You are here
Home > CCT Robawm > PASTOR LIANGKHAIA (1884-1979)

PASTOR LIANGKHAIA (1884-1979)

PASTOR LIANGKHAIA (1884-1979)

(Mizote tana Pathian mi hman, kohhran tana mi tangkai tak Pastor Liangkhaia thih champhia vawiin June ni 27 hian amah hriatreng nan a chanchin tawi tihchhuah a ni)

VIRTHLILENG copy

1979 Synod bu-a ‘Khawmpui leh Committee thu zah thiam a, Kohhran phuntu leh chawmtu, Zoram Kohhran ban zinga pakhat chu a ni ngei mai,’ tia an ziah kha Rev. Liangkhaia hi a ni.

Pastor Liangkhaia
Kum 1884 khan Pu Thanghluta leh Pi Hauchhingi ten Saihum khuaa fapa an hrin chu a hmingah Hrangchina an sa a. A pian atanga tuk thum tukah arte hring banin an thawi a. Mi dangte a thawia a tih dan lovin a thawitu chuan arte chu a nghawngah hmawlh te zai kaka chehtirin, liangah a thiat a. Mite’n mak an ti a, “Intih dan a mak em mai a, naupang pawh hi ‘Liangkhaia’ tih ngei tur a ni ang” an ti a. Chuta tang chuan Liangkhaia tih a ni zui ta a ni.

rev.liangkhaia
Saihum atang chuan Sentlangah an pem, 1889-ah vai lianin an hal avangin Thingkhuangah an awm leh a. Chuta tangin Zialungah an lut a. Zialungah hian ziak leh chhiar a thiam a. Kum 1904-ah Zawngin-ah an pem a. 1908-ah Lower Primary exam turin Aizawlah a kal a. Exam hma ni sawm vel lek sikul a kal hman nain an result a chhuah chuan pakhatna a ni. Chumi tum chuan a thlen inten Isua chanchin an neih chu a chhiar a, a rilru a hneh hle a. Pathian a ring ta a.

Sap Upa & Pu Buanga
Sap Upa & Pu Buanga

Pathian thu a awih avangin a thianpa Tumbiala nen na fe fein tum thum ngawt an lalin a vel a. Liangkhaia dar a tihchhiat sak chu a piansualpui ta nghe nghe a. An lal chuan khuaa awmah pawh a duh lo va, “Ka thah hma che u hian tlan bo rawh u,” a tih avangin Zokhawsang-ah an pem leh a. Kum 1910-1912 chhungin Tirhkoh hna a zir a. Zo Saphluia’n Pathian thu zir tura a tih avangin Chera-ah Pathian thu a zir a. A kum khatnaah hian pahnihna a ni a, a bak chu a zir chhung zawngin pakhatna a ni tluan chhuak parh.
April 13, 1917-ah Ngurchhuani nen an innei a. Fapa L.Biakliana an nei a. A nupui chu a thi ta mai a. Kum 1924-ah makpa hnam hrual chat zawmin, a nupui nau Ngurliani nen inneiin, ani nen hian fa 11 an nei a. Kum 1922-a Pastor atana an nemngheh atangin 1954 thlenga thawkin a pension a. A pension hnu-in Aizawl Theological College-ah rawih a ni.
Mizo History ziaktu hmasa, Pathian thu, Culture, Astronomy, Education leh hla lam lehkhabu ziak leh lehlin thawktu, Rev Liangkhaia hi 24th March 1979-ah Mizo Accademy of Letter-in Award an pe a. MAL Award dawng hmsa ber a ni. Mizo Literature ban zinga pakhat Rev Liangkhaia hi 27th June 1979-ah a Lalpa’n a hnena cheng turin a seng ta a ni.

Rev. Liangkhaia (1884-1979) THIH CHAMPHA CHU JUNE 27

  Kum 37 a lo liam ta reng mai.

