You are here
Home > CCT Robawm > SATICHAURA GHAT INTHAHNA RAPTHLAK!

SATICHAURA GHAT INTHAHNA RAPTHLAK!

SATICHAURA GHAT INTHAHNA RAPTHLAK!

(Kan thu kal lai kha MUGHAL LAL HNUHNUNG BER LEH THANGLIANA tih a ni a, The 1857 Sepoy Mutiny’ leh  Mughal lal  hnuhnung ber Bahadur Shah Zafar II, British-in an man hnua Rangoon-a an tantir a, kum 1862-a thi ta chanchin ziah kan tumna lamah Thangliana leh The 1857 Sepoy Mutiny laia Cawnpore inthahna rapthlak tak kan sawi mek kha a ni a)

INTHAHNA

Sap kan tihte hi eng emaw ti zawng chuan an nun a lo rawng khawp mai a, Burma ram lal hnuhnung ber Thibaw Min kha India ram Ratnagiri ah khawhar takin a thih thlengin an hreng a. A fanu lah chuan Vaichhia kan tih ang hi pasalah a nei a, Burma ram lal chhungkua an mang hlauh chu a ni ta ber mai a.

  1. Lalsukthla, Syhlet Jailah a thih thleng tantir a ni.
  2. Lalkhama Sentlang lal Manga thlah, Tezpur Jail atangin Hazaribagh Jailah a thih tlengin tantir a ni. Lianphunga Lungtian lal, Tezpur Jail atangin Hazaribagh Jailah thih thlengin tantir a ni.  
  3. Nikuala Zahau, Calcutta Jail-ah thih thlengin tantir a ni.
  4. Ropuiliani Sailo, Ralvawng lal Chittagong Jail-ah thih thlengin tantir a ni.
  5. Dokulha Chinzah lal, Anaman Jail-ah thih tlengin tantir a ni.
  6. Hnawncheuva Vanphawng, Ralvawng pasalţha, Andaman Jail-ah thih thlengin tantir a ni.
  7. Zakapa Fanai (pakhup) Khawhri lal, Andaman Jail-ah thih thlengin tantir a ni.
  8. Thanghulha nisapui lal Manga thlah, Tezpur Jail-a tangin Hazaribagh Jail-ah 1895 ah chhuah tir a ni.
  9. Lalţhuama, Denglung lal, a nu Ropuiliani nena Chittagong Jail-a tang dun an ni a, a nu a thih tak avangin a nu ruang an zui hawtir a. A tanna aţangin chhuahtir nghal a ni.
  10. Aikunga fanai ( Pasalţha) Hnahthial khua Andaman Jail-ah thih thlengin tantir a ni.
  11. Lalchuailova Syhlet Jail atangin Andaman Jail-ah thih thlengin tan tir a ni.

Tichuan, ‘A tlawm ve lo Ropuiliani Sappui tawnah’ tih hlate kan nei a, Laltluangliana Khiangte-in Lalnu Ropuiliana chu Kumpinu laka tlawm ve lo angin lemchan thawnthu a ziak bawk a. Heng hi art a ni tih kan pawm thiam a ngai a, khawvel mithiam leh University changkang tak taka history an ziak dan approach dik tak dung zuiin, hnam rilru so sang tel lova kan ziak a nih chuan Kumpinu lakah Ropuiliani hi a tlawm a, Sailo lal, Fanai lal, Lai lal leh Mara lalte pawh an tlawm vek a ni tiin kan ziak tur a ni ang.

Chutiang bawkin 1857 Sepoy Mutinypawhhi India ram zalennna a neih hnuah version hran hranin, Sap huatna rilru nen  rawn ziak mah se, Scholar approach bawkin kan ziak dawn a, sawi mawi zawk leh sawinep zawk tumna nei lovin thulai la takin kan ziak zel dawn a ni.

Up to 1,000 British troops, their families and loyal sepoys were holed up in Gen Wheeler's entrenchment in Kanpur for three weeks in June 1857 where they were constantly bombarded by a local prince, Nana Sahib's army.
Up to 1,000 British troops, their families and loyal sepoys were holed up in Gen Wheeler’s entrenchment in Kanpur for three weeks in June 1857 where they were constantly bombarded by a local prince, Nana Sahib’s army.

