You are here
Home > CCT Robawm > MIZO POET OF THE CENTURY; ROKUNGA (1914 – 1969)

MIZO POET OF THE CENTURY; ROKUNGA (1914 – 1969)

MIZO POET OF THE CENTURY; ROKUNGA (1914 – 1969)

Hla phuah thiam Rokunga hi  Zoram Van ram tla fual  lei Eden, pialral rim nam ram nuama chantirtu a ni

ROKUNG copy
Mizo hnam hla, ‘Aw Nang Kan Lal Kan Pathian ‘tih phuahtu, Mizoram leh a mi chengte nun tihhlim kawnga hlaa chawitu Rokunga hi February 20, 1914 khan Venghluiah a lo piang a. A pian ni leh State kan neih ni leh thla a inthuhmun hi Mizo Hnam Hla phuahtu ni âwm rênga piang nia ngaih theih a ni.

IMG_20171202_095809 - Copy

A nu leh pa Thanglûta leh Zaliani hian nau an dam thei lo hle a. He ni taka fa an neih hi an kawmthlang pitarin, ‘hei zet chu in chhungkaw khaidingtu ro a nih hi,’ tiin a hmingah Rokunga a sa a.Chhungkaw khaidingtu mai ni lovin Hnam ro tling hla siamtu Hnam Rokunga a lo ni ta a ni. ‘Van hnuai khawvel sakhming chhiarin”tih hla 1939 kuma a phuah atangin 1969 kuma a hla phuah hnuhnung ber “Sualin bo mah ila” tih hla a phuah nen hla 129 a phuah a ni.

IMG_20171202_115647

Middle sikul zovin a nu leh pate hna thawh a pui a. Kum 1931 atangin The Loch Printing Press (Tuna Synod Press)-ah thawkin, châng dang kan lovin dam chhung hnaah a neih a. Kohhrante’n kaihlek hla an huat êm êm thlâkna turin thalaite tâna hla tha tak tak a phuah a. A hlaah hian thu har zep lovin, thinlung khawih taka thu hman a thiam thung.

IMG_20171202_113132

A hla tam tak thlirin, Mizoram chu Pialrâl anga tehin, pâr mawi chitinin a bawm, romei leh chhumte lung tilêng tâwka an zâmna. Ram ngaw hring dup kâra zo tui thiang luanna, rimawi ram a nih a târlang thiam a. A mi chêngte pawh Mizo nih thlâkhlelhtirin, ram changkâng tawhte el tura tan la tura fuihin ‘Mizo kan ni, kan hmel a tha, Kan tum a sang bawk si’ tiin. Hnam dangte’n an neih ve loh Tlawmngaihna mite rilrua bo mai lo tura chelh din tumin hlain a au tâwk tâwk a. Nungchang mawi leh tha, hmasâwnna rilru pua Mizote a duhthawhzia tilangin, lei mite hunbi chhiartu, vân zâwla arsi ngawi rengte pawh khi min fuihtua hmangin; –

Chung siâr lungmâwl mah khian,
Nunna êng nei rawh min lo ti;
Ngawi rengin tawng lovin chet danin,
I êng ve ang u……

a ti thlâwt mai a ni. A hla, ‘Kan Zo Tlang Ram Nuam’ tih phei chu Assam Rifles Band Party kalrem nân hman a ni nghe nghe. Rangoon Zo hnahtlak zirlaite’n Rangoon Radio Station kawt Medical college I phul zawla Chin Day an hman thin lai chuan Chin State-a district 8 aiawh zirlaite’n he hla hi opening song-ah an sa fo thin bawk a ni. Ram hian ri a nei a, Thu leh hlate erawh hi chuan ram ri kham an lo nei ve lo a ni.

‘Rokunga Lungdawh’ hi Rokunga memorial Society leh Aizawl Developement Authority tangrualin Aizawl City Park-ah an dawh a. Chutah chuan a lim an dintir a. 15th Aug.2008 khan Chief Minister, Chairman, ADA ni bawk, Pu Zoramthanga’n a hawng a. Rokunga hi Century Poet atân thlan a ni.Kha mi ni-a Pu Zoramthanga’n a duh tawka Rokunga ropuizia a han sawi zet kha chu a ropui e! Thusawi a lo thiam na rawh e, English (honours) ni awm reng a lo ni e.

