You are here
Home > CCT Robawm > MIZO ŢAWNG HI A KHAWSIK A SANG HLE! – Mizo Academy of Letters (MAL)

MIZO ŢAWNG HI A KHAWSIK A SANG HLE! – Mizo Academy of Letters (MAL)

MIZO ŢAWNG HI A KHAWSIK A SANG HLE! – Mizo Academy of Letters (MAL)

DDK Aizawl aţanga tihchhuah MIZO ŢAWNG HMAKHUA tih thupui, Prof. Laltluangliana Khiangte, President, Mizo Academy of Letters (MAL), Dr.Rualkhuma, Secretary Mizo Academy of Letters, Dorothy Zonunsangi, Executive member, Mizo Academy of Letters leh J. Malsawmzuala Vanchhawng (Host) te sawihonaa a pawimawh lai lai chaichehin ka han thur chhuak ang e.

vlcsnap-2018-01-27-12h07m25s736

Prof. LALTLUANGLIANA KHIANGTE, President, MAL; Chhiarpuia a lan dan chuan tun hma kum 1901 chhiarpui hmasa berah  khan Mizo tih a la awm lo va, Lusei emaw Lushai emaw  tih a ni a;

Prof. LALTLUANGLIANA KHIANGTE, President, MAL
Prof. LALTLUANGLIANA KHIANGTE, President, MAL

Hmar           10,411

Pawi           15,038

Lushai        36,332

Ralte           13,829

Paite           2,870

Mi dangte  3954

Total          82,434

Chhiarpui-ah khan Mizo kha an lo pungchho zel a, 1972 January ni 21-a Mizoram hi Union Territory-a hlan kai kan lo nih khan Mizo tih hi official khan a lo lut ta a ni. A ţawng hrim hrima pawh kha Mizo ţawng tih a lo ni ta zel a. Mizo hnahthlakho zawng zawng ţawng a khaikhawmna, a ngulpui ber kan ti dawn nge, a kawr pui ber, kan luankhawmna hmuna  kha Mizo ti hian kan lo sawi ta a. Tui angin ngaihtuah ta ila, tlang hrang hrang atanga tuiliang chu Tlawng luiah a infin a, Tlawnglui a lo luang ta zui a, Mizorama a luang tlang zui ang hian Mizoţawng hi a lo luang tlang ta zur mai ni hian a hriat a. Chu chu hmang vek ta ila, chutah chuan cheng ta ila, Mizoţawng hi zir ila, hmang zui mai ila a ţha ber hian kei chuan ka hria a ni.

 

Dr. RUALKHUMA COLNEY; Mizoţawng han tih hian a kentel kha a awm a, a vaia han sawi chuan a len hnuk ang pawhin kan sawi thei ang a, len hi a hnuka kan lak chuan a hnuk vek ta a. Hindi-ah pawh lian tak tak ţawng hlawm 49 vel a awm a, chung 49 chuan te peng a lo nei leh a. Kan tuma chu Mizo ţawng hi kan zavai ţawng a ni a, a dang kha hmaih tihna ni lovin, Mizo ţawng a hnuk khan a kengtel nghal vek ti zawng khan kan ngaihtuah turah ka ngai a ni. Chu Mizo ţawng hmakhuaa chu kan ngaihtuah a ngai ta em em a ni.

Dr.Rualkhuma Colney, Secretary Mizo Academy of Letters
Dr.Rualkhuma Colney, Secretary Mizo Academy of Letters
Dorothy Zonunsangi, Executive member, Mizo Academy of Letters
Dorothy Zonunsangi, Executive member, Mizo Academy of Letters

DOROTHY ZONUNGSANGI;  Mizo ţawng hi hnama min siamtu Pathian min pek a ni tih hi kan hriat a pawimawh em em a. Mizoţawng hi Mizote hian kan hmangaih a, hma kan sawntir loh chuan tumah hian hma min rawn sawntir dawn lo a ni.

J.MALSAWMZUALA VANCHHAWNG (Host) ; Tunah hian Mizoţawng dinhmun hi eng ang chiah nge?

