You are here
Home > CCT Robawm > MIZO ZAWLNEITE LEH CHANCHIN ŢHA – Familia Fanai Lalţansanga

MIZO ZAWLNEITE LEH CHANCHIN ŢHA – Familia Fanai Lalţansanga

MIZO ZAWLNEITE LEH CHANCHIN ŢHA – Familia Fanai Lalţansanga

(Missionary Day pual leh Pu Buanga leh Sap Upate hriatreng nan vawiin chu ka thuziak thulkhung 3 ka phawrhchhuak leh a, hei hi a 3-na chu a ni)

IMG_20180111_151705

KNOW YOURSELF; Hmasang hnam fing hmasa Greek-ho khawpui Delphi-a Temple of Apollo luhna kawngkapui chungah chuan “Know Thyself” tih thuziak hi an tar kuau mai a. A awmziia chu “Mahni in hrechiang rawh”tihna a ni mai awm e. Socrates chuan mahni inhrechiang mang si lova, finna thuk zawk leh hriatna ril zawk hriatchhuah tuma hun leh tha khawhral chu thil atthlak leh thil nuihzatthlak tak a nih thu a sawi a. Mahni inhre chiang phawt ila, thil dang chu chiang leh fiah zawkin kan thiam theiin kan hre thei dawn chauh a ni a tihna a ni ber awm e. Mizote hi  tute nge kan nih? Eng ang hnam nge kan nih a, eng titur nge kan nih? tih hi han sawi ka tum a ni.

MIZO FUSION:Mizote’n kan ngaihsan em em Sap-ho leh an ţawng, English hi hnam khat atanga rawn insiamchhuak a ni lo va,Hnam hrang hrang leh ţawng hrang hrang atanga rawn insiamchhuak a ni a. England ram khu hman lai chuan Irebisan leh Celt te awmna a ni a, B.C 55 kum khan Rome Lal Julius Ceasar khan a run a, A.D 410 thlengin an awp a.German hmar lama awm Tutono hnamin an run leh a, chung hnamte chu Angles, Saxons leh Jutes te an ni a.Danish–hovin an rawn run reng a. A.D 871 khan Alfred the Great kha lal a lo ni ta hial a. Danish-ho an rawn pemlut zel a,a hnu-ah Saxon chu thuneitu ber an lo ni leh ta a. A.D 1066-ah Norman hovin an rawn run leh a, an chenchilh ta reng a, nupui pasal inneih pawlhin an inthlahpawlh nasa ta hle a.French tawng pawh chu tawng tual leng hran bik liau liau angina a awm thei ta bik lova, Latin tawng leh Saxon tawng te nen a inchawhpawlh ta vek a. Tichuan kum sang bi a lo ral meuh chuan English hnam leh English tawng chu fusion (sokhawm,remkhawm,tuahrem) atang lo piangchhuak a lo ni ta a ni. (W.Weech’s History of the World page. 460)

 Chutiang deuh chiah chuan Mizo hnam leh Mizo ţawng pawh hi Zo hnahthlak hnam peng hrang hrang khawsaho leh chenhona atanga rawn insiamchhuak a ni. Lentlang-ah khan Mizo hnam hrang hrangte kha khaw hran hranah mahni hnam bil tawng,mahni hnamzia leh mahni inthawi dan hrang ţheuh neiin kan khawsa a.Thlanrawn râl hlauvin thlâng kan rawn tlak hnu khan Selesih-ah lâl 7 an infinkhawm a.Heta ţang hian thlang an tla ta zel a, Sailo lalho khua-ah Mizo hnam hrang hrangte chu khua leh tui niin an lo khawsaho ta a. Lallula thlahten Zadeng lalho, Rolura thlahten Palian lalho leh Lianlula thlahten Thangluahho an tudai a. Khawchhak lam Pawi leh Paite nawr turin Lal huaisen Lalsavung an dah bawk a.Tichuan Hrangturzo leh Purun tlang chhim lam, Ţawipui piah khawchhak lam zawng zawng chu Fanai leh Chinzah lal ram a ni a.

Tichuan kum 1750 vel atanga 1880 inkar vel chhung hian Mizoram dung leh vangah ţawng hman thu-ah te, khawtlang inrelbawl danah te, thu chhia thu tha remdanah te, sakhaw biak dan chenin ngaihdan, rindan leh nunphung a lo inang ta deuh vek a. Chuvangin Mizo hnam peng hrang hrangte ţawng khat, nunphung khat, rorel dan inang khata kan intuahrem (fusion) theihna atana Sailo lalho thawhhlawkzia hi sawiin a siak lo a ni ber e! Khuanu remruat ka ti lo thei lo! Heng hun lai hian Mizoram khawtin deuh thaw-ah Zawlbuk neiin są leh rála an damkhawchhuah (survive) theih nan Lal leh val upate kaihhruaina hnuaiah nundan inzirtirna (institution) nghet leh ţha tak kan lo nei ta a, Zonunmawi (Mizo value system) inzirtirna hmun pawimawh tak a lo ni chho ta a ni.

 KUMPINU LEH MIZO LALTE; • Kum 1854 hma lam khan kum 17 chhungin Mizovin phaitual vawi 19 an run a, mi 107 an that a, mi 186 salah an man.

