You are here
Home > CCT Robawm > SULZAM BU THLIRNA- ZUIA

SULZAM BU THLIRNA- ZUIA

 Dr.Laltluangliana Khiangte Lehkhabu Thar; ‘SULZAM’ Bu Thlirna

(Critical Appreciation)

Mizo Țawng Thumal Thar leh Lehkhabu Thar

He lehkhabu thar, Sulzam bu, phek 330 zeta chhah, International Standard Book Number (ISBN) nei, kawm mawi taka duan, hawrawp hraw țha taka chhut, chhiar hahdam tak tura duan leh buatsaih, chhiar ninawm lo tawk tura tawi te tea ziah, Prof. Laltluangliana Khiangte lehkhabu thar hi lehkhabu thar satliah mai a ni lo va; a bu hming (title) ‘SULZAM’ tih hi Mizo țawnga la awm ngai lo, a ziaktu țhahnemngaihna luangliam ațanga Mizo țawnga thumal thar chher chhuah (coined-word) a nihna hian he lehkhabu chhung thu hlutna hi a belhchhah em lo anih pawhin Mizo țawng chungchangah erawh kawng khat tal chuan a tihausa tih loh rual a ni lo.

A chhan chu ‘Zunzăm’ tih te, ‘Sūrzăm’ tih te, ‘Sūlhnu’ tih te,  ‘Sūl-zui’, ‘Sūl-su’, ‘Sūl-nghak’, ‘Sūl-kir’, ‘Sul-tum’, ‘Sūl-tung’, ‘Lo sūl’, ‘kawngka sūl’ tihte  kan nei tawh a. Hla thu leh țawng pangngaiah pawh kan lo hmang fo tawh țhin a ni. ‘Sul’ tih hrim hrim hi ‘Hnim chi khat, sei tak, han pala kalma lam hawia thle nghiai thei’ niin Darchhawna chuan a sawi. He lehkhabu hminga ‘Sūlz^m’ tih hian mitinin kan tawn leh daihriat țheuh, ‘Sūlhnu ngaihnawm leh lungtileng tak tak te, ‘sūlhnu zăm vel, thinlunga sūl cham bang, zăm vel chi chiaiho’ khaikhawm nan remchang takin a rawn hmang hi Mizo țawng tihhausakna chu a ni. |hangthar leh ziakmiten he ‘Sūlzăm’ tih  țawngkam thar hi duh tak leh mawi ti takin kan la hmanpui dawn chauh niin a lang.

Chuvangin, lehkhabu thar țha tak kan neih piah lamah thumal thar, țawngkam thar kan neih belh hi Mizo Language leh Mizo Literature tan chuan malsawmna thuahhnih tih loh phal rual a ni lo. A ziaktu Prof.Laltluangliana Khiangte țhahnemngaihna leh Mizo țawng tihhmasawn nana ngaihtuahna a sen nasatzia  pawh he lehkhabu thar hming ațang mai pawh hian chiang takin kan hmu thei nghal a ni.

Lehkhabu Thar ‘Sūlzăm’ chu:

Sulzam bu-ah hian thu hlawm chi hrang hrang 60 (Biography, Travelogue, Articles & Essays) a chuang a, a bu hi hlawm lia țhen a ni. A Țhen hmasa ber chu ‘Father of Modern Missions’ an lo tih huai huai, Rev. Dr. William Carey-a chanchin leh a kaihhnawih thil chi hrang hrang bung 7 lai awh a ni a.

Țhen hnihna chu Pathian thu zirna khawvela hming lar tak leh pawimawh tak Serampore College kan tih huai huai thin leh a chhehvel chanchin hlang, bung 12 zet awh  a ni. Ralkhat ațanga kan lo hriat dan mai aia chiangin, chipchiar lutuk si lovin a ngaihnawm leh bengvarthlak tawk chiaha chhiar ninawm hman miah lo va ziah a ni.

Țhen thumna chu a ziaktu daihriat leh thil tawn pawimawh thlan chhuah hote a ni deuh ber a. Bung 21 lai awmin Serampore College Principal hna kum 3 leh a chanve zet a thawh chhunga thil thleng pawimawh zual  lawrkhawm, ngaihnawm tak tak leh  bengverh tak tak ziahna a niin a țhen phei chu a challenging  em em a ni.

