You are here
Home > CCT Robawm > MIZO HAWRAWP HI – Familia Fanai Lalţansanga

MIZO HAWRAWP HI – Familia Fanai Lalţansanga

( Missionary Ni pual leh Pu Buanga leh Sap UPa hriathrengna pual bikin ka post ka thulkhung tawh 3 ka rawn tharthawh leh dawn a, hei hi a pakhatna a ni)

Mihring thil siam (invention) tawh zawng zawng zinga thil tangkai ber mai chu ţawng (language) hi a ni a. Ţawng chu hawrawp hmangin ziak leh chhiar theihin an lo siam leh ta zel a, hriatna leh finna vawnţhat leh thehdarhna hmanraw tangkai ber a lo ni ta a ni.

Khawvelah hian ţawng chi hrang tam tak a awm a, chung zingah chuan Chinese Mandarin ţawng hi  a hmangtu  mihring a lunungin an tam ber a, tawng hman tlanglawn ber leh pawimawh ber erawh chu Sap ţawng, English hi a ni thung a ni. (W.Nelson Francis).

America President lo ni tawhte zinga mite ngainat leh ngaihsan la hlawh ber John Fitzgerald Kennedy (1917-1963) kha lehkha a chhiar rang thei hle a, vawikhatah hian a rilru-in tlar thum a chhiar thei niin an sawi a. Mizo ţawng ziak erawh hi chu chhiar dik leh chhiar ran a har hle mai a, tih fuh leh fuh loh-ah a innghat a ni deuh ber! Rang taka chhiar dik vek phei chu a theih loh hulhual ang a ni. Engvang nge kan tih chuan hawrawp min siamsaktu kan Zosapte khan a thluk chi hrang hrang chhinchhiahna (Tone marking) an lo siam famkim tawk loh vang a ni.

Mizo ţawng hi ziaka dah hmasa bertu chu Mizovin Thangliana an tih mai, T.H.Lewin(1839-1916) kha a ni a, a dawttu chu Rangamati khuaa damdawi lam thiam Brojo Nath Shaha a ni. He mite lehkhabu siam hi Pu Buangate ţhian dun khan Mizorama luhphalna an neih hma, Kossolong leh Silchar vela kum 2 zet an awm chhung khan Mizo ţawng zir nan an hmang ţangkai hle a, 1884 kumah Aizawl an lo thleng a, Suakmichhinga (M.Suaka,a hnu-a Durtlang Lal lo ni ta) leh Thangphunga ( a hnu-a Chaltlang lal lo ni ta) te’n Mizo ţawng an lo zirtir bawk a, Sir William Hunter ziak lehkhabu rawn chung zelin Mizo hawrawp an siam ta a ni. Hnial hrat deuh tan chuan Silchara an awm lai zawk khan a ni Mizo hawprawp hi an lo siam tawh zawk! pawh a tih theih tho ang chu.

Hmar Lungleng lal Khamliana Sailo chuan Pu Buangate hnenah Mizo hawrawp zirin chawlhkar khat vel chiah a awm a, an khua-a a haw hnu lawk chuan lehkha a rawn thawn ta mai a! Zosapte khan mak an ti hle a, an lawm em em bawk a ni. Pu Buanga phei chuan chu lehkhathawn, meihawl chhut dip tui nena chawhpawlh hnua hmawlhte hmawr-a ziak chu a rohvin a ngaihlu khawp mai a, London-a a nu leh pa te’n an lo hmuh ve atan a it tlat a, a zuk thawn thla vang vang nghe nghe a ni.

 Chiti fakauva Pu Buanga te lawmna chhan kha Linguistics zir ve lem lo tan chuan kan hriatthiampui lo a ni thei e. Hawrawp siam (Orthography) hi thil awl-ai leh thil namai a ni lo va, hawrawp siam reng reng chu a hmangtu tur ţawng ri huap zo vek si, zir thiam awlsam thei ang ber a ni tur a ni a. Sanskrit leh Mandarin hawrawp te hi kumpui linglet zir pawhin thiam theih mai a la ni lo niin an sawi a. Pu Buanga te siam Mizo hawrawp erawh chu Pu Khamliana khan kar khat tling mang lovah a zir thiam hman der a, lehkhathawn a ziak thei a ni. Chu lehkha thawn Pu Buanga te’n an hmuh atang chiah khan Mizo hawrawp an siam fuhzia an lo hre thei ta a. Lawm lo thei an ni lo a ni.

