You are here
Home > Zoram > ‘TAWLHLOH PUAN LO CHHUAH DAN’ TIH KHA – B. Lalthangliana

‘TAWLHLOH PUAN LO CHHUAH DAN’ TIH KHA – B. Lalthangliana

‘TAWLHLOH PUAN LO CHHUAH DAN’ TIH KHA – B. Lalthangliana

He thupui hmanga Vanglaini, ni 15 November 2016-a mi kha ngun takin ka lo chhiar ve a. A ziaktu hi pa bengvar tak a ni a, a thu lakna Pu Lalrokhama lah hi pa zahawm leh thil hria a ni bawk. Engpawh ni se, ziaktu hmasate ziak dan leh kan lo chhui ve dan tawi deuha tarlan kan tum a ni.

11039998_738064339646654_330478070_n

A hmasa berin, a hun hriat nan ‘Silai’ chungchang hi sawi ila. “… Silai chu a kap ta ṭhuai ṭhuai mai a,’ tih leh, ‘Hei kan silai hian min tikhawmuang mai mai a ni,” tih sawi tel a ni a. Europe-ah silai hi kum zabi 15-na (AD)-ah an hmu chhuak a. Kawlho hian eng tikah nge an neih ṭan kan hre thei lo na a, Kawl lal Bayin Naung (1551 – 1581) chuan a body guard Portuguese silai keng 400 a hmang tih kan hmu.

Pu B.Lalthangliana The Historian
Pu B.Lalthangliana The Historian

Chin state hmar lama Halkha leh Khawlhring indonaah leh Sunthla leh Halkha indonaah te silai an hman thu upaten an sawi a, hei hi kum 1740 – 1750 vel a ni mai thei; Mizo hnahthlak zinga silai hman thu sawina hmasa ber niin a lang. Lallula’n Zopuia Thlanrawnho a rawt chiam a, an sal man Cherkanga chu silai fung thumin an tlan tih hla hluiah kan hmu a, chu chu kum 1760 vel a nih hmel a, hei hi Mizorama silai a luh kan hriat theih hmasa ber a ni mai awm e.

N.E. Parry chuan, “Kum 1777 hma lamah Mizoten silai an la nei lo,” tiin a ziak a. Rev. Liangkhaia chuan Mânga (Mangpawrha) hian Reieka a awm laiin silai a nei tawh a, ‘Zadeng ka thawm e’ tiin a kap vak vak ṭhin a… a nei hmasa pawl a la ni a,” tiin a ziak. Mânga hi kum 1812-ah a thi a, Silai a neih hi kum 1800 velah dah ila, a dik tawk vel mai thei.

Chuti a nih chuan Pu Lalrokhama thukhawchang hi kum 1800 hnu lama thleng a niin a dah theih a, Tawlhlohpuan lo chhuah dan a sawi pawh hi kum 1800 hnu lam deuh niin a lang.

Rev. Liangkhaia (1885 – 1979) chuan, “Len tlâng an lo chuan chhuah chuan ‘Dawlrem kawr’… an siam thiam ta a… chu chu rei tak an ching…” tiin a ziak a. Lehkhathiam hmasa Pu Thanga (1883 – 1957) chuan, “… Chutih laia an puan chin chu Puanrin leh Tawlhloh puan niin a lang… mipa chuan râl an tuk hian Tawlhlohpuan an kawrtawng hak a, chu chu tawlh loh tur tih entirna a ni…” tiin a ziak ve bawk. Hei hi Len tlâng thlang lama an chen lai bawk a ni.

Pi pute Thân tlang leh Run lui kam vela an khawsak lai hian an chhehvel (environment) te, boruak leh ruah tui tlaten a zir loh em avangin buh a vui thei lo a, la (cotton) a pâr thei bawk lo a. Chuvangin, hmeichhiain siapsuap an feng a, mipain hnawkhâl an inbel a, an culture a hnungtawlh duai a, heng hun lai hi kum 1250 – 1400 AD vel a ni mai thei. Thlang an tla zel a, Lên tlâng leh Ṭiau inkara an chen lai pawh a ṭha deuh a. Tichuan, buh a vui thei a, la a pâr thei a, an culture pawhin hma a sawn ta hle. A hma lama kan sawi ang khan silhfen te pawh an lo puahchah thei leh ta a; heng hun lai kum 1450 – 1700 AD vel niin a lang.

Hetianga Mizo history uluk leh ngun deuh taka kan zir a, kan chhut leh, ziaktu hmasate sawi aṭang te hian, Tawlhlohpuan hi pi puten Ṭiau an kan hmâ, kum 1700 AD hma lamah khan an nei tawh a, an tah thiam tawh a, an lo hmang ngei tih kan ring nghet a ni.

Courtesy: http://www.vanglaini.org/articles/read/6687

Tawlhlohpuan lo chhuah dan – Lalnunawma Fanai

Lalnunṭawma Fanai
Lalnunṭawma Fanai

Vanglaini chanchinbu, Novem­ber ni 12, 2016 (Inrin­ni) chhuakah khan Vaphai lal Pu Lalrokhama Hualngo k-91 mi, kum 2014 a boral ta hriatrengna lungphun tum a nih chu ka lo hmu a, a lungphun tur anih thu ka hmuh rual hian, kum 2011 October ni 23 a Aizawla a lo zin a, Bethlehem Vengthlanga a thlen ina kan ṭhiante nena kan zu hmuh ṭuma kan kawmnaa a thu min hrilh, ‘Tawlhhlohpuan lo chhuah dan” tih hi ziaka ka dah ṭhat hi ka hre chhuak thut a. A lungphun tur pual hian han pho chhuak ve ila ṭhain ka hria a. Pu Rokhama hriat dan leh mi dangten kan hriat dan a inang em tihte pawh hriat nan a ṭha awm e.

