You are here
Home > CCT Robawm > PATHIAN PASALŢHA THANGBAWNGA: Episode 3 -Familia Fanai Lalțansanga

PATHIAN PASALŢHA THANGBAWNGA: Episode 3 -Familia Fanai Lalțansanga

KRISTIAN CHHUNGKUA

Thingsai lal Hleibawra chu an khuate’n dawi thiam an rawt avangin vaiah a tang a, Hleibawra pa, Patlaia lah a thi tawh bawk si a, hmeithai rorelin an awm rih a ni a, hetih lai hian lal fapa Lalbuana chu naupang mai a la ni si a, Lalbuana pa lah chu a Vai tâng a chhuah hnuah a hrisel lo va, Lalbuana chauh hi fa a la nei hman a, a boral ta mai si a. Thingsai khua chu Thangbawnga te chhung hian an awp a ni ta ber mai a. Hei vang hian Thangbawnga chuan kum 1912-17 chhung lal aiawhin ro a rel a ni.

Thangbawnga te chhung hi inkhatah thuk hran chhuangin chhung thum an awm khawm a, ‘Pathian chhung’ tia koh an ni a, an lo te hi ‘Pathian lo’ an ti a, an ui leh arte leh ran vulh reng rengte pawh ‘Pathian vawk’, ‘Pathian ar” ‘Pathian sial’tih vek a ni a, an in chu “Pathian in’ an ti a, inkhawm nan an hmang a, sunde sikul kai nan an hmang bawk a. Kohhranho engkim relna in a ni a, khawtlang chungchangah lah chuan, khaw chhung awptu, thu chhia thu ţha thlenna leh rorelna in a lo ni bawk a. Thingsai khaw tan chuan an engkima engkim an ni ringawt mai. Thangbawnga nau Thlahaia chu khawchhiar a ni a, Sande sikul hotu a ni bawk a. Thangbawnga lah pa fing leh huaisen, mi nun ţha em em lo ni bawk nen, Chîma lah chu kohhran lamah mi phur thei tak leh tha tho tak mai a lo ni si a, an chhungkua hi khawtlang hruaitu an lo tling ve reng reng a ni.

Hetianga kohhran leh khawtlang kaihruai thei chhungkua an lo ni thei ta hi a makin a danglam hle a, hun eng emawti hnuah chuan kohhrante an lo pung zel a, biak în han neihte pawh an lo duh ve ta a. Chutia kohhrante an lo puna an lo ngheh deuh deuh hnuah chuan, amah Thangbawnga pawh Pathian thu hrilin khaw danga zinchhuah ţul a tihna te pawh a lo zual ta deuh deuh bawk a. Tin, khawtlang rorelna leh kohhan lam kaihhruaina anni chhungkaw kuta a innghah vek kha fel tawkin a hre lo bawk a.

Kohhran han kaihruai turin Haklawm khuaa mi Phaisama chu Thangbawngaho hian an va hruai ta a, kohhran pawh a lo ding nghet ţan ta hle a. Phaisamaho hian an khawsa ţan ta a. Kohhran an lo pung ta deuhin biak în neih pawh an lo châk ta a, biak in sak an lo ur ta a. Thangbawnga nau, Chîma hi biak in sakah hian a phurin a taima em em a,  biak în rên pawimawh zual pui phei chu a feh pahin a hawn daih vek a ni, an ti ţhin.

Biak in chu zawlbuk kawtah an sa ta a, a chung atan chuan buhpâwl an chih a, buh fangte kha a la awm nual mai si a. Biak in chungah chuan ar a thlawk kai chamchi ta mai a. Mahse chutih laia kohhrante chu naupang te te, tuallaia lenglam rual lek lek pawh a tam zawk an ni a, ar ringawt phei chu an veng hneh hle awm e.

Pu Phaisama hi Aizawl lamah mi fing zawk thiltihte lo hmu ţhang tawh a ni a, Krismas nite hian lemchan ang deuhvin, ennawmte an siam a, an biak în pulpit achin kha puan an zar phui a, biak in châr lamah a luhna khawngka an siam a, an hmaiah bûr reh pawh an invuah a. Mipuiho chu pulpit hma lamah an ţhu a. Pulpit lam puanzar phenah chuan lemchangtute kha an awm a, puan zar kha an va keu hawng a, nuihza fiamthute an va sawi a, hmar bûr kha an invuah bawk a, an hlim hle ţhin a ni.