  • Kum 1850 –ah Col. Lister-an Sentlang Ngura khua a hal fai vek. Mirâwng an 200 a chhanchhuak.
  • Kum 1860-ah Ngura chuan chhim lam a rǖn leh a, khua 15 a rǖn a, mi 185 an that a, sal 150 an mân.
  • Kum 1862 leh kum 1869-ah Lalsuthlah-a’n Vaiho a rǖn.
  • Kum 1871 January ni 23-ah Bengkhuaia hovin Tlawng dungah Alexandrapore leh Katlicherra a rǖn a, Mr.Winchester an that a, a fanu kum 5 mi lek emaw Mary Winchester an mân a. Mizo pasalthaten Sap hmeichhe naupang hlau hmel pu tak zanah meichher enga an kalpui lai lemziak chu Sap chanchinbu-ah a chhuak a,chu hmeichhe naupang thlabar tak hmel chuanna chanchinbu chu London-a Sap mipa naupang 1-in a chhiar a, a rilru a khawih hle a, mut hunah mut nachang pawh a hre lo va, a theihnghilh thei ngai tawh lo a ni.Chu Sap mipa naupang chu J.H.Lorrain ( a hnu-a Pu Buanga lo ni ta kha) a ni.
  • Ainakhal an run leh bawk a, mi 25 an that a, sal 37 an man bawk.
  • January ni 23, 1871 khan Lalburha hovin Tuirial dunga Jhalnacherra an run a, kuli 7 an that.
  • January ni 26, 1871-ah Moniarkhal an run leh bawk.

 VAI AN LO LIAN TA! Sipai rual thlur 3-in an lo lut a.  Mizo upa ten Vai lian an tih kha Lushai expediton (1871-72) a ni a.

  • Khawthlang tuipui(Tlabung)-a lo chhuak chu Right Wing an ti a,General Brounlow-an a ho. Lt.Col-Thomas Herbert Lewin (Thangliana) a tawiawma , inkap lovin Mary Wincheter chu January 21,1872 –ah an la chhuak a,Tlabung lam panin an kalpui a,Calcutta lamah an chhukpui ta zel a ni.
  • Tlawng dunga lute chu Middle Wing an ti a, Reiek, Sailianpuia khua an thlen laiin Mary Winchester lakchhuah a ni ta tih hrilh nan Meithallawn ,Thenzawl atang kahchhuah an hmu a, meithawllawn vekin an chhang a, an haw leh ta a ni. Ringht wing leh Middle Wing te hi Mary Winchester chhanchhuak tura lo chhuak an ni.
  • Tipaimukh a lo chhuakte hi Left Wing an ti a,an rawn thawk rip ber a,Sai pawh an chhawr a, Brigadier-General G.Bourchier-an a ho va,mi 4000 chuang an ni. An tum chu Lalburha hrem leh a silai leh rallakte laklet a ni.Champhai lal Vanhnuailiana a lo thi hman a, a lungdawh thar takah chuan sukte lu,la sen seng sung 4 an lo tar an va hmu. February ni 21, 1872 khan an kir leh ta.

SAP LU AN LA! • Kum 1888-ah Rahmate kiangah Lt. Steward- leh a hote survey nei lai chu Pawi lal Hausata ram mǖin an hmu fuh a, an suam a, Sap 2 leh sipai 1 an that.

  • 1888 December thlaah Lungliana leh Nikhaman Tlabung atanga mel 4 vel Sirte tlang ami Thangluah khua an run a, mi an that chiam a, salah an hruai teuh bawk.
  • Kum 1889-ah Lianphunga Satikang rama mi bawk Tuikukho a zuk run a, mi an that tam hle a, sal pawh 100 lai an man bawk.

VAI LIAN VAWI HNIHNA ;( Chin-Lushai Expediton 1889-1890) KUMPINU chuan Mizoram chu awp hlen turin a siruk la-in ţhuang thum (3)-in an rawn thawk ta rup mai a, Chittagong Column chu Bragadier General V.W.Tregear-a’n a hova, mi 3400 vel an ni. Assam Column chu Mr.Daly-a’n a hova, Surma valley Military Police 400 a hruai a.Northern column chu Colonel G.J.Skinner-a’n a hova, sipai 800 vel an ni. Chhim lam Vai lian Brig.General Tregear hote chuan Kum 1888 December thlaah Tlabung an lo thleng a, Hmar lam Vailian chu kum 1889 January thlaah Changsil an lo thleng a ni. Tichuan Mizo lalhote an titlawm ta zel a, an inkah hnuhnung ber chu February ni 29,1892 kuma Sesawng inkahna kha a ni.

Tichuan, Kumpinu-in min rawn awp ţantirh khan Mizoram hi Sailo lalte, Fanai lalte leh Chinzah lalte inrelbawlna hnuaiah a lo awm vek tawh a. Chutah tak chuan Ţawng thuhmun, Lusei ţawng an lo hmangho thei deuh vek tawh a, Saphovin min awp hnu hian indo, inrun, inrawk a tawp ta vek a, Ni tla seng lova roreltu Kumpinu rorelna hnuai-ah Lushai Hills chu ralmuang takin a lo awm ta a ni.

Zonu Zopa hriat thiam theih zawngin han sawi dawn ta ila, ram chang ţha tak, thing leh mau pik tak chu lo atan an han vat ta a, vahchap an han phoro hnu chuan lo an han hal ta a, buh chi thlak turin buahsaih peih a lo ni ta a. Chutiang chiah chuan Mizoram thim tak leh indo inrun reng renga awmna ram chu British sawrkar a insawhngheh rualin Chanchin ţha dawng turin a lo inpeih ta a ni.

