You are here
Home > CCT Robawm > Rev.Dr. C.L.HMINGA SERAMPORE CHAWIMAWINA KA LAWMPUI

Rev.Dr. C.L.HMINGA SERAMPORE CHAWIMAWINA KA LAWMPUI

Rev.Dr. C.L.HMINGA SERAMPORE CHAWIMAWINA KA LAWMPUI

Vawiin khan Serampore College-in Rev.Dr. C.L.Hminga Doctor of Divinity chawimawina an pek lawmpui nan Lunglei Serkawn Ramzotlanga an inah ka han kal vang vanga a, a chawimawinna nopui lawmpui nan Cheese Craker ka han hlan ve a ni.

IMG_20171216_144649_1

Rev.Dr. C.L.Hminga hi a rawnga a lo bawl ţhin LALPA Pathian hian a chawimawi nasa hle a, kum 90 a nih kum, Serampore college-in convocation vawi 90 an neihnaah chawimawina nopui, Doctor of divinity an hlan a, ka pian kum tak, kum 1961 khan Sap ram Westminster Abbey-ah modern missionary an tih William Carey pian kum 200-na lawmnaah Bible chang chhiarna hun a nei bawk a, Mizo paah chuan chang sang tak a ni a, a Sap ţawng hi Mizo paah chuan a la ţha ber bawk a ni.

IMG-20171216-WA0005

Sap ţawng thiam mang lo hian Sap ţawng thiam leh thiam lo pawh hi kan hre tak tak lo va. Sap ţawng thiam taka kan ngaihte pawh hi an lo thiam tak tak lem lo a ni.

IMG-20171216-WA0004

Vawiin chuan P.S Chawngthu, a fanu Jenny Chawngthu , Blue Mountian English Medium School-a ka thawhpui, a hla phuah “Chhingkhual Lenmawii”, Rev.Dr. C.L.Hminga nupui  ngei khan thingpui min lum a, a ropui dangdai thlawt e.

IMG-20171216-WA0003

Kum 3 liam taa Rev.Dr. C.L.Hminga te inneih Golden Jubilee-a ka thu post daih kha ka han tarlang ang e.

IMG-20171216-WA0002

 “Engmah chhuan tur ka nei lo”; Rev.Dr.C.L.Hminga

Kum 2014 December ni 12 chawhnu dar 1 khan Rev.Dr.C.L.Hminga,kum 87 leh Pi Lalengzami,kum 82 te inneih kum 50 champhaphak lawmna, an chenna in Ramzotlang Serkawn,Lungleiah neih a ni a, lawmpuitu mipui an tha hnem hle.

An inneih Golden Jubilee lawmna hun hi Pu M.S.Dawngliana’n kaihruaiin Rev.Dr.C.L.Hminga hnathawh pawimawh tak 2 sawilangin Mizoram hi Kristian ram anihna khawvela puangchhuaktu mi pawimawh tak a nih bakah Mizoram buai lai, mipuite tuboh leh dolung kara an awm laia mipui thlamuantu leh Mizoram remna leh muanna a awm theih nana theih tawp chhuahtu a nih thu a sawi a ni.

Thuchah sawitu Rev.Dr. K.Lalrinthanga chuan he mite chhung hi Pathian ţih chhung an ni a, an nun kawng bumboh tak karah pawh Pathian ring tlat mi an ni a, an rin Pathian rintlakzia an nun atang hian kan hmu a ni, a ti. PUC Principal hlui Pu Saingenga chuan an nu Pi Lalengzami chanchin sawiin , “ Sailo lal ropui fanu a nih bakah a nulat lai khan a hmel a tha hle a nih a rinawm a, Pahlira Sena Chawngthu-in, “ A sakhming,hmel, hre bil lo mah ila, tawng leh hian ka mawi nen maw, saw lamtluang a liam ta e, suihlung lentu reng chu CHHINGKHUAL LENMAWI” a tih kha Pi Zami nulat lai ngei hi a lo ni e, a ti.

Rev.Dr. Chhangte Lal Hminga chuan thu tawite a sawi ve a, “Eng mah chhuan tur ka nei lo, Lalpa-in a rawng bawl thei tura min lo ruat hi ka lawm em em a ni” a ti. A nupui chungchang sawiin , “ Aizawl khaw dintu Sailo lal ropui Lalsavunga leh General Sir Frederick Sleigh Roberts, the Lushai Expedition (1871-1872) hotu pawhin a ngaihsan em em,a sakawr hmingah pawh Vanhnuailiana(vonolel) a phuah hial Champhai khua dintu Vanhnuailiana te thlah kal zel Ngopa Sailo lal fanu a ni na chungin a inngaithlawm lutuk hi a buaithlak zawk a, kum 50 kan inneih chhung hian kan inhau ngai lo va, pakhat a sat deuh hian pakhat hian ngawi kan dawh tlat zel a, kan inhau thei ngai lo a ni, a ti. Mizo Baibul lehlin lai phei chuan kum khatah thla 2 chiah inah ka awm hman thin a ni, a ti bawk.

He nupa entawntlak takte hian fa 4 an nei a, 2 chuan an boral san tawh a, a la dam 2 te chu Mizo zinga architect lar tak Lalthanpuia Chhangte leh Sap tawng thiam tak Lalthangmawii(Nutei) M.A.(Eng) J.B college te an ni.

Rev.Dr.C.L.HMINGA CHANCHIN & A RAWNGBAWLNA TLANGPUI.

