You are here
Home > World News > NORTH KOREA HI RIKRAP LOH TUR – PUTIN

NORTH KOREA HI RIKRAP LOH TUR – PUTIN

NORTH KOREA HI RIKRAP LOH TUR – PUTIN

North Korea chuan Chawlhni zing khan missile kap hla thei chi, Hwasong-12 missile chu hlawhlting takin a enchhin a, he missile hian van sang km  2,111.5 (1,312 miles) a thleng a, km 787 (489 miles)-a hla a kap tleng a, N.Korea state news agency KCNA chuan hetiang missile hian nuclear warhead lian tak a phur thei a ni tiin an missile enchhin hlawhtling ta chu lawmawm a tih chu a puang a ni.

Chawlhnia an enchhin tak Hwasong-12 missile  hian km 4,500 a kap thleng pha a ngaih a ni a, KCNA thupuan hi a dik a nih ngai chuan N.Korea hian Pacific tuifinriat-a US thliarkar pakhat Guam chu a kap pha dawn ta niin an chhut a, he hmunah hian US indo thlawhna ţha chi B-1s, B-2s leh  B-52s te an dahna Andersen Air Force Base a awm a ni.

Hemi chungchangah hian China rama cham mek Russian President Vladimir Putin chuan a ngaihdan a sawi chhuak a, N.Korea missile enchhin hi a hlauhawmin ţhenawm ramte a tiralti a, mi a tiralkhel a. Amaherawhchu N.Korea hi kan rikrap tur a ni lo, a ti.

170514114202-russia-putin-one-belt-one-road-speech-exlarge-169

A sawi zelnaah Putin chuan, Ka sawi chian duh ber chu nuclear ralthuam hlauhawm darh zau zel tur hi kan do tur a ni a, Korea Peninsula-ah ngei pawh hian awm lo se kan ti em em a, engvang nge kan tih chuan nuclear ralthuam hi chhiatna lam awm sa reng, thil hlauhawm lutuk tak a nih bakah thil dehchhuah tipungtu a ni lo hrim hrim a ni, a ti a. US thiltih dan chungchang mei nei taka sawi thawiin, North Korea ram rikrap leh vauzam tumna hi chu pawmzam  theih chi a ni lo, a ti hlauh thung a ni.

170515104043-02-north-korea-missile-launch-1405-overlay-tease

North Korea chuan missile a en chhin fona chhan chu US leh a kuang ben rual ruala lam mai mai South Korea laka an sahimna leh invenna tur a nih thu an puang a, North Korea ambassador to China Ji Jae Ryong chuan nimin khan China ram khawpui Beijingah thusawiin, North Korea hotute thuthlukna angzia zelin n an duh hun hunah, an duhna hmun hmunah Intercontinental ballistic Missile (ICBM) enchhin hi an nei thei a ni, a ti bawk a ni.

_95294552_icbm_trajectories_624_v2

Russia President Putin chuan North Korea buaina sosang zel chu dawhkan kilhova sawi fel chi nia a hriat thu a sawi a, North Korea tlavang a han hauh zeuhna chhan chu White House press secretary Sean Spicer khan a thupuan-ah North Korea missile enchhin leh hi Russia hian na takin a thungrul mai thei a ni tih a sawi, a chhanlet kheuhna  nia ngaih a ni.

The United Nations Security Council (UNSC) chuan nimin kha thuchhuah siamin Democratic People’s Republic of Korea in UNSC hrekna leh khapna  thupek palzuta a ţhenawm ramte tiralkhel zawnga a che fo chu a dem tak zet tih a puang a, UNSC chuan North Korea thil tih hi a enthlitlaiin a zir chiang reng a, nuclear ralthuam enchhinna titawp tawh tura thupek awm sa chu tihhlawhtlin a nih theih nan a hma aia nasa zawka hrek dan pawh a ngaihtuah chhunzawm zel dawn a ni, a ti.

US leh Japan ram rawtna angin vawiin hian The United Nations Security Council (UNSC) chuan meeting hmanhmawh an nei leh dawn a, North Korea missile enchhin chungchang an sawiho leh dawn a ni.

Khawvel ram ropui tak lo ni ta,Dragon muhil lo harhchhuak ta  China chuan khawvel pum huap tuifinriata lawng  kawng leh khawmuala rel kawng  hmanga insumdawntawnna beihpui thlak a tumna, The Belt and Road Summit, (One Belt & One Road-OBOR an tih bawk) Beijing khawpuiah a huaihawt a, khawvel ram hruaitu 29 lai an tel a, an thil ruahman hi a namen lo hle mai a, an budget hi one trillion yuan ($160 billion US) a ni chheu mai a, India ram Prime Minister lar tak Narendra Modi pawh a bik taka sawm a ni nachungin ramri buaina chhuanlam fahrah siamin a tel ta lo a ni a.

Mahni rama intih lar ve mah nak alaia China pa lian Chinese President Xi Jinping hmaah chuan a tȇ chem chem dawn hian ka hria a, a budget a han sawi rik phei chuan Narendra Modi hi a khua a sik ru er er in ka ring hial a ni. Mizote’n kan insawiţhaih fo leh kan ţihsakhai Karl Marx-a ngaihtuahchhuah, Communist ideology hmangin China ram chuan a khua leh tuite nuamsa tak, rinawm tak leh taima taka an khawsaktheihna tur kawng a zawng hmu ta a, khawvel tan malsawmna ni turin hmathar lian tak a chhawpchhuak leh mek a ni.

North Korea hi huaikawm bawl a thiam reuh khawp a, China pa lian President Xi Jinping tizak chem chem turin OBOR Summit neih dawn tukah ngei China a ngaih pawimawh lohzia lantir  nan missile a han enchhin ve leh ta kher bawk a, N.Korea thlavang lo hauh ţang ţang ţhin President Xi Jinping chuan a hnar a hmu lian ve hle mai thei a ni. OBOR Summit aiin North Korea missile enchhin chanchin hian khawvel media a al hneh hle a ni.

Similar Articles

Top