You are here
Home > Zoram > MODI HIAN ENG VANGIN NGE PAWISA A TIHTHIH LE?

MODI HIAN ENG VANGIN NGE PAWISA A TIHTHIH LE?

Pawisa tihthih hi sorkar nikhua lo tak tih awm chauha ngaih a ni a, a ram inrelbawk dan tha lo lutuk vang a ni ti ila, a dik ber awm e. Burma ram sipai sorkar lai khan vawi hnih teh reng an han tithi mai a, a chhan chu sorkar  sum bawm a ruak a, Foreign Exchange a nei miah bawk si lo va, mualpho leh muapho tiin a tithi ta kha a ni a. An mualpho reng a, sipai sorkar tihawm tak kha a ni lah tak a.

India ram chu ram ropui tak a ni tih hairual a ni lo va, a system dik lo tak Nehru hun atang daih khan a awm tawh tih chu tlanghriat a ni a, a dik lo tih hre reng chungin an ekcheh țhut thlawk thlawk mai chu a ni a.

 

Keini Tribal ho hi chuan pawisa hi kan pi leh pute hun kum 1850 chho bawl vel khan an lo hmang ngai lo. Chuvangin tun thleng hian pawisa ren nachang kan hre lo va, Sap hnam fing hmasa, mi enkawltute khan kan hnamzia an hre chiang a, tlangmi te tan indaidanna tur dan  min siamsak loh chuan Vai-hovin min chimral  vek nghal ang tih an hre chiang a, ILP min siamsak ta a, kan him ta hram a ni.

Pi leh pute hun atanga sumdawn thiam pawisa hman thiam Vai kan tihte hian sorkara chhiah pek hi thih hreh takin an lo hreh hlawm a, chhiah awl ruk dan hi mut hmawh hnar mawhah an lo neih kumkhua a ni a. Chu mai a la ni lo va, India ram sorkar inrelbawl dan hi a deldul em em a, chhiah khawntu Zakaia te hun ang tho khan Tax inspector leh income tax department hotute hian  ar talh dan chi khat chauh a awm lo ang bawkin eiruk dan chi khat chuah a awm lo tih hi ka vaibel tih tluk zetin an chiang a, Vai ramah hian an hausa thur thur ringawt mai a ni. Tichuan chhiah awlruk tum, leh chhiah khawntu leh chhiah chhunluh na tur sorkar inkarah khan thil dik lo hi a lo tam ta em em ringawt mai a, Tom leh Jerry anga inveh tawn reng reng  khan hun leh nite an lo hmang liam  fo a ni.

Tichuan Modi sorkar hma khan chhiah awl ruk leh pawisa chheprelh ka haichhuak ang tih kha a campaign auhla a ni reng a, tichuan hmanni khan India rama chhiah awl ruk chingte an chhiah awl ruk an pek chuan hremna an pumpelh ang tih, tax amnesty scheme an han puana hun tiam an han siam khan sum tam lutuk tak mai kha sorkar pawisa bawmah an rawn chhung lut ta ruih ruih mai a nih kha. A zat kha a tam lutuk a, $10 billion hi   a Mizo tawng phei chuan ka sawi thiam lo-ah ngai ta mai ila.

Chuti chung chuan an han chhut an han chhut hian chhiah awl ru, pawisa chheprelh, sorkar hriatpui lohva pawisa leng vak black money hi a lo la tam lutuk tih hi a chiang a. Thawhleh zan khan India Prime minister Narendra Modi chuan Rs 500 note leh Rs 1000 note te chu zanlai atangin tihthih a nih tur thu a han puang ta rup mai a. Banka pawisa 250,000 rupees aia tam deposit reng reng Tax thuneitute hnenah report zel tur a lo ni ta a, chhiah awl ru an man chuan a chhiah awl ruk let 2 zel an chawitir dawn ta bawk a nih chu.

Pawisa an tihthih tuk Nilaini chawhma khan VAi mi lian rangkachak kawlho  khan Mumbai rangkachak dawrah rangkachak kg 250, cheng mtd 750 man an hralh hman der!

Ambit in a chhut dan chuan India ram puma kum khata pawisa leng vel $2 trillion gross domestic product zinga  20% hi sorkar hriatpui loh, sorkarin chhiah a lak theih loh , black money niin a chhut a ni.

United State-ah chuan an GDP atanga sorkarin tax a lakluh zat, tax revenue hi 25.4 % a ni a, Japan ramah 30.3%  a nih laiin 2016 kumah hian India  hian tax revenue 16.7 % chauh a la lut tlat mai a! Hei hian India ram tax lak danah a langtlang tawk lo va, a system a dik tawk lo tih a entir bawk a ni.

Chuvangin tihluihna ang renga chhiah emaw, rangkachak anga an kawl emaw, tangka sum faia an kawl emaw te hi sorkar banka an chhunluh khan sorkar hian $30 billion vel a hui lut thei dawn niin Macquarie chuan  a chhut a, chutiang zat additional tax revenue a lo hmuh chuan nikum lama India ram sum indaih lohna fiscal deficit $80 billion kha a su hek hlawih thei dawn ta a ni.

Tichuan, Vai mi hausa tawntaw ho hian ram dangah pawisa hi an lo chheprelh nasa khawp mai a, chungte pawh Modi sorkar hian a la umzui zel turah ngai phawt mai ang. Vai tha mi ho hausak zia kan lo ngaihruat thiam theih nan Amitab Bachhan ang te hian nitin cheng nuai 100 lalut ziah ang an ni a, Reliance Ambani te, Airtel Mittal te phei chu engzat tak lalut ang maw?

Reference : http://www.financialexpress.com/economy/rs-500-rs-1000-ban-while-india-plugs-black-money-holes-indians-find-leaks/444034/

Similar Articles

Top