You are here
Home > Zoram > PASTORS & LEADERS TRAINING PEK KAN ZO TA- C.T.Lalrinawma

PASTORS & LEADERS TRAINING PEK KAN ZO TA- C.T.Lalrinawma

PASTORS & LEADERS TRAINING PEK KAN ZO TA- C.T.Lalrinawma

July 14, 2017 khan Phum Thmey village, Svay Rieng province, Cambodia-Vietnam inrina bula “Pastors & Leaders Training” kan pek chu tluang takin, Pathian leh min lo tawngtaisaktute zarah kan zo ta. Pastors 13 leh Leaders 23 (hmeichhia 11) an lo tel thei a ni. Phum Thmey (Cambodian tawnga Khawthar tihna mai a ni) khuaah hian In 142 vel awmin, naupang nen Kristian 20 vel an awm ve tawh a ni. Leaders hote hi village leh district dang atanga lo kalkhawm, 15km leh 20km vela hla a mi te an ni.

20179657_1513906418667226_2131488287_n

 July 13 ah he Phum Thmey hi kan pan a, Cambodian ho hun hman dik loh thin vangin, ka kal oui tur mi 3 te chu dakar 2:40 ka nghak a, rin aiin mi nghah hi dawhtheih a lo ngai hle. Mihringte hian ngah (wait) tih hi kan ngeih vak lo! Pathian erawh chuan a fate hi “Lo nghak lawk teh” (just wait) tih leh “Ring mai rawh” (just believe) tih hi min chhanna leh hruai tumna a ni fo thin. Pathian chuan hun in ang veka mi tinte min pek laiin, Cambodian ho nena thil han tih ho changa hun an hmang diklo (flexible) lutuk thin chu, a ninawm viau.

Phnom Penh atanga 200km vel a nih vangin July 13 zan dar 8:15pm ah Phum Thmey hi tek tla sen zuai zuai leh ruah sur bur bur karah kan thleng thei a, electricity mumal takin a awm lova, mahse, hengah chuan China siam Generator leh Solar Energy eng pekna an hmang uar thin. Thingtlang pil ril deuh, in vel pawh kar inhlat deuh deuhva awm chi khua a lo ni a; kawngah kawng kan bo vangin leh ruah sur nasat vangin kan bo zauh zauh thin.

Khmer ho hi Vai te hi ang ka ti deuh thin a, an thil hriat loh mi zawh an hreh em em zel hi buaithlak duh hle. Kawngah chuan motor headlight tha si lo khan kawng bumboh-khuar leh khuar lo te, lei hnip lai leh lai lote a hmuh theih si lova. Kan kal tumna khua ber lah an hre chiang bawk si lo. Telephone-in an in be pah zel a, mahse, thim hnuaiah leh ruah sur nasa hnuaiah chuan kawng pek dik hriat a awlsam lo. Kawng an hre lo thin chu, “Kawng sira in lo awm te leh mite chu rawh u” tum 5 vel ka tih pawhin an zawt duh mang tlat lo! A tawpah kawng diklo zawhin 2km dawn kan tlan kirte a nfaih phah a ni. Thil hriat loh, mite zawh ngam mai hi ava finthlak em. Kawnga lei vung hnip laiah, ruah surin a chiah nem purah kan tan phah a!

Motor ke hmalam, ding lam chu a pil tawh si a, a hma lam atanga nawr chhuak chawikang deuhva kan beihna lamah chuan motor ke in phiat vir chiamin ka kekawrah chirh a rawn vawm kai tam hle a, nikhat chauh cham tura inngaiin inthlakna ka keng bawk si lo chuan rilru a tinuam viau lo. “Thil hriat loh chuan mi zawh hreh loh tur asin…nichinah zawt ru ka tih ka tih khan zawt ula, tlan let a ngai lovang” ka ti a, ka chuan pui 3 te chuan sawi tur reng an hre zui lo. Team-works anga thawh hi chuan a tam zawk duh dan zawm tul chang a tam a; he Leia ringtute khualzin kawngah hian remruat leh duhthusam ang vekin a lo kal theih loh a nih hi, tihte min ngaihtuah vang vang a ni.

Phum Thmey a kan thlen in pa (Pastor Men Savun) in chu Cambodian villagers te in dang anglo takin a sa lian hle mai a, a chhuat chu thingphel 2inch aia te tura phel sinin a phah chhuak vek a, a chhat hi lei atanga 12ft ang vel daih a ni a, khawlumah chuan a tihchi phian ang. In hnuaia Bawng thlun an ching erawh chuan, a zun leh ek rima ti na hma hle thung. Bawng 10, Vawk 9, Arsa 100 chuang, Sangha Dil 2 leh Varak leh Vatawk engemaw leh Ui 5 a vulh bawk a! Kan thlen zan pawhin Arsa hem hmin leh chhum han tawp min lo hlui teuh mai. A in bul vel chu Theihai leh Laui/Lamkhuang kungin a hual ngaw khup mai bawk a; thingtlang paah chuan awm thei tak niin, kum 2007 a Kristian a inpe a ni.

