You are here
Home > Zoram > MEET THE ELDER/AUTHOR

MEET THE ELDER/AUTHOR

MEET THE ELDER/AUTHOR

ll_1_1474530264

Vawiin chawhma khan Heritage Centre, Lunglei ah Art & Culture Dept. leh Mizo Academy of Letter Jt.Hqrs. Lunglei te buatsaih in Meet the Elder/Author neih a ni. Pu Thlamuana, MCS Secretary, sericulture & Fishery Dept. Govt. of Mizoram chu khuallian niin a hmanpui.

dsc_0070

Khuallian chuan thusawiin thu leh hla lam a mithiam kum upa te sulhnu ngah tak tak te vawiin hun Art & Culture dept. leh MAL Jt. Hqrs. Lunglei ten an buatsaih hi thangthar te tan Mizo tawng dik zirtur leh hriattur tam tak an neih phah dawn a ni. Mithiam ten tawng hi thil nung a ni an ti a, hnam leh chi tawng te hi a bo in a thi thei a hemi avang hian hnam leh chi tawngte hi hmang uar ang u a ti. Tunlai thalai ten Mizo tawng an hmang uluk lo hi a pawi a, chuvang in thu leh hla te hi lo awm zel tur a ni a,kan mithiam leh kum upa sulhnu atang hian kan thalai ten Mizo tawng dik tak hman i uar ang u a ti.

Inkhawm hi Pu C. Hrangdula, President MAL Jt.Hqrs. Lunglei in kaihruaiin kum upa an kawmte chu Dr. R.T. Hnialum, Lawngtlai, Rev. Dr.C.L.Hminga, Lunglei, R.K. Lalhluna, Lunglei, Sanghlira Colbert, Lunglei , Rev.H.Killuaia, Lunglei leh C.Lalnunchanga, Aizawl te an ni.

Dr.R.T.Hnialum
Dr.R.T.Hnialum

Dr.Robert Tintlunga Hnialum;

January 26, 1930 khan Lungzarhţum, Lawngtlai District-ah a lo piang a, a pa Ralchina Hnialum, a nu Nipawngi Khenglawt a ni. A naupan lain Chawnhu-ah te, Bualpui “Ng”-ah te, Mampui-ah te Primary School a kal a, Serkawn Middle English School atangin pawl VI a zo va, Aizawlah High School kal zawmin Pawl VIII chu Shillong High School-ah ziriin heta tang hian Matric a  zo ta a ni. Kum 1960-ah Gauhati University atangin B.A a pass a, Kum 1987 khan Honorary Doctorate in Discipleship hlan a ni a, kum 1992-ah Under Miracle Centre, DevoKottai, Tamil Nadu atangin Honorary Dcotorate in Philosophy in Theology a dawn bawk.

Kum 1954-ah Middle School zirtirtu hna a thawk a. Kum 1962-72 chhung Pawi-Lakher Regional Council-ah secretary hna a thawh hnu-in kum 1972-1993 thleng Lai Aotonomous district council hnuaiah Secretary leh Principal Secretary in a thawk leh a, 1993-ah Principal Secretary-in a pension ta a ni. A pension hnu-ah Jehova Jirerh English School, Lawngtlaiah Principalin kum 1997 thleng a thawk bawk. Upa Dr.R.T.Hnialum hian Baptist church of Mizoram hnuaiah din hmun pawimawh tak tak ; Assembly Executive Committee member, Nomination Committee member, Centre & Service Committee member leh Finance committee member leh a dang dang a chelh tawh thin bawk a, Mizo Academy of Letters Jt. Hqrs. Lunglei leh Lawngtlai Academy of Letters-in thu leh hla thiam chawimawina an hlan tawh bawk.

Dr.R.T.Hnialum hian lehkhabu 11 zet a tichhuak tawh a, chungte chu Road to Lai Autonomous District Council, Lawngtlai Pastor Bial Chanchin, BCM Lawngtlai Pastor Bial Kohhran Bante, Lai Hla phuah thiam Ngunchhin, Lawngtlai south Pastor Bial Tualchhung Kohhran Chanchin, MBK Paithar Bial Chanchin, Lai District chhunga zirna leh a ţhan chhoh dan , Mizoram leh Sixth Schedule, Functioning of Sixth Schedule in North East India, Mizoram Baptist Kohhran Upate leh Nemngheh kum,  English Zirna bute an ni.