        Kum 1979 June 27 zan kha a mar deh tur  awm loh tan hun chu a ni a, he khawvelah hian thawk a la zui ta lo. Kha zan tak kha aw…Aizawlah chuan Karfiu (Curfew) an puang a, Cachar leh Mizoram inep vang lai kha a ni a, mi an zalen lo hle. Thingtlang khaw te reuh tea hmeithai fa rethei bak berh leh hmelchhe ve tak, Kristian a nih vanga an lalin a nghaisak hnua pianphunga rual ban zo ta lo chanchin han sawi chiam mai chu mak angreng tak a ni. Mahse Zofate zirna muala ram pawna pakhatna ni thei hmasa, Mizo History ziak hmasa,    khawvel hla ‘puma zai’ pawchhuaktu, thu leh hlaa hming chhera Academy dawng hmasa ber leh Mizo Kohhranho khawmpui lian bera țum 5 lai Moderator hna lo chelha berampu hna kum 96 a nih thlenga lo thawk tawh Pastor Liangkhaia chanchin hi țhangtharte hriat tura han chhawp chhuah zauh hi a tha awm e.

Thawnthu ngaihnawm ve tak ang mai a ni ta. Kum zabi 20-na tawp dawn lamah khan pa pakhat Thanghluta hi Saihum khua-ah a awm a, rál that pasalțha a ni ve ngat mai nghe nghe a. Pasalțhate chu mi huaisen, tlawmngai leh thil țha chi hrang hrang tih uar mi, a țul huna an hmelmate beia hmachhawn ngam, an do rál  thata mi lute la ngam khawpa hlauh nei lo mi an ni. Kum 1884 tawp lamah khan Thanghluta chuan fapa pakhat a nei ta hlauh mai a, a pasalțhat leh rál that mi huaisen a nihna chawi chuan a hmingah Hrangchina tih a phuah ta a.

Kan pi leh pute hunlai chuan nau an pian reng rengin arte-hringban an ti a, arte hmanga inthawi ngei ngei tur a ni a. Chu nausen pawh chu arte hmang chuan an thawi ta ngei a, a thawitu puithiam chu pa phawk leh fiamthu maksak tak thawh duh mi a lo ni a. Ani chuan arte chu mi tih dana hmawlhtea chepa banga thiat țha ve hle hle ta mai lo chuan, a maksak thei ang berin liang filawrah chuan a han khai ta vá mai a.

Arte chu a chiap ta lauh lauh mai a, mi lo kal khawmte chuan  an rawn hmuhin,chutia arte lianga inkhai ta vá mai chu mak an ti hle a. “E khai, in nautè hi Hrangchina ti lovin Liangkhaia tih tur a nih zawk hi, liangah in khai sia Liangkhaia a nih hi Liangkhaia,” an ti a. Tichuan, Liangkhaia tih hming chu a lo pu hlen ta a ni. Chu artè, lianga inkhai chu mipa naupang lo kal zinga pakhat chuan a han hawlh thla a, a ar chuam atan a la ta daih mai nghe nghe a ni.

Hunte a lo kal zel a, naupang rilru tumtlang tak Liangkhaia chu a lo țhang chho ve chhet chhet a, naupang țhang mawh tak leh chawrchê tak a ni a, a hmel lah a țha lem lo hle mai si. Naupang harh tak leh thil intihre tak a ni a, a hriat tawh chu a hre reng zel a. A rualpuite zingah pawh thil a hriat theih em avangin ro han rel mai thei a ni zel a. A aia lian leh puitling zawkte chuan chutianga naupangte si thil dilchhût tak leh intihre taka țawng țhin mi chu an ngaithei lo hle țhin a, mahse thil hriat lamah an tluk si lo.

A pa-in a thihsan hma em avangin Liangkhaia-te chhungkua chu an rethei hle mai a, mi tan pawh hmuhsitawm tak an ni. Thingnawi fawm rual a nih lai ațangin naupang Liangkhaia chuan ram lam hna chi hrang hrang a thawk ve fat fat a, a feh hawn kawngah Zawlbuka keuh tur thing nawi a´n fawm khawm leh zawk zawk bawk țhin a.

Chutih karah chuan zirtirtu pawh nei lovin amahin ziak leh chhiar a zir a, mau ro an chhêm a, mei ėngah chuan lehkha ziak leh chhiar a zir ngat ngat a. Kawlawm leh lehkhapuan leina tur nei zo ve hek lo le, mau phel chhung lam var laiah chuan meihawlin ziak a zir a. Chhunah ramah hah takin hna a thawk a, zanah mei ėngah a theih ang angin lehkha a zir chho zel a. A thiam zawkte zawt chawpin lehkha ziak  leh chhiar chu zir mah se rei lote hnu-ah chuan a țhian hnai zualte zirtir chhawngtu a ni thei ta der mai.

