You are here
Home > CCT Robawm > MIZO HLA KUNGPUI SUAKLIANA -Familia Fanai Lalțansanga

MIZO HLA KUNGPUI SUAKLIANA -Familia Fanai Lalțansanga

Mizo Pathian hla ţha tak tak leh khaw sâwikhâwm hla ţha elkhen phuahtu Suakliana hi kum 1901 khan Hrangkunga Sailo leh Lalziki te fa upa ber ni turin Maite khuaah a piang a. A naupan laiin Chhipphirah an pem a, naupangte a nih laiin a mit vei lam hi hmawlhin a hawlh a, chuta ţang chuan khaw hmu fiah thei lovin a paw ta a. Kum 1925-ah Suakzawni nen inneiin kum 1927-ah Kanghmun Melvengah an pem a. Chuta an awm lai chuan mitna hri leng avangin a mit ding lam pawh chu a na leh ta vak mai a. Chuta ţang chuan hlo thlo thei lovin a mit khing hnih chuan a paw a. Chhun engah erawh chuan tiang hawl chungin amahin a kal thei thung a.

Lungrang khuaa an awm hnu kum 1932 vel khan Lunglei Serkawn damdawi inah mit zai var thiam daktawr pakhat Chandrakuna panin a mit vawi hnih a lo zaisak a. Ni li hnua an han phelh chuan a khaw hmuh chu a lo fiah lo zual hle a, a mit naute paw chu a paw lehzual ta vek mai a. Chuta ţang chuan Mitdel Suakliana tia hriat a ni hlen ta a, a tisa mitdelna chuan Thlarau lamah mit var ţha tak a pe a lo ni zawk a. Chutia a mit a lo del tak aţang chuan Thlarau pawlna a dawng a, hla tha tak tak a lo phuah ta hlauh thung a ni.

“Kan nghak reng che kan Lalber” tih hla hi 1929-1931 inkar vel, Kanghmuna an awm laia phuah a ni a. Hetih lai hian a pa Hrangkunga Sailo chu ring lo mi, ţhen leh rualte khâwma zu inpui bûng bûng ţhin a ni a. Suakliana chu Thlarau pawlna changin mihlim a ni tawh bawk si a. A pa chuan ngeih lovin Suakliana chu zana a mut tawh hnuah pawh insual turin a kaitho lui a. A nupui Suakzawni pawh uireah te puhin a lo maksak vei thul a. Suakliana leh a nupui chu a chang leh a hnawtchhuakin anni nupu chu Bilkhawthlir leh Ramlaituiah te an tlanchhe hial ţhin a.

Favang awllen lai a ni a, an inchhung boruak pik tak ata inthiarfihlim turin Suakliana chu a feh ta a. Kawngtluanin a pa nen an inkar te, a tihhreawm dan leh sual hnathawh chimawm ziate a ngaihtuah vak vak a. Sual huatna chuan a thinlung a rawn luah khat ta hial a. A mit ţhat loh nak-a-lai chuan a khawhmuh a lo thim zo ta vek mai a. Thim zingah chuan setana’n a rawn bei buai leh ta nghal a. A mangang lutuk chu Pathian hnenah a ţawngţai ta a, Pathianin a rawn pawl a, “Nangma lam chauh i inngaihtuah a, i lungngai a nih kha, nangmah aia rethei hi khawvelah hian an tam asin,” tiin Kolkotta khawpuia kutdawhte a hmuhtir a.Chung mite chuan Lal Isua an lo rin ve theih nan a ţawngţai a, a ţap vak vak ta mai a. Ni hnuia awm zawng zawng hi thim lal thuneihna hnuaia awma, lungngai hreawm nasa tak tuara ţap chuah chuahin a hmu ta a. Chutah a thinlungah hla thar, “ Kan nghak reng che kan Lalber” tih hi  a thluk nen a thinlungah a lo thleng ta a. He hla chang 3-na,

“Aw, khawiah nge Chhandamtu,

Zion tlang ralmuanna chu?

Sual thenfaina hmangaih tui, kan tan in luanna chu,

Sual dan chahna kulhpui, i chatuan van khua leh tui,

Chhandam fa i zar mawia lawma an lenna chu,’

 

tih peka a awm  lai phei chuan van khi a lo inhawng uarh a, chutah chuan Pathian eng zau pui mai chu a lo lang bawk a. Pathian engah chuan van mipui chhiar sen loh chu, “ Thianghlim, Thianghlim”ti-a thlawk eng nuaih nuaihin a hmu a. Chumi hnu lawkah chuan van chu a lo inkhar leh thuai a. Suakliana thinlungah chuan Pathian hmangaihna leh thlamuanna chu a lo khat liam ta a, “ Halleluia” tiin an lo mawng zawlah chuan a lam kual ta zawr zawr mai a, a lam kualna buh hmun chu nghalrual chetna ang maiin a pet hian a pe sun mai a ni.

Tichuan, chang 4-na,

“Aw, khawvel hi a ral ang,

Rei lotean a ral ang;

Chhandamtu a au vang a, lei ram kan pel tawh ang.

Krista hmangaihtute Lal ropuina an chang ang

Hmangaihna a fawn vel e, lawm r’u, Halleluia!”

 Sual thimin beiseina eng chhê tê chauh pawh neih harsa ti khawpa a bawm phui tlat avanga Pathian ngai em ema autu chu thinlunga hlimna ropui tak neia luangliamin, “ Hmangaihna a fâwn vel e, lawm r’u, Halleluia” tiin a au chhuak leh thei ta hial a ni.

