You are here
Home > Zoram > TRAFFIC MANAGEMENT COMMITTEE THUKHAWM

TRAFFIC MANAGEMENT COMMITTEE THUKHAWM

Vawiin chawhnu khan Traffic Management Committee chu an Chairman Home Minister Pu R. Lalzirliana kaihhruaiin Chief Secretary Conference Hall-ah Aizawl khawpui chhunga traffic felfai taka enkawl dan leh hmalakna te sawiin an thukhawm.

Vawiin thutkhawmah hian kumin kum tira Home Minister Office-a meeting neih tawh a an thurel bawhzuina te thlirlet hmasak a ni a. Vendor-te inphona tur hmun rem leh mumal zawk te, footpath, multi-story motor parking siam leh thil danga a mawhphurtu department theuhte hmalakna sawiho a ni a. Line Bus permit leh licence nei tur chuan Traffic SP atanga No Objection Certificate lak hmasak loh chuan pek an nih theih loh thu leh, Line Bus tur chu model/ size tuk bik/ specified a nih thu te tarlan a ni.

Meeting-ah hian AMC (Control of Parking and Collection of Parking Fees) Regulation 2012 chungchang leh hemi kaihnawih Dan leh Dun hrang hrang sawiho a ni a. Heng bakah hian Aizawl khawpui chhunga kawngpui (road area) humhalh tura mawhphurtu bik “Protection Squad” din rawt a ni a. Lirthei lei leh hralh (Ownership transfer) chungchangah mipui tan fimkhur a pawimawh avangin MV lamin inhrilhhriatna lamah hma lak ni se tih te, kawng sira Dan lova lirthei park thin te leh lirthei lei turten a dahna “garage” an nei ngei ngei tur tih chu khauh zawka kalpui tura hmalak te sawiho a ni bawk. Meeting-ah hian Traffic Dan bawhchhiate pawisa chawi zat Compounding Fee Rate bithliah zat chu ennawn a, dik taka lak a ni em tih te ngaihtuah ho a ni a; Lungverh atanga Ramrikawn panna kawng (via Sakawrtuichhun) kawng rintlak zawkqa siam a nih theih dan leh Traffic Control Equipment mamawh – Sound Level Meter leh Speed Radar Gun neih theih dan kawng te vawiin thutkhawmah hian ngaihtuah a ni bawk.

Home Minister chuan khawpui a lo felfai zawk theih nana member-te thahnemngaihna chu lawmawm a tih thu sawiin, Dan siamtu leh kengkawhtute mai bakah mipui zawng zawng hi mawhphurtu kan nih thu a sawi a. Committee-ah hian member-te an tel tha hle a ni.

Similar Articles

Top