Chhangte Lal Hminga hi Pastor thanzing leh Thangpuii te inkarah 1927 kum October ni 4 khan darzo khua-ah a lo piang a,Lawntlai bul chawnhu Mission Primary a zirzawh hnu-in serkawn Mission Middle sikul-ah a kal a, 1948 kum khan Government High School ,shillong atangin matric a zirzo va.1955 kum khan Serampore college atangin B.D degree a la a, 1957 khan pastor-a nemngheh a ni. 1963 kum khan Manchester University,England atangin MA. a zo va. 1976 kum khan Fuller seminary,California,USA atangin Doctorate Degree ( D.Miss) a la a,hetah hian Dean’s award for the Best Achieval and field Research a dawng pha hial a ni.

EDUCATION LAMA A RAWNGBAWLNA;

  1. Part time Lecturer at Teacher Training School, Serkawn.1955-57.
    2. Part time Lecturer, Jubelee Bible School.1955-57.
    3. Principal,Jubilee Bible School,Serkawn.1964.
    4. Principal,Lunglei College.1964-67.
    5. Member,Managing Board of Union chritian college,Barapani,near shillong.1968-1973.
    6. Member, Managing Board,Mount Hermon School,Darjeling,1973-1986.
    7. Member of Court, North East Hill University, 1977-1980.
    8. Board Member of J.B College till 1991.
    9. Honorary Examiner, Serampore(University) college senate Exams 1964-1968.
    10. Lecturer and coordinator for N.E.India, Mc gavran Institute 1990-1993.
    11. Director, Carey Centre for Post Graduate Theological Studies,1996-1999 and Teacher at Calcutta bible college.

ADMINISTRATIVE LAMA A RAWNGBAWLNA;

  1. Finance Secretary,BCM.1958-1961
    2. Literature Secretary,BCM.1963-69 & 1976-77
    3. Zoram Baptist Mission Secretary, BCM 1968-71 &1977-1980.
    4. General Secretary,BCM.1971-75 &1980-88
    5. President (full time), BCM.1995-1996.
    6. Director of Carey Centre for Post graduate theological Studies based at Calcutta College.1996-1999.

CHRISTIAN ORGANIZATION HRANG HRANGA A RAWNGBAWLNA;

  1. Vice President, Bible Society of India, Assam Auxiliary.1957-58
    2. Vice President, Bible Society of India,N.E. Auxiliary.1973-74.
    3. Vice President, Bible Society of India.Aizawl Auxiliary 1983-1991
    4. President,N.E,India Christian Council.1979 &1980, Vice President.1981-82.
    5. President,council of Baptist churches in N.E.India.1972-74,1977-79
    6. General council member,BWA,1975-88,1995-79
    7. ECM,Asian Baptist Federation,1980-1988. etc

A LEHKHABU ZIAK TE;

  1. The Life and Witness of The Churches in Mizoram.1987.(L.Keivom-an Mizo zingah sap tawnga thu ziak thiam ber a tihna lehkhabu kha a ni)
    2. William Carey (a biography)-1993.
    3. Mizoram Baptist Kohhran Chanchin.2003.
    4. Sap tawnga a ziak a bu-a la chhuah loh bu 4 a la awm.

A nihna chel neuh neuh chu ziak tawh lo mai ila, Rev.Dr.C.L. Hminga hian a naupan laia a seilenna khaw tlanga zu in mite sual zia a hmuh atangin a piana hnu lamah zu hi a la tep chhin aih lo hrim hrim a, zuk leh hmuam hi a ti ngai lo bawk a, kum 87 mi a ni tawh a, a la intha zo hle a, tiang a hawl lo va, Scout lamah Mizoram pum huap puipa nihna rei tak a tawk thei a, 1977 atang khan 1997 thleng khan Vice President(S) Mizoram State Council BSG nihna a chelh a, Calcutta lam a awm hlan khan midang kutah dah a niin 2001 atang khan 2010 thleng khan Vice President a la ni zui thei a ni.

Rambuai tirh khan Rev.C.L.Hminga leh rev.HS.Luaia te kha kohhran tirhin aizawlah an kal vang vanga sipai lam hotute chuan an lo dawp a, remna siam tura kal an nih thu an hmin theih hnu-ah MNF te chuan India sipai lo kap lo tura hmin turin Pastor Luaia kha a zan a zanin a phei leh vang vang a, Pastor Hminga khan Aizawl DC hovin sipai hotute a lo dawr char char a, an ni pahnih zarah Lunglei chu Jet fighter-in a kap alh ve lo hlauh a ni. Rambuai retheih barberh lai khan Pastor Hminga hian MNF leh sipai lam rin a hlawh avangin mipuite a thlamuan theih phah hle a, chhuanchham leh chi seh nei lote a kanin a mah pawisa sengin a leisak thin a, a thlarau mi hle a ni.

Pastor Thanzinga kha Pathian a ring a, Lalpa a ţih bawk a, a rawngbawlna-ah a hlawhtling hle a, a fate zingah Mizote tan thangchhuah thei 3 lai an awm a! Chungte chu Mizo IAS hmasa, a hna zahawmtak kalsana a aia hna zahawm zawk Lalpa rawngbawlna lama kal ta Rev.C.L.Rema (L), MP C.L.Ruala leh Mizo Theologian thlarau mi Rev.Dr.C.L. Hminga te an ni.

Rev.Dr. C.L. Hminga hi Mizo pa dik tak a niin a thiltih ţhat hi amah hian a sawichhuak duh ngai lo va, chuvang chuan a chanchin kimchang hi keimah hian third person angin kimchang takin ka ziak vek dawn a, Lengchhawng Press-in an chhu ang a, ropui takin a damlai ngei hian kan tlangzarh rup mai dawn a ni.

 

Similar Articles

Top