MIZO VERSION HALLELUJAH CHORUS HMASA BER

Phaisama Aizawl zin chuan Halleluia Chorus an sak lai hi a va hmuin a va ngaithla ve ni awm tak a ni a. Thingsai kohhranho chu Mizo version Halleluia Chorus zirtir a tum ve ta a. Zaipawla telte chu Sangbuta te, Lalnghaka te, Tawnphunga te, Chalkiauva te, Thatchhuma te leh Hranghnawli te leh mi dangte an ni a.

Pu Phaia chuan zaipawlte chu hmun thumah a țhut hrantir a, pawl khatna chuan “Leng Leng bi king” an han ti rual țhat țhat tur a ni a. Pawl hnihnate’n, “Letza king lit” lo tih ve tur a ti a. Pawl thumna erawh chuan, “Ko re ban, ko re ban” an lo ti ve leh tur a ni, a ti a.

A fâla pawl hran hrante’n an tih țheuh hnuah chuan, a rualin mahni chan țheuh chu an sa rual ta huk huk țhin a ni awm e. Haleluia chorus sap hlaa an rem a thik a ni ber awm a, hei hi Thingsai kohhran hla rem hmasak ber a ni hial awm e.

Phaisama hi a naupan laia Pawihin sala an man, a hnua an tlanchhuah leh tak, Pathian thu awi hmasa leh tirhkoh hmasa ber 3 zinga mi kha a ni.

PATHIAN THU HRILIN A ZIN CHHUAK TA

Kum 1920 bawr vel atang khan Thangbawnga chuan Thingsai atanga hmar lam phei Biate leh a chheh velte fangin Pathian thu hrilin vahchhuah a lo ţan ta a, rei tak tak a thang bo thin a, Thingsaiah a let leh ţhin a ni.  Tin, nakin deuhva Zorama harhna lo thlengah khan a harh lehzual ta a, 1926 kum tawp lam atang phei chuan a in leh lo awmna Thingsai khua chhuahsanin khaw bulbal leh in leh lo pawh nei lovin Chanchin Ţha hrilin Mizo ram chhim leh hmar a fang ta a. Lunglei bul Pukpuia Pu Chenga inah 1927-28 kum hnih chhung an cheng a, heta ţang hian thla hnih thla thum thangin Pathian thu hrilin a zin chhuak ţhin a. Pukpui atang hian Sairepah an kal a, Sairep upa Lianhnâwla nen an inzui ta a, Herhse, Mualcheng, |awipui, Thlengang, Thingkah, Mampui,Chawnthang,Lawngtlai, Sahri, Paithar thlengin an kal a, Pathian thu awih atan hming 1,000 aia tam a la a ni.

Pukpui atanga Paithar thleng an zin ţum chuan Paithar lal Zahia Hlychho, Serkawr Pioneer Mission hmunpuia lo awm tawh ţhin chuan a khua awm turin a sawm a. Kristianna a ngaisan avangin a khua leh tuite chu Kristianah awm vek se a duh vang a ni a. 1929 kumah Paitharah chuan an pem phei ta a, Paithar khua an va thleng tur chu dai bulah chuan a ding a, Thawngbawnga chuan van lam a en a, a ngawi reng mai a. A fateho chuan khaw thlen chu nghakhlel hle mah sela, ani lah chu a dak a, a ding tlat si a. Nakin deuhvah chuan a kal leh ta a. Thangbawnga chuan “Vantirhkoh nen kan inbia a nih kha” a ti a.

Paitharah chuan khawtlangin în an saksak a, an inbengbel ve ta a. Hun eng emaw chen an awm hnuaah a fanuin Tuipui (Kawlchaw) lawngpu pasalah a nei a, Thangbawnga te chhungkua pawhin an fin thla ve ta a, Paithar nen an kartawn ta deuh reng a ni.

A RAWNGBAWL DAN

Thangbawnga rawngbawl dan hi thlur thum lian tak tak an ni a ;- (1) Chanchin Ţha mite hriattir tura tlangaupui (2) Mite Pathian thu awi tura sawm (3) Ţawngţai Rawngbawlna

(1) CHANCHIN ŢHA MITE HRIATTIR TURA TLANGAUPUI

Thangbawnga hian thingsai khaw chhungah pawh khaw dangah pawh khawlaiah thu a sawi a. Zing thawh hlim velah te, tlaiah te, zanriah ei khamah te, hun remchang a neih dan ang angin a sawi ţhin a.

A thusawina tur hmunah a han ding a, hla a han sa phawt a. A hla duh zawngte chu, Ni tinin ka ngai che, Ka lal duh ber, tih te, Lo hawi la, lo kir tawh i liam dawn em ni? tih te, Khawvel  hi bo mah se, Isua ka nei tihte hi amah chauhvin a han sa rih a, tichuan Pathian thu a sawi ta ţhin a ni.