Suakliana hian Sam bu hi a vawng vek a, en lovin a sawichhuak vek thei a ni. “Sam bu-ah hian Lalpa pek ka dawng a ni e. Ka sawi thei chauh a ni lova, a hrilhfiahna pawh pek ka ni tel,” a ti.

“Hlaah pawh hian Lalpa thilpek ka dawng a” a ti bawk. Suakliana chu Thangbawnga hnena a kal thu hetiang hian a sawi bawk, “ Thangbawnga chuan huan pal a lo pin mawlh mawlh lai chuan a bul a va thleng a. A chemtum chu dahin a ding a, chibai an inbuk a, invuana an din dun lai chuan Thangbawnga chuan, “Ka nau, Lalpa malsawmna i va dawng nasa ve le. I lo kal hi kan kawtchhuaha i lo thleng kha Lalpan min hrilh a. Ka nau, chapo reng reng suh, i ta chu sihsen tiat pawh a awm lo. Sihsen tiat pawh i rilru a chapona a lo awm chuan Lalpa hmaah ţhingţhi la, a ngaidamna dil thuai ang che” a lo ti a. Suakliana chuan hetiang hian a sawi bawk. “Hla phuahah hian Lalpa malsawmna leh a pek ka dawng nasa em em mai a. Lei leh van inkar hi hlain a khat a; ka phuah seng lo a ni. Ka lo chapo ta a, Lalpan a thilpek min laksak ta a. Han phuah tumin kan’n ngaihtuah chiam ţhin a, phuah tur ka hre chuang lo a. Lei leh van inkar hi a kaw rawng rawng mai a ni. Tah zet chuan Thangbawnga thu min hrilh kha ka hre vawng vawng mai” a ti.

Kum 1931 January ni 11 khan Thenzawl biakina hla chang a hril lauh lauh laiin zel angin a awm ta thut a, thawk leh khatah van chung diahah khian lak chhohin a inhria a, Pathian eng chu eng mawi em em mai hian van dum kual ang chiatin a lo eng kulh ta mai a; chu chu  a mitin a han si chatin a hria a. Chutia a han sik chat veleh chuan Pathian thil hmuh dan ni awm tak mai hian eng kim mai chu a hmu ta vek mai a. Van chu khu tah, a hnuai chiahah a awm a: vana mite chu hlim(shade) nei miah lo khawpin a zu en a. An rilru putzia te chenin a hmu fiah ta  vek mai a. Chu engah  chuan lei leh van hi thawl em emin a awm a ni.

Tin, chumi eng chu a sir lamah hian a pawp a, chutah chuan a han bih a, sawiah sawn hremhmun a hmu ta a, hremhmuna mite chu bawlhhlawh em em mai hlir hi an lo ni a. Khawngaih rual an lo ni lo. Khawngaih thla pawh hi an la lo tawp mai a ni. An tamzia chu Mizoram hi chhung vum thur mai ila, chu chuan belhchhah ta ila, mi belhchhah tih pawh a hre lo ang. Chuti khawpa tam chu hremhmunah an awm a ni.

Tin, vana chhandam fate leh thung chu an tam em em mai a. Tehkhin tur pawh a hre lo hial a. Leipum pui hi hlum nem tak ni sela, a beng phek zovin phek takin beng sela, chutah chuan hriau sin mi hi, a khatin insi ţhutin vit phun ta ila, chu pawh chuan a la zat teuh lo vang.  A thil hmuh chu a  nasa khawp a, a mihring rilru chuan a keng zo ta lo a ni. Bung lian pui, ţawi tawh tak mai hi a chi tê tak teah hian khung leh vek tum ila, a leng tawh teuh lo ang a, a thil hmuh a rilrua a len lohzia chu chutiang chu a ni.

Suakliana hian hla 150 zet a huah a, a hla tam ber chu Pathian fakna leh chawimawina a ni a, Kristian Hla Bu-ah hian a hla phuah 9 lai seng luh a ni a, chungte chu; –

KHB 77- AW, tunah chanchin mak tak chu

KHB 78- Aw Chhandamtu, sual leh buaina karah hianin

KHB 116- Hosana ti zelin aw, Haleluia! Amen

KHB 144- He khawvel damlai thlaler chhumpui zing hnuaiah hian

KHB 148- Aw,  hmangaihna ka sawi thim lo nâ ka ngawi thei lo

KHB 164- Hming dang zawng zawng aiin a mawi ber Lal Isu-a

KHB 194- Jerusalem Zion khawpui chu thlir teh u

KHB 453- Kan nghak reng che kan Lalber leh

KHB 522- Van chung sang taka Lal Isu te an ni a.

Lusun-khawhar hla pawh 30 vel zet a phuah. Khaw khâwm hla, “Kan hun tawng zingah khaw khawm a pawi ber mai” tih hi a phuah hnuhnun ber pawl a ni.

Suakliana hian a hun tawp lam chu champhai district Lianpui khuaah a hmang a, July ni 3, 1979, zing lam, khuan hmasa ar an khuang ţan tihin, “ I buatsaih Selem khawpui, Aw, ka ngai tawh mang e,” a tih Salem khawpui panin khawvel a lo chhuahsan ta a ni.

References; (1) Pathian Thlarau Mi Ril Suakliana Leh A Hlate by VLC Vanlalhriatrenga (2) Mizo Rohlu by R.Lalrawna (3) Lal Isua Tuahrem Zoram Harhna Thu by Lalhmuaka, B.A. & Upa Tlangchawma, Venghlui.

Published in MAKEDONIA Evangelical Weekly, 22nd January, 2017 
Sunday Issue No.41

Similar Articles

Top