Heng bakah hian  Booklet 5- Pathian biak Inkhawm Kaihruaitu, Upa H.Lianmanga, Who Are The Mizos? Lungzarhţum, BCM Berampute. Heng bakah hian article 50 chuang zet a ziak tawh bawk a ni.

Bharat Scouts and Guides-ah theih ang tawka inhmang ţhin a ni a, award hrang hrang Special Service Star, Silver Service Star leh J.H.Lorrain Memorial Certificate leh Medal a dawng bawk a ni.

Theih ang tawka kohhran leh khawtlangah inhmangin tunah hian Lawngtlai IV-ah in leh lo nuam tak, hmun zo reih rawih, kal tawh chuan cham rei chakawm tak hmun nuam leh mawi tak-ah awmin a nupui fanau, tu leh tate nen an cheng mek a, kum87 mi a ni ta a, chak lo tak chungin Zofate min la dampui a ni.

Rev.Dr.C.L. Hminga

Pastorho an titi a, Pathian thlrau hruaia awm hi engtia nun tur nge ni ang? tih an sawiho a. A thutlukna ni ta chu, Rev.Dr.C.L.Hminga anga nun leh khawsak hi Pathian thlrau hruaia awm dan tur a ni e tiin thu an keuh tlu a ni. He thu ropui tak hian a chanchin kan ziah tur Rev.C.L.Hminga chanchin hi a hril kim hle awm asin.

Rev.C.L.Hminga leh MIzo Pathian thu zirte, Serampore 1955
Rev.C.L.Hminga leh MIzo Pathian thu zirte, Serampore 1955

October ni 4, 1927-ah Pastor Thanzinga  leh Thanpuii te inkarah Darzo khuaah a piang a, Chawnhnu khuaah seilian a ni a, Ngopa lal fanu Lalengzami nen Aizawlah inneiin fapa 3 leh fanu 1 an nei a ni.

Pasotr Hminga zirkawng hi a ngaihnawn khawp mai. Chawnhuah zirna bul ţanin Serkawnah Middle a  zir z ova, Shillong atangin Matric a pass a. Kum 1955-ah Srampore college atangin B.d. a z ova, 1963-ah Manchester University atangin M.A a zo leh a ni. Fuller Theology Seminary, California USA-ah a zir zawm leh a, Kum 1976-ah doctorate Degree ( D.Miss) hlan a ni a. A tiţha viau a ni ang, a thesis, “ The Life and witness of the Churches in Mizoram” tih chu research paper ţha bera thlan a ni a, Annual Dean’s Award a dawng hial a ni.

7

A hnathawh sawisen rual a ni lo. Kum 1964-67 chhung Lunglei College Principal hna a thawk a, Baptist Kohhranah nihna a chelh tam hle a, 1971-75,1980-88 chhung hotu ber dinhmun luahin a pension thlengin General Secretary hna a chelh a ni. BCM-ah fulltime President hmasa ber a ni bawk (1995-96). India ram pawnah pawh conference leh Consultationah vawi 13 zet palai hna thawkin a feh chhuak a, ramhran ghrang- England, USA, South Korea, Thailand, Singapore, Australia, Sweden leh Switzerland ramte a tlawh tawh bawk a ni.

Kohhran bakah bible Society leh YMCA-ah nasa taka inhmangin rawng a bawl bawk a, nihna hrang hrang pawh a chelh nual ţhin. Kum 1939-ah Scout Movement zawmin, vawiin thlengin theih ang tawkin a la inhmang a, chawimawina sang pawh a dawng hial reng a ni.

Thu leh hla lamah pawh sulhnu a nei tha hle a, lehkhabu 4 a ziah bakah Sap ţawng leh Mizo ţawngin Magazine hrang hrangah article ţhahnem tak a ziak a. Chu bakah 1955-58, 1973-74, 1977-1989 chhung Mizo Bible lehlin hna rim takin a lo thawk tawh bawk a ni.

Mizoram buai ţan tirh lai khan mipui himna turin mahni lu hial zuar ngamin ke a pen chhuak am mi tam tak nunna a chhanhim reng a. Heng a hnathawh hlu tak avang han Zoram Ni Organizing Committee chuan chawimawinahlu tak a hlan a. chu bakah Art ang culture Department leh Mizo writer Accociation chuan Thu leh Hla Kutpuiah chