You are here
Home > CCT Robawm > PASTOR B.THANGCHINA RINNNA HI – Familia Fanai Lalțansanga

PASTOR B.THANGCHINA RINNNA HI – Familia Fanai Lalțansanga

PASTOR B.THANGCHINA RINNNA HI – Familia Fanai Lalțansanga

Nazaret khuaa mi Isua thusawi;-

I rin chuan Pathian ropuizia i hmu ang, ka ti lo che em ni?

John 11:40; John Jesus saith unto her, Said I not unto thee, that, if thou wouldest believe, thou shouldest see the glory of God? ( KJV)

THANGCHINA

Mizoramah hian kum 31 lai ka lo awm ve ta reng mai a. Chumi chhunga Mizoram hmasawnzia hmu chiang em emtu ka ni hi vannei ka inti a. Chutih rualin vanduaithlak tak leh lungchhiathlak takin sum leh pai lakluh dan dik lo, rilru hrisel lo chhungkaw eng emaw zat rawihral ka hmu bawk a., pawi ka ti hle a.

IMG_20171215_163807_HDR

 Sam ziaktu-in;-

Mi suaksual chu nasa taka thu neia,

A țona hmuna thing chawr duah hluah anga a țawi bum lai ka hmu a.

Nimahsela kawngah mi a va kal a, tin, ngaiteh, ani chu a lo awm ta lo mai a:

A ni, ka zawng a, nimahsela hmuh theih a ni ta lo’ tih ziak hi a dikzia ka lo hmu ve ta bawk a.

Chutih mek laiin mi hriat hlawh lem loh chhungkaw dingchhuak an awm a, chhungkaw entawntlak tak tak an awm bawk. B.Ed kan zir laia kan zirtirtu Pi Lalliani’n, “Kan inhausak chhawk mai mai a ni, “ a tih te pawh ka hrechhuak rum rum thin a ni.

 

Sam hla siamtu-in,

Naupang ka lo ni tawh a, tunah târ ka lo ni ta a,

Nimahsela, mi fel chu kalsana a awm ka hmu ngai lo va,

A thlahte chaw khawn pawh ka hmu ngai hek lo’ a lo tih hi a  dikzia hrechiangtu ka lo ni ve ta a.

Mahni ngaih chuan “fel” leh “țha’ chu kan inti vek lawi si a, Sam ziaktu-in “mi fel” righteous a tih tak chu eng ber hi nge ni ang? tih hi bengsik meuhvin ka ngaihtuah fo thin a….Chu lam thu chu han sawi thui vak pawh ka tum lo va. Lunglei Zotlanga kan ţhenawm, kan kawmchhak pa , pasitawr siniar, pa entawntlak leh pa fel Pastor B.Thangchina Rinna hi han sawi ka tum a ni.

Ani hi Thingtlang khaw chengker, Bualpui(H)-a piang leh seilian a ni a, PWD mohorar a thawh laiin LALPA  chauh rinchhana rawngbawl tura kohna a dawng a, khawvel thil engmah innghahna tur leh rinchhan tur nei lo a ni a, khawvel khawi hmunah pawh Krista chanchin țha hril turin a chhungte nen an inpe a, Baptist Kohhranah dilna a thlen a, BCM Assembly chuan BD zir turin an thlang ta a. Serampore College-a zir tur a ni a, thlakhatah Rs 105/ chiah kohhranin a tumsak thei a, chhungkuaa kal lo thei an ni si  lo va. “Tlang lamahte khian ka mit ka len chho vang, khawi lama mi nge mi ţanpuina tur lo thleng ang? Mi țanpuina chu LALPA, Lei leh Van siamtu hnena mi a lo thleng ang” (Sam 121:1) tih ziak-ah chiah khan an innghat tawp mai a ni!

B.D First year chu Lungleia an neih zawng zawng an in leh lo an hralhna pawisa an kenthlak khan an tlingtla ve thei hram a. Kum 2 zir an la hmabak chu a nupui Pi Chalnawni’n “Van Treasury kan ring dawn” a tih angin  an nghak ta chawt a. An mahni ţanpuina tur chu Lalpa hnen ata London atangin a lo thleng hmasa a, a kum thumnaah chuan USA Southern Baptist atangin a lo thleng leh ta a ni. Serampore-ah hian an fate school kal tirna an neih loh avangin Pi Chawlnawni hian a fate hi an sitting roomah lehkha a zirtir ţhin a ni. An pasalin  B.D a zir zawh hnu chuan Pastor hna chu Phawngpui Bial Sangau-ah a thawk ţan ve ta a ni.