A awmna a piangah a titi tui ber chu Pathian thu a hi a, khawngaihna leh hmanngaihna ngah mi, amah pawl apiangin ngainat loh theih loh mi, tuma han huat awm reng renga awm ngai lo mi a ni. Mihring chung chauhvah ngil a nei a ni lo va, Pathian thilsiam nungcha tawh phawt leh nunna neia kan ngaih loh, thing leh mau chung chenin khawngaihna a nei a ni.

A Pathian thu sawi dan deuh ber chu- “Pathian thu hi awih rawh u, ramhuai bawih aţang chhuah a ţul a ni. Inchhuah loh chuan hremhmunah in kal ngei ang,” a ti thin a. A chang chuan, “Pathian thu hi awih rawh u, hnam tinin an la awih dawn a ni. Lalte pawh hian an la awih vek dawn a ni,” a ti bawk thin a.

Thangbawnga’n Chanchin Ţha a puan chhuah dan leh a ţawngkamte hi a mak ang reng hle: “Tihtauhvi te, Elseni te, Runluihi te lakah hian insûm hram hram rawh u. In thin rim hle mah se lungawi tum hram hram ula, ‘thin’ leh ‘lûng hi a inhnaih em a, in tum chuan in lungawi mai ang” tihte hi a ţawngkamchhuak a ni. Mihringte ramhuai bawiha kan awm hi chhuah a, Pathian angchhunga kan tluk loh a ţulzia a sawi uar em em bawk a ni.

A chang chuan zu hmunah nu leh paho zingah a va tel ve a, a zaia an  lâm bung bungna hmunah te a va kal ve a, a va zaipui ve a, a va lampui ve a, an zingah hlim hmel pu tak khan a va talpui ve a. Remchang a hmuh veleh, “ Khai le, thu ka han sawi ve ang e, min lo ngaithla rawh u,” a han ti te te a, Pathian thu a sawi ve leh hlauh ţhin a.

Zawlbuka an han chhuah khawmte hian  tlangvalho zingah fiamthu a han thawh a, “Vakul rorel dan in ngahtla duh em? a ti sauh sauh va, vakul rorel dan chu a han zir a, a thiam nasa mai si a, an hual tuau mai ţhin a, a zir zawh chuan, “Khai le, unaute u, Pathian thu lo ngaithla ve thung rawh ule” a han ti leh hlauh mai a, Pathian thu a  hrilh ve leh hlauh thung ţhin a ni.

Mi awmkhawmwna apiangah remchang mel ve a, Pathian thu rhilh tum ran areng a ni a, tlangval ţhenkhatte phei chuan na tak taka an lo khak chang pawh a tam a. Mahse huat thuah a kai ve duh lem lo va, remchang chu a hmu leh nge nge \hin a ni.

(2) MITE PATHIAN THU AWI TURA SAWM; Thangbawnga Pathian thu hril dan kawng hnihna chu Mite Pathian thu awi tur sawm a ni a, mi nu leh pa te, an chaw kil lai emaw, an vawk chaw pe lai emaw, an hnâng khawih laite emaw, nula puan tah laite emaw, remchang a hmuhna ang angah mite Pathianthu awih turin a sawm a. Pencil leh ziakloh a keng a, “Khai, i hming i ziak ang, kohhranah i hming dah ve rawh aw” tiin ţhahnem ngai takin mi a sâwm ţhin a ni.

Chutianga a sawm thlukte chu, lehkha ziak thiamte hnenah, “ Khai le, han ziak rawh u le,” a ti a, an han ziak a, a han ţawngţai a, a ţap zawih zawih ţhin.

Naupanghote a han sâwm dan chu hetiang hi a ni. An kawm rual ve ni âwm ang mai khan a va kawm a, “ Khai naute u, thu ka zawt ang che u, vawkek nge in duh artui le?” a han ti a. “Artui” tiin an hanchhang  ngei a, ani chuan, “ E, chuti chu, Pathian hnena awm in duh a nih chu, khai i hming i ziak ang aw? te a han ti leh hlauh thung ţhin a ni. Lehkha ziak leh chhiar pawh thiam lo khawpa mi mawl ni mah se Pathianin a rawngbawl turin talent ropui tak a pe a ni.