Nana Sahib sipaite chuan kum 1857 June ni 6 dar 10; 30 AM atangin Bristish sipaite tawmna hmun chu an bei tan ta a.
An kulh hual vel hian bomb@ zen tam tak an phum ru nia an hriat avangin nana Sahib sipaite hian British sipai hmunpui hi an luahchhuah ngam bik lo a ni. Laipuiin an tawng a ni ber a. Chutianga Nana Sahib-a’n Bristish sipaiate a do ta tih an hriat chuan Vai sipai, sepoy  hel pawlte chuan Nana Sahib chu an thlawp ta hlawm a, June ni 10 a lo thlen meuhchuan Nana Sahib hian sipai 12,000 atanga 15,000 lai a nei ta nia ngaih a ni.

General Wheeler kaihhruai Sap sipaite leh Sap sipai nupui fanau te tiamin mi  1000 vel lai chu British sipai  hmun tawt takah chuan an inekbeng  a. Nana Sahib sipaite chuan chawlhkar 3 lai laipuiin an kap a. British sipai kulh chhungah chuan an buai mangang hle a, khua a lum ropui mai si a, ni a sa vawl vawl a, an mitthi ruangte chu an tliang nghuk mai a, zanah tui chhunchhuah hluiah an va paih thin a. Kawţha lo hri a leng a, zawnghri a leng bawk a. Sap sipai zinga huaisen tak Captain John Moore leh a kaihhruai sipai, 32nd (Cornwall) Light Infantry te chuan zan thim hnuaiah  Nana Sahib sipaite inkhuarna chu a bei let ve thin a. Hetianga Captain John Moore-a’n a beihlet tak fo hnu hian Nana Sahib chuan Sipai hmunpui chu luhchhuah tir a tum a, mahse a sipaite chuan an ngam bik si lo a ni.

June ni 12 atang chuan Nana Sahib-a sipaite chuan an beihdan an thlak thleng ta a, an laipui chuan an kahna ngai hlir an kap nawn ta un un mai a, Sipai kulh chhung barrack a kang ta ngei a, chu chuan kangmei nasa tak a chhuahtir ta a.

June ni 12 atang phei chuan Nana Sahib sipaite chuan thapui thawhin a siruk laiin British sipai inkulhna hmun chu an bei ta tak tak a, hetih lai pawhhian a beitute hian kulh hual velin bomb phumruk tam tak awmin an ring tlat a, an luhchhuah ngam bik lo a ni.

June ni 13 phei chuan Nana Sahib sipaite laipui mu chuan British sipai inkulhna chhunga damdawi in a deng fuh a, a kang hluah hluah ta mai a, an damdawi dah ţhat te a kang ral vek a, sipai dam lo damdawi ina awmte pawh a kang hlum nual ta mai bawk a. Sipai kulh chhunga sipaiho dinhmun chu a chhe ta hle a, an chanin maian chan pawh a tluk ta lo va, an mangang tak zet zet ta.

Nana Sahib sipaite inpunkhawmin kulh chu luhchhuah an tum mek laiin Lieutenant George Ashe kaihhruaina-an laipui hmangin an bei let thut a, an luhchhuah thei leh ta bik lo va.

June ni 21 a lo thlen meuh chuan British sipai kulh chhunga awmte hmun thuma ţhena hmun khat chu an thi zo ta.

Wheeler-a’n Lucknow-a Bristish sipai Henry Lawrence hnena hmanhmawh taka chhanchhuah an ngaih thu a thawn chu chhanna a hmu ngai lo va, hetih lai hian Lucknow British sipai hmunpui pawh Vai sipai helte hian an lo hual ve bawk vang a ni a.   

June ni 23-ah pawh British sipai awmhmun chu silai hmang leh laipui hmangin an la kap chhunzawm reng a. He June ni 23 hi ni bik leh ni pawimawh tak a nihna lai a awm a, Kumpinu-in India lalram a  hnehchuhna bul ţanna Battle of Plassey indo champhaphak  kum 100-na  a ni a. Kum 1857 Sepoy helna hi a bulţanna mei vap chhemalhtu chu hrilhlawkna dik lo, Battle of Plassey indona atanga kum za hnu-ah East India Company hi India ramah a tlawm dawn tih thu thang dik lo vang a ni pakhat a ni.

 

Chuvang chu a ni ang e, Kelkang harhnaa Kumpinu a tlawm dawn tih hrilhlawkna puangtute kha khatih laia Lushai Hills superintendent Anthony Gilchrist McCall (1895-1978) Indian Civil Servant chuan ral pui phiarin Kelkang harhna kha a lo phiar a, na takain a hrem hlawm a, lammual laih sazaite a pe a, amah pawh Kumpinu thuneitu sang zawkin an  khak ta reng a nih kha.

