You are here
Home > CCT Robawm > THANGCHHUAH CHU ENG TIHNA NGE? – Familia Fanai Lalţansanga

THANGCHHUAH CHU ENG TIHNA NGE? – Familia Fanai Lalţansanga

Vanhnuaithang Pasalţha Hranghleia – Episode 24

          Tunlai ţhangtharte hi chuan hmanlai kan pi leh pute ngaihlut em em thangchhuah awmzia leh a hlutna pawh kan ngaihruat thiam ta lo hlawm vek a. Remchanna leiin  pi pute nuna Thangchhuah pawimawhna  ka han sawi lawk ang e. Thangchhuah an duh chhante :

  1. Thih hnuah chatuan Pialrala faihawt/faisaa chawm an nih theih nan;
  2. An dam chhunga mi ropui leh zahawm, lal duhsak, khawtlang nu leh pa an nih theih nan.
  3. Mitthi khaw kalkawngah Pawla’n a lo sai ngam loh nan.

RAM LAMA THANGCHHUAH DAN

          Ram lama thangchhuah turin sai, tumpang, savawm, zukchal, sanghal, vahluk te hi kah a ngai a, savawm hi chu aih loh chuan mitthi khaw kal kawngah a hruai mai theih loh va, chuvangin aih nem a ngai a ni. Savawm aih hnu chuan a nun a nem ve ta a, mitthi khaw kawngah a hruai ngil theih ve ta a ni. Tin, vahluk hi aih a ngai bawk. Chutiang sa kaptu pa chu a thih hunah, a sa hrang kahte khan hma an hruai a, ani chu a hnung berah sai chungah a chuang a, Pawla-te nupa chuan ropui an tiin an lo zah em em a, sai tak aruangin a en pawh an en ngam lova, in chhungah an tawmbo ţhin a ni. Tichuan thangchhuahte nupa chu pialrala faisaa chawm turin ropui takin an lut nghal ţhin a ni.

          Tin, muvanlai leh rulngan aih tel lek phei chuan a ropui zual a, zukchal kha mitthi khaw kal kawngah chuan hmahruaitu a ni, a ki hreuvah rulngan a inzem kual vel a, muvanlai khan “Kawk kawk kaw lek, kaw lek,” tiin a chhaih vel vat vat reng a, thangchhuahpa kha a hnung berah sai chungah a chuang a.Vahlukin thlawk chungin a lu chungah daihlim a zar a, Pawla kawt an thlen veleh Pawla hmuh theih loh turin, a hmai hliahin a thlawk leh ta thung a. Pawla te nupa chuan ropui an ti mai pawh ni lovin, a hlauhvin an hlau ta zawk a, in chhungah an tlan lut a, bang awng atangin an bih dek dek ngam chauh a ni.

          Mi dang, thangchhuah lova thite chu Pawlan a lo sai ngei ngei a, a saina sairawkherh chu phulraw phel phawk a ni a, a saihlum chu artui tiat a ni a, kum thum a ngawt lo thei lo lehnghal a ni. Chuvangin mitthite chuan Pawla kawt thlen an huphurh a, an thep khawtlai ţhin a, chutia thep khawtlaiho chu Sânu chuan an banah a han kai dawr dawr a, Pawla chuan a lo sai ta ţhin a ni.  Sai tur an lo kal khât deuh chuan Sanu chu a thawk chhuak a, nau chaw hrai chungin a han tlan a, rang takin mi nunna a han la a; Pawla hnenah a tlanpui dawr dawr ţhin a, ani’n a lo sai ţhin a ni. Pawla sai tur ngaihtuah hian Sanui chu a inhmang ral a, a puan tah lai pawh a vawng hman tawh lo va, a taksa chu tun thlengin zung khat bawk lek a ni reng mai an ti ţhin. Chuvangin tuihri leh kawng danga thih thut hi Sanu lak an ti ţhin reng a ni.

          “Sânu’n banah kaih lo rel lo la,

          Enchimlohpui Tuaia thlafam;

          Ţumkawng a lai lo kian rawh,” an ti  a ni.

          Tin, thangchhuah nana sahrâng an aih nan hian sial emaw, vawk emaw an hmang ber. Sa aitu kawtah khan thingse ţang, naupang lawn theihna khawpa lian, a hnah nen khur zau puiah an phun bawr luih a, vawm hruiin an phuar vel a. Thingse par lai an duh bik. Aitupa inah chuan zu an in a, hla an sa a, hla dote an chham a, silai an kap chamchi bawk.

          Kan pi pute’n an aih theih zawng zawng chu: ral, sakei, savawm, sakhi, vahluk, muvanlai, rulngan, buh za te hi a ni.

Similar Articles

Top