You are here
Home > Asia News > MOKEN – TUIFINRIATA KHAWSA HNAM

MOKEN – TUIFINRIATA KHAWSA HNAM

MOKEN – TUIFINRIATA KHAWSA HNAM

Burma ram mawng lam zingzumah khian  Mergui thliarkar te reuh te te-a awm a, heng thliarkar –a cheng, tuifinriata ei zawng Salung hnam putarte chu tui chhungah darkar chanve laite an liluh thei tih an sawi ka lo hre thin a, ka lo awi ngai lem lo va. Tun tlai khawhnu-a he hnam, Burmese-in Salung an tih, Thai-ho-vin Chao Ley( tuifinriat mi) an tih leh Sap-in Moken an tihho chanchin ka han zir ka han zir hnu hian tui-ah an lo liluh rei thei hle ang tih chu ka ring ta khawp mai a. Adaptation leh evolution aţang pawhin naupan tet atanga tuia khawsa, tuia eizawng an nih avangin tui chhungah pawh thil an hmufiah thei em em bik an tih an sawi pawh hi ka awih ta khawp mai.

d3e19abb6c88847011a6013109364155--snorkel-terra

Kum 2003 khan Sweden ram Lund University-in research neia an zirchianna-ah Moken naupangte hian Europe rama naupangte aiin tui chhungah thil a let 2-in an hmufiah thei bik tih an hmuchhuak a ni.

4x7v3008_gallery_large

Mizoram chhim tawp ber khua chu Tawngkawlawng a ni a, Burma ram chhim tawp ber khua chu Kaw Tawng a ni a, Andaman & Nicobar Islands leh Thailand ram inkara Burma ram chhim lam zingzum khi Tenasserim Division a ni a, Tenasserim leh ah Andaman inkar tuipui mel killi bial 250 (400 kilometers) velah hian Mergui Archipelago, thlairkar te reuh te te 800 lai khawmna a awm a. Chu lai hmuna chengte chu Moken hnam, hnam mawl tak ramhuai bia an ni a, Burma  sorkar leh Thailand sorkarin hnam fing zawka chherchhuah (assimilate) an tum a, an la hlawhchham rih a ni.

31BFE84400000578-3472297-image-a-6_1456883744378

Assimilate (v) assimilation (n) tih Sapţawng thumal hi Brig.T.Sailo khan Mizo hnam chimrala kan awm a hlauh thu a sawina-ah a hmang fo va, Mizo rilru-ah chuan assimilate tih chu hnam chimralna lam hawi chauh hi emaw tiin a awmzia kan lo phawk ang tih a hlauhawm ta hial a. A awmzia tak zawk chu hip-lut emaw senglut emaw tihna a ni ber zawk a, chanchin thar te, ngaihdan thar te leh culture thar sengluh, hrethiam, man chiang tihna a kawk ber.

moken-child

Kristian sakhua-in Mizote min assimilate chiang hle a ni, kan ti thei ang. Ngaihdan ţha leh changkang zawk pawchhuak a, nuna senglut sawi nan pawh a hman theih ang chu. Sap ţawng zir nan English to English dictionary hman hi a ţha ber fo. English to Mizo kan hman hian, a bikin verb-ah hian  a Sap ţawng awmzia,meaning  (sense) bo ţhen a awm ngei ngei ţhin a ni.

CMX7PC Thailand, Koh Surin, View of cottage with sea

Moken hnam bul hi hriat theih a ni tawh lo va, kum 4000 kal ta vel atang khan China ram hmar lam atanga tuifinriata rawn pem thla niin an ngai a, kum khatah thla riat zet hi tuifinriatah ei zawngin hun an hmang a, an lawng ‘kabang’, fei leh len hmangin tuifinriat sanghla leh thil nung dang manin ei an zawng a, zirthiamna an neih loh avangin an nun phung hi kum zabi tam tak inthlakthleng leh hmasawmma awm lovin tun thleng hian a ngaite-in a an la khawsa ve reng a ni.

Moken hnam hi zu duh tak hnam an ni bawk a, an rethei em em a, an pung thei lo va, an tlem tial tial a, an la mang em lo chauh a ni a. Tunah hian an hnam pumpui hi mi 2500 atang 3000 vel chauh an awm tawh a ni. Kum tir atang thla bial vawi nga-naah ramhuai bia-in kut an nei thin a, mi thi an awmin a vuina-ah an zai a, an lam a, zu an in bawk thin a ni.