Țhen lina ‘Ramfan Thukhawchang’ chhungah hian bung 20 lai awmin China rama Kristiante chanchin ngaihnawm tak, vantlangin kan hriat lar lem loh thu ngaihnawm leh bengverh tak tak bakah bengvarthlak tak tak mai niin China ram ațanga India chhim tawp thlenga ram fan thu kal zel, lawr zeuh zeuh hote a ni. Hemi țhen bik hi he lehkhabu buk tirittu leh chhiar timanhlatu ber a tih theih hial ang, a dangte chhiar hmaih chuang si lovin.

Heng bakah hian a |hen tawp berah thubelh angin ‘Bengvarna Huang’ dahin  bengvarna tur thu pawimawh tak tak, Serampore College Master leh  Principal-ho hming leh thawh chhung te, Serampore College hnuaia  Pathian thu  lama ‘Doctor’ (D.D leh D.Th)-ho hming leh mi pawimawh tak tak hming list belh a ni bawk. Hnamdang hming tam tak kara Mizo pa hming lo lang ve leh zauh zauh țhin hi he Thubelh huang pawimawhna leh hlutna tak pawh a ni a; ‘Bengvarna Huang’ anih ang ngeiin beng a tivar ngei chhap e.

Mitin Mil ‘Sūlzăm’ Lehkhabu:

He lehkhabu ‘Sūlzăm’ hi ‘mitin mil’ lehkhabu, mi nawlpui leh mi vantlang a\anga Kohhran rawngbawltu leh zirlaite tan chhiar manhla tak a ni a. Lehkhabu chhiar chak lo deuh tan pawh Bung khat hi phek khat lek te, phek hnih thum lek lekte anih hlawm avangin chhiar a ninawm hman lo va, mit lama harsatna nei tan lah a ziak a hraw țhain a fiahfai țha a, chhiar nuam tawk tak a ni bawk si. Nuam ti tak leh tui ti taka kan chhiar theih nan thu hlimawm leh  zangkhai (humour) a ziaktu hian a bilh tel leh zauh zauh avangte hian ‘Mitin Mil’ lehkhabu han tih loh rual a ni lo.

A lehkhabu pum kan thlir chuan Thomas De Quiency țawngkam hawhin he ‘Sūlzăm’ bu hi ‘Literature of Knowledge’ leh ‘Literature of Power’ nei kawp lehkhabu a ni mai lawm ni, tih theih a ni. A chhan chu a thufun tam ber hi ‘hriatna’ min petu leh hlan chhawngtu a ni a; chutih laiin a ‘mode of expression’  a țhain ‘presentation’ a neih țhat em avangin chhiartute min ‘move’ lo thei lo a ni. Tlangzarh nia a lehkhabu thlirlawk (preview)-tu Upa R. Lalmalsawma khan ‘nung’ takin a  ziak a ti a; kei chuan țawngkam dangin sawi ta ila, ‘rau’ takin a ziak niin ka hria.Chulai tak chu a ni he lehkhabu kan chhiara min ‘move’-tu ka tih chu ni!

A ziaktu hi lehkhabu tam tak lo ziak tawh a ni a, a kut chhuakho lehkhabu hming ringawt pawh phek hnih daih nei tawh a ni a. Chutih laiin a kut chhuak tam ber chu a nawlpuiin kan tuipui loh lam, literature lama tui leh literature zirlaite tan rawn leh chhiar tur lam anih vangin mi nawlpui tuipui theih tur, ‘Mitin Mil’ lehkhabu hetianga a sual chhuak hi a lawmawmin a kut chhuak zingah pawh chhiar nuam leh chhiar manhla pawl tak a ni.

‘Sūlzăm’ Lehkhabua Thu-Zăm:

He lehkhabu chhunga thu awm hmun thuma thena hmun hnih hi Rev.Dr. William Carey-a sūlzăm a ni a; hmun khat dang chu a ziaktu Prof.Laltluangliana Khiangte sūlzăm a ni thung. Chutih laiin  he lehkhabu pumpuia ‘a ropui ber’  erawh PATHIAN a ni. Chuvangin, he lehkhabu thu saruh khel lian ber leh phek tin tihtheiha a hlimthla hmuh theih chu ‘rawngbawlna’ chungchang a ni. Chutih laiin a ziak chhuah danah Inrinni zana Sarmon ngaihnawm lo zet ngaihthlak ang ni lovin ‘nung’ tak leh ‘rau’ taka ziak a nihna hian ngaihnawm tak leh tui titakin min chhiartir thei si a ni.

