You are here
Home > Zoram > REIEK TLANGAH BAWK – K.L.Liana

REIEK TLANGAH BAWK – K.L.Liana

Rambuai hma, 1963 khan Sialsukah Pu R. Thangmawia, Nausel khua chu High Sikul zirtirtuah a awm a, a nau Biakhluni chu a u te sikula pawl kua zir turin a u hnenah a awm a, nula fel leh hawihhawm tak a ni a, hmel fel ngaihnobei tak a ni bawk. Chutia an khuaa mikhual nula fel tak leh rual kawm thiam, sakhaw mi tak lo awm ta chu hla phuahthiam Tanpuia tan chuan ngawi renga thlir liam rual a ni lo ve. Rei lo te mai chauh a awm chhung pawhin kumtluanga theihnghilh tawh ngai loh turin leh hriatreng turin a awm a, khawvelah chuan khua hmunah awm ho reng thei dawn lo mah sela, thlarau khawvel vanah tal inthen tawh ngai lo turin intiam ang aw, tiin a han sawm ta a nih chu.

Hun tlem teah kumtluang nghilh loh par min ban, Piallei a zau kar lam a hla, Rauthla sumtual chung vankhua ngei, I tiam ang then lova kan len nan, a han ti hi chu a mawiin a ril thlawt a ni. Aw lunglen a thar nang vangin, Ka tan tahna mai i lo ni; Pialleiah inthen mah ila, Min rawn zawng chhuak leh la, Parte van Pialralah, tia a thunawn a han siamte hi keini pawhin lunglen changin kan hla sa thin a nih hi.

A ni e, sikul chawlh a lo hun ang a, a ni, chu sikulah chuan lehkha zirin a awm reng thei lo vang a, an khaw lama a haw leh hun a awm dawn tih chu mi a nileng lo tan chuan a chiang reng mai. Kum tawp exam zawha a haw tur chu a han au leh ta, Damtakin aw tlangzapui chu liam ta la, Zunleng rauthla kan awih changin, Awmhar tah zai tin rem runah, I sakhming Parte a chul dawn lo, han tihte hi chu aw, sawi thiam a har zawk a nih hi.

Engtin ngai ve tak ang maw zaleng zawng hian, Hleiten i dang chuang thinlaiah, Dawn titam thinlai tiriangtu, Ngaihnobei chhingkhual Thalengheri, a han tih chu, Sialsuk tlangvalhoin, Thalengheri tih kha Thalengleri, tiin an lo sa ta mai a, amah Biakhluni phei chu nula fel leh hawi zau, rilru zau tak pu a nih avangin a ngai haw hauh lo, mahse a nu leh paten lo hria sela, Thalengleri han tih kher chu engtin chuan lo ngai ang maw, a ti a. Chu thu chu Tanpuia chuan a lo hria a, a ngai haw deuh emaw tiin ka hla koh kir a ngai a nih chu, tih pahin, Awmhar Champion lunglen zai a kir leh ta, Chhingkhual lungduh chawi a rem lo, Lenkhua kan tlai lung a rual lo, Awi leh ang e, Kungliani khiangawi hnu, a han ti ta a nih chu. A ngamtlak Kungliani, khawthlang lama pasal nei tawh bawk chu a han chham leh ta a ni.

A ni e, chutiang taka a hla phuah lunglen thlak leh ril chu, keini pawhin tun ang hun favang khaw thiang, zan lama thla eng hnuaiah leh thal romei zam zam ri riai hnuah kan kurpui thin a, 2006 April ni 23, Zirtawpnia ka Reiek tlanga Anthurium Kut kan hman a, a tlang chhipa kan kal tum te tak kha aw, chu chu a tlang neitu mah ni ila, ka kal vawi khatna a ni ang lawi a. A tlang chhipa kan awm laia chhim thlang lam atanga thlifim na deuhin kan chalsam a chhem len siau siau lai ngei pawhin kan hawi vel a, Aw lunglen a thar nang vangin.., kan ti kha a ni a.

Hun a lo kal zel a, nipui laia Anthurium Kut an hman chu favang chhoah an sawn ta daih a, a tihchi viau mai a, mahse maw, eng emaw kum chuan ruahtui a tam a, chuvang chuan a kawng chu a chhiat phah a, kawng a chhiat em avanga kal loh phah nana hmang ta erawh an tam hle thung. A lo rei leh leh deuh a, a tlanga chu sawn theih ni hek lo le, hmun dang khawi emaw laiah an suan ta daih mai a, Anthurium Kut Reiek tlang atanga an nghah laia kal ve thin leh kei a tlang neitu pawh min rawn der lova ka hriatpui lohva an sawn tak avang chuan chu Kut chuan ka lunglen a hnawt tiau zo vek a, kal chu sawi loh a lam pawh ka hawi chhin lo.

An sawn ta mai chu a dik lohzia an in hre chhuak ta a ni ngei ang, kumin chu a nghahna hmun ngai leh a nghahna tur dik tak, Reiek tlangah bawk an nghat leh dawn ta a ni awm e, a lawmawm hle. Mahse an Zo-Khua hlui leh chhe tak tawhte kha an chei tha ang a, cheng tam tak sen ral pawh a ngaih hmel loh bawk a, a nihna tur ang khan inte kha a awm leh ang a, Kut chhimtute tan pawh fana en manhla takin an siam tha vek dawn, tih thawm chu awm rih mah suh se, chutianga siam that nachang chu hre turah ngai ila, an siam tha lo a nih vaih chuan a pawi ang a, Ban loh pawi zawk ang.. tih au-hla ang deuh khan, hrethiams?

MLPC Act kan hmang mek a, chu Kutah chuan dan bawhchhe tur leh leh zu ina rui tur erawh chuan tumah an kal kei Reiek tlang neitu hian ka phal dawn lo va, hlim taka thil kan tihnaah hian dan lova COTPA dan kalha lo pak khu ta luai luai leh MLPC Act kalha lo rui mai tawk kan awm fo hi a zahthlak a, a changkang lo va, a pawi a ni tih hi i hria ang u aw. He Kut kan hman hun tur pawh kan hma lawkah a awm tawh e, mahse Kutpui a nih avanga dan lo anga awm a, thil tia khawsa tur tan chuan tel ve loh mai a him zawk a, dan kan zaha kan ngaih pawimawha kan zawm phawt chuan hlim takin kan hmang thei ang a, dan a lalna apiangah zalenna a awm thin, tih thu hi a dik ber fo si a. Dan bawhchhe si loin hlim taka Anthurium Kut Reiek tlanga hmang turin inphuahchah ang aw.

Courtesy; http://www.vanglaini.org/articles/read/6327

Similar Articles

Top