You are here
Home > World News > SAPHU KĂWR KG 5000 HALRAL

SAPHU KĂWR KG 5000 HALRAL

SAPHU KĂWR KG 5000 HALRAL

SAPHU KĂWR KG 5000 HALRAL

Khawvela rannung sumdawnna atan an tihhlum hnem ber chu Saphu hi niin an sawi a, saphu kăwr hmanga sumdawnna hi khawvel sorkarte hian an duh lo va, dan kalh a nihzia tlangthantir nan South Africa ramah  saphu 4000 lai kăwr kg 5000 lai chu an halral vek a ni.

p04b22h7-copy-2-copy

China hian hmakhawsang ațang tawhin  saphu kawr hi damdawi siam nan a hman thiam a. Saphu hi a nungin emaw, a kăwr emaw hmangin sumdawn nan an hmang nasa a, hei hi khawvel pum huap nungcha leh thing leh mau humhalhtu pawl The Convention on International Trade in Endangered Species of Wild Fauna and Flora (CITES) chuan an duhlohzia leh an dodalna lantirin  September ni 24 ațang  October  ni 5, 2016 inkara Sandton Convention Center, Johannesburg, South Africa-a inkhawmpui lian convention an neih lai ngeiin saphu kawrte hi an halral ta a ni.

p04b21zv-copy-2-copy

Wildlife photographer Paul Hilton chuan he saphu kawr kg 5000 lai an halral lai hi a thlalakthiamna hmangin khawvel hriata  tlangzarh a duh vangin South Africa ramah a zuk fehchhuak a. Thlalak a lo thiam nangiang reng a, a thlalak “The Pangolin Pit” chuan Wildlife Photographer of the Year competition-a photojournalism category-ah  pakhatna lawmman a dawng ta hial reng a ni.

p04b21ty-copy-copy-copy

 

SAPHU CHANCHIN

SAPHU CHI 8 A AWM; Saphu kawr an man thu chang hi ka hre chamchiin kan hre chawk a, a saphu chanchin tak hi kan hre tam lo hle a, ka han ziak hlek ang e.

p04b224h-1-copy-copy

Mithiamte’n a rinsawi dan chuan saphu thlahtu bul ber chu Manidae a ni a, kum maktaduai 80 chhungin chi 8-ah a rawn insiam danglam ta a. Asian rama saphu te chu chi 4 an lo ni ta a, chungte chu Chinese, Malayan (or Sunda), Indian leh  Palawan te an ni a. Africa ramah khuan Saphu chi 4 a awm bawk a, chungte chu Tree pangolin ( thinga awm chi saphu), Giant ground pangolin (leia awm saphu lian chi), Cape pangolin Lukhuam ang kawr nei saphu) leh Long-tailed pangolin (Saphu mei sei chi) te an ni thung a ni.

p04b222y-copy-copy

SAPHU LEI A SEI HLE: Saphu hian ha a lo nei reng reng lo mai a, lêi erawh an nei sei namen lo thung a, a taksa, a sakruang  sei zawng chen lai hi lei an lo nei a lo ni a, an lei sei zawng hi cm 40 lai a ni thei a ni. cm 30 hi feet 1 a ni a. A lei băn taka rannung a man te chu a lem thla nghal duak zel a, a pumpuia lehkhathap ang leh lung awmte chuan a thil lem chu an lo țhialsawm vek thin a ni. An chaw ber chu fanghmir, tlumpi leh vual te an ni.

p04b2269-copy-copy

PHUHLIP ANG KĂWRIN A TAKSA A TUAM VEK: A no te a pui hnute-a chawm chi rannung, mammal zinga Saphu hi a taksa pum phuhlip ang kăwrin a tuamchhuah vek rannung awm chhun a ni a, a kawr hi mihring kut tin te, sava leh arke tin te, samak ki ang te hi a ni a. Hmakhawsang atangin China-ho khian saphu kawr hi damdawi atan an lo hmang thiam bik a, phungzawl damdawi atan te, nu hnutetui nei lo hnutetui neihtir nan te leh pan hnai hipna damdawi atan te an lo siam thiam a, chuvangin saphu kăwr hi kg 1 $3,000 laiin an lo lei ngam thin a lo ni.