20158434_1513919238665944_605617940_n

July 14 ah zing dar 8am atangin program kan tan a, tlai dar 3:30pm-ah kan zo thei a ni. Ka tawng hi Pastor Nget Sarann, Kampot Evangelical Churches Association President-in a let a ni.. chawhma lamin Skype (video) hmangin Cambodian Australian Christian Church pastor pakhat, Pa thian hla pawh Khmer tawnga phuah nualtu leh anmahni hnam vei em emtu, refugee anga Pol Pol regime laia tlanchhia, Australia a awm hlen ta chuan “Spiritual Life in Christ” tih, discipleship lam subj a zirtir a; khawvel hmasawnna kal zelah Information Technology-Age of Digital Revolution hi a lo hman tangkai theih ngei mai. Projector nen amah chuan kan hmaah awmin, a tawng chu sound system-speaker tha takah a hriatfiah theih hle mai a, changkang vak lovah ka ngaihte chuan IT lamah hma an lo sawn ngei mai!

Kei chuan chaw hnu hunah “Krista danglam bikna” (Uniqueness of Christ) tih leh “Thilpek/thawlawm” (Giving) tih subj 2 ang deuhvin ka sawi a; Buddha leh Krista inanlohna te khaikhinin, Mizoram leh India chanchin te ka sawi a, Buhfaitham pawh anmahni kohhran intodelh nan ti ve tura fuih pahin, Mizoten Buhfaitham kan ngaih pawimawhzia ka sawi leh chiam. Mizo hre ngailo mi 50 dawnin Mizote chanchin chu, Chanchin Tha avangin an lo hriat belh ve ta a ni. Chhun chaw hmeh turin Bawng no deuh, 35kg vel tur hi an talhin an hem hmin a, Bawng hi US$200 man niin, Australia a awm Cambodian kristianten an rawn tum sak a ni. An bawng talh dan leh sawngbawl dan vel chu uluk takin ka en a, an hem hmin vangin chaw hmeh tur hawp tur erawh a awm lo! Khmer ho hian sa hem hmin leh thlai hem hmin ei hi an uar hle a ni.

20158508_1513919285332606_57656852_n

Ka tawng mai loh vangin anmahni Cambodian pa emaw min lo ti deuh vek a! Indian ka ni tih ka tawnglettu Pastor Nget Sarann chuan an sawifiah a, “Samak” hmu niawm takin mak an tih hmelin, thenkhat chu Khiang rah tla ang maiin an khi reng mai a ni. Indian-Vai hmel kan lo pu si lova, S.E Asian zinga Chanchin Tha hrilh nana advantage pakhat chu a lo ni e. Tin, Buddhist World bei turin leh Anamist-Tribal hote zinga Chanchin Tha hril turin Mizoten advantage tam tak kan neih phahin ka hria. “Indiaah Buddhism chu a lo piang a…Gautama Buddha chu Lal fapa a ni…India buddhist an tlem, S.E Asia-ah in lo tam hle si!” kan tih chuan mak an ti zual. “Kristianna chu….kristiante Pathian chu Western sakhua, ram dang mite sakhua tih in ching a, Buddhism pawh in ta a ni lova, India atanga lo kal ve mai chauh a nia…” ka’n tih chuan dik an ti ve viau thin a ni ang. Isua danglam bikna te leh a zirtirna “In hmangaih tawn rawh u” (Love One Another) tih chu uar taka sawi pahin, Buddha chuan “Tharum thawhlohna” (Non-Violence) a sawi mawi thung a….te kan tih chuan “Amen, amen” an lo ti ve tliar tliar thin a ni.

20134817_1513919165332618_349499080_n

Lunch ei zawh chuan an khaw bul hnai pakhat Samroang Market an ti ta in ka hria, kan thlen in pa leh Harvest Time Church, Cambodia ka lawina Upa pakhat chu Bike-in Ni sa hnuaiah an kal chhuak a, enge an tih dawn tih ka zawh chuan, “I coffee in tur-vur nena siam an lei dawn” tih min hrilh a, an kalna tur, coffee an va leina tur chu 11km chuang a ni awm e. “A va hla ve aw…” ka tih chuan Seda chuan, “Chutiangin ngaihtuah suh. Hla deuhva ngaihtuah chuan a hmun a thlen theih ngai loh!” tiin min lo chhang thuai a, “Nizanah pawh kawngte bo vin a hlat em kha! Mahse, kan kal zel a, he hmun hi kan thleng ta a ni…” a lo ti sam et a! Ka ngaihtuah a va kal tir thui teh lul em. A dik. “Thil thui deuhva ngaiha thleng pha lo tura inngaihna rilru” hi Pathian rawngbawltute kan ni emaw, ni lo emaw, tu pawhin “A hla lutuk, a thui em mai” ti ringawt lovin, hmuh phak chin, thlen phak chin zelah tha thlah lovin lo pan a, kal tauh tauh thin tur a lo ni!

20134734_1513919208665947_38457847_n

Kawng hi a lo awm zel a, a kal na na nachuan a tawp thlengin an kal thin a lo ni! Tlang sang leh tuifinriat thuk dum kuk te pawh hi kan zel chuan tawp chin an lo nei vek a ni e. Zion fate i kal zel ang u! “Kal lai kan ni, i chaw lo vang…” tih hla ang khan. Seda tawngkam chuan spiritual insight min zirtir a, sermon pakhat ka chhar chhuah phah nghe nghe a ni! (pic: Bawng no an talh, an hem hmun leh ei pawlh tura Tumbu zai hlep leh chawhpawlh vel a ni e-ct)

20197097_1513919218665946_349056417_n

Similar Articles

Top