You are here
Home > Zoram > TUIPUI LUI DUNGA SANGHA FUAN MEK

TUIPUI LUI DUNGA SANGHA FUAN MEK

Him taka Sangha a fuan theih nan Tuipui tlawhchhan Branch YMA hrang hrangin ngafuan an veng.

Tuipui tlawh chhan khaw hrang hrang intelkhawm, Joint Committee ten an humhalh Tuipui luidunga Nghalim te chu October ni 14 zan atang khan him tak leh hlawhtling takin an fuan tan a.

Tuipui Tlawhchhan Joint Committee te’n Branch hrang hrang chanvo an inpêk angin riak lutin nghafuante hi an venghim mek a ni.

October ni 14 zan khan Biate Branch YMA Duty-na hmun Hmunte lui chhuahah Ngha-lim quintal khat chuang him takin an fuan thei a, Khawbung Branch YMA Duty-na hmun Tlaikuang lui chhuahah 15kg-20kg vel him takin an fuan bawk a ni.

YMA Duty-te hian him taka sangha an fuan theih nana an vên bâkah an fuan zawh hnuah an tuite hi uchang, rul leh rannung dangte’n an ei riral mai loh nan an tui inchâr that hnuah tui chim that theih turin tui tamna lamah an suan lut bawk a ni.

Tuipui luidunga sangha fuan hi lui hnâr lam atangin a fuan hmasa a, lui mawng lamah an fuan chhunzawm thla zel thin a. Vawiin leh nak zan lamah Arsi chhuah, Aikam chhuah velah te a fuan kal zel rin a ni a, heng fuan-chhuahte hi Leng, Sailulak, Zawlsei leh Khuangthing Branch YMA-ten an chang ve thung a ni

Source: DDK News, Aizawl

Similar Articles

Top