You are here
Home > Zoram > MINISTER PU JOHN ROTLUANGLIANA’N MUALKHANG GAS BOTTLING PLANT HI A TLAWH

MINISTER PU JOHN ROTLUANGLIANA’N MUALKHANG GAS BOTTLING PLANT HI A TLAWH

MINISTER PU JOHN ROTLUANGLIANA’N  MUALKHANG GAS BOTTLING PLANT HI A TLAWH

Vawiin khan Food, Civil Supplies and Consumer Affairs Minister Pu John Rotluangliana hovin a pisaah sawrkar mi pawimawhten gas harsatna chungchang an sawiho a. Gas buk tling leh khawih chingpen loh hniang hnar taka Mizoram mipuiten kan dawn theih nan sawrkar chuan hma a la mek tiin Supply Minister Pu John Rotluangliana chuan Mizo mipuiten dawhthei taka lo nghak hram hram tur leh hnam anga tanrual a hun tih hre thar turin a ngen a ni.

FCS&CA Minister Pu John Rotluangliana
FCS&CA Minister Pu John Rotluangliana

Meeting-ah hian gas phurh chungchanga harsatna tawh a nih dan sawifiahin oil refinery leh LPG Bottling Plant (Mizoram tan Borkhola, Silchar leh Mualkhang) atanga gas phur chhuak tur contractor te hi Indian Oil Corporation Ltd. dan angin tender chhanga rawih an ni a. Anmahni ban emaw rawih emaw chungchangah State sawrkar a inrawlh theilo a ni. IOCL dan in a phut angin gas phurtute hian explosive license an neih a ngai a, Automatic Braking System (ABS) te leh Tracking Device te pawh an neih vek a tul a, mimal truck duh anga rawih ngawt theih a ni lo a. Carrying Contractors te hian tender an chhanna a hniam lutuk avangin a phurtu driver-te hlawh an pe tam thei lo a, State sawrkar leh Central YMA te thahnemngaihna in Mizoramah uluk taka gas buk nawn leh thin a lo nih bawk si avangin driver-te an lungawi ta lo nia lan thu meeting-ah hian tarlan a ni.

He harsatna tawh mek sukiang tur hian sawrkar chuan hma a la a. IOCL hnenah thil awmzia zawh fiah niin company official te pawhin an enfiah mek a, Mizoram sawrkar duh angin gas phurtuten tihsual an nei a nih chuan a phu tawka hremna pe tur te leh a phurtu dang ruai tur te, Borkhola Bottling Plang atanga gas tam zawk Mizorama thawn tur te in a thlen tawh a. Ministry of Petroleum & Natural Gas hnenah gas supply tam zawk kan hmuh theihna tur leh distributor leh company dangte pawh Mizoramah lo luh tir turin ngenna thehluh a ni tawh bawk.

Supply Minister Pu John Rotluangliana hian October ni 10 khan Ministry of Petroleum & Natural Gas a Secretary Kapil Dev Tripathy a hmu a. October ni 13 khan gas chungchanga kan harsatna tawh mek sukiang tur hian Ministry ah lehkha a thawn tawh bawk. Tun dinhmuna gas mamawhna phuhru turin October ni 14, 15 leh 16, ni thum chhung khan gas cylinder 18,000 zet phurh mek a ni a, hei hian gas vang lutuk tur a tihziaawm lailawk beisei a ni.

Gas phurtu (transporter)-te hi an kir leh lamah Mualkhang Gas Bottling Plant-ah in report-in heng motor vek hmang hian Mizoram khaw hrang hrangah gas sem chhuah leh thin a ni a. In report lova tlan tlang an awm thin tih hriat niin a dan na turin hmalak mek a ni. Meeting-ah hian Mualkhangah Legal Metrology Site office thar hawn nise tiin an rel a, FCS&CA Minister Pu John Rotluangliana chuan vawiin tlai khan Mualkhang Gas Bottling Plant hi a tlawh nghal a ni.

Mualkhang Gas Bottling Plant
Mualkhang Gas Bottling Plant

WRITTEN BY K. VANLALSANGI MIS, IPRO

DATED: 17TH OCTOBER 2016, 2:50 PM | LANGUAGE: MIZO

Similar Articles

Top