You are here
Home > CCT Robawm > PASALŢHA CHÂWMA ROKHAWMTUTE’N ALEXANDRAPUR THINGPUI HUAN AN TLAWH! – Familia Fanai Lalțansanga

PASALŢHA CHÂWMA ROKHAWMTUTE’N ALEXANDRAPUR THINGPUI HUAN AN TLAWH! – Familia Fanai Lalțansanga

PASALŢHA CHÂWMA ROKHAWMTUTE’N ALEXANDRAPUR THINGPUI HUAN AN TLAWH! – Familia Fanai Lalțansanga

Pathian thil rel dan chu,

A va mak em!

Hriat phak rual loh a ni,

A tum zauzia;

Thil tê ber pawh a veng,

Van thil a rel kim e;

Pathian ruat ang zelin,

Engkim a thleng.

 

Pathian ruat ang zelin engkim a thleng tawh a, a thleng mek a, a lo la thleng zel dawn a ni.

Pi Lalrimawii leh Pu Lalngilneia
Pi Lalrimawii leh Pu Lalngilneia

James Winchester, Mary Winchester, Zoluti pa thattu Chalchungnunga, Sailam lal Bengkhuaia pasalţha, a pian ţhat vang leh a mitmeng a zim a vanga Chemchawma tia koh, Châwma tia hriat lar rokhawmtute nupa, Pu Lalngilneia leh Pi Lalrimawii, Kulikawn te   chuan chanchin ţha avangin an pu tualthahna hmun, Mizo pasalţha-te’n thisen chhuahna, mihring nunna hlu tak an lakna hmun Alexandrapur thingpui huanah ngei chuan sual thupha chawiin an ţawngţai.

img013

img011

Pi Rozingi, Pu Châwma tuchhuan Pu Lalpianga nupui Kum 100 mi, kum 2002 a boral ta chuan, “Zoluti kha a vun rawng a danglam avang leh a samte pawh a danglam avangin anni( Chalchungnunga@ Chemchawma te nupa, Kawlri) kawl reng chi-ah ngai lovin, Kawlri-ah hun rei vak lo an awmpui hnuin Lal Bengkhuaia Inah ui tak chungin an dah chho ta a, Vai lianin an lakkir leh hma zawng chu Sailamah awm ta a ni,” tiin a sawi chhawng a.

Pasaltha Chemchawma lungphun
Pasaltha Chemchawma lungphun

James Winchester-a bun lai SANA pawh eng nge a nih pawh hre lovin a laksak a, hmun ralmuang an thlenin an han enchiang a, a chek ri leh a chhunga thil kal zet zet chu a ngaihna hre lovin, VAI DAWIBUR-ah ngaiin Tlawng lipuiah an paih ta a. A hnu daiha Bawrhsapte’n an bun an hmuh lehin an ui hnuhnawh leh niin Pi Rozingi hian a sawi bawk a ni.

Zoluti- 1872, Chhitagong
Zoluti- 1872, Chittagong
Zoluti leh Sailam atanga la lettu Sibuder Amed, 1872
Zoluti leh Sailam atanga la lettu Sibuder Mohammed Azim, 1872

Mizo Lalte Chhim leh Hmar Indona laia chhimlam Lal hmingthang, Lalpuithanga fapa, Sailam Lal hmingthang BENGKHUAIA pasalţha leh Mr. James Winchester thata a fanu Mary Winchester, Mizoten Zoluti tia kan hriat lar, Mizorama rawn paw hawtu Pasalţha Chhungchungnunga(Chawma) hian unau Airuma Chuaungo, Lal thirdeng leh chak hmingthang a nei a, Pasalţha Châwma hian vanduaithlâk takin fa a nei lo hlauh mai a, a unau pa Airuma thlah kal zelte hian, Pasalţha Chawma hman KAWLHNAM leh FEI chu rochun chhawng zelin, tun thleng hian hmuh theih a kawl ţhat a la ni a. A kawltute chu Lianhmingthanga (L), Hauchhingpuii, Chuauţhuama (L) te an ni a, tunah hian Kulikawna awm mek Pi Lalrimawii leh Pu Lalngilneia-te hian an kawl ta a ni.