Amaherawhchu, a kum chungchangah hian kum 2011 a kan kawm ṭum hian kum 84 a inti a, ka chhinchhiah dan ang hi chuan kumin 2016-ah hian kum 89 ni turah ka ngai a. Vanglaini-a lungphun tur chungchanga sawmnaah hian kum 91 tih a ni si a. Amah ngei kan kawmna leh kan ziah nghal, kan dahṭhat a ni si a, min ti buai deuh hlek a, kan hre sual palh anih chuan a chhung ten min hrethiam se ka duh a, ka han tarlang tel hmasa ve hrim hrim anih hi.  Hemi ṭuma ka kalpuite hi Lalthlamuana Ralte PUC zirtirtu, Lalhruaitluanga Chawngte leh Vanlalremruata Tonson te an ni.

Hemi ṭuma Vaphai lal Pu Lalrokhama’n Tawlhhlohpuan lo chhuah dan thawnthu ngaihnawm tak min hrilh dan chu hetiang hi a ni.

Lalnunṭawma Fanai. The TV Presenter
Lalnunṭawma Fanai. The TV Presenter

“Hualngo pasalṭha Darh­nawka, ral pawh a that ṭeuh tawh, Sakei pawh a kah hnem avangin a khum pawh Sakei phawa hual chhuak vek khawpa pasalṭha hi a awm a. Ral beia rammu ṭhin a nih avangin

ṭum khat chu a nupui hnenah, “Khai le, ral bei reng ka ni a, thih hun ka la nei dawn a. Ka ruang tuamna turin puan sei tawk, fem nei min tah sak rawh, fem sei tawk tak i neih tir dawn nia,” a ti a. A dam lai ngei emaw,  a thih hnu pawha a ruang tuamna thama lianin a tah tir ta a. A puan chu a var a ni a, ṭing hmangin a dumin a tial tir a. A nupui hnenah chuan,”He puan hi ka bat anih chuan ral hmaah leh sa hrâng hmaah ka tlân dawn lova, he puan hi ka ruang tuamna tur a ni,” tiin a nupui chu a hrilh a.

Puan an tah zawh hnu hian Dartetui leh Uihri khua, Sailo leh Fanai Lalte chuan an khua chu an rawn run ṭan ta mai a. Khuaa ral an lo lut tih an hriat chuan an Lal ina Darhnawka lêng lai chu an va hrilh a, a lo haw a, Tawlhlohpuan a va la a, an lal luhka aṭang chuan, “Kei Darhnawk Sakeia, hetah ka awm e. A ngam chuan min rawn bei rawh u, a thi ngam ngam lokal ru,” tiin a silai chu a kap ta thuai ṭhuai mai a. Ralho chuan, “E khai, Darhnawka a awm tlat mai, beih ngam chi an ni dawn love, i hawsan mai ang u,” an ti a, an ṭinsan leh ta a.

Darhnawka chuan, “Chuti taka min rawn chote chu kan um let tur a ni’ a tih tlat avangin pasalṭha ṭhenkhat nen an um let ta a. Farkawn ram, Lurh lamah an umzui a, râlho chuan ṭiau an lo kan hman a. Ṭiau ral an thleng tih an hriat hnu chuan an lo chau deuh nen lungpui chungah an chawl a, a vaimim ken chu a ei ta a. A ṭhiante chuan an mi um ten an rawn kah an hlauhpui avangin lungpui chunga ṭhu lo turin an ti a. Ani chuan a lo hlau awzawng lo mai a, “A hlau chu phaiphuk karah khan awm rawh u,’ a ti mai a. Rin ang ngeiin Ṭiau ral aṭang chuan Lungpui chunga a ṭhu chu an rawn hmu ta a, a chet vel zawng chuan a ban hnuaia a puan fem uai chu a che suau suau a, ralho chuan, ‘Sawpa saw mihring a ni lo ve, hmul a nei a ni,’ an ti a, an tlanchhe leh ta a. An tlanchhe thawm chu hriain an umzui ta a. A

ṭhiante chuan hlau hle mah se, a duh chu haw mai turin a ti a. Anmahni runtute tlanchhia chuan, “Hei kan silai hian min ti khawmuang mai mai a ni” tiin khâmah an paih ta a, chu kham chu, ‘Fanai silai khawh thlakna’ tih hming a chawi phah ta a ni.

Dârhnawka chuan a umzui zel a, an zinga chau deuh, hnuhnung fal chu a man ta a. Sa leh râl a thah hnem tawh avangin seh hlum ngei a duh a. Sakeiin ran a seh ang maiin a hrawkah chuan a seh ta ngat ngat mai a, rei tak a seh hnu chuan ral pakhat chu a seh hlum ta a ni. Heti taka a huaisen zual chhan hi Tawlhlohpuan a bah vang a ni a, hei hi he Tawlhlohpuan lo chhuah dan a ni,’ tiin min hrilh a ni.

Courtesy; http://www.vanglaini.org/articles/read/6650

Similar Articles

Top