You are here
Home > Asia News > PM MODI LO HAW, KASHMIR BUAINA NGIAHTUAH NGHAL

PM MODI LO HAW, KASHMIR BUAINA NGIAHTUAH NGHAL

Africa ram 4 tlawha fehchhuak Prime Minister Narendra Modi  a lo haw ta a, tukin khan Home Minister Rajnath Singh  leh ram hruaitu lawkte nen Jammu leh Kashmir buaina tihziaawm dan tur an rel nghal.

Kashmir-ah hian hel pawl hruaitu lar tak, India-in firfiak anga a chhal, Kashmir mipuite’n ram hmangaihtu dik tak nia an ngaih kum 22 mi Burhan Wani Vai sipaiten an kah hlum avangin buaina a sosang hle a, mi 30 an thi tawh a, mi 800 laiin hliam an tuar a ni. Thi zingah hian police 1 a tel a, nimin khan grenade puak avangin CRPF 12-in hliam an tuar bawk.

Burhan Wani vuina-ah hian mipui chu a maka makin an tam a, vuina hunserh leh tawngtaina pawh an hmang thei lo hial a ni.

He buaina leh India huatna meipui anga a alh hluah hluah lai hi Pakistan sorkar leh Kashmir hel pawl Pakistan rama inkhuar mekte chuan remchanna hmanga buaina tihsosan zel an tum mek a. Hei tak hi tukina PM Modi leh a thawhtpuite chuan hmehmih dan an ngaihtuah chu a ni a, opposition party te pawh phung bawmah an sawm ta chul mai a ni.

Home Minister Rajnath Singh chuan he buaina avang hian US zin a tum pawh a țhulh phah hial a, boruak a ziaawm chuan karleh lamah a zin dawn thung a ni.

Boruakin ziaawm lam a pan niin an sawi a, sipai leh police te pawh mipuite chunga zahngai hram hram turin an ngen a, sipai dang thawn belh an rel bawk a ni.

 

Similar Articles

Top