chuan sa ruak ngal ngatin an um zui ţhin a ni.

HRANGHLEIA

 Sa hel ei chi ni lo ramsate hian mitthi tawh hnu reng reng an sawisa zui ngai lo va. Ama ţawngkam ngei lo ngaithla ila; “Ka kap a, min rawn phin a, thingtuai ka lo bêl a, min phinthluk lai pawh ka hre hman lo. Ka lo mu reng mai a, a lo kir phei leh a, a ki chuan mi lak a tum a, mahse a ki kha a kual lutuk a, min la thei lo va, min chawk let tawp tawp mai a. Kei lah chu ka thi der tlat mai si a, a chilthli min thlauh buah buahte chu thakpui kan ang mai hian a thak ţhuai ţhuai mai si a. Chutia rei deuh min khalh hnu chuan a beidawng ta a, min kalsan ta a ni. Ram sialin mi a phin reng rengin thing lian belh tur a ni lo va, thingtuai thinglukham tia vel hi belh tur a ni a. Kha thingtuai kha a phin thlu a, thingtuaiin min delh hnu chuan rei vak lovah a beidawng a, min kalsan mai a. Ram sialin mi a chil ngai lo,” a ti.

post tur

 Tumpangin thi tak tak emaw tia a  inthiar fihlimsan hnu chuan Hranghleia chu a tho va, a thinrim chu a tlak bap bap a, silai mu a thun leh sauh sauh va, a um zui ve leh ta ngat a. Tumpang chal chuan a rim a lo hria a, a rawn phin let leh chu a chaldarah tak a lo kap ta siah a. Tumpang chu a awp rup a, a khur ta chur chur a, a ke a leng vual vual a, zawi zawiin a zâwi ta tial tial a. Hranghleia chuan a dar tlawhchhan chungin hla do a chham ta vang vang a;

          “Tumpang sial lian a hrang an ti,

          Kei ka tawnah a hrang sual e,

          Thlunglu lei ber bur taka aw  e,

          Romani pa’n pialralah chuang nang ka ti”

IMG_0002e

Van copy - Copy

Excerpt from Vanhnuaithang pasalţha Hranghleia by Familia Fanai Lalţansanga

 

Similar Articles

Top