You are here
Home > Zoram > Mizote rilru tihnat ka duh lo – Union Minister

Mizote rilru tihnat ka duh lo – Union Minister

Sorkar laipui hmalakna leh BJP Mizoram Pradesh huaihawta nimina Ailawnga Mizo pasalṭha Khuangchera chawimawi tum chu zirlaite dodalna avangin ṭhulh a ni. Khuangchera chawi­mawinaa khuallian tur, Union minister of state for Railways Rajen Gohain chuan MZP leh MSU hruaitute ngenna angin Lengpui Airport a thlen hnuah programme a ṭhulh a; Mizote rilru tihnat a duh loh thu a sawi.

Sorkar laipui ruahmannain India ram tana zalenna sual­tu, chawimawi hlawh lote chawimawi tura tih a ni a, hmar­chhakah chuan mi 10 chawimawi tura tih niin, chu’ng zingah chuan Khuangchera telh a ni. Zirlai pawlte chuan Khuanghcera chu India zalenna atana beitu ni loin, Mizote tana beitu a ni tiin, India tana zalenna sualtute zinga telh an duh lo. BJP (Mizoram) hruaitute chuan Mizote tana zalenna sualtu a nih anga chawimawi tum an nih thu an sawi thung.

MZP leh MSU huaihawtin Aizawla college hrang hranga zirlaite chu nimin chawhma dar 10 aṭang khan Vanapa Hall-ah an pungkhawm a; Khuangchera puala hun hman tum dan an duh loh thuin an au rual.

Khuangchera chawimawina hun atana a bultumtute zinga mi, BJP Mizoram president Prof. JV Hluna leh Prof. Laltluangliana Khiangte, MZU-te lim hâl tumin an inbuatsaih a; Prof. Laltluangliana Khiangte chu programme aṭanga a inhnuhdawh avangin a lim an hâl lo. Prof. JV Hluna chu Mizo hnam phat­santuah an puh a, Vanapa Hall kawtah a lim an hâl a ni.

Union minister Rajen Gohain chu nimin chawhnu dar 2 khan Lengpui Airport-ah a thleng a, MZP leh MSU hruaitute nen inbe nghal. Zirlai pawlte chuan pasalṭha Khuangchera dinhmun dik tak lo hrilhin, Indian freedom fighter anga chawimawi an tum chu ṭhulh turin an ngen a; Rajen Gohain chuan Ailawnga a programme hman tur chu a ṭhulh ta a ni.

Inbiaknaah hian zirlai pawl hruaitute bakah, parliamentary secretary (Transport) TT Zothan­sanga, Aizawl DC Kannan Gopinathan leh Mizorama BJP hruaitute an tel.

Vanglaini palai zawhna chhangin Rajen Gohain chuan, zirlai hruaitute nen an inkawm­naah Khuangchera chu India tana zalenna sualtu anga tih a nih chuan Mizote rilru a nat tak zet tur thu an hrilh tih sawiin, “Mizote rilru tihnat hi ka duh loh avangin programme ruahmansa ka ṭhulh a ni. Official-a thil tih awm miah loin, Mizo pasalṭha huaisen thlân erawh tlawh ngei ka tum,” a ti.

Rajen Gohain hian vawiin hian Ailawnga Khuangchera thlân a tlawh dawn a, sàwm an nih angin zirlai pawl hruaitute pawh an kal dawn a ni.

Mizoram tana Railways Ministry hmalakna chungchanga zawhna chhangin Railways Minister chuan, “Aizawl thlenga rêl kaltir turin ruahmanna siam a ni a, a tihlawhtling turin theih­tawp chhuah mek a ni,” a ti.

Zirlaite hian nimin chawhnu khan Ailawng a panna kawnga Union Minister lo dan tumin Khatla kâwn leh Mission Vengthlang kâwn an pan a; Minister-in a programme a

ṭhulh tâk avangin zirlaite chu an ṭîn darh.

Rajen Gohain hian a prog­ramme hmasa a ṭhulh tak avangin nimin tlai khan Mizoram BJP hruaitute a kâwm a, vawiinah Khuangchera thlân a tlawh zawhah Lengpui Airport aṭangin Mizoram a chhuahsan ang.

– See more at: http://www.vanglaini.org/tualchhung/59256#sthash.nzAZ3eJG.dpuf

Similar Articles

Top