Sangau bial atangin Tripura missionary hna thawk tura chunglam kohna a dawng leh a, an chhuk dawnin an fate zirna kawngah harsatna a awm palh an hlauhpui avangin TBCU hotute chuan an fate chu Mizorama hnutchhiah rih mai turin an rawn a, nimahsela Lalpan an awm dan tur chu a ngaihtuah sak mai ang tih ringin chhangchhe bungbawr takin an chhungkua-in Tripura-ah chuan an chhuk ta a. Tripura khawpuia an awm lai hian an fate lehkhazir tiffin atan artui pumkhat pawh an siamsak thei lo va, Liandova te unauvin vaimim fangkhat an inphel ang khan artui pumkhat hi an inphel a ni.

Tripura khawpui Agartala atanga Bangalore-a Pathian thu zir tura an chhuk dawnin Bangalore-a school admission harsatzia leh insenso a sanzia te kan hriatin an huphurh hle a. Mahse Pathian rinchhanin  an chhung kal leh tawp a.

Bangalore an zuk thlenthlak chuan Pathian mite, mi fel leh ţha tak tak Rev.Dr.K.Thanzauva te, mi azawnga mi hmingţha leh mi rinkai Pu H.T.Sangliana IPS te, Dr.Balrag, Biship Cotton School Principal te hmangin English Medium School ţha tak mai, Bishop Cotton School-ah an fate pali chu admit vek an lo ni ta a. Chu-achhapah Principal chuan an fate chu missionary fate an nih avangin pahnih chu free student, pahnih dang chu 50% concession student-ah an dahsak a.

Chu chauh chu a la ni lo, Pastor B.Thangchina leh a nupui te chu Mizo zirlaite Mizo țawng zirtir turin an ruai a, Inrinni apiangin an zirtir ţhin a, lawman, hlawh an pe leh ta nghal a. Heng avang hian an fate pali chu Bangalore school ţha atangin ICBE Board exam chu ţha takin an pass vek nghe nghe a. Ani pawh M.Th( Missiology) chu Pathian khawngaihna avang liau liauvin 1st Class First-ah a pass ve a ni. Lal Isua hi “ finna leh Hriatna ro zawng zawng thuhrukna” chu a lo ni tak meuh a ni. ( Kolosa 2:2).

Rawngbawlna hlawhtling, rahchhuah nei tur chuan rinnaa hmalak a ngai, mahni theihnaah ni lovin, midang pawha innghat hek lovin, Pathianah chauh inghat a, a duhdan ngaih pawimawh ber tur a ni.

Kum 1980 khan St.James’ High School, Gangarai, Tripuraah Pastor B.Thangchina hovin  din ţan a ni a, ngaihdan hrang hrang leh dodalna a nasa hle. Khatih lai khan Halam-Kuki ( Mizo hnahthlak) hnam tan High School luhna tur a la awm lova, Matric pass pawh mi panga emaw chauh an la awm a. Pastor B.Thangchina vision chu St.James’ High School-ah hian zirlai 100 lai an la awm ve ang a, Matric pass pawh 100 lai an la awm ve ngei ang tih kha a ni a. Pathian hi a rintlakin a rinawm em em a, tunah chuan St.James’ High School-ah hian zirlai 800 chuang leh he school atanga matric pass pawh zirlai 500 aia tam an awm lo awm ta. Lalpa chu fakin awm rawh se.

Hetiang fakauva Pathian a rinna chuan rahţha tak a chhuah a, Lalpa hian in leh lo leh lirthei man to hi rochanah a ngai lo va, mahni rila ral fanaute hi Lalpa rochan chu a ni a. Pastor B.Thangchina fanau rochante hi;-

  1. Upa Dr.B.Laldinliana MS, Medical Superintendent, Christian Hospital, Serkawn.
  2. Pi Lalrinkimi M.A (English)
  3. Upa B.Lalţhakima M.Phil. Associate Professor, Aizawl College
  4. B. Lalramhluna M.Th
  5. B.Lalrinchhani Ph.D Associate Professor, J.B College te an ni a, a tute zingah M.Sc 2, leh M.A 3 an awm tawh a ni.