Dr. RUALKHUMA COLNEY;  Chalngawlh chala pen fawk an tih anga chianga sawi chu a harsa deuh mai thei a, mi thiam UNESCO te’n an han zirchian hian Mizoţawng dinhmun hi vulnerable an ti a. Chumi awmzia chu a dinhmin chiang lo, ral mai thei dinhmuna dingah an hmu a ni. India rama ţawng ral mai thei  191 zingah Mizoţawng hi Vulnerable-ah an dah a ni.  (Safe leh extinct inkarah chi 4-in an ţhen a, Vulnerable, Severely endangered, Critically endangered, Definitely endangered. Entir nan; Mizo chipeng ţawng KHiangte, Pautu leh a dang eng emaw zat an thi ( extinct) tawh a, ral mek Critically endangered zingah Ralte ţawng a tel a, ral mai hlauhthawnawm tak zingah Bawm, Hrangkhawl, Gangte, Paite etc a tel a, Mizoţawng hi ngaihtuahawm tak Vulnerable-ah a awm mek a ni.) Tuna atanga kum 50-ah pheichuan Mizoţawng dinhmuntur hi ngaithuahawm tak tur a ni a, chuvang chuan Mizoţawng hmakhua hi kan ngaihtuah a lo ngai ta a ni. Mizoţawng hi a dam khawchhuak zo ang em? Mizoţawng hman dik loh hi a tam ta hle bawk a, Mizo ţawng kauchheh hman dik loh tamzia te leh Mizoţawng lam dan dik lova lam te a tam ta hle mai a, tun dinhmunah hian Mizoţawng hi a khawsik a sang hle kan ti thei awm e! Mizoţawng hi hliamin a awm a ni ti zawng pawhin kan sawi thei ang.

 vlcsnap-2018-01-27-11h49m56s212

Prof. LALTLUANGLIANA KHIANGTE, President, MAL; Mizo ţawng tuna a dinhmun tihah khan a dinhmun kha kawng hrang hrangin a sawi theih a, kawng hrang hranga kan sawi loh chuan a chiang thei dawn lo va. Mizo Subject ang zawng hian lo sawi ta ila: Kum 1997 atangin MA ( Mizo) zirna te pawh kan lo nei ve tawh a, kum 2000 hnu lamah khan research beih theihna atan te pawh siam a lo ni ta a, kum 2010 chhovah M.Phil ( Mizo) te kan ti chho ve leh ta a. Ph.D te pawh a lo zir theih ta a, ţawngpui dang angin Mizo ţawng hi a lo puitling ve tawh tihna a ni. Chu chu a ţawng, language lamah lo ni ta se la. Literature lam zawnga kan sawi chuan Mizoţawnga ziak lehkhabute hi kan nei pung nasa em em a. Kan thu leh hla hi a pung em em a. Mizo Academy of Letters hian kum 1989 atang khan kan chhinchhiah a, kum tin hian lehkahbu thar 150 atanga 200 inkar chhuak zel angin kan chhut a, chutah chuan chhutnawn leh lehlin a la tiam lo va. Chu chu kan  mihring tam lam nen chhut chuan tam tak, pui tak a ni.

Tin, kawng dang leha kan dinhmun kan sawilehna tur chuan; Mizo Chinchinbu hi India ram ţawngah hian a ngah ber  pawl kan ni ang. Veng tin YMA leh Kohhran Thalai pawl ang zawnga chhut phei chuan kartin chhuak chanchinbu pawh hi tam tak a ni a, a ropui a ni.

DOROTHY ZONUNGSANGI; Mizoţawng dinhmun chu heti zawng hian sawi leh ta bawk ila; Christopher Moseley chuan ţawng inhlan chhawn zel dan atanga ţawng thi mai thei tur a ziakkhawmna, “Atlas of the World’s Languages in Danger’ tih lehkhabu, UNESCO-in a chhuahah chuan India rama ţawng boral mai hlauhawm( endangered languages) 180 vel a tarlan zingah Mizoţawng chu a telh hial a ni.

Hetianga ţawng a thih ţhin avang hian kan ţawng pawh hi a thih lohna tura kan vawnnun a, kan humhalh a ţul a, chumi atana thil pawimawh tak chu schedule language-a Mizoţawng telh ve hi a ni ngei ang.

Eight Schedule-a ţawng hlankai/dahluh a nih chuan ram danpui, constitution hnuaia ţawng pawimawh a ni nghal phawt ang a, chu chuan Mizoţawng hi dan hmangin a humhalh dawn tihna a ni. Hei bakah lehkhabuu chhuah leh ziak kawngahg nasa takin a chhawr theih ang a, Mizoţawng tihhmasawnna atan seminar, workshop leh thil dang buatsaihna atan sum hmuh pawh a awlsam ang a, chu chuan rah ţha tak a chhuah bawk ang.

J.MALSAWMZUALA VANCHHAWNG; Eight Schedule-a Mizoţawng sengluh hian kan tribal niha chanvo leh hamţhatna te a tibo duak thei anga sawite a awm ve bawk a?

Prof. LALTLUANGLIANA KHIANGTE, President, MAL; An hriatchian loh vang mai mai a ni a, hlauhthawn tur a awm lo va, kan tribal hamţhatna chanvo hlohna tur a awm lo. Eight Schedule-a Mizo ţawng dahluh a nihchuan hna kau a ţet ang a, malsawmna a lo luang lut hum hum ang a, ‘Sum ţha hmu, sum ţha hmu’ tih kha a ni mai dawn a ni.

 

Similar Articles

Top