(3) ŢAWNGŢAI RAWNGBAWLNA

Thangbawnga rawngbawlna thlur pawimawh tak chu ţawngţai rawngbawlna hmanga tihdamna hi a ni a, Pathian thu a awih tirh aţang rengin ţawngţaina a ngai pawimawh em em a. An chhungkua chauhva Pathian thu ringtu an nih lai aţang tawh khan ţawngţai lam hi an lo uar em em a, chhungkaw ţawngţaihonate an vawng uluk hleţ hin a ni. Mite sawi dan chuan an feh pawh hi thlam an va thlenah an ţawngţai a, an hawn dawnah thlamah an ţawngţai leh ţhin a ni, an ti. Mi ţhenkhat phei chuan an sawi uar deuh nge? “Thangbawnga te chhung chuan chaw lum an ei ve ngei hlei nem, a ţawngţai chhungin an chawhlui a dai vek zel alawm” an ti thin.

Thangbawnga hian mihringte damlohna hi ramhuai tihnat ngei a ni ang tih a ring tlat a, sualna avangin mihring taksaah natna a lo awm tih pawh a ring nghet tlat bawk a ni.

Ţawngtai ţawng kauchheh deuhte chu “Hmuaka’n min hmuak la, tih te, “rilru parfung chawiin” tih te “Lalpa nangmah ngaiin chhim a rûm a, hmar a rûm, thlâng a rûm a” tihte an ni. A tihtawp dan pawh “I dawvan kan kai a, Lal Isua hmingin kan dil e” a ti ţhin.

 

Ţum khat chu a fanu Chalziki theibal a ei sual a, a pum a na vak mai a. Pi leh pute pawh hian, “ theibal hi chu Châwm Nu-in a veng an lo ti ve fo reng a, theibal rah an lawh dawnte hian lungin an han ţâwng hmasa te te rih ţhin a ni ngai a.

Chalziki pumnâ chu a zual ta zel a, a thlangphang ta hle a. A pa Thangbawnga lah chu hmar lama zin tuma Ngharchhipa a riah chhuah ni a lo ni si a. Chalziki pumna chu a zual em avangin a boral hial pawh an hlau va, a pa Ngahrchhipa a awm chu an va ko va. A pa lo thlen lai vel pawh chuan a fanu pum na chu a zual hle mai a. Thangbawnga chuan a fanu chu ramhuai tihnat ngei a nih a ring tlat a, a fanu chu a thih mai a hlauhpui hle a. Thangbawnga chuan , ka fanu hi Pathianin ramhuai lak ata a chhanchhuah chuan keima phak vena tawk tawkah Pathian tana inhman ve ka intiam e” tiin a intiam ta hiala sawi a ni a, Pathian hnenah a han ţawngţai ta a, a ţawngţaina chu Pathianin a hlawhtlintir a, a fanu chua lo harhchhuakin a dam fel leh ta. Thangbawnga pawhin a thuthiam chu rinawm taka hlen a lo tum ta a. Pathian hnenah  a ţawngţai a, “ Lalpa engti kawnga min hman nge i duh dan le” tiin.

Pathianin a ţawngţaina hi a hlawhtlintira a hriat avangin amah pawh a tui chho nasa zel a, Pathian rawng a bawlna kawng pui ber tih tur a lo ni ta hial a. 

Thangbawnga hi mite lainatna ngah mi leh mi tlawmngai a ni a. Mite’n an damloh manganna a hnena an va thlena ţawngţaisak tura an sawm chuan eng hun lai pawh ni se, khawi hmun pawh ni se duhsak em emna thinlung pu chungin a ţawngţaisak peih reng a, ţawngţai dam theihna thilpek a vawn avangin damlote’n a ţawngţaiskana an beisei em em ţhin a. A awmna khua apiangah miten an ko huai huai thin a, dam lo tamnakhuaah phei hi chuan a ţul em em thin a, damlo tam takte’n inţawngţaitir turin an pan luai luai bawk ţhin a, a hah em em ţhin a ni.(Chhunzawm tur)

 

Thulakna;  (1) Mi Thianghlim Thangbawnga- Pu Selţhuama (2) Pathian Pasalţha Pu Thangbawnga- Robawm bua Pastor Chuautera ziak, July 1950.(3) Zofate Chanchin Ţha Rawn Hlantute- P.L.Lianzuala (4) Lal Isua Tuahrem Zoram, Harhna Thu- Lalhmuaka B.A.(5)Mizoram Baptist Kohhran Hruaitu Hmasa leh Sulsutute- BCM Publication Board

 

Compiled, edited & published by Familia Fanai Lalţansanga

Dated; The 12th February 2017 | Lunglei

Similar Articles

Top