Sikul pangngaia kal ve a, mi tih dan pangngaia lehkha han zir ve chu a chak thei em em a, mahse an retheih em avangin a tan kawng a inhawng thei si lo. Chhungkaw chawmtu a nih avangin a chhungte kalsana khaw lian zawka lehkha zir thei a ni bawk si lo nen, a theih ang tawka mahnia inzir ngat ngat mai loh chu atan kawng a awm lo.

An pem luhna khua Zâwngin-ah phei chuan thil zir a bei ngawrh lehzual a. Mikhual lo kalte hi thil a lo zawt țhin a, mak an ti țhin hle. Ziak leh chhiar a thiam bel hle hnu-ah chuan an lal Lalzika chuan a hmang țangkai ta hle a. Kum 1901 chhiarpui neih laite khan khawchhiar țanpuitu-ah a țang ve zar zar tawh a ni.

Vawi khat chu an khaw upa pakhat nen Khawruhlian-ah a ba țhing turin a tir a, chuta an zinnaah chuan mi ang manglo nau awih hla danglam tak mai hi a hre ta a. Chu hla chu Zâwngin-ah Liangkhaia chuan zawlbuk velah a´n sa a, tlangval hawklak dang chuan an lo zawm ve thuai a. An sa zel a, hla thar a pawchhuak chu a ni ta der a. Chu hla tlar tawpah chuan Puma tih a awm zel avangin, ‘Puma zai’ an ti ta a, chu hla thlûk anga sak theih tur chuan hla dang a phuah zui thei mai zel si a. Chu hla chu an tuipui ta khawp mai a, tlangval dang pakhat chuan Puma zai an tih tak thlûk chuan hla a phuah a phuah ta mai bawk nen. Zu hmunah te an sa a, lam nan an hmang a, a rual te-in an lampui ta dual dual mai a ni. Chu Zai chuan mipui a chawk hlimin, a lo lar ta hle a, an lal Lalzika chuan Sialin a ai ta hial a. Tlangvalho ringawtin sa ta lo chuan, mi tam takin chutiang hla chu an lo sa thiam ta a, ram pum a fan chhuak ta a ni.

Liangkhaia chuan chutia Zâwngin khuaa awma zai leh lam mup mup ringawt mai chu hmasawnna tur awmin a hre lo hle a, ama tawkah lehkha te lo zir a, ziak leh chhiar thiam tawh a nih avang leh hmasawn zel duh mi a nih avangin a țhiante pahnih a sawm a, Lower Primary Exam-naa tel tumin an lalin Puma Zai a aih ni pawh nghak thleng zo lovin Aizawl an pan ta ngawt mai a.

An tum ang ngei chuan pawl thum chu 1908 khan an han ekzam ve ta a. Aizawl khuaa zirlaite leh an țhiante chuan sikul pangngaia kal lo thingtlang naupang, zirlaibu pawh nei hlei lo chu an lo hmusitin an tlin zawh ve pawh an ring lo  reng reng a. Mahse anni Liangkhaia leh a țhiante chuan an ekzam chu harsa ti vak lovin an zo ve ta mai a. An rizal a lo chhuah meuh chuan an rin ai daihin an lo tițha a. Liangkhaia phei chu a sang ber a ni ta daih mai a, a tira anmahni lo hmusittute ai pawh chuan an lo thiam si a, zirlai leh zirtirtute pawh chuan mak an ti em em a, sawi tur hre lovin an ka ho ringawt mai a ni.