Pathian tana hun puma rawngbawltu, India ram tana ‘thilthlawnpek’ hlu tak leh Bengal-ho tana ‘Pathian bel ruat’ William Carey-a ‘Sūlzăm’- a sulhnu leh hmun hlui, a thiltih leh hnathawh, a rawngbawlna chanchin zawng zawngte hi lehkhabu tam tak daih a nih avangin he lehkhabuah hian chung a chanchin leh rawngbawlna chipchiar chu ziah len leh ziah zawh sen rual a ni lo tih a chiang a. Nimahsela, kan hriat awm tawk leh kan hriat tur chin erawh a funkim țha hle thung a; nula inchei thiam tak ang maia tawi-kim takin a pawimawh lai fun kim sia a rawn ziak chhuak thei hi he lehkhabu chhiar timanhlatu a ni.

Bung hmasa lamah Carey-a hun hmasa lam leh rawngbawl tura a inpuahchah chhoh dan ngaihnawm takin min hrilh a. William Carey-a hi ‘Miten tu nge a ni an tih?’ tih  han chhiar mai pawh hian a ropuizia leh ‘mi bik’ a lo nihzia  chu tlang hriat  anih thu a chiang nghal a. Chutah, rawngbawl tura a inbuatsaih chhoh dan te, harsatna hrang hrangin a tlakbuak nasatzia te, chhung lam leh pawn indona leh harsatnaten kiansan lo mah se, chung zawng zawng hneha a rawngbawl dan chanchin han hriat lek phei chuan ngaihs^n loh rual a ni lo. Chumai ni lovin, Carey-a nun ropui leh ngaihsanawm tak te, a inngaihtlawmna nun ze ropui tak maite hi  ‘Missionary challenge’ ropui tak leh  sarmon ropui tak  a ni nghal bawk.

Carey-a chanchin nena inhne reng, a chanchin nena lakhran theih hauh loh, a rawngbawlna rahchhuah vawiin thlenga mi tam takin a zar kan la zo theih reng,  Serampore College chungchang hlei hlei hi a bengvarthlak a. Ralkhat ațanga kan lo ral hriat mai mai țhin he Serampore College țobul leh University dangte aia a danglamna te, a kalphung leh inrelbawl dan te, Secular leh Theology lam zirna inphiarzawm dan te,  a peng leh zar hrang hrang SATHRI, SCEPTRE, BTESSC lamte mi nawlpui leh vantlangin kan hriat awm chinte tawi fel takin min hrilh a. Chuvangin, hemi |hen bik hi chu zirlaite leh Pathian thu zir duh țhalaite tan a bengvarthlakin Kohhran mi nawlpui tan pawh kan berampute leh kan Kohhran hruaitute inzir chhuahna hmunpui ber pakhat chanchin hriat chian kawng tam takah a țangkaiin a  hlu hle bawk.

Bung 20 ațang hian William Carey-a ‘Sūlzăm’ chhuia Mizoram boruak nuam tak ațanga Khulkhutkhaw lum tak pantu, a ziaktu Prof.Laltluangliana Khiangte-in Carey-a rawngbawlna chhunzawma Serampore College Principal țhutthleng a luah chhunga a thil tawn leh daihriat ngaihnawm tak tak min hlui bawk a. He Tent-making Missionary hna a thawh dawn a\ang Carey-a ang maia harsatna (chhungkaw lamah a hringtu pa ngeiin a boralsan thu) hrang hrangin a tlakbuak thu kan hmu a. Rawngbawlna zau zawk nei tura a ‘puan in hmun’ a zauh țanna ațanga hetiang harsatna lo thleng a pal chhuah dan hi a ziah lan bakah thuk tak, ziah lan vek remchang lo, thil chi hrang hrang a awm ngei ang tih erawh a chiang.

Engpawhnise, heng a taka a tawn leh daihriat amah ngeiin a rawn ziah chhuah thil hrang hrang ațang hian a ziaktu hi eng ang mi nge a nih tih pawh chiang takin kan hre thei a. Ram hrang hrang aiawh Palai rual hmaa Mizo pa tak maia ‘Hlado’ chham vang vang ngam; a tlachawp hmang țangkaia remchanna lei thiam tak a ni tih pawh chiang takin kan  hmu thei. Joshua anga ‘kei leh ka chhungte chuan Lalpa rawng a ni kan bawl dawn’ ti ngam an nihnate hi a chhuanawm hle a. A mimal tuina leh thiamna bik ‘Lemchan Khawvel Lamah’ tih bung phei hi chu Lemchanț (Drama) lama tuite tan Indian Drama hmasawn dan sawihmawrhmuhna (introduction) ha tak a tling hial awm e. Chuvangin, sei deuh hlek mah se he bung bik hi chhiar manhla tak a ni ve tlat.