Hemi ni tak hian Nana Sahib sipai, 2nd Bengal Cavalry te chuan British sipai kulh an hnaih hle a, kulh atanga hlam  25 vel leka an inhawrkhawm lai tak mai chu British sipai 1st Native Infantry chuan an bei thut ta mai a, Nana Sahib-a sipai hotu Radhay Singh  chu an kap hlum thei hlauh ta mai a, British sipai kulh lehlama an inbeihnaah Nana Sahib sipai 25 lai an kap hlum thei bawk a, British sipaite erawh hliam tuar an tlem hle thung a.

BRITISH SIPAITE AN INPE (SURRENDER) TA

1858 picture of Sati Chaura Ghat on the banks of the Ganges River, where on 27 June 1857 many British men lost their lives and the surviving women and children were taken prisoner by the rebels.
1858 picture of Sati Chaura Ghat on the banks of the Ganges River, where on 27 June 1857 many British men lost their lives and the surviving women and children were taken prisoner by the rebels.

British sipai kulh chhungah chuan harsatna leh mangangna chi hrang hrangin a tlakbuak ta reng mai a, natna hri a leng nasa bawk nen, damdawi a tlachham a, tui leh ei leh bar an tlachham ta bawk a, a beidawnthlak ngawih ngawih ta mai a. General Wheeler fapa sipai Lieutenant Gordon Wheeler ngei pawh chu laipui mu-in a deng fuh a, a taksa a bung sawm remrum ta mai bawk nen. General Wheeler a mangangin a lu a hai ta tak zet zet a. General Wheeler chuan an hmelma te dinhmun thlithlai turin Jonah Shepherd a tirchhuak dek dek a, an hmelma te chuan a ringah an lo rek hmak a, tan inah an lo khung ta hmak bawk si a.

Nana Sahib sipaite pawh an mang a ang ve tak zet a, British sipai inkulh hual vel chuan  chuan zen tam tak an phum ru niin an hria a, an lutchilh ngam bik si lo va.

June ni 24-ah chuan Nana Sahib pawlte chuan lamkal, Sap an mi hren zinga mi Mrs Rose Greenway an tir ta a. An inpek, surrender chuan Allahabad-a him taka an kal theihna turin Ganges lui kam Satichaura Ghat-ah him taka an kal theihna tur ruahmanna siam Nana Sahib chuan a tiam thu a thlen ta a. Mahse he lamkal lehkha kenah hian Nana Sahib hming ziakna a tel lo va, chuvang chuan  General Wheeler chuan he rawtna hi a hnawl fithla hlauh va.

A tuk, June ni 25-ah chuan Nana Sahib chuan an mi man, Mrs Jacobi chu lamkalah a tir leh a, lehkha a kentirah chuan a hming a ziahhnan ta ngei a. Chu lehkha an han hmuh chuan Bristish sipai kulhah chuan inpek duh pawl leh duh lo pawl an awm nghal ta pang mai a. Darkar 24 chhung chu Nana Sahib sipaite chuan Bristih sipai kulh chu laipuiin an sai ta lo va, a reh duk mai a. A tawp a tawpah chuan
General Wheeler chuan Nana Sahib rawtna anga inpe turin thutlukna a siam fel  ta a ni.

A tukah chuan British sipai kulha mitthite ruang an tiankhawm  chu an phum ta hlawm a, Kum 1857 June thla ni 27 chuan Allahabad pan tur chuan an inpuahchah ta a ni.

SATICHAURA GHAT INTHAHNA RAPTHLAK A THLENG TA!

Tichuan, June thla ni 27 zingah chuan General Wheeler leh a sipaite leh Sap nu leh nunaute chu an sipai kulh atang chuan Ganges lui kam Sati Chaura Ghat chu an pan ta duah duah a. British sipaite chu an silai ken phalsak an ni a, Nana Sahib chuan nu leh nunau leh damlo te phurhna turin tawilailir leh sai rualte a rawn thawh bawk a. British sipaite leh nunau kal lai chu Cawnpore mipui a khaw nawtin an thlir huai huai a, Nana Sahib sipai rualte chuan an zui duah duah bawk a.

Hetih hun lai tak hian Ganges lui tui tlem lai tak a ni a, an chhuanna tur lawngte chu vaukam ţiauphovah an awm hlawm a, ţiaupho atanga Ganges lui tuia nawrthlak chu hna hautak zet mai a ni a.