DARPHAWKA

MIZO ZAWLNEI 2; Lunglei bial mi pakhat Selkhuma an tih chuan thu mak tak tak a sawi thin a.”An thuin Van a ǖr ang tih te,Chhim leh Hmarah mei a ěng ang tih te leh Tlawng hnarah lal ngai lo a lâl ang tih te, a lo sawilawk thin a A hnu kum 50 velah, Mizo Zawlnei ropui Darphawka(a hming dik tak chu Darneihthanga ) khan mumang anga inlarna vawi 3 ,1882,1885 leh 1890 kumah te a hmu a, a hnuhnung ber 1890 hian “Tuifinriat ral atangin mingo an lo kal ang a, an thu lo awi vat ang che u” tiin a sawi a ni. (Nimahsela amah, Thlarau dik tak chu,a lo thlen hun chuan thutak zawng zawngah a hruailut ang che u,amaha phuahchawpin thu a sawi dawn si lo ; thu a dawn apiang chu a hril zawk ang: thil lo thleng turte pawh a hriattir ang che u”(Johana 16;13) tih ziak ang khan .)

CHANCHIN THA; Mizo zawlneite’n an lo hril lawk ang ngeiin Chanchin tha hril tur mi ngo an lo chhuak ta! Khasi rama awm, Welsh Presbyterian missionary Rev.William Williams chuan Sap chanchinbu editor hruaiin Aizawl-ah Kum 1891 march ni 20-ah an lo lut a, Mizo leh Sap indo lai a ni a, awm rei an phal lo va, April ni 17-ah an hawng leh a, Mizorama Missionary hna thawh a tum hle a, a boral tak avangin a thil tum a puitlin hman ta lo. A report ziak avangin Welsh mission-in a hnu deuh hlekah Mizoramah a lo luh phah ta.

William Williams (1859-1892). The first missionary to visit Mizoram.
William Williams (1859-1892). The first missionary to visit Mizoram.

WILLIAMA THLAN

Mihring thil tum hi chu a hlawhlting lo fo va, Pathian chatuan remruat erawh dân rual a ni lo. Ram a lo ralmuan tak avangin North Lushai Hills Bawrhsap Mr.A.W.Davies chuan Frederick William Savidge(Sap Upa) leh James Herbert Lorrain(Pu buanga) te hnenah Lushai Hills luhphalna an pe ta a,January ni 11, 1894 kumah Aizawl an thleng. Hemi kum hian A,Aw,B min siamsak nghal.April ni 2-ah Mizorama Skul leh Biak In ni nghal hmasa ber an sa zo bawk. Sap Upa leh Pu Buanga te hi a hun takah an lo thleng a ni.Rev.D.E.Jones chuan “Sawrkar kal hmain hetah (Aizawlah) lo kal ta sela, an lu tan chum a ni ang.” a ti hial. Kumpinu sawrkar chuan Mizoramah Bengali tawng hi official language atan hman a lo tum mek a.Bawrhsap A.Porteous-a chuan 1896 kum-ah Assam Chief commissioner Secretary hnenah Mizo naupangte tan sikul 1 din a rawtna-ah chuan Bengali tawng zirtir phawt nise tiin a ziak. Pu Buanga ten Mizo hawrawp min siamsak hun pawh hi a hun dik tak a ni. Rev.C.L.Hminga chuan “Chanchin Tha hi keimahni tawng leh hawrawp ngeiin inpek chhawn ni ta lo sela chuan, kan hnam pum hian Chanchin tha hi kan la chang kim lo tawp ang’ a ti.

15941506_1325125964219106_5352468175903690073_n

MISSIONARY THLARAU MI;Mizoram kan vanneihna em em chu BMS missionary 2 Sap Upa leh Pu Buanga te kha an ţha em em a, an hna-ah an tui a, an thlarau mi bawk. Welsh Missionary Zosaphluia (Rev.D.E Jones) kha thlarau mi tak a lo ni leh zel a, Mizote zai leh hla phuah lama kan talent haichhuak turin Zosapthara (Rev.Edwin Rolands) kha hla phuah thiam tak, zai thiam tak a lo ni leh zel a. Rev.Dr.H.S Luaia’n min hrilh dan chuan  “Missionary lo chhuak zawng zawng kha an ţha vek kher lova, Sap Upa leh Pu Buanga kan nei kha kan vannei hle a ni’ a ti. Mak leh ang reng tak mai chu Mizoram lalte an tuktlawm hnua Kumpinu hnuaia Mizoram awptu 2 te kha Pathian ţih mi leh Kohhran ţiaktir ngai pawhmawh em em an ni tlat kha a ni.Tarmit( J.Shakespeare) leh Loch Sapte kha mi ţha tak an ni ve ve a ni. Tarmita’n suam hmang leh tualthat Lamsuakate kha 1900 kum khan Mizo lalho hma-ah a khaihlumtir a.An chung thu a ngaih tuah zawh hnu hian a officea mi a chhuahtir vek a, kawngka inkalhkhum a,minute 5 vel chhung Pathian hnenah a inhlan a nih an ring.

