You are here
Home > Zoram > MIZORAM SAWHTHING LEH HMARCHA KHARCHHAWNGTU RANA DEB NEN

MIZORAM SAWHTHING LEH HMARCHA KHARCHHAWNGTU RANA DEB NEN

MIZORAM SAWHTHING LEH HMARCHA KHARCHHAWNGTU RANA DEB NEN

Mizoramah hian sawhthing hi a ţha duh hle a, sawhthing hi a hralhna awm ţha-in a hralhna man hi to   phei se chuan Mizoramah hian BPL tak tak pawh hi kan awm pawh ka ring lo hial thin a. Amaherawhchu, a hralhna mawlh mai hi a mumal thei lo lutuk a, a man lah a fumfe thei na hek lo. Mizoram sorkar hnuaia MAMCO hian sawhthing hralhnate hi an ngaihvenin an zawng turah ka lo ngai thin a, tun tleng hian sawhthing hralhna an hmuh hun hi Tluma thlir takin ka la thlir reng a, ka thlirna lamah ka ringte hi a kham ta hle mai si a.

Tichuan, Mizoram chhim thlang khaw tawp Parva atangin Tuichawng dung phairuam suartluanin  Chawngte thleng ka rawn inkhalh thla boh boh va, Chawngte atang chuan motor kawng ţha deuh umin Diltlangah, Lawngtlaiah, chuta ţang chuan Lungleiah ka lut ta a. Lunglei aţang chuan Sumo-in Champhai ka pan leh ta a. Kawng tluanin thingtlang khaw tam tak paltlangin kangvar leh lo la hal loh, ruahin a sur hnan tak si te kan hmu zel a, rilru a kap duh khawp mai a. Thingtlang mite lo retheih barkberhzia te rilru na tak chungin kan hmu zel bawk a. Vaihlo leh a kaihhnawih zuk leh hmuam leh kuhva hian min lo bawih hnehzia te, kan ha leh kan ka balhzia balhzia te ka hmu zel bawk a. Literary percentage san vanga lehkhathiam tam hnam anga kan insawi fote hi a lo dik lohzia te pawh ka hmu zel a, Mizo zingah educated, mahni taksa leh rilru thunun thei, mi  fel leh mi fai tak tak hi an lo tlemzia te ka ngaihtuahchhuak zel bawk a.  Keitum-ho lo hal chu a kang ţha mai mai khawp a, mângkhawh tur pawh a awm lo hial a. Kangvara han feha tuthlawh nen thlai chi han thlak tak hi ka nâp a.

Tuichang lui kan kân lai chuan Tuichang lui chu a lian hle a, a nu phut mai  bawk a, Khawlailung kan han thleng chu an khua a lo danglamin hmalakna thar hmuh tur a tam hle mai a. MP Pu C.L.Ruala’n Model Village-a a thlan vangte leh an bialtu MLA fel vangte pawh a ni pakhat ngei ang a, an khawtlang hruaitu, VC leh NGO te inpekna leh inlungrual vang a ni ngei tih kha chu sawi ngai lo, mahse pawimawh em em si a ni a. Sorkar hmalakna leh ruahmannate hi ţha viau ţhin mah se a dawngsawngtu khawtlang mite’n hahnemngaihna rilru leh inpekna nen kan phungbawm  si loh chuan sorkar project hi eng mah lo mai a ni fo thin a. Sorkar ruahmanna leh hmalaknate hi  khawtlang mite, Local community-in an ţawiawm hian hmasawmna leh hlawhtlinna duhawm hmel  lo langin mipui mimirin kan dikna chanvo kan lo nei thei ta thin a, chu chu sorkar hlawhtlinna a lo ni ta a ni.

Khawlailung khaw lai atang chuan Chekawna kal tur Vai pakhat hi kan  chuanna Sumo-ah chuan a rawn chuang ve a, ka bul-ah hian a rawn ţhu a, a hming leh a hnathawhte ka han zawh chuan Mizorama Sawhthing leh hmarchate kharchhawngtu a lo ni reng mai a. Mizorama sawhthing man mumal loh chhan keimaha ka lo chhui ka lo chhui ţhin, a chhan ka hriat fak theih si loh hre chiang ber tur ka bulah a lo ţhu ta reng mai chu remchanna leiin ka titipui ta chiam a, a thusawi hi a rintlak hlein ka hre bawk a ni.