Falam,Halkha,Thlantlang leh Matupui District-a  cheng Zohnahthlakte hi Lâi hnam an inti a, an tawng hman hi Lâi tawng a ni a, Lai  tawngah hian dialects tam tak a awm leh a .Mizovin Lai kan lam rik dan hi a dik lo va, hla kan sa a, kan zai a lâi,a aw a lâi tia kan sawia a lâi tih lam rik ang a ri hniama lam tur a ni. Lai ( Mizovin chhipa sam zial an nih avanga   Pawih kan tih mai)  ţawng ziak dan hi British sipai Lieutenant R.Steward Hudson chuan 1857 kumah a lo siam tan a, Halkha-a political officer D.J.C.MacNabb,B.Sc. chuan Roman Alphabet zulzuiin Lai ţawng ziak dan a siam leh a, “The Handbook of Haka or Baungshe Dialect Of Chin Language” tih lehkhabu a  ziak chu  1891 kum khan Rangoon-ah  khawla chhutchhuah a ni, Surgeon Major A.G.E Newland(IMS) chuan Lai writing system a siam leh a, “A Practical Hand Book of the Lais as spoken by the Hakas and other allied tribes of the Chin Hills” tih ziakin  1897 kum khan a bu-a siam a ni leh a. Chin Hills-a American Baptist Missionary hmasa ber Rev.Arthur Carson chuan a ţhian Rev.Dr.Tilbe nen Lai hawrawp ziak dan dik la ţha ziktluak lo lai deuh te chu an siam ţha leh a. Kum 1908 khan Halkha khawpuiah Rev.Joseph Herbert Cope a lo thlen hnu khan Lai ţawng ziak dana a pawr lai leh a phuailuai lai te zutmamin a rawn chulmam ţha leh hlekin a rawn thual ţha leh ta a, kum 1925 khan Rev.Dr.Chester U  Strait chuan a siam ţhat belh leh a,Mi thiam 7 laiin kum 50 zet an siam hnuah tuna Lai ţawng ziak dan hi an puitlin ta chauh a ni. Falam (Laizo) tawng hi Chil Hills official language a ni a, Rangoon Radio atangin kum 50 aia tam  Chin Programmes hi Falam ţawnga puan a  ni a, Chin Hills-a ţawng tualleng ber chu Falam (Laizo) ţawng a lo ni ta  a, a dawttu chu Mizo tawng hi a ni.

Radio han sawi rik tak azarah chuan Halkha rama thingtlang khuaa zirtirtu kan ţhian pa pakhat pawh khan AIR Aizawl hi a lo ngaithla ve thin ni ngei tur a ni,Lok Sabha tih hi an puang zing ropui mai  si a, khawiah tak he khua hi awm ang maw tiin India  Map-ah Lok Sabha khaw awmna  a han zawng tak tak chu a hmu lo chiang hle a, a beidawng hle a ni awm e!

Pu Buanga ten  hun rei lo te chhunga heti taka Mizo hawrawp an lo siamfuh thei hi a mak a,Thlarau thianghlim hnathawh a ni ang e, tih loh phal rual a ni lo. Mizo tawng hi Pathianin mal a sawm ka ti lo thei lo bawk a ni, Pathian thu sawi nan leh Pathian hla siam nan a lo ţha em mai!

Ama’rawhchu Pu Buanga’n “Ch” a lo siam kher kher hi a buaithlak hle mai a, Kawp-Sap chuan “ch” hi hmang lovin “c” chauh a hmang a, hetah tak hi chuan  American Baptist Missionary Rev.Arthur Carson leh   Rev.Dr. Cope (Kawp-Sap)te hi an tifuh zawkin ka hria a ni.

Entir nan, chi (salt) hi “ci” tiin an ziak sam et a, “Chhinchhiah” tih ziakah hian “h” 5 ngawt hman a ngaih laiin Kawl Sapa siamdan chuan “chinchiah” h 3 lek hmangin a tlingtla thei a. Hawrawp pahnih ‘aw” hman aiah a theih chin chin-ah chuan hawrawp pakhat  “o”hman hi a remchang em em zawk bawk a ni. Lai ţawng ziak danah chuan hming hi Hawrawp pui hmangin a mal vekin an ziak a, a fiahin a chiang kek kawk bik viau a ni. eg.Thang Tin Liana, Lal Bika,etc.