PU BUANGA TE SAILUNGVAR LIM

 Kum 1904-ah sikul enkawl hna chu Mission kutah sawrkarin a dah ta a.1952 kumah sawrkarin skul tam ber a la let leh ta chauh a ni.Kum 50 deuh thaw Mizorama zirna In zawng zawng deuh thaw Mission kuta a awm avangin zirna lamah hma kan sawn hle a ni. Chhim lama BMS missionary te leh Hmara lama Welsh Presbyterian Mission hnuaia missionary te chauh hian Pathian thu hi hril ta se, Mizoram pumah kristian sakhua hi a darh chak lo viau ang. Pathian rorel dan mak tak a lo lang leh ta a, Thlarau thianghlim chuan Harhna hmangin Mizo mipuite min han nuai leh ta a, ringtu kan lo pung chak ta em em a ni. 1901 kum khan Mizoram mihring awm zat 82,434 zingah ringtu 24 emaw chauh an awm a.

CHHIM LAM PALAITE

HARHNA TUM KHATNA : Kum 1906 khan Aizawla Zosaphluia leh Lunglei Serkawna Pu Buanga te chuan Khasi ram, Mairang khuaa Harhna chhim a, chu Harhna chu  Mizorama rawn puakchhuah ve theih  beiseiin Mizoram atanga palai  11 an tir a.Mi 11 kher an thlan nachhan chu Lal Isua zirtirte Juda Iskariota tel lo zat chiah niin Hmeichhia 3 an teltir a ni.Hmar lam atanga palaite chu Chawnga,Thanga,Khuma leh Vanchhunga te an ni a, Hmeichhia te chu Siniboni,Pawngi leh Thangkungi te an ni a. Chhim lam atanga palaite chu Thankunga( R.Buchhawna pa) Parima,Zathanga leh Lěnga te an ni.Lěnga hi a ke a nat avangin Aizawl thleng chauh a kal thei ta.An zuk chhim chu eng teh ual an ang thei law,an lo haw kawngah phei chuan an intithiam lova,  kawng tluanin an inbe thei mang lo. Aizawl an luh dawn Chaltlanga an tawngtai laiin thil eng emaw tak chu an rilru-ah a thleng a, Harhna erawh a la thleng lo. April ni 9, Thawhtan zingah Chhim lam palaite thlahna tawngtai inkhawm, Hmeichhe sikul Mission Veng Aizawl-a an neih laiin harhna hi a thleng ta! Zosaphluia chuan Khandaih khua-ah Harhna a thleng ve ang tia thlarau mita a lo hmuh chu, Nilai (April 11, 1906) zanah Vanphunga khua Khandaihah “Zan inkhawmah Bomb phum/kam ruk puak ang in a thleng phut bawk.

Sap Upa leh Pu Buanga Aizawl an thlen hlim khan Mizo khawsak dan an han en vel a,an ran vulhte nen inkhata an lawiza a, an khawsaho mai kha mak a ti hle mai a, Pu Buang phei chuan hetiang hnam mawl leh hnam bal lutuk Pathian thuhril tura Pathianin a ruat nia a hriat kha a ringhlel rum rum a,khawvelah hnam ropui, changkang leh fing zawk an tam tehreng nen hetiang hnam mawl hlum bel ang mai a hmuh chuan mak a tihzia a log book-ah a ziak hial a ni. Hetiang hnam mawl tak a hman hian
A hming a tiropui zual hle zawk dawn a ni mahna, tiin a ziak a ni.

Pu Buanga’n a Log Book-a 16.1.1894 nia a ziak ka han thur chhuak ang e. First Impression: Iam am xure if you were to walk through a Lushai villageand were to see that pigs, fowls and youngsters all nothing & scrambing about in dirt and could peep inside the squalid hovels in where thise people live, you would tingk that it was high time that they were taught to live a little less like beasts.

Ni 29.1.1894-a a ziak: An Earthen Vessel: And What seems most wonderful to me is that God should choose such poor, weak instruments for such a glorious work. It may be that He knows that by using earthen vessels, the more golry will accrue to His Name.

 Pathian thu an han hrilh tan a, mi sual an nihzia an han hrilh chuan Mizo-ho nuih an tiza hle a, misual an nihna an inhre tlat lo. Chuvangin ramhuai aia thil tithei Pathian a awm thu an hrilh ta zawk a ni. Chutianga sual nih inhre thei lo Mizote kha Harhna ţum khatna khan a han nuai ta a, sual nih inhriatna an nei a, an sual an puang a, Pathian ngaihdamna an chan thu hriattirin an awm ta bawk kha a mak hle a ni.

 HARHNA TUM HNIHNA; Champhai Hmunhmeltha khua-ah February ni 9, 1913 zanah khawhar (Mihlim Dara) in-a an zaikhawm laiin harhna hi a thleng a, kar awm meuh lovin Durtlang leh Aizawl Mission Vengah a thleng a, he harhna hian naupang a nuai hle. He harhna thu ken ber chu Krawsa tawrhna thu leh Lal Isua lo kal leh hnaihzia a ni.

HARHNA TUM THUMNA; Kum 1919 July ni 26 Pathianni zana Biak in inkhawmna-ah a rual ţhatin Thingsai, Zotlang leh Nisapuiah a thleng a ni. He harhna hian Zoram dung leh vang mai ni lo, Zo hnahthlak awmna Burma, Manipur, Halflong leh Zampui tlangdungte a fanchhuak thuai a, ringtu an pung nasa em em a ni.1920 kum vel hian Mizoramah bawlpu leh seluphante a bo deuh vek tawh.