FAMILIA: Ka pu, Tu nge i hming?

RANA DEB; Rana Deb

FAMILIA: Mizo tawng i thiam hle a, hetah hian eng nge i tih ber?

RANA DEB: Sawhthing ka lei a, a man ka rawn pe hlawm a ni.

FAMILIA: Sawhthing i kharchhawnna a rei tawh em? Silchar-ah chuan tu hnenah nge in zuk hralh a?

RANA DEB: Mizorama sawhthing leh hmarcha ka kharchhawnna hi kum 26 lai a ni ta a, Silchar-ah khuan pu (Marjon) kan nei a,  Tukor Deb leh Sukir Deb te unau an ni a, anni hian min tir a, an hnenah kan pe thin a ni.

FAMILIA: Anih, tunah hian eng zatin nge i lak a, eng zatin nge i hralh tak le? Quintal  eng zat nge i lei tawh?

RANA DEB; Kg khat Rs.7 (Cheng sarih) in trucks trip 5 (Qtl 750) ka la tawh a, Silchar-ah Rs 9.50 ( Cheng kua leh duli)in ka pe a, ka sawhthing lei kha a bal lutuk a, a nawi a tam si a, Rs.8000 ( Cheng sangriat) ka hloh va, ka chawi belh. Kan pute chuan Bangladesh-an kg-ah Rs.10 in an hralh. Hmarcha-ah ka vannei hlauh va, Nuai 3 ka hlep thung.

FAMILIA: Hmarcha chu khawi ami nge inlak khawm a?

RANA DEB: Khawchhak tlang dung Champhai, Vaphai, Cherhlun, Thingsai chheh vel ami kan la khawm thin a, kg-ah Rs.220/– in kan la a, Silchar-ah Rs.270/- in kan hralh a. Hmarcha chu sawhthing ang a ni lo va, hralh a kal reng a, a hlep erawh a tam vak thei lo thung a, kumin hi kan vannei a, ka hlep ve hlek a ni.

FAMILIA: Anih sawhthing hi a changin a man a sang thut a, a changin a hralhna a awm miah lo thung a. Hei hi a chhan eng nge ni ta bera i hriat?

DANA DEB: A chhan hi keini pawhin kan hre thei bik vek lo. Punjab, Andra Pradesh, Kolkatta leh Siliguri atanga sumdawng lianho hian an rawn chah thut hian sawhthing man hi a sang thut a, eng tikah nge an rawn chah leh ang tih kan hre lawk bik si lo va. Kum 1994, 1995 leh 1996 khan sawhthing man a to va, Bangladesh lam khan an rawn chah nasa a. Kum 2008, 2009, 2010 leh 2011 vel khan hralh a kal leh a, West Bengal, Punjab leh Andra Pradesh-a chin atan a chi an rawn chah tam vang niin ka hria a. Leilet-ah an ching a, leitha an pe a, an sawhthing a lianin a thinghlim em em a. Tuilian thut leh ruah sur thut chang hian an buai thin a. Chutiang hunah chuan Silchar lamah te an rawn dap thut thin niin a lang a ni.

FAMILIA: Kum 1994 khan Shillong Vai sumdawngte’n Khawzawl, Khawhai velah sawhthing an rawn lei a, kg-ah Rs.14 in an lei a, Khawzawl mi luhlul pathum, miin sawhthing chin an beidawng a, an bansan vek hnua pawha la ching luite an din chhuah phah a. Haulawng tlangdung leh Zoram pumah sawhthing chin an intihhmuh  ta sup sup a. Khatih hun lai khan Lal Isua kha a hring a hranin Haulawng tlangdungah lo kal phei sela chuan tehkhinthu-ah pawh Grape leh theipui chungchang sawi lovin sawhthing tehkhinthu a sawi an ring hial a ni.

