You are here
Home > Asia News > RBI HOTU A ŢAWNGCHHUAK VE TA

RBI HOTU A ŢAWNGCHHUAK VE TA

India pawisa Rs 500 leh Rs 1000 note  tithi tura sorkar laipuia thurawn petu Reserve Bank of India hotu lu ber Dr. Urjit Patel chu pawisa tihthih a nih  hnu khan the hmeh an sawi angin a reh vang vang a, vawiinah a ka a ang ta a, pawisa tihthih hi thil tih zen zen chi ni lo, ram leh hnam hnuk khawih pha a ni a, pawisa tihthih avanga mi rilru thianglhlimte tawrhna chu a rang thei ang bera thawi dam a nih tur thu a sawi.

RBI chuan nitin ram chhung pawisa virvel a thlithlai reng a, a rang thei ann bera pawisa mamawh chhu zung zung thei turin Printing press te a tũrin a vil reng a ni a ti a, Pawisa tihthih tur hi sorkar thuruk vawrtawp a nih avangin lo inbuatsaih lawk a theih lohna chin a awm a ni, a ti.

A sawi zel naah Dr. Urjit chuan, India rama pawisa hman tlanglawn ber Rs 500 note leh Rs.1000 note , India ram puma pawisa leng vel 86%  tihthih thut chu a hautak lo thei lo va, a sawhkhawk pawh a na lo thei lo a ni a ti a,  bank-a thawkte an hah em em thu leh  ATM siam ţha turin nitin mi 40000-50000 vel an rawih ziah thu a sawi bawk a ni. Chhiah awl ruk leh black economy do nana RBI leh sorkar laipui hmalakna chu dawhthei taka ţawiawm hram hram turin mipuite a ngen bawk a ni.

Law Minister Ravi Shankar Prasad chuan Inrinni khan Rs 500 leh Rs 1000 note tihthih chu RBI thurawn angin sorkar laipuiin a tih a nih thu a sawi a ni.

Congress spokesperson Mr Ramesh chuan RBI hotu Dr.Patel hian RBI autonomy thuneihna a hmang sual a, ruahmanna fel fai nei lovin pawisa tithi turin sorkarah thurawn a pek bawk avangin a bang ngei tur a ni a ti a, Finance Minister Arun Jaitley chuan RBI hotu thlavang a hauh thung a ni.

Similar Articles

Top