A Sunda Pangolin ( Manis javanica ). Indonesia. Photo: Paul Hilton for WildAid
A Sunda Pangolin ( Manis javanica ). Indonesia. Photo: Paul Hilton for WildAid

PENGGULING; Saphu hi Sap tawng chuan pangolin an ti a, a hming hi Malay (the national language of Malaysia, Brunei and Indonesia) țawng ‘pengguling’ atanga an lak a ni a, a awmzia chu inzial emaw invial emaw tihna a ni a. Hlauh a neih chuan saphu hi a kawr chhah hmachhuanin a inzial hlawm tlat a. Vanduaithlak takin a inven dan tak hi mihring tan chuan man a lo awlsam ta em em hlauh si a ni.

250px-pangolin_borneo-copy-copy-copy

THING KAWRAWNGA BU NEI CHI  LEH LEIA KUA NEI CHI AN AWM: Tin chhah tak leh zum țha tak an nei bawk a, saphu thekhatte hi thing an thei hle a, Africa rama Saphu mei sei chi angte phei chu thing kawrangah bu an nei zawk mah a, an mei chak tak hmangin thingah an uai tang thei a. Saphu chi țhenkhatte chu kua an nei thung a, an kua hi feet 10 lai athuk te a ni hlawm a,  an kua hi a lian pawlah phei chuan mihringte pawh an leng hial thin a ni.

pangolin_defending_itself_from_lions_gir_forest_gujarat_india-copy

SAKEIBAKNEIIN AN SEH HLUM THEI LO; Hlauh nei Saphu a han inzial hian  a kăwr hi a chhah bawk a,  sakeibaknei  rual pawhin tihngaihna tak an hre lo va, an kalsan leh mai thin a ni.

Saphu Kawr
Saphu Kawr

SAPHU DAM REI ZAWNG LA HRE LO: Saphu dam rei zawng hi hriatchian theih a ni lo. Sahuana an khawite hi chu kum 19 emaw a aia rei lo an dam thei a, ram hnuaia saphute dam rei zawng hi hriatchian theih a la ni lo a ni.

Khawvela saphu awmna ram te
Khawvela saphu awmna ram te

SUMDAWN NAN AN HMANG NASA: Saphu kawr hi sumdawn nan an hmang nasa a, kum tin hian Africa leh Asia khawmualpui atang hian saphu 100,000 lai hi China ram leh Vietnam ramah hian an hralh ziah angin an chhut a, chuvangin  the International Union for the Conservation of Nature chuan saphu hi rannung thimang mai tura hlauhthawnawm, Red List of animals threatened with extinction-ah a puang ta a ni.

p04b22m9-copy-copy

THIL RIM CHHE TAK TICHHUAK THEI : Saphu te hian inven dan chi 3 an nei a, a chi khatna chu an kawr chhah hmachhuana inzial tawp a ni a, a pahnihna chu Awle-in a mei a hmang thiam ang bawk hian saphu hian a inven nan a mei hmang tangkai thiam a a. A pathumna chu a mawng bul atang hian thil rimchhe tak a tichhuak thie a, a tichik thei lo thung a ni.

p04b2252-copy-copy

ZANA CHAW ZAWNG CHI AN NI: Saphu chi 8 zingah Africa khawmualpuia awm Saphu mei sei chi tih loh chu zana chaw zawng chi vek an ni a, chhunah an kua-ah emaw thingah emaw an mu thin a ni. An mit hi a zim hle a, an mit hi a fiah vak lo va, an mit aiin a hnar leh an beng hi chaw zawn nan an hmang tangkai zawk fo a ni.

p04b2269-copy-copy

CHI THLAH HUN BIK AN NEI LO: Saphu pa te hian an ram chin hi an zunin an chhinchhiah vek a, a nu hur chuan a pa zun rim atangin a pa awmna a rawn zawng ta mai thin a ni. Saphu chi a zirin an no pai rei zawng a inang lo va, ni 70 atangin ni 140 no an pai deuh ber a, a veiveh hian  a pui hian a note hi thla 3 chhung a mei chungah a paw thin a, thla 5 hnu-ah an puilting ve ta mai thin a, an awm hrang ve thin a ni.

p04b225k-copy-2

ap239258848016_3179766a-large_transqvzuuqpflyliwib6ntmjwfsvwez_ven7c6bhu2jjnt8-copy-copy-copy

Similar Articles

Top