Lâwr ekzam laia Aizawla a cham chhung chuan ‘Isua chanchin’ tih lehkhabu hi a thlen inte chuan an lo nei a, chu chu a chhiar nauh nauh țhin a. Chhiar nuam a tiin a rilru a khawih em em ta mai a. Isua khenbeh thu a han chhiar lai te chuan rinhlelhna pakhat mah nei lovin a tak takah a pawm thlap zel a. Lal Isua chu a khawngaih em avang leh a nun chuan a rilru a hneh em avangin chhiar hlei thei lo khawp hialin a mittui a tla ta țhin a. A han inhru hul hmasa leh te te a, a chhiar chhunzawm leh țhin a. A hnuk a ulh a, a mittui a far zung zung țhin a ni. A chhiar apiangin chutiang chuan a awm zel mai a, chuta chin chu Pathian thu awihah a  inngai ve ta a, mahse tu hnenah mah hming chu a la pe lo.

An rizal a lo chhuaha mite rin aia a lo tihțhat tak avang chuan amah pawh a lawm hle a, Isuan a thinlung a khawih danglamsak tak avang pawh chuan lawmawm a tiin a rilru a hlim hle mai a. A tan chuan khawvel thar a ni ngawt a, ina hawa a chhungte leh a țhiante hnena Isua chanchin han hrilh vel chu a thil tih chak ber a ni. Chumi rilru pu chuan an khua Zâwngin chu rilru thawveng tak leh hlim takin a pan ta vang vang a.

Amaherawhchu, an khua an han thlen chuan an rin ang leh beisei ang rengin thil a kal ta lo. Hêktu an awm a ni ngei ang. An khua an han thlen chuan an lal chuan a ko thuai a, thinrim engphiarin hian, “In inti Pathian thu awih a, kan tlanglàm min hmu peih lo va, in tlanbo a ni,” a lo ti ta tlut mai a.

Thiam thu sawi theiin an lal chuan a siam lo. Thinrim takin a hau tun tun reng ta mai a. Pum Zai ațanga ‘tlanglàm zai’ an duh tak loh vanga zin chhuak ni hauh si lo chu, tute emaw avangin an țhianho chu hrem tur an lo ni ta. Liangkhaia phei chu a hotu ber, a țhiante hruai sualtu-ah ngaiin Bualpui bangla saa zan 10 riaka kuli turin khua a thlen tukah chuan hahchawl hman miah lovin an lal chuan a tir chhuak leh ta a. Chu chu hremna a tawh hmasa ber, Krista vanga a tawrhna hmasa ber a ni.

Kum 1906-a an khaw țhenawm Vanphunga khua Khandaiha Kristian ho an hrem rual khan Kristian chanchin hi a hre țan ve chauh  a, kum 1908-ah chuan amah ngeiin hremna chi hrang hrang a lo tuar ve ta a. Mahse Kristian nih vanga tuar chu hrehawm a ti chuang lo.

An lal Lalzika chuan Liangkhaia chu kawng hrang hrangin a Pathian phat leh mai turin a thlêm țhin a, a changin țha taka biain a Kristianna bansan turin a thlêm a, a chang leh a vau bawk țhin. “Lehkha thiam mah ula, Pathian thu in awih chuan ka khuaah nuam in ti rei lo vang,’”a ti a. A chang leh, “Pathian thu hi awih lo la ka khuaa tlangval fel ber, lehkhathiam ber i ni a, ziaktuah ka hmang ang che. Ka upa lal berte zinga pakhat i ni ve ang,” ti te-in a thlem bawk țhin.

Mahse, Liangkhaia chu mi rilru nghet tak a ni a, a rinna chu bansan leh phal chi niin a hre hek lo. Tihduhdahna leh vuakna, hremna leh hrehawmna tinreng tuar huama Isua zui a lo tum tlat tawh avangin an lal sawmna, zilhna leh vaunate pawh chu a ngai pawimawh zo ta lo.

Ni khat chu chhun reh lai tak hian a țhianpa Tumbila nen Zawlbuka an hun tawng makzia leh hriatthiam harsa an tih thu te an  sawi mek laiin,  tuten emaw an lo ngaithla ru a, an lal hnenah an lo han zualko chu niin. A hma pawha a lo thinrim tawhsa nak alaiin chutia an han hrilh leh takah chuan an lal chu a thinur em em a. Zawlbukah chuan a zuk luhkhung nghal a. “Ka khua leh tuia ka duh loh zawnga awm hrim hrim chu nuam in ti lo vang e, eng nge Pathian Pathian in tih, in Pathian chu keimah hi ka ni alawm, ka tihhlum hma che u hian pem daih rawh u. Ka khua leh tuia ka thu awih lo chu khua leh tuiah pawh ka duh hleinem, ka tihhlum hma che u hian pêm rang rawh u,” a ti tun tun a.