HARHNA TUM LINA; Harhna vawi li-na hi kum 1930 thlasik laiin Biate khua-ah a thleng a.He harhna hi Pu Lalhmuaka chuan harhna lo thleng dang aiin a ropui ber niin a ngai a ni. Harhna lo thlen a apiangin Pathianin hla hmangin a inpuangchhuak nasa em em a, an zai tui thei em em a, an lam a, taksa chetna chi hrang hrang nen hla an nawn tlut tlut thin a,hla thute chuan mi rilru-ah hna a thawk nasa em em a,mittui tla zawih zawihin hlim leh lawm takin an zai thin a, Khawbungah hla vawi 88 an nawn a, Hmunhmeltha khua harhna a thlen tum khan Nilai zana an hla sa kha an tawp thei ta lo va, Chawlni zan rei tak thlengin an chhun zawm a ni.

Harhna tum 3-na vanglai khan Lungrang inkhawmpui-ah khan Pastor Liangkhaian Chawlhni chawhnu inkhawmah Kraws thu a sawi a,banna hla-ah , ‘Thu mak ka sawi nin theih loh chu Kalvari chanchin a ni’ tih hla kha an sa a, Pu Buanga rilru a khawih hle mai a,hla chang sawiin vawi 9 a nawn a, a mittui tla zawih zawih chungin, Kalvary tlanga a ke ngei a a lo kal tawh thu leh Lungrang tlang atanga kraws a hmuh chian anga chiang hian Lal Isua tuarna Kraws hi a la hmuhfiah ngai loh thu a sawi hial a ni. Thlarau mite hla phuah hian thlarau mit-in Pathian ropuizia a hmuhfiahtir thin a,.Hla hi lei hreawm leh angelte lenna Van ram dawh zawmtu lei(bridge) a ni a, Pathian thu ril tak tak thu hmanga sawi fiah theih loh hi hla thu mawl te te hmangain chiang tak leh fiah takin mite thinlungah a hrilhfiah thei a ni. Mr.B.L.Sojwal(Secretary of the Board of Theological Education of India ) chuan “The Mizo Church shall continue to sing as long as it is alive,and it shall remain alive as long as it sings” a ti hial a ni. Mizo Kohhran a nun chhung chu fak hla sa-in an zai reng ang a,Fak hla sa-a an zai chhung chuan Mizo Kohhran hi a nung reng bawk ang” a ti a ni. Harhna lo thlen dan kan han sawichhuah chhan hi Pathianin Mizote zinga a thu a puandarhna hmanraw pawimawh tak a nihzia sawi lan ka han tum vang a ni a. 1902 kum khan Hmar lamah ringtu 90 chauh an awm laiin Chhim lamah chuan ringtu 314 an awm tawh a, hei hi Darphawka inlarna avangin Chhim lam miten chanchin tha dawngsawng turin an thinlung a inhawng zawk niin a lang a ni. Pukpuia ringtu hmasa Khawtinthanga(Pastor Thankunga pa) chuan inthawi ngai lova ngaihdam thei chu tute nge lawm lovang,a ti hial a ni. Pathianin Ama chanchin puangchhuak turin kan mawl ang anga kan rilru mil zawnga Pathian thusawi thiam min pe zel a ni.

THANGBAWNGA

THANGBAWNGA; Chhim lamah Thingsai lal Upa khawnbawl Thangbawnga leh Hmar lamah Arro Khuangte hi Pathianin a thuhril darh tura a koh leh a ruatte an niin a lang a.Thangbawng hian kum 18 chhungin mi 4431 kristianah a siam a,tawngtai mi leh tihdam rawngbawlna nei mi a ni a. An chaw ei tur tawngtai ho an rei thei hle a, “Chaw lum an ei ngai lo” an ti hial.Dam lote a tawngtaisakin an lo dam thin a, tawngtaiTihdam rawngbawlna a neih avangin Zoram pumin an pan a ni e” tih theih a ni a.Amah pan tute kha lawm em emin an haw thei vek kha thil mak tak a ni bawk a ni. A hnena kala lawmna nei apiangte chuan an kalna apiangah Pathian hnathawh ropuizia an sawi zel a, chuvangin Zoramah hian amah avangin Pathian ram a zau sawt hle a ni.

ARRO KHUANGA

ARRO KHUANGA; Hmar lama Pathian thu hrila vak thin Arro Khuanga kha mi danglam tak a ni bawk a,Pathian a ring em em a, Pathian thu hrilin a zinchhuak reng a, Pathian tan thilpek a pe tha em em a,Pathian-ah a lawm em em thei reng a ni. Miin Pathian thu sawi tur an hre lo hi mak a ti em em a, “Sawma pakhat pek harsa an inti fo mai hi a mak e,Pek loh hi a harsa a ni zawk a lawm”a ti. Hmuifang tlang kawng chho lutukah hian nghawngkawl nen bawmrang khat thil phur chungin, “ Ka tho anga ka Pa hnenah ka kal teh ang” tih hla sa chungin a kal a, a hlim ta em em a,a lam chho ta zel a, hah hlek lovin nuam titakin a zawhchhuak parh thei a ni.