“Ch” a ţhat loh em emna dang pakhat leh chu Sap tawng kan lam dik loh phah tlat hi a ni a. Entirna’n ‘chance” tih hi “Chhance” tia lam rik tur kha ‘chance” tiin kan lam ri ta  mai a. Sap-ho bengah  a fiah  tawk thei ta ţhin lo a ni. Tin, “Sh”, phonetics sign /∫/ hi Mizo hawrawp an siam tirh kha chuan an hmang thin a, 1920 vel atang khan kan hmang zui ta lo va, Sap tawnga /sh/ ri hi kan nei ta lo va, kan sap tawng lam a dik thei ta lo a ni. Nation, fashion tih ang hi /neishawn/,/feishawn/ tia lam rik tur kha /sh/ kan neih tak loh avangin kan lam dik thei ta lo a ni.

Mizo tawng ziak dan ţha zawk ngaihtuahho turin Chhim bial leh Hmar bial kohhran hruaitute chu 1920 kum khan Serkawn-ah an inhmukhawm a. A thluk chhinchhiah dan tur hi rei fe an chai a.Tawngkam tin hi kan thluk nei sa a ni  deuh vek zawk a, thlukseina chhinchhiah a ngai lo” tiin Pastor Liangkhaia(1884-1979)te an ţang a.Pu Buanga chuan “ A thluk dan azir-a awmze hrang siam thei ţawngah reng reng chuan thlukseina chhinchhiah (Circumflex) hman vek tur a ni” a ti a, hnial theitu an awm tawh loh avangin Pu Buanga sawi chu Mizo tawng ziak dan a lo ni ta a ni.

Mizo ţawng thluk (lexical tone) chi li, ri sang, ri hniam, ri lawn leh ri uaithla te chhinchhiahna atan thlukseina pakhat chiah hi kan hmang kawp vek a, tunlai phei chuan thlukseina pawh kan dah hman tawh mang lo va, chuvang chuan Mizo ţawng ziak hi kan chhiar sual ta chhen mai a, TV leh Radio thupuangtute leh Pulpit tlanga rawngbawltute lamin kan chhiar sual ta nawk nawk mai zawng a nih hi!

Sap tawng ziak dan pawh hi a lo tha famkim bik lova, George Bernard Shaw(1856-1950) khan a sawisel thin reng a, “t” hi a changing “sh” angin an lam ri a.( e.g.Nation) “gh” hi a a changin “f” angina lam ri bawk a (e.g. enough). “a” hi a changin “aw” leh a changing “ei” ang te-n (eg. Ball,Fashion) angin an lam ri bawk thin a. Amaherawhchu phonetics zir tan chuan Sap ţawng ziak hi chhiar sual theih a ni lo thung.

Pu Buanga te ţhiandun hnathawh ropui tak avangin tunah chuan Literacy Thangchhuah Lung kan lo phun thei ta hial a, lehkha thiam (educated) hnam ni lovin, lehkha ziak leh  chhiar thiam(literate) hnam kan lo ni ve ta hial a. Mizo tawng ziak a thlukchhinchhiahna dan chiang fek fawk, computera chhut theih ngei tur siam kan tum ve tawh dawn lawm ni? Khawvela Linguist ropui bera ngaih Naom Chomsky te khuan an mahni thlahnem ngaihnain min rawn siamsak dawn  si va, keimahni’n kan siam loh chuan kan fate leh kan tute, kan tuchhuan leh chuan leh chhawng te thlengin Mizo ţawng ziak hi an la rawn chhiar sual ve fo dawn si a!

(Naom Chomsky hi Tawmski tia lam rik tur a ni; Hnam hrang hrangin hming ziak dan leh lam dan bik kan nei a,Mizo hming pawh a tawpna-a ‘ng’ a awm chuan hnam dangin an lam dik lo fo thin a, a tawpna ‘l’ leh ‘k’ a nih chuan an lam dik thei,e.g Peka, Fela..etc..UN General Secretary U Thant(1909-74) an thlantlin hlim khan khawvel ram hrang hranga a chanchin puangtute chuan a hming an lam dik lo vek! Burma sorkar chuan ram hrang hranga a embassy kal tlangin a hming lam dan tur phonetic signs hmangin a hriattir ta a ni. U tih hi Burmese mipa zahawm Mr. sawina a ni a, ‘you’ anga lam lovin Mizovin U kan lam anga lam rik tur a ni.)

Pix; He lemziak hi kum 1993-a I&PR Director Pu LR Sailo-va’n Artist Tlang Rokhuma a ziahtir kha a ni a, Pathianin he lemziak hi mal a sawm a ni ang e, hman a hlawh malh malh hle a ni.

Similar Articles

Top