MARY WINCHESTER ZOLUTI LEH CHANCHINŢHA- Episode I

SAILAM PASALTHATE’N RAMMUT ZAI AN REL

‘Kum khuaa kan ram, kan sai ram chhuahna chu Hringchar vai-hovin chin tawk awm lovin an rawn nek a, an rawn vat chereu zo tak ngial dawn e” tih zualko thu an rawn sawi a hriat chuan ram leilung hlutna hre mi Sailam lal Bengkhuaia (A hming dik tak Lalsahulha) chuan a enghelhin a ngaimawh ta hle mai a. Thomas Herbert Lewin (Thangliana) report ziak dan chuan 1873 kum tir khan Bengkhuaia khua chu sang khua an tling tawh a ni. A hun lai Zoram khaw lian ber a ni bawk a, “Kan ram” tia an bawh chin pawh a zau kher mai. Hmar lamah Hmuifang tlang, chhak lamah Tuikum, thlang lamah Tlawng lui thleng a huam a. Chhim leh Hmar indo hnu khan tual chhung buaina neuh neuh bak buaina lian tham a awm tawh meuh lo va, hawi lam a pianga an uan theih lai a lo nih bawk avangin Sailam tlangval thatho han inhawt vel chuan rammut an rel tlu ta a ni.

PASALTHA RAMMU TURTE THLAHNA THU

‘Nangni pasalţha, kawng engkima kan khawtlang timawitu leh venghimtu, engkima kan engkim in ni tak meuh meuh va. Kan chhuang em em che u a ni. Khawvelah hian tumah ngam loh leh hneh loh inneih pawh kan ring bik lo. Kan ram rawn tibuai tur leh mi rawn sihheksak turah te phei chuan lu chhum ban chhum huama ţang ngam vek in ni tih pawh kan hai lo va. Hei, inhriat angin kan sai ram chhuahna hmun ber, sangho themtleng chen chen inkahna ţhin hmun kha tute’n emaw an lo vat chereu leh mai thin a. Chuvangin kan lungawi thei tawh lo va, nangni meuh inchet a ngai ta a nih hi! A pawi ngawt mai.

Dam takin in zu kal ang a, hlawhtling taka in lo hawng leh ang a, ropui takin kawtchhuahah kan lo hmuak dawn che u nia.

Vanduai thilthu-ah nunna hial emaw, ramtuileilo emaw pawh inawm palh thei a ni a, kan dan pangngai angin chung chu engtikawng mahin khawtlangin a theilhngilh lo vang tih ka tiam e. Dam takin zu kal ang che u.

PASALŢHATE AN THAWKCHHUAK TA

Kum 1871 thlasik vanglai tak chuan Sailam khawpui chhuansanin pasaltha rammu turte chu Panglian-ah an liam thla ta a, Lau lui leh tlawng lui kanin Darlungah an riak a, an kal zel a, Hachhek tlang vel atang khuan Vai khua-ah an chhuak thla a, 1871 kum January ni 23 khan Kalitcherra leh Alexandrapur an bei ta a ni.

Alexandrapur daifemah tlai lam nghakin pasalthaho chu hnim buk karah an tawm ru a, an hun tiam a thlen velah an hotupa chuan chang a tum ta raih a! “Naute u zam reng reng suh u, saw in tha tak sipai dinna saw ka va luhchilh ang a, saw ,silai keng lo mi dang pawh saw, kan va man fai vek dawn, chhak lam sira in khi a thenin bei ula, heti zawng hian i inzar phei duai mai ang u” ti a a sawi zawh chuan Keitawna chu bawk vakin dim takin a vak phei a, a veh ta ţhem ţhem mai le.Police duty chu feiin a khawh thlu tawp mai a. Police dang an lo lang leh nghal vat bawk a. Chu chu mi dangin silaiin an lo kap thlu nghal a. silai a rik veleh mipui mangang thlabar chu an pung khawm nghal a, police silai keng leh keng lo nen, Keitawna pawlte’n an bei zui nghal a, an inphek beih ta luai luai mai le.

Alexandrapur-ah chuan James Winchester, Scotland mi thingpui huana kum 12 zet lo thawk tawh a awm a.Scotland ramah hawn a tum hnai tawh a, Meitei hmeichhia Mira lakah fa a nei a, chu a fanu hming chu Mary Winchester a ni a.An rama a haw hunah a fanu chu Sap rama lehkha zir tura dah a tum a. An hawm hma chuan lehkha an zirlai atanga a ţhian pa Shella te chhung an tlawh a ni.