DANA DEB: Khatih hun lai khan keini chuan Rs 14 em em chuan kan lei lo.

FAMILIA: A nih ka ring, Shillong Vaiho kha Bangladesh-a hralh tur an duh khawp an hmuh loh avangin chawlhkar hnih chhung chiah sawhthing kha a man tovin an lei a ni.

DANA DEP: Sawhthing hralhna market that chhung hi hun rei lo te a ni a, thla khat vel chiah hi a ni tlangpui.

FAMILIA: I sawi dik chiah.

DANA DEP: Kum 2015 khan sawhthing hralhna a awm a, truck trip 5 lai ka lei a, Aizawl Silchar kawngpui a tlang loh rei avanginka sawhthing lei te a tawih hman nual a, cheng nuai 5 ka hloh duai a, beidawngin in-ah ka haw a. Kan pu-in min rawn phone a, cheng nuai 5 rawn la la, Mizoramah sawhthing zuk kharchhawng leh rawh min ti a. A pawisa nuai 5 keng chuan Mizoramah ka rawn kal leh a, sawhthing kg 1 Rs 45-in ka khar chawng a, Silchar-ah kg 1 Rs 75-in ka hralh thei a, cheng nuai 10 ka hlep a, cheng nuai 5 ka hloh kha ka cover leh thei ta hram a ni. Mosolman Kutpui avangin sawhthing man a sang thut kha a lo ni a, a man to chhung kha hun rei lo te a ni thung.

FAMILIA: Anih, Mizoram sawhthing hi a ţha em?

RANA DEB: A tha lo, a bal lutuk, saiip bag-ah hian a ningnawi an thun tel teuh zel!

FAMILIA: Tunah hian kg-ah eng zatin nge i lei?

RANA DEB: Thingtlang nu leh pate hian an fate school admission leh zirlaibu lei nan pawisa an mamawh a, a man tlawm pawhin an hralh duh ta mai a, kg-ah Rs.5/- in ka leisak. Truck trip 1@ Quintal 150 ka lei tawh. Kan pu chuan truck trip 3 tal lei turin min ti a, mahse risk ka la ngam tawh lo a ni.

FAMILIA: Sumdawnna khawvelah chuan thil hralh kal reng ang chi hi a hlep tlem mahse a tih reng ngam a, a hlep tam thur thur ang chi hi chu risk puitling lak a ngai hrim hrim a, Mizorama sawhthing chin vaka risk lak hi a tih chiin i hria em? Eng nge I ngaihdan?

RANA DEB: Sawhthing chin vak hi a tih chiin ka hre lo. Engvang nge tih chuan Manipur te, Arunachal Pradesh-ah te West Bengal leh Punjab-ah te pawh an ching nasa a, Manipur leh Aunachal Pradesh lama an chinte hi Guwahati lam atangin Vai ram khawpuiah te an thawn nasa a, Mizorama sawhthingte hi Silchar kaltlangin Bangladesh-ah kan thawn a ni ber a, Bangladesh-ah sawhthing mamawhna a sang thutte a nih loh chuan Mizoram sawhthing hralhna, market  hi a awm reng ka ring lo va, a man pawh a to ka ring lo a ni. Tunah hian kei pawhin kg 1 Rs. 5/-pawhin truck trip khat bak ka la ngam rih lo a ni.

Chutia kan titi mawlh mawlh lai chuan Chekawn khua chu kan lo thleng ta reng mai a,  Rana Deb chu a chhuk ta a.

 

Written & published by Familia Fanai Laltansanga

The 11th April, 2017 | Camp: Rihkhawdar

 

 

RANA DEB
RANA DEB
Tuikuk Nula
Tuikuk Nula
Chhimtuipui
Chhimtuipui
Chakma nu pahnih tuichawi lai
Chakma nu pahnih tuichawi lai
Devasora kawng
Devasora kawng
Tuichawng phairuam
Tuichawng phairuam
Chakma naupang 3-in la an kai lai
Chakma naupang 3-in la an kai lai
KMMTTP
KMMTTP

Similar Articles

Top