You are here
Home > World News > MITHI PUMCHHUNG AȚANGA PIANGCHHUAK ‘MIRACLE BABY’ AN TIH CHU

MITHI PUMCHHUNG AȚANGA PIANGCHHUAK ‘MIRACLE BABY’ AN TIH CHU

Medical pawmdan ațanga thi-a ngaih ni tawh, ‘brain-dead’ a awm Sandra Pedro-in nausen mipa a hrin chhuah, a hming atan ‘Lourenco Salvador’ an sak chu bawrhsawm leh derdep tak chungin țhat lam a pan chho ve bek bek zel a, a vawikhat nan a thlalak hmeh sakin an phochhuah a ni.
.
A lu namen lova a nat avanga damdawiin an luh pui hnu rei vak lovah nau pai mek Sandra, kum 37 chu ‘brain dead’ (thluak thi) a puan zui a ni a, la thaw theiin a lungphu te chu la awm mahse medical pawm dan ațang chuan ‘mithi’ a ni tawh a ni. Doctorten an thawk tirna/an tihnun na khawl(ventilator) chu hlih sak an tum vel mek laiin a pum chhungah lungphu a awm tih an hmuchhuak a, amah chu thi(brain-dead) tawh mahse a nau pai erawh mak takin a lo la nung thung a, tichuan doctorte chuan a naute avang chuan Sandra-i chu life support in an thawk tir chhunzawm ta a, a pai puitlin hun chu an nghak ta rawih a, hemi hunchhung hian nurse ngilnei tak tak te chuan duat taka Sandra-i pum te chu chul leh kuah sak țhinin, naute chu hla te sak sakin an lo awi țhin a, ni 107 chhung tehmeuh mai an enkawl hnuin him pialin June 7 khan an zai chhuak ta a ni.
.
Lisbon ațanga hnaite Alverca, Portugal-a khawsa Sandra-i pasal Miguel, kum 30 chuan, “Inrinni-ah kan in dah lut a, Chawlhni-ah khawl chu hlihsak tura tih a ni a, mahse test an han tih chuan lungphu an hmu ta tlat a ni. Doctor chuan ‘Mihring thi tawh pumchhungah naute nungdama awm ka la hre ngailo’ a ti hial a ni”
.
“Amah(a nupui) ka sunna avanga ka lungchhiat mek laiin he thil hian chhungril hlimna min rawn siam sak thung a ni. Nungdama a pianchhuah beiseina nei mahila kar 32 chhung zet nghah zawng a rei lu hret a ni” a ti.
.
Febuary 20 khan an chenna inah an nupa chu an țhiante nen chaw eikhawma hlim taka an inkawm ho laih laih laiin kar 17 mi naute pai mek Sandra-i chu a lu a rawn na thut a, a lu na lutuk chu puak keh thei dawn hialin a inhria a, a mangang takzet a ni. Rang takin emergency an phone nghal a, ambulance a lo thlen chuan nikhaw hre lovin a lo awm tawh a, damdawiin an thlen pui hnu darkar reilote hnuah San Jose Hospital, Lisbon-ah chuan ‘brain dead’ a puan a ni zui ta mai a ni. Doctorte chuan a nau pai pawh thi ngei tur chiang sa-ah an ruat a ni.
.
Mahse mak tak maiin naute chu thla 4 dawn a nu pumchhungah damchhuakin a rawn țhang(insiam) puitling a, 5lb 3oz(2.4 kgs) a rit niin dam takin khawvel eng a rawn hmu ta si. A nupui a sun avanga lungngaia indawmkun mek Miguel-an chu ‘pa thar’ a ni tih an hrilh chuan lawm luat vangin a thi dang lo chauh a ni. “Ka hamhaih zova ka țawng chhuak lawk thei lova, ka kut te chu a khur dut dut a, tichuan a hmel ka han en chu ka nui tawp theilo” a ti. A fapa chu a la derdep rih em avangin incubator-a enkawl a ni a, khawih leh pawm vel an la phal sak rih lo a ni.
.
Lourenco-a hi damdawiinah hian kar 3 vel tal an la enkawl zui hmel rih a, 4lb-a a rih belh hma chu an chhuah tir thei dawn lo niin an tarlang.
.
*_Joseph Lr Kop Chhangte_*

Similar Articles

Top