Kristian sakhua-in a ‘assimilate’ Mizote hi hnam tlemte mah ni ila, chanchin ţha engine ka thinlung min chhun-en avangin khawvel hi ka dap chhuak ve ţan ta a, India ram leh Burma ramah phei chuan kan mikhual tawh lo va, kan tlangnel ta hle mai!

Indopui II lai khan hnam dang karah Mizo tlawmngaihna an lantir avangin Rangoon leh Moulmein khaw indar Salween luipui kamah Mizo sipai tam tak an thlanchhe duh lo va, an sipai hotute an veng tlat a, Japan sipai kuttuarin tam rak an thi a, Japan sipaite’n an thi tawh emaw an tiha anpaih tawhhnu rawn tlangchhuakte chanchin kha a ngaihnawm hle mai a, a rapthlak bawk a,  an chanchin hi ka la rawn ziak ang.

Indopui II-na lai vel khan Suangpuilawn khawchhuak Pu Zinga kha sipai ei rawngbawlin tuna an chinchin kan sawi mek Moken ho awmna bul Myeik khuaah a han awm tawh bawk a, chawhmeh siam a thiam hle a. A pension hnuah  Krismas ruai siam hian sa kawchhung chutney tui si, thak em em si hian a siam ziah thin a. A thusawi hun tur kohhran secretary-in a puan a hriat a tang hian a hnuk hi a lo ulh ziah ţhin bawk a, Lal Isua hmangaihna hian a rilru a ‘assimilate’ hle ni ngei tur a ni.

Vawiin chu Dr.Ramdinthara Sailo hlaphuah “A mak mang e” tih hla khan ka rilru a luah ve reuh va! Moken hnamte ka han ngaihtuah reuh reuh hian keini hnam mawl lutuk, thing bul lung bul bia, mahni leh mahni inrun reng hnam zingah Mizo zawlnei Darphawka’n “Kumpinu sumtualtah laisuih(lehkha) kan thlak tawh,Tuifinriat ral atangin Mingo an lo chhuak ang a, an thu lo awi rawh u” tih a lo sawi lawk ang ngei khan Zolut-i chu Lu la hnam kawlhsen ten a pa kap hlumin an ramah an hruai tih chanchinbu-a a milem nena chhuak, London Sap naupang  J.H. Lorrain chuan a lo chhiar atangin a rilru-ah a riak ta reng mai a. Chu a rilrua vision chu mission-ah lo changin 1894 kum January ni 11 khan a thianpa Sap Upa nen Mizoram leilung an rawn rap ta a! London khawpuia nuamsa-a khawsa thei mi ropui 2 te hian Lushai Hills , thosi, vangvat leh vaihmite karah ral hlau reng reng chunga thih ngam lu pu-a an rawn kal chhan ni eng eng ni ta ber ang le?

 

A MAK MANG E

A mak mang e, Vân Lalber chuan,
Inngaitlâwma hringmi a chan lai khan,
Nuamsa thei khan hrehawm tinrêng chu tuarin,
Ranthlêng leh kraws maw a lo thlan le!

Hmangaihna luah vânga inngaitlâwmin,
Hrehawm leh thihna a rawn thlang ta;
Hmangaihten malsâwmna an chan theih nân,
Hmangaihtu’n a tuar a ṭûl si ṭhîn.

A hniakhnunga kan zui ve nân,
Entawn tûr amahin a hnutchhiah kha;
Mi dang tâna Malsâwmna lo ni tûrin,
Keini pawh kan tuar a ṭûl ngei ang.

Hmangaihna famkim a lang ṭhîn,
Engkim huama tuarna hmunah hianin;
Lal Isua I hmangaihzia lanna tûrin,
Engtia nasa nge i lo tuar ve?

Tirhkoh Paula chu Krista hmangaihna chuan a ‘assimilate’ a, a compel/constrain a, tirlui ta (For the love of Christ constraineth us.KJV) ang khan chu Krista hmangaihna man fuh (assimilate)te chu an awm hle hle thei thawh lo va, missionary turin chhuak vek thei lo mah ila, rawngbawl theih dan kawng hi chu a awm vekin a lang a, kohhran leh a behbawm biak in leh a chheh vela chet chauh hi emaw rawngbawlna kan tih ngaihdan hi bansanin, mahni kuang lo nawr kan chin hi bansan bawk ila,  mahni eizawmna mual theihvah rinawm tak, taima tak leh inpe zo tak hian  thawk theuh ila, LALPA  chu a ropui ber fo vang a, LALPA zarah he ram leh hnam pawh hi a ropui ve chauh dawn a ni.

Similar Articles

Top