You are here
Home > Health > NAU ZAICHHUAH NGAI TAM TIAL TIAL- EVOLUTION LA KAL ZEL?

NAU ZAICHHUAH NGAI TAM TIAL TIAL- EVOLUTION LA KAL ZEL?

Evolution theory hi finfiah theih chin a awm a, finfiah theih lo chin a awm tih kan sawi fo va. Evolution kan sawi rik ruala mahni tapchhak zawla lo sa em em leh ha chang țhial ngal duh pawh kan tam a. Zirchianna thara an hmuhchhuah danin kumkar ruh zim, narrow pelvis size avanga nau neih pangngaia nau nei thei lo nu an tam tial tial tih hmuhchhuah a ni.

Khawvel thiamna sang zelah nu nau neih dan pangngai, natural birth a nei thei lote chu nau zaichhuahsak thiamna Caesarean sections hmangin an zaichhuahsak ta zel a, nau zaichhuah ngai hi a kum telin a pung tial tial ta mai a.

A awmzia nia lang ta ber chu nu kumkar ruh te lutuk avanga nau hring  thei lo te chu raicheha thi mai tur an ni a, thiamna lo sang chho zelah Caesarean sections hmangin nausen chu zaihchhuah theih a lo ni ta a. A nu leh nausen an thi ta lo va. Chuvangin kha kumkar ruh te gene khan an inthlahchhawngah an chhawm ta zel ni tura ngaih a ni ta a ni.

Zirbing mite’n an chhut danin 1960 chho bawr velah nu nau nei 1000 zelah 30 vel chiah zaihchhuah ngai an nih laiin tunah chuan nu nei vei 1000 zelah 60 chu Caesarean sections hmanga zaichhuah ngai an lo ni ta a ni.

Dr Philipp Mitteroecker, department of theoretical biology,University of Vienna chuan “ Tunlai damdawi thiamna tel lo chuan nu tam tak thih ngei ngeina tur a ni a, hei hi evolutionary perspective-a thlir chuan selection chiah kha a ni, a ti a, kumkar ruh te nu tam tak hi kum 100 kal taah kha chuan raicheha thi ngei ngei tur an ni a, an thih chuan an gene kha intlahchhawn ngaihna a awm lo va, kumkar ruh zim chi, gene  kha mang mai tura ngaih chu a  ni” a ti. Damdawi lam thiamna sang avangin nau zaichhuah a ni ta zel a, kumkar ruh zim nute khan a fanu te-ah gene kha a pe chhawng ta zel a, nausen zaichhuah ngai an lo pung ta zel a ni.

A lehlam zawnga ngaihtuah chuan tunlai nu naupaite hi damdawi nen enkawl țhat an nih tak avangin a chhul chhunga nausente hi an lo hrisel ta a, a lian bawk a, an lu pawh a lo lian ta bawk a ni. Hetih lai hian zawng thlah chimpanzee lam an zirchiannaah no neih an awlsam em em tlangpui a, kumkar ruh zim vangin no neih chungchangah harsatna an neih hriat a ni lo thung  a ni.

Dr. Philipp Mitteroecker chuan tunlai thiamna hmanga nausen zaichhuah hi kan sawisel a ni lo va, evolutionary effect hi a lo lang a ni tih kan sawi lang mai zawk a ni, a ti.

Reference; BBC

 

Similar Articles

Top