Anni țhian dun chuan chhanlet chu sawi loh, en pawh an en ngam lo va, an kun dun ràn mai a. Ngawi renga an awm pawh chuan Lalzika thinrim chu a tizual zel a ni ang chu, vuakna tur  tiang țha a zawng a.  Mau tiang chhah țha bel bawl hi a hmu a, chu chu a la lawk a, an pahnih chuan a vaw ta zawt zawt mai a, a vaw na hle mai. A vuakna tiang chuan a dâwl ta lo va, a keh chhe ta vek mai a ni. A na awm hle mai.

Chumi hnu zan thumna velah chuan zan rei tawh tak, tlangval leng hawng mu tura an insiam zawh țhup tawh laiin an țhiandun bawk chu Zawlbuk ata lal inah an ko chho va. An lal chu khumái lam dawh chhovah hian a lo țhu a, a upa pali lai mai chu a kiangah an lo awm bawk a. Lal chu a lo ang mial mial a, anni țhiandun chu tap sût bulah hian an dintir a, “Eng nge Pathian thute chu ka awih e in tih! In Pathian chu keimah hi ka ni mai alawm, duha tichhe thei leh tițha thei che u ka ni lawm ni? Lehkha ka zir ang a, ka thiam ang a, ka lal ang in ti a ni maw? Lal eng ang mah ula nangni Khiangte zawng zawng leh Ralte zawng zawng ka ngam loh che u chuan ka lu hi meiah ka rawh mai ang! Ka tihhlum hma che u hian thlawk bo rang rawh u,” a ti a.

A thinrim lutuk chuan a ha chang chu a țhial ri rap rap mai a. Chaicheh hian tap chu a chhun chawrh chawrh țhin a; chaicheh chuan a vaw hreh deuh a ni ang, a dah lawk a. Vuak fung dang a han zawng a, tuthlawh-ha suih loh hi a hmu ta hlauh mai a, chu chu mau bul lian tawk tak, chhah bel bawl, rit țha tak a ni. Chumi chuan an pahnih chuan a vaw dun ta hrep mai a; a vaw nasa lutuk a, Liangkhaia te țhiandun chu an thi lo chauh a ni ber e.

An tan han khawih let ve a thiang si lo, lal te chu an lal nasa mai si a, anni lah mi chhe fa mai leh khaw khatah pawha rethei berh tak chhung ațanga chhuak ve ve an ni bawk nen, an dikna ngei ngei pawh sawi thei lovin an tuar tlawk tlawk mai a. An lalin duhtawka a vuak hnu chuan an țhiandun chuan an riahna tur lam chu an pan a, kal pawh an kal thei lo va, thi hnuang chungin Zawlbuk lam an pan a. Tu mah țanpuitu leh khawngaihtu, chhantu an nei si lo va, tu mah lahin an chhan ngam hek lo, harsa ti tak chung chuan an bawkvak zel a, thei leh thei lovin Zawlbuk chu an vak thleng thei ta hram a ni.

An lal chuan a lo vaw na hle mai a, Liangkhaia chu tlangval thau lo tak, sa nei mang lo, cher deuh țhei țhawi a ni a, an lal vuakna chu na a ti rei hle a, a ban vei lam invuahna ruh chu an lal chuan a vuak chhiatsak hi a lo ni a, a piansual hlen phah ta a. A thih ni thlengin a ban vei lam chu a lu aia sangah a phar chho thei lo. Chutiang khawp chuan Liangkhaia chuan Pathian thu a awih avangin a lo tuar ta a ni. A țhianpa Tumbila pawh chu a vaw na hle a, ani chu tlema thau deuh leh sa țha deuh a lo ni hlauh a, chu vang chuan Liangkhaia ang em chuan a tuar nasa ve ta lo a ni.

Chuta chinah chuan an lal chuan anni țhiandun chu vuak tumin a zawng ta fo mai a, awmkhawmna deuh apiangah vuakna tur tiang nen a zawng reng țhin a. An nun chu a him lo hle mai. An hmel a hmuh tawh phawt chuan hla deuh pawh ni se, sairawkherh talin a perh zui ngei ngei țhin.

