You are here
Home > Sports > MFA LEH ZONET INREMNA THUTHLUNG ZIAK

MFA LEH ZONET INREMNA THUTHLUNG ZIAK

Mizoram Football Association leh Zonet chuan kum nga chhung atan contract an pawtsei a, nizan khan Govt. Champhai College-ah MFA president Lal Thanzara leh Zonet managing director RK Lianzuala ten inremna thuthlung an ziak.

Kum 2012 khan MFA leh Zonet te hian I&PR Auditorium-ah kum nga chhung atan inremna an lo ziak tawh a, nizan lama kum nga chhung atan inremna an neih leh takah chuan kum 10 chhung atan an thawk dun tawh tihna a ni.

Mizoram Premier League lo pian theih nan MFA leh Zonet in Study Group siamin football league changtlung taka kalpui theih dan tur an zir a, India ram state danga an tih dante leh ram pawnte thlenga an kalpui dante zirin Mizoram mil turin football kalhmang thar an duang.

MFA leh Zonet hnathawh zarah Mizoram Premier League match hmasa ber chu October 24, 2012 khan Lammualah Chanmari FC leh Luangmual FC ten an khel ṭan a, inelna hi tluang taka neih chhoh niin kumin MPL hi kum ngana leh contract hmasa tawpna a ni.

Inremna hmasaah hian Zonet-in kum nga chhung kum tinin cheng nuai 25 an thawh a, MFA lamin football league an kalpui thung. Zonet lamin television live coverage an buaipui vek bakah commercial rights neiin MPL a kal theihna turin sponsor an zawng bawk.

Tuna kum nga chhung inremna an neih leh takah chuan Mizoram Premier League chu tluang takin a kalchho leh dawn tihna a ni a, tualchhung football ngainatute buaina pakhat chu chinfel a ni ta.

MFA president Lal Thanzara chuan Zonet nen hlawhtling taka kum nga an thawhho tawh hnua kum nga dang atan an thawkho leh thei tur chu lawmawm a tih thu a sawi a, MPL avanga Mizoram football in hma a sawn dante a sawi lang.

Zonet managing director RK Lianzuala chuan MPL atana inremna ṭha tak an nei leh thei lawmawm a tih thute, an thawhho tawhnaah MFA chunga an lawmthu leh kum nga dang lo awm turah ṭha taka thawhho zui zel a beisei thute a sawi.

MFA honorary Secretary Lalnghinglova Hmar chuan MPL season khelh tawh thlirna leh a hmasawn chhoh dante a sawi a, MPL ṭan a nih hnua hlawhtlinna hrang hrang awmte report a pe bawk.

Courtesy ://www.vanglaini.org/infiamna/61648#sthash.iNt6fd7o.dpuf

Similar Articles

Top