He ni hian Mizo nih tinuamtu Rokunga tih lehkhabu Rev Lalsawma’n a tlângzarh Thalaite ngainat zâwng leh hnam tâna rohlu tam tak min hnutchhiahtu Rokunga hi July 12th 1969 tlai dar 10: 15 khan Lêntupui chawi vêl chhûmina a bawm Zoram nuam leh duhawm pawh hi thlahlel zo lovin, Hlakungpui kal hmasate fin turin a kal ve ta a ni.

Aizawl atanga lang reng Chite lui chu hla phuah thiam Rokunga’n hla-in a han chawi vel ta a;

Fiara Tui thiang te luang del del
Lengi nena luia lengngha kan chhaina;
I sirah thing leh maurua an zing riai e,
Luang dem dem rawh piallei a ral hma loh chuan”

a han tih meuh hi chuan hnam dang tawnga “Pa-ni” tih leh “Water” tih ai hi chuan Mizo tawng ngei mai a,”tui”kan han tih hi chuan a “tui” bik hliah hliah bik a, Mizo rilru-ah chuan a lo fiahin a lo chiang ber nge nge a ni, an lo tih thin ang deuhvin, amah Hmangaih Jahoan’n Juda hnam ngaihruatna atanga Van ram a suangtuahna, “ Nunna tui lui, Kristal Lung anga tle, Pahtian leh Beram No tlalthutphaha lo chhuak” a tih ai hian a fimin a thianghlim hmeli zawk daih a, kan ngaih leh thlen hlan kan nghahhlelh em em Van ram lui ni awm hiala mawi leh nuam tura ngaihruat theih tur khawpa mawiin Mizo tawng pachhe tak hmangin hla a siam thiam bik a ni,Rokunga hian!

Zoram khawvela Mizote Krismas tikrismas-tu chu Rokung bawk hi a ni a!

Kan ngaih Krismas ni eng a lo zam thar leh ta,
a mawi tizuala’n Bethlehem par ne,
a lo vul ta e pang ang kan lawm…,

Rangoon khawpui daifema Mizorama piang leh seilian Burma sipaia țangte Krismas carol-a kan han suartluan a, Rokunga phuah Krismas hla kan han sa a, an lungleng lutuk an mittui sur hnem ţhinzia tak khaw aw!

Ka thinlung ram Kaisar lalnaah hian
Bethlehem tlangpui rawn din la,
I tan ranthleng rawn hung leh la,
Tah chuan lo cheng ang che….’

Engpawh ni se,Rokunga Krismas hlate tel lo chuan Zoram khawvel hian Krismas an hmang thei lo va, Rokunga hian Krismas boruak a zap nung thar leh thin a ni ber mai!

Krismas hla a phuah ni leh kumte tal ka han ziaklang ang e.

  1. A Mi An Riang Maw Van Mi A Lo Piang ( 7.12.1950)
  2. A Mutna Chu Bethlehem Ranthleng A Lo Ni ( 21.12.1943)
  3. Aw, Bethlehem, Judai Rama Mi
  4. Bethlehem Mual Tlaitla Engah ( 1949)
  5. Bethlehem Tlang A Mawi Leh Ta I Thlir Ang ( 1942)
  6. Chumi Zan Reh Takah Chuan (1949)
  7. Davida Veng Khawpui Tualnuam Chu ( 1940)
  8. Hmannah Kaisar Lal Lian Rengpui )9.12.1957)
  9. Judai Ram Bethlehemah (1955)
  10. Kan Chatuan Pa Lenna Runah ( 1941)
  11. Kan Tan Naupang A Piang Ta (1942)
  12. Khawvel Sual Tunding Leh Tura ( 12.12.1954)
  13. Kum Pui Sul A Lo Vei Chang Hian ( November 1953)
  14. Lal Davida Khawpui Veng In Tualah (11.12.1950)
  15. Ngai R’u,Angelho Zai Chuan ( 1945)
  16. Ngai Teh, Van Lal Fa Chu
  17. Pathianin Khawvel A Hmangaih
  18. Thimin Lei A Tuam Laiin
  19. Vanhnuai Khuavel Sakhming Chhiarin ( 1939)
  20. Zantlai Khawthiang Karah (1962)

Similar Articles

Top