Chuti chuan hun a lo kal zel a, lal nena an inkar chuan țhat lam a pan thei ta chuang lo. A tawpa tawpah chuan an lal chuan Liangkhaia te țhiandun chu a khua ata zanlaiah a hnawtchhuak ta hial a. Chu zan chu an tan a hlimawm mawlh lo.

Ruahpui vanawn surin kawl a phe zuai zuai a, thlipui namen lo tleh tur ang maiin thli a thaw hum hum a, khawpui a ri dur dur bawk a. A hnu lawkah chuan nasa tak maiin thlipui chu a lo thawk ta ngei a, chuti chung chung chuan lal thupek lah hnial chi rual a nih loh avangin ruahpui vanawn sur karah chuan țhiandun lainatawm takte chuan an hmangaih takte awmna khua Zâwngin chu kir leh tawh ngai reng reng lo turin an chhuahsan ta a ni.

Chumi zana kawng chhengchhe tak han thimzia lah chu, ai-mit-thlawn an tih chu nep te a ni, kawng reng a hmuh theih loh. Ruah sur nasat avangin meichher chhit theih a ni bawk si lo, an rin kal ta mawp mawp mai a. Kawng dapchawp chung leh kalna tur pawh hre mumal lo chung chuan anni țhiandun chu Lal Isua hmingin an vakvai ta. Ramhnuaiah, thawmhnaw lum pawh nei lo leh eng pakhat mah nei lovin, ramsa hlauhawm pui pui karah chuan harsa ti tak chungin an kal zel a, khua an nghak var a. A tuk khaw engah kal zelin  Zokhawsang an thleng ta hlawl mai a ni.

Zokhawsangah chuan tlangval puanthuah khai an lo tlem hle mai a. Chutih laia lehkhathiam Lâwr zo tawh ve ve tlangval țha tak mai chu an khuaa awm nghetah an lo duh em em mai a. Kohhranah pawh an theih ang tawk tawkin an chhawr țangkai  nghal a, baptisma pawh an chan hma-in thu te an sawi ve nghal ta mai zel a. Chutiang taka an chhawr avang chuan anni țhiandun pawh chuan hma an sawn phah hle mai.

Zokhawsang ațang chuan Aizawl chu hnai te a nih tawh avangin Zosapte nen pawh an lo inhmu ta fo va. Kum 1909 December-ah chuan Aizawlah Baptisma chang turin Liangkhaia chu a zuk kal a, hming pek chu a chak ngawih ngawih tawh a ni. Zosaphluia chuan a hming a lo zawt a, “In hming lem mai mai ni lo, in hming tak, in nu leh pate sak ngei a ni tur a ni,” a ti a. Liangkhaia chu Hrangchina tiin a lo baptis ta a, chu chu a Kristian hming a ni ta mai zawk awm e.

Liangkhaia chuan Pathian thu zir a chak em em a, kum 1910-a lo nih chuan Pathian thu zir a țan ta chat a. Kum 1913-ah Khasi ram Cherra-ah a zir chhunzawm a. Sam zial ngauh mai a la nih avangin mite chuan hnam mawl, zâwng û awrh enin an lo en a. Khasi leh hnam dang zirlai hote chuan an ngaisang lo kher mai, a tirah phei chuan an thamlo em em a ni. Hmuhsitawm tak a ni rêng mai thei e, a hmel a țha si lo, incheina a nei țha bawk si lo, a pawr fap mai a. A tirah chuan sap țawng pawh thiam țha hek lo le, duh hun huna ‘Yes’ mai a, duh hun huna ‘No’ mai mai kha a ni bawk nen. Han ngaihsan chi ziazang chu a ni lo ve.