LALKHERHA

LALKHERHA; Zan khat chu Lalkherha hian mumang a nei a. A mumangah chuan Thangbawnga kha a hmu a, sipai General inchei angin a lo inchei a, a awm-ah chuan tangkapui a inbel ţhut a,chutia an ding dun chu a kut ding lamah chuan meichher alh hluah hluah a keng a,Thangbawnga chuan Lalkherha hnenah “Hei hi la la,chhi zel rawh” a ti a. Lalkherha chuan meichher chu Thangbawnga kut ata chu a la ta a ni.He a mang hi a man hnu chawlhkar khatah Thangbawnga thih thu kha hriat a ni ta a ni. Lalkherh thil sawi pakhat an sawi chu hei hi a ni a. “Kan thlawhhmaah,hlo kan thlawh lain,Vau atangin Sap pakhat, Sap lukhum khum,ka hma lamah a lo kal a;chibai kan inbuk a.Aizawla Pu Mendus-a ka hmu chu ( a hmain a la hmu lo) kan thlawhhmaa ka Sap hmuh chibai ka buk chiah kha a ni,” a ti a.A buhseng laiin Pathian aw a hria a, A ram leh a felna chu zawng hmasa zawk rawh u tih hi chiang em emin a hria a , tichuan ,chung zawng zawng chu a pek belhchhah dawn che nia” tih lai thu chu chiang vak lovin a hria a. A han hawi vel a, Pathian hausakna chu a hawina lam apiangah chiang takin a hmu ta a, a mittui a luang zawih zawih ta a, Pathian tan a inhlan ta a .Pathian kohna a hriat hnu thla 2-ah Aizawla inkhawmpui chhima a a lam lai chu Missionary E.LMendus chuan a lo en reng a.Inkhawm ban hnu chuan Pu Mendus chuan a va chibai a “I lam laiin ka en reng a ni. Pathian thu I hril thin ang” a lo ti a ni. Lalkherha hian kum 1931 atang 1970 thleng rawng a bawlnaah kum 30 chuang zet mahni-ina khawsa hman lovin rawngbawlin a hun a hmang a . Hmingchhiatna leh hming hliauna nei maih lo vin Pathian rawng a bawl thei a, khawvel thil hian a tibuai pha lo reng reng a ni. A zindan tur hi a hre lawk ngai lova, a mumangah a iptepui aka a chhuahna lam panin a zin mai thin a ni.Thusawi hi a thiam em em a, pulpit a lawn rual hian a bulah mi pakhat awm ve hian a hre thin a ni. Pathian kohna-ah a chiang hle a, kohhran upa nihna te, Manipura kohhran pakhatin pastor tur an sawmna te, Manipur rama leilet tha tak a thlawna an pek te pawh a hnawl vek a ni. Biate daia,rilru sa huam huama, awm ngaihna hre lo hiala  a mangang, tlangsam buk hnuaia a tawngtaia,Van mite’n an rawn pawla,a hlimzia, “Vanram pawh hei aiin a nuam bik lo ang e” a ti hial a. “Biate daia sawntlung bul zawla ka hnena lo langte kha a ropui em avangin ti hian ka vâk ka vâk a nih hi”a ti thin a ni.

SUAKLIANA; Ani hi khawhmu lo, kuta hruai ngai a ni a. Sam bu hi a vawng vek a, en lovin a sawichhuak vek thei a ni.”Sam bu-ah hian Lalpa pek ka dawng a ni e. Ka sawi thei chauh a ni lova, a hrilhfiahna pawh pek ka ni tel” a ti. “Hlaah pawh hian Lalpa thilpek ka dawng a” a ti bawk. Suakliana chu Thangbawnga hnenah a kal a,Thangbawnga chuan huan pal a lo pin mawlh mawlh lai chuan a bul a va thleng a. A chemtum chu dahin a ding a, chibai an inbuk a, invuana an din dun lai chuan Thangbawnga chuan, “Ka nau, Lalpa malsawmna I va dawng nasa ve le.I lo kal hi kan kawtchhuaha I lo thleng kha Lalpan min hrilh a.Ka nau, chapo reng reng suh, I ta chu sihsen tiat pawh a awm lo. Sihsen tiat pawh.I rilru a chapona a lo awm chuan Lalpa hmaah thingthi la, a ngaidamna dil thuai ang che” a lo ti a. Suakliana chuan hetiang hian a sawi bawk. “Hla phuaah hian Lalpa malsawmna leh a pek ka dawng nasa em em mai a. Lei leh van inkar hi hlain a khat a; ka phuah seng lo a ni. Ka lo chapo ta a, Lalpan a thilpek min laksak ta a. Han phuah tumin kan’n ngaihtuah chiam thin a, phuah tur ka hre chuang lo a. Lei leh van inkar hi a kaw rawng rawng mai a ni.Tah zet chuan Thangbâwnga thu min hrilh kha ka hre vawng vawng mai”.