General Wheeler leh a pawlte chuanna lawng chu Ganges lui-ah a thleng ta tih veleh vaukam atang khan tawtawrawt ri hriat a ni ta a. Chu veleh buaina a lo chhuak ta phut mai a, an chiaiin an buai na nuai nuai mai a, a ţhen lui atanga vaukam lam an hleuh laiin lawng ţhenkhat chu a kang hluah hluah ta mai a. Silai a puak ta a, Vai sipai hel, Nana Sahib-a pawlte chuan British sipaite chiaite chu a pawngkah ta chiam mai a.

Sap sipai damkhawchhuak pali zinga pakhat Lieutenant Mowbray Thomson chuan he inthahna rapthlak hi ruahman lawk a nih leh nih loh a sawi thei loh thu a sawi a, buaina a lo awm tak avangin an inkap ta chiam mai chu a ni phawt mai.

Massacre_in_the_boats_off_Cawnpore_-_The_history_of_the_Indian_Mutiny_(1858-1859),_opposite_336_-_BL

A contemporary engraving of the massacre at the Satichura Ghat.

Hetianga silai hmeh puah a lo nih takah chuan Nana Sahib-a sipai lalber general Tatya Tope chuan a sipaite chu British sipaite laipuia tlir turin thu a pe niin an sawi bawk a ni.

Tichuan, an kah hlum loh Sap sipai, Ganges luia hleuhte chu ngunhnam hmanga sah hlum an ni ta hlawm a, nu leh nunaute erawh a nung chungin an man khawm ta chiam mai a,

Nu leh nunau leh naupang 120 lai chu man an niin Savada House an tihah chuan an khungkhawm ta a ni.

Ganges luiah hian lawng pahnih chu an tlengthla hman a, lawng pakhat zawk chu vaukam atanga laipuia an kah fuh avangin tui a lut thei ta a, a pil mai dawn niin a lang a. He lawnga chuang Sap mangangte chuan General Wheeler te chuanna lawng mi 60 lai chuannaah chuan pakai an tum ta a.

India;_(1909)_(14753085992)

Attack on 23 June 1857

THE_BOATS_STUCK_IN_THE_MUD_AND_WERE_AN_EASY_MARK

The British boats were stuck on mudbanks preventing departure and, amid much confusion, the soldiers subsequently captured or massacred by Nana Sahib’s rebel army.

General Wheeler te chuanna lawng pawh chuan Vai sepoi hel ho khan ralthuam nen an rawn um ta bawk a. Hmanhmawh nak alaiin an lawng chu lui tuitlemna tiauvah a la tang a la tang ta dah a. Chutianga an lawng a tan lai chuan Lieutenant Thomson kaihhruai Sap sipaite chuan hel pawl chu an han bei let ve leh ta rih a.

 

Chutianga vaukam tiauphova an inbeihhnu chuan Lieutenant Thomson kaihhruai Sap sipaite chuan lawnga chuan an han tum leh chu an lawng awmna chu an hre ta lo va. Chutih lai chuan Vai sipai hel pawlchuan lui ral lehlam atangin chu lawng chu an rawn bei leh ta a. Tihngaihna leh ţan ngaihna awm tawh hek lo le, lawngah chuan flag var an tar ta ringawt mai a, Vai sipai helte hnenah chuan an inpe leh ta nge nge a ni.

 Lawnga chuang Sap sipaiho chu an man leh ta vek a, nu leh nunauho an khungkhawmna Savada House-ah chuan an hruai leh ta vek hlawm a. Sap sipaiho hi kah hlum an tum laiin an nupui leh fanaute chuan sipaite chu chu an pawm a, an kah ruala kap hlum ve nghal turin an ngen a. An nupuite chu an pawt sawn a, sipaite chu an kahhlum hma-in Nana Sahib chuan an chaplain chu  Sap sipaite ţawngţaisak turin a phalsak a. A ţawngţai hnu chuan silaiin an kap ta a, la thi lote chu ngunhnamin an sat hlum ta phiar a ni.

Lieutenant Thomson leh a ţhian sipaite chu an tlanchhe ta a, an biru a. A hnuah a rawn umtu Vai sipai hel ho nen aninbeihnaah a sipai 6 te chu an thi a, an sipai 3 te nen chuan Ganges lui thlang lam panin an hleuh ta ringawt a, vaukam an han chhuah chuan Brtish laka rinawm tlat Raja Dirigibijah Singh-a sipai Rajput sipaite chuan an chhanchhuak ta hlauh va, heng sipai 4 te chiah hi damkhawchhuak awm chhun chu an ni ta a. Chungte chu; Murphey , Sullivan, Lieutenant Delafosse leh Lieutenant (a hnua  Captain) Mowbray Thomson te an ni.

La chhunzawm zel tur….

 

Similar Articles

Top