Rinnaa kal hi mi ţhenkhat tan atthlakin a lang bawk ţhin a, mahse Pathian Engkimtithei chunga rinna nghat chung zela hmalak hi a lo atthlak lo. Rinna lovin ama lawng zawng mi nih rual a ni lo (Hebrai 11:6) tih a ni zawk.

Mizoram Gospel Centenary 1994 khan BCM chuan Centenary kum hian Missionary 100 tirhchhuah belh tur a ni, tih chu Project pakhatah neih a ni a. Rinna lo chuan huphurhawm tak a ni. Mahse kum 1994 a lo ral chuan missionary 100 chuang tirh belh an ni a, Missionary 450 zet kan lo nei ta a. Tunah phei chuan missionary 1160 lai mai kan lo nei ta hi Rinnaa rawngbawl hlawhtlingna ropui tak a ni a, kan missionary te thawhna hrang hranga kohhran member kan neih te pawh Mizorama BCM member aia tam mah kan lo nei ta. Rinnaa rawngbawl chuan rah tam tak a chhuah ţhin a ni.

Rinna chungchanga Pastor B.Thangchina ngaihdan chu hei hi a ni a;

Ringtu mimal chhungkua leh kohhran Pathian rama kan hmalakna kawng hrang hrangah hian Rinna- Pathian chauhva innghahnaa hma la tur leh rawngbawl tur kan ni a, chu chu Pathianin amah ringtute awmdan tur leh rawngbawl dan tura a ruahmanna awmchhun a ni. Mahni neihsa, chakna leh thiltihtheihna ringawta rawngbawl kan nih chuan hma kan sawn thei lo vang. Chuvangin, “Tuna ka nung hi rinna nung ka ni” ti thei ţheuh ila, hma kan va sawn nasa dawn em? tih hi!

Amah William Shakespeare-an, “A coward dies a thousand times before his death, but the valiant taste of death but once. It seems to me most strange that men should fear, seeing that death, a necessary end, will come when it will come.”  a lo timathlawnlovin  rinna kan neih loh avang hian kan dam chhung la la hian vawi tam tak kan tihtur ti ngam lovin kan lo thi nawn âwn âwn thin a, rinnaa mi huaisente avang zawk hian sualin a bawih mek khawvelah hian Pathian ram hi a lo zau deuh deuhva, a lo lang fiah deuh deuhva, a lo nghet deuh deuh zawk ţhin a,  kohhran hi a lo phuisuiin a lo  nghet deuh deuh zawk bawk ţhin a lo ni.

Mizoram mihring nuai 12 vel chauh awmna atanga missionary kan thawnchhuah tamzia hi ropui ka ti a. Nikum lama ka data neih a ni a, tunah chuan a hnuaia ka rawn tarlan ai hian missionary pawh kan nei tam tawh ngeiin ka ring a, keimah tak hi chu Synod pastor chhungkuaa seilian ka ni a, Burma Synod stipend atanga Rangoon Univertisy atanga zirchhuak ka ni a, Mizoram chhim lamah ka awm a, Chhim lam pastor hmasa, Pu Buanga leh Sap upa-te lo ţawiawmtu Pastor Zathanga te chhungkua-ah ka tlu lut a, Baptist-ah ka awm ta mai a, ka thaibawi vang pawh ni lovin ka denominational vak lo vang mai a ni e.

 

Presbyterian; missionary tirhchuah zat; 2,520 (Kum 1-a an hlawha kohhran insen zat vbc 27 vel)
Baptist ;
missionary tirhchuah zat; 1,139 (Kum 1-a an hlawha kohhran insen zat vbc 8 vel )
Salvation Army;
missionary tirhchuah zat; 338 (Kum 1-a an hlawha kohhran insen zat nuai 1000 vel )
UPC (NE) ;
missionary tirhchuah zat; 116 (Kum 1-a an hlawha kohhran insen zat nuai 500 vel 
Mizoram UPC;
missionary tirhchuah zat ;76 (Kum 1-a an hlawha kohhran insen zat nuai 400 vel) leh a dante.

Presbyterian pastor ţha tak tak leh thlarau mi tak tak chanchinte pawh ka la rawn post zel dawn a nia.

Similar Articles

Top