You are here
Home > Asia News > NITI Aayog, National Institution for Transforming India

NITI Aayog, National Institution for Transforming India

India ram inrelbawl dan leh sum dehchhuah kawnga hma thar la turin India sorkar laipui chuan Narendra Modi kaihhruaina-in NITI Aayog@ National Institution for Transforming India  chu 1 January 2015 khan din a lo ni ta a, hei hian kum 65 zet lo ding tawh Planning Commission chu a rawn thlak ta a ni.

Finance Minister Arun Jaitley chuan NITI Aayog an dinchhan a sawifiahnaah kum 65 zet India ram pum huap ruahmanna lo siam thin Planning Commission chu awmze nei a nih tak loh avangin tunlai khawvel pumhuap hmasawnna nena inmil tur India ram sumdawnna ruhrel siam tha tur hian NITI Aayog hi din a lo ni ta a ni, a ti.

India ram inrelbawl dan hi siamthat tur tam tak a awm a, Sorkar laipui leh state inkara sum inpek dan te hi zirchian fe hnua siamthat ngai a tam  a, Planning commission khan thuneihna a nei sang hle thin a, sum sem dan turah pawh thuneihna pumhlum a nei a, sum kha awmze nei lo vin an sem kual mai mai thin a, khang an sum sem kha politician te leh sorkar hnathawm liante khan hnungthak inhiattawnin an intheisem mai mai thin a, a thlenna tur dik tak mipui hnen a thlen tur ang a thleng ngai lo va. Chuvang chuan NITI Aayog hmalak dan tur hi a pawimawh hle dawn a, ram hnuk khawih pha thil vek a nih dawn avangin mitin beng khawn chi a ni a. India ram Prime Minister Modi  din a ni a, a kaihhruaina hnuaiah awmze nei taka a kal chhoh beisei ila, sorkar sum luang liam politician ho leh active party worker luruh ringho ei bobar mai mai ang hi a awm tlem deuh tawh turah beisei phawt ang.

Delhi tlangah hemi chungchang meeting an neihah PM Modi ngeiin khunkhan takin a kaihruai a, Kum 15 lo awm tur atan ruahmanna fel tak siam a chah hlawm a, kan Chief Secretary leh Planning Secretary te pawhin an zuk chhim a, home work tam tak an rawn hawn ngei mai a, Mizoram tan pawh planning mumal tak kan neih theih chhoh zel a beiseiawm a ni.

Similar Articles

Top