You are here
Home > Zoram > RAMA DANG NENA INSUMDAWN TAWN – K.Sapdanga, Vanglaini Editor

RAMA DANG NENA INSUMDAWN TAWN – K.Sapdanga, Vanglaini Editor

International Labour Organization (ILO) hmalaknain, Mizoram thil deh chhuah leh Mizoram aṭanga thil siam chhuah hmanga Myanmar, Bangladesh leh Asia chhimchhak ram țhenkhatte nen insumdawn tawnna tura company hrang hrangte Mizorama an inbun theih dan tur sawiho a ni. ILO mithiamte chuan, Mizoram chu sumdawnna hmun țhaa an ngaih thu an sawi.

Tun hnaiah India sorkarin khaw chhak lam a hawi a, khaw chhak ramte nen insumdawn tawnna lam a sawi uar a, hemi atan hian thil thui tak a kalpui tawh. Tunah ILO lam pawhin Mizoram chu sumdawnna hmun țha a nih theih an beisei thu an rawn sawi leh ta a, thil lawmawm tak a ni.

Hetihlai hian Mizoram dinhmun dik tak hi kan hriat chian chuan sumdawng thei dinhmunah a ding chiah em, tihte kan chhut a ngai a, tute emaw sumdawnna kalkawng mai lo nih hi a him nge him lo tih thlenga zir tel a ṭha ang. India leh khaw chhak ramte’n sumdawnna lian tham kalpui dawn ta se, Mizoram hi ‘kalkawng’ a nih vangin ngaihthah theih chu a ni hauh lo ang a; nimahsela Mizoram tana sum leh paia hlawkpuina lian tham awm si lo hian, an kalkawng ang lekah min ngai ang tih a hlauhawm hle.

Sumdawng tur chuan bungraw thawn chhuah tur kan siam chhuah ve phawt a ngai a, chutiang tur chuan industry lian tham kan la nei lo a, sumdawnna lian kalpui thei kan la ni chiahin a lang lo. Chutihlaiin tuna kan nihna ang ang hian eng chinah nge sumdawnna kan kalpui theih a, eng angin nge inher rem ila ṭha ber ang, tihte hi chu kan ngaihven a hun ta.

Ram dang nena insumdawn tawnna hi lian tham zawka kalpui a ni ngei dawn niin a lang ta a, hetih hunah hian a kalkawng ni sia a sumdawnna taka tel ve loh hi thil awm thei a ni a; kan sorkar thuneitu leh mithiamte hian thil thui tak ngaihtuah chungin, ram dang nena insumdawn tawnnaah hian Mizoram tana hlawk thei tur ber lo zir lawk se a ṭha khawp mai.

 

Courtesy: http://www.vanglaini.org/articles/read/6046

 

Similar Articles

Top