MI HLIM KAPA; Kapa hian 1932 khan Zoram hausakna lo awm tura hrilhtu hrilh chu puangchhuakin a vahpui a, Luangmuala a awm laiin a in leh lo, a ran chenin Kohhran te a rochuntir a, a thil hmuh leh hriat chu puangchhuakin a vak thin a ni. Vantirhkoh Angelin a rawn hrilh a, a bula awm niin a hria a,thutphah te an pe a, ţhu tur an awm chuang lo va, awka ngeiin fel fiah takin an inbe thin a. Japan ral a lo len khan Mizoram hi an rawnrun ngei tura ngaih a ni a. Mihlim Kapa chuan Mizoram chu a him dawn, kil 4-ah vantirhkohvin an veng a ni” a ti a. A sawi ang ngeiin Mizoram chu Japan ral lakah a him ta a ni. Mihlim Kap hi Thangbawnga hmu turin a zin a, a kalkawngah Pa chuan a rawn pawl ta a. A thilhmuh thenkhatte chu;

(1)Mizoram kum 50 chhung chanchin tur a entir.chumi chhung chuan mi an hriselin, an hausa a.Mizoram hi Himna Ram a lo ni a.Hringchar atangin rel a lo lut a.Hmunpui ram Lengpuiah a tawp. (Hei hi tunah a thleng dik mek a,rail kawng an lai mup mup tawh a, pawisa engkim sorkarin a ruahman vek tawh a ni). Sitakang atangin a lo lut bawk a,Thenzawlah a tawp a. Kawlvai lam atangin a lo lut bawk a,Biate-ah a tawp a.

(2) Kum 50 dang chhung tur a entir leh a.Hemi chhung hian Mizoram nula leh tlangvalte hi Pathian thu hril turin,mi rama chhuak zung zungin a hmu a;(Hei hi a thleng dik mek a,C.T.Lalrinawma chuan tunah Cambodia ramah ringawt pawh Mizo thalai 23 ( a aiin an tam tawh mai thei) kan awm mek, a ti a,Wales ramah te, Africa ramah te, Nepal ramah te,Thailand Akha hnam zingah te, Bhutan ramah te, China ramah te kan fehchhuak mek zel! )mi rama Kristian tihduhdahte chu Mizorama lo lut zung zungin a hmu bawk a.

(3) Lehkhabu zial inphelh zung zung angin Pathian lehkhabu hi fiah uarin a hmuhtir bawk. Heng kan han sawi tak Pathian thuhriltute hi mi mawl,zirna sang pawh nei lo an ni a, heng mi mawl te tete hian hriattirna Aw leh Hmuh an nei a, van lam nen inzawmna an nei a ni tih a chiang hle a ni.

ZOSAPHLUIA

Heng mite kaltlang leh Harhna avang te leh Mizo hlaphuah thiamte avangin Mizoramin chanchin tha eng a hmuh atanga kum 50na, 1944 kum-ah chuan ringtu an lo pung ta hle mai a, Mizorama mihring cheng za zel a 85(85%) chu ringtu an lo ni ta a ni.  Jubily Assemby an neihna Mc Donald Hill pioneer missionary-te lungdawh-ah mipui tam tak leh Indopui II-naa sap sipai  tam tak leh bajapu te an pungkhawm a. Hetah hian ka pu Pastor Langlura pawh a tel ve nghe nghe a. Zosap Rev. E.L.Mendus chuan hetiang hian thu  a sawi a. “The preaching of Gospel of Jesus has started in the small spot.It has now spread all over the land.The peculiarity of the Lushai Hills is that; if one goes, beyond the boundary to the south, to the west, to the north and to the east,there one will meet Christians. So this small spot is HOLY. Zarkawt hi Mizoram sumdawnna hmun pui ber commercial centre ni mah se, Mizoram Kristianna bul ţanna hmun, hmun thianghlim a ni.

ZOSAPTHARA

 Rev.Dr.Zairema chuan Kristian Missionary ten chanchin ţha an rawn hrilh atanga kum 60 velah Mizorama awm Mizo hnahthlak khatte chu Kristian an ni ta vek tih tur a ni a. Hei hi khawvela thil awm zen zen lo a ni a, sakhaw chhui mite phei chuan an ngaihven hle a ni, a ti a, zawhna a siam nghal a ‘Mizo rilru hi a lo inhawngin an rindan atanga Kristian rindan han pawm hahdamna emaw awlsam riauva emaw a awm em? a ti a. He zawhna chhan dik tumin Pi Pute Biak Hi tih lehkhabu a buatsaih hial a ni. Mizorama lal inthlahchhawng kal zel Sailo lalte, Fanai lalte, Chinzah lalte leh hnamchawm lal tlemte te chu 1954 kum April thla khan ban vek an ni a.An lal ban dan kha a dik tawk lova, lal ban theihna dan pawh an nei lo tih tun hnu-ah hmuhchhuah a ni. Mahse Pathian remruat a ni ang e. Lal ban anih tak avangin Mizorama hnam hrang hrangte inang khat vekin (man is created equal) kan lo awm phah ta thung a, Mizo hnam thar a lo piang ta! ( A new nation is born!)

img002

Kum  1962 hnu lamah chuan Pathianin a thu puangchhuak turin lehkhathiamte a ko chhuak ta a, Dr.R.K.Nghaka te, Dr.L.N.Tluanga te, Rev.Vanlalnghaka te leh mi dang tam tak an lo chhuak ta a, Gospel centenary kan lawm hunah phei chuan Mizoram chu India ram lehkha ziak thiam tamna, literacy percentage sang ber dawttu state kan lo ni pha ta hial a. Mihlim Kapa hrilhlawkna angin Huan ţha leh thlai ro an uar ang a, Pathian ram a pung ang a tih ang leh Mizoram nula leh tlangvalte hi Pathian thu hril turin mi ramah an chhuak zung zung ang a tih ang hun kha kan lo thleng ta. Mizoram chu India rama state ralmuang ber kan lo ni ta bawk a,Khawizu leh hnute tui luanna Kanan ram, Davida’n Golitha  chala virvawma a vawmthluka,a lu a lak hma atanga tun thleng a, thisen luanna, inthah rengna, intihbuai rengna Israel GAZA ram aiin a lo nuamin a lo ralmuang ta zawk bawk a ni.