Chumi ni tak chuan Mary Winchester chu a awmtute chuan huanah an lenpui a, an hlim em em a.Thawklehkhatah huana hnathawktute chungah thil rapthlak tak hlauhawm em em a lo thleng ta phut mai a,tlang mi hnam kawlhsen takte chuan an rawn run thut hi a lo ni a. Huana inhlawhfa hna thawkttute chu mangang thlabar tak leh ţe chel chul chungin leh lam leh lamah an tlan kual ta nuai nuai mai a. Silai an kap ri dum dum a, Shella sap chu sakawr chunga chuangin a tlan vak vak a.Mary Winchester chu a awmtute chuan an tlanchhiatpui vat a, a pa hnenah an hlan a, a pa James Winchester chu a fanu pawm chungin a tlanpui laiin a hnunglamah Chawma’n a rawn kap fuh  a, a tlu ta a. A kaptu Chawm fei nena  lo tlan phei chu a hmu bawk si, thei leh thei lovin hliampui tuar tawha James Winchester chuan  a fanu duat lai  Mary Winchester hnenah chuan, “Mamte, I awmdan tur chu Pathian chauhvin a hria!” a ti hman chauh va, Chawma chuan James Winchester chu a fei chuan a chhunhlum ta a ni.

Sailam pasaltha mi chak Châwma hi Airuma nau a ni a, mi aia chak bik ‘tha hlei pu’ a nih avangin fanau a sam lo an ti mai a, fa an nei lo.Hrei-ha tur a lakin mau pum phih chhuah zawh loh a nei lo an ti a, hrui (Tairua, changdam etc) a chhahin thinglera zam phih thlak zawh loh a nei lo an ti bawk.a hming pum chu Chhungchungnunga a ni a, a pian a dam lam deuh va, a mitmeng zim deuh, pian ţha tak, sa ţha tak a nih avangin Chĕmchâwma tiin an ko thin a ni .

Mi chak Châwma chuan , “ Nang chu henglai mi i va ang lo ve! I ngo mang e. I lu chu ka la tho tho. Tlan suh. I lu ka la ve nghal mai tur a nia! Nang chu a manin ka man ang che” a ti a. Mary Winchester hlau hlutuk chu a khur zawih zawih a. “Aw… heti hian saw lai hnim buk karah sawn ka thlung ţha ang che, ka ţhiante khi ka han pui ve leh phawt ang” Chawma chuan a ti a. Mary chu hnimbuk karah chuan a thlung  a, a ţhiante pui turin a kalsan ta a.

AN SAL MANTE;

Buk tualah chuan meipui an chhep hluah a, an sal mante chu an ţingmit dul a, a hrangin an thuttir hlawm a. Mary Winchester erawh chu a la naupan deuh avang leh a hmelte a danglam bik deuh avangin an hling ve lo va, fiamthu thawh nante an  hmang a.

“Châwma, hei ,I sal man te reuh hi mihring a ni ve ngut lo vang a! Lûrh leh Ţǎn kham kar vela zuang theuh theuh awm tak a nih hi! Chang-el lairil kheh ang mai, a var per mai a nih hi. Kan man dangte hi kangvara feh haw ni awm tak vek an ni mai si a, hei te a mit meng pawh a dik lo, I chhuah leh mai zawk ang hmiang? A pa i thahsak a, a lung a leng nasa a nih hi, a kun reng mai!”

“Chhuah lo ve a ! Kan man tawh laklawh si a, fanu atan ka duh a ni. Heng hi mi ngo an tih hi alawm,a pa pawh pa lian pui ngo tak a ni. a nu pawh nu lian mal var tak a nih ngei ka ring. Chemte, tunge i hming? ( a ngawi reng a) …a luhlul awm mang e aw. Kan invulh puitling ngut lo vang aw….. Ţawngte i la thiam lo bawk a, tunah chuan ka ngaidam rih ang che. I luhlul viau mai chuan rei kan invulh lo mai ang”………

ZO JPG

(Excerpts from Mary Winchester Zoluti by Familia Fanai Lalţansanga, edited with introduction by Rev.Dr.Lalsawma, an introduction by B.Lalthangliana, published by Lengchhawn Offset & Publication, Khatla, Aizawl. Pages 201. Rs.200. Vanapa Hall hnuaia Zoni@B.Zonunmawii, mobile phone 9774387782 ah Print version  leh leh Digital version http://www.mizostore.com/publication/issue/5/mary-winchester-zoluti-chanchin ah online in a la lei  theih e. )

Chawlhni apiangin Mary Winchester Zoluti Episode khat zel rawn tihchhuah a ni ang.

 

Similar Articles

Top