Mahse, chu tlangval zuamawm tak chu mi taima leh lehkha zir nasa mi a ni a. Hnam dang zirlaite chuan thamlo viau mah se an han ekzam (first term) meuh chuan, a sang ber dawttu a ni nghal der a.  A zirlai chu a zir nasa em em a, lehkhabu a hmuh apiang a chhiar chhuak parh parh zel a. An retheih vangin lehkhabu leina tur pawisa pawh nei ve hek lo le, a hunawl apiangah Library-ah a kal a, a theih anga tam chhiarin chhinchhiah ngaite a lakai zung zung a. Lehkhabĩkah chuan a hun zawng zawng deuhthaw a hmang a. Theihtawp chhuaha lehkha a zir ngat ngat avangin kum chanve hnu lam a lo nih chuan an zirlai zawng zawng chu a thiam zo ta vek a, ekzam apiangin pakhatna a ni chho ta zat zat a ni.

An zir tur chin (Course) a thiam zawh hnu-ah chuan zir belh tur leh thiam loh a neih tak loh avangin lehkhabu chi hrang hrang chhiar nan hunawl a lo nei thei ta a. Chungah chuan Science lam te, damdawi lam thil te leh khawvel sawrkar inrelbawl dan te a thiam ang tawk tawkin a zir zau a, hunawl a nei ve ngai lo. Lehkha ziak leh chhiara inzirvàr reng a duh avangin len mai mai nan hun a nei ve ngai lo. ‘Lehkhabu hrik’ (Book-worm) an ti mai a, a hun zawng zawng chu thil țangkai zir nan a hmang zo vek țhin a ni. Han ngaihtuah ve mah teh u, tlangval Liangkhaia chuan kum khat chhunga an zir tur, zirlaibua chuang reng reng chu pakhat mah hmaih lovin a thiam chhuak vek a nih chu!  A zir taihmak vangin Pathian țanpuina pawh a dawng nasa hle tihna a ni.

Khasi ram Cherra khuaa a awm lai hian Tonic Solfa a zir tel bawk a, Zofate zinga Tonic Solfa Certificate chi thum -Junior, Elementary leh Intermediate Certificate nei kim hmasa ber a ni ta nghe nghe. Amah hi zaithiam a ni bawk a, Mizoramah chuan malzai (solo) ching hmasa ber a ni awm e, 1915-16 vel ațang khan mipui hma-ah a zai țan a. Mizoram hmun hrang hrangah rawngbawlin a chhuak a, thusawi thiam a nih avangin Mizoram chhung mai ni lo, ram pawn lam ațang te-in thusawi tura sawmna a hmu deuh reng a, chūnga a kalnaah chuan thu a sawi a, a zai nghal bawk țhin. A rawngbawlna a nung hle a, mi tam takin piantharna an chan phah a, damlo tam takin damna an chang bawk. Hla lama tui mi a ni bawk a, a hla phuah leh lehlinte hi 50 chuang zet a awm bawk a ni.

Liangkhaia hi lehkha thiam thei tak a ni tih kan sawi tawh kha, ziak leh chhiar a thiam tirh ațangin ni tin Dairi (diary) a ziak țhin a, chu chu a thih dawn hnaih thlengin a chhunzawm reng a ni. Mi thil chîk mi leh a thil hmuh leh hriatte ziaka vawng țha thlap thlap mi a ni a, chu chu Mizote tan a țangkai em em. Chūng a thil chhinchhiahte hmang chuan lehkhabu pakhat ‘Mizo chanchin’ tih chu 1920 chhovah khan a ziak a, 1938-ah chhut a ni. Chu chu Mizoten kan Hnam chanchin (History) ziaka kan neih hmasak ber a lo ni ta. Hei bakah hian lehkhabu 40 vel lai a ziak a, hmánlai kan pi leh puten arsi chanchin an hriat dan leh pipute ațanga an lo inzirtir thil chi hrang hrangte a lo vawngțha thlap a. Arsi chanchinte phei chu a lem nena en theiha a siam avangin naupangte tan pawh awlsam taka hriat mai theih a ni a, a țangkai hle a, a ngaihnawm hlawm hle bawk.