He lehkhabua thu-zam zingah China ram fan thukhawchang hi Mizote tan chuan chhiar makmawk a tling a. A chhan chu ralkhat ațanga kan lo hriat leh China ram, Communist ram, Kristian tihduhdahna leh Kristiante nekchepna ram anga kan lo hriat țhin leh an zinga thawk Mizo Missionary-te awka ațang pawha nekchepna leh harsatna hlir mai kan hriat țhin kha ni mah se, thil awmdan a lo inthlak ta nge, Sorkar lam an lo inhawng ta deuh tih hriat lohvin kan hriat dan letling thawk maiin, a ziaktu ngeiin mita a hmuh leh benga a hriatte a rawn tarlang a. Chuvangin, a sir lehlam chauh ațanga kan lo ralhriat țhin kha he lehkhabu hian a lanna tlang dang ațang China ram Kristianna dinhmun min thlirpui a,       a ngaihnawm mai ni lovin kan chhiar laiin mak tih vangin kan ka hau mai a ni.

Sakhuana leh rawngbawlna chungchang  mai bakah China rama hmeichhe dinhmun pawh chiang takin min hrilh a. A hranpaa hmeichhe dinhmun chawikan ngai lo va changkang sa, \ha sa an han ni ringawt hi Chinese hmeichhiate thawhrah a ni ngei ang. Communist Sorkar mah ni se Sorkar inrelnawlna țhatzia leh an hnathawh ropuizia pawh chiang takin kan hre thei a. Ringtu Kristian ram, kan ram hruaitute pawh Kristian mai ni lo va  rawngbawltu rual awmna Mizoram nena khaikhin phei chuan hmasawnna leh zir tur kan ngahzia chiang takin a rawn pholang a. ‘Engtin nge hetiang hi a nih theih? Engtin nge an tihtheih?’ tia mahni inzawt mawlh mawlh chunga chhiar loh theih a ni lo. Chuvangin, he China Ram Fan Thukhawchang avang ngawt pawh hian he lehkhabu hi leia chhiar ngei chi niin ka hria.

Țhahnemngaihna & Duhsakna Awka:

He lehkhabu thar, ‘Sulzam’ tih bu hi phek 330 a chhah, Rs. 300/- man  a ni a. A phek zat ngaihtuah chuan to uchuak a ni hauh lo. Mahse, Kaphleia sawi anga ‘Fate lehkha zir nana pawisa a awm lo ti a,  tlang hrai nana vawk neih chhun talh leh si’ țhin  Mizote zingah lehkhabu hlutna hria, lehkhabu chhiar ngaina, neih chhun chu sawi loh neih chuangliam pawha lehkhabu thar leh lehkhabu țha lei nachang hria kan la tlem em avang hian ‘phung zinga piring vawrh’ an sawi ang chuan hralh a kal duak duak dawn lo tih erawh a chiang a.

Nimahsela, he lehkhabu ‘ro tling tak’ mai chhungah hian a Bulpui ber chu PATHIAN a ni a; a Kungpui chu William Carey niin a Kakpui tam tak zinga pakhat chu a ziaktu Laltluangliana Khiangte hi niin, he lehkhabu pumpui thuchah laimu hi tawngkam khat leka sawi  chuan ‘RAWNGBAWLNA’ tih hi a ni ngei ang.

Chuvangin, he ‘Sulzăm’ lehkhabu hi ‘mitin mil’ lehkhabu, rawngbawltute tana thusawi țanfunga hman rem tak tak, Pathian thu zir tumte tan kaihhruaina leh kawng inkawhhmuhna bu tling, mi nawlpui tana hriatna leh bengvarna tur tam tak chuanna lehkhabu anih avangin, ‘Sūlzăm’ hi kan hriatna tipung tur leh kan thlarau nun chawmtu atan lehkhabu țha tak a tlin avangin, lei a, chhiar a, kawl țhat reng tlak lehkhabu hlu tak a nih avang hian, a famkim lohna leh a țhat tawk lohna lamte dahțhain leh a kimchang tawk lohnate pawh en khumin ‘vawk hmaa tuikeplung’ let reng hi chhar nachang hre turin mi nawlpuite kan  infuih ta hlauh zawk a nih hi.

 

 

Similar Articles

Top