Pastor Challiana leh Pastor Chuautera
Pastor Challiana leh Pastor Chuautera

THU TLANGKAWMNA LEH TLIPNA; Kan han sawi tak zawng zawng atanga lo lang chiang ta em em thil pakhat chu; kan duh reng vang leh kan ţhat vanga chinchin ţha hi dawng kan ni lo. Pathianin min rawn zawngchhuak a, a chanchin ţha kawl tur leh puangdarh tuin min kovin min thlang a, kan huat em em chal hnawih sen, milem be hnam thawhchhuah sa sum, India ram hausakna hmangin min chherin min buatsaih mek a ni. Kanan ram pana Israel fate Mosia kaihhruaina hnuaia an kal lai khan, Pathian hruaina chhum ding hmu reng chung leh a thupek hre reng chungin luhlul chhuahte, Pathian fiah chingte, insum thei lote kha thlalerah an tluhlumin an boral vek!

WP_20140226_007

Keini Pathian zawnchhuah hnam Mizo zingah pawh Pathian aia khawvel thil, hausakna leh tangka sum lungkhamte chu kan mit hmuh lai ngeiin  an boral mek  zel a ni. Pathian hnam thlan Israel fate chu chaw-lawlna sualin a khuh bo mek laiin keini hnam mawl tak , bal em em, hrisel lo em em,Pu Buanga Log book tawngkam-a hluma siam bel( an earthen vessel) hi Lal Isua zarah Abrahama chi, chi ropui kan lo ni thei ta a ni. Kan chhehvela kan tlangmi puite, Khasi, Jaintia, Tripuri, Naga te, Hindu- sakhuaa inlet ta Meitei te kan han thlir hian Pathian zawnchhuah hnam  Mizo nih hi a va ropui em! ka ti a ni.

SAP UPA

Thlanrawn khua-ah kum 1991 khan ka han kal a, an va retheiin an va tlem tawh tak em! Sual man chu thlarau lam thihna chauh pawh a lo ni lo! Hnam ang leh chhungkua ang pawha boralna, mang hlauhna a lo ni. A va rapthlak teh lul em! Lal Isua thupek kan zawm chuan Thlamuantu (counsellor/Advocate; Greek tawng paraklete tih hi Mizo tawnga thlamuantu tih hian a sawichhuak kim thei lo, ţanpui vartu hnai reng tih hi ka rilru-a a fiah dan chu a ni zawk mah) pek min tiam a.Thlarau thianghlim dik tak chuan thilpek 7 a nei a, chungte chu; finna te, hriatthiamna te, thutlukna dik leh tha siam theihna te, Huaisenna te, Hriatna te, Pathian zahna te leh Pathian ţihna te a ni. (Wisdom, Understanding, Counsel, Fortitude, Knowledge, Piety and Fear of the Lord).

Mizote hi Hnam naupang tak kan ni a, sum peipun leh sum deh kan la thiam tawk lo va, Mizo zinga sumdawng hmasate chhungkua inthlahchhawng zel chanchin kan zir chian chuan chhungkaw awhawm tak an vang tawh em em a ni. Mizo zingah zu in thiam kan vang hle. Mizote hi Pathian zawnchhuah hnam kan nih avang tak chuan hlima zaia lam ringawt tur kan ni lo, kan kovah mawhphurhna a nghat tel nghal tlat a. A koh loh leh a thlan loh hnamte, Mosolman & Hindu te etc, chungah chuan Pahtian thikthu a chhe teh ual lo ni ngei tur a ni. A zawnchhuahte chungah erawh a thikthu a chhia a, kanralhmang Pathian a nihna a lantir chawk. A thu hria-a zawmtute chhungkaw inthlah kal zel (kohhrana nihna nei leh pastorte chauh emaw tihna   ni kher lovin! Lal Isua Krista ěngin an thinlung a chhun-en thinlunga thianghlimte chauh) kan chhui chuan mi nihlawh, mi vannei, mi awhawm,mi hmingţha leh mi zahawm an ni deuh zel. Keini nu leh pate hi chu he khawvelah hian kan dam rei tawh kher lo ang! Mihring chu hlobet ang lek kan ni.Kan tu leh fate, kan thlah kal zelte hmuingilna, malsawmna leh dam khaw chhuahna awmchhun chu Lalpa hmangaih a, a thupekte zawm hi a ni. (Deut 6; 5-7)

Aw Israel mite u, ngaithla teh u, LALPA kan Pathian chauh chu LALPA a ni a;

LALPA in Pathian chu in thinlung zawng zawngin , in rilru zawng zawngin, in chakna zawng zawngin a hmangaih tur a ni.

Tin, heng thu, vawiina ka pêk che u hi in thinlungah a cham reng ang a;in fate ţhahnemngai takin in zirtir ang a, in ina in ţhut lai te, kawnga in kal lai te, in mut lai te, in thawh hun tein in sawi thin tur a ni.  

Similar Articles

Top