Tichuan, Liangkhaia chu kum 1916-ah Tirhkoh a ni țan a, kum 1921-ah Pastor niin bial a awp țan a, a rawngbawl chhungin mi 7,587 lai baptisma a chantir a, nupa tuak 1,236 a inneihtir bawk. Amah anga mahni hnaa tui hi an vang khawp ang le. Kum 56 chhung zet, 57 hmelhmu Mizoram hmun hrang hrangah a Lalpa thu chu a lo vahkualpui a, a awmna apiangah mite rin leh rawn a lo ni ta zel a ni. A ngaihdan hriat duh hian mi chi hrang hrangin an kawm a, uluk taka thil ngaihtuah mi a niin ngun taka a zir chian hnuah chauh a ngaih dan a sawi țhin avangin dik nia a hriatah chuan a țang huai țhin hle a, thutlukna a siam ngheh tawh chuan a ngaih dan a sawhsawn zung zung ngai hek lo. Dik nia a hriatah chuan nghet takin a țang tlat țhin.

Pastor hna ațanga a pension hnu chuan Aizawl Theological College-a thawk turin an sawm a, a thawk ta a. Theological College zirlaite chu kum 12 chhung lai a zirtir leh a. Zirtirtu nih chu nuam a ti hle a, a tui hle bawk. A thiamna leh a thil hriatte naupangte leh la hre ve lote hnena han sawi chu nuam a tiin a phur hle țhin.

Pastor Liangkhaia chanchina kan sawi hmaih hauh loh tur chu lehkhabu letlingtu ropui a nihna hi a ni. Amah maiin Baibul bu mal 12 lai 1947-48 chhung khan a letling a, Mizorama Bible Society of India Branch President hmasa ber (1957) a ni bawk. Baibul leh a kaihhnawih thil hi a ziak tam hle. Baibul Pathian thu tih te, Pathian thu tluan tling tih te, Pathian Chatuan remruat tih te, Thu thlung hlui leh thar kar thu tih te, Hebrai leh Thupuan hrilhfiahna te, Kohhran leh a rawngbawl hna tih te, Chhandamna thu tih te, Kohhran siamțhatna bul te, Thusawm pek hrilhfiahna leh lehkhabu dang dang a ziak țeuh mai, sawi vek lo mai ang aw. Pathian thu lam ni lo, chanchin ngaihnawm leh chhiartute tifing tur chi pawh a lo ziak tam ngang mai e.

Chutiang taka Mizote tana mi țangkai chuan kum 1979 June ni 27 khan chatuan ram min lo pansan ta a. A thih hma lawk hian chawimawina hlu tak, Academy Award chu Mizo Academy of Letters-in an hlan a, thu leh hla lama chawimawina hlu tham dawng hmasa ber a ni ta nghe nghe. Kawng hrang hranga sulsutu, hla phuah thiam leh thuziaktu ropui, hnam tana rohlu tam tak hnutchhiahtu hian hriatreng a phu em em a ni.

Mizoram khawpui Aizawl khuaa Mission Veng thlanmualah a lei taksa chu zalh a ni a, chu hmunah chuan hriatrengna lung țha tak phun a ni. A thlan hi mi tam takin an tlawh deuh reng a ni. A naupan laiin hmelchhe hle mah se ‘a tar tawlh tawlha a hmelțha tial tial a ni’ an ti țhin. A kutchhuak leh thil țha tih chi hrang hrang avangin mi hratkhawkheng Liangkhaia hming hi he khawvelah hian a dai tawh ngai lo vang. India ram chhunga mi chhuanawm zingah pho chhuah ve ni ta se, thu leh hla leh kawng hrang hranga a dam rualpuite tana a hnathawh dan chipchiar hria tu ma´n mak an ti lovang tih a rinawm.

Rev. Liangkhaia pian champha phak vawi 125-na (Quasquicentennial jubilee 1884-2009) chu kawng hrang hranga lawm chhoh zel a ni a. A lehkhabute pawh chhutnawn leh a ni hlawm a.

Tunhnaiah BAIBUL PATHIAN THU tih te, THUSAWM PEK HRILHFIAHNA tih te, sap twang a chanchin ziak PIONEER TRIBAL SCHOLAR (ISPCK chhuah) tih bute a chhuak a. MIZO CHANCHIN za ziak chu miten an roh hle a, an hmang tangkai em em. THUPUAN HRILHFIAHNA a ziak chu chhut nawn a ni leh ta chiah a, a lehkha dang 30 vel chu hmuh theihin Bookroom hrang hrangah dah a ni a, Kohhranho lehkhabu dawrah chauh a lehkhabute hi hmuh leh lei theiha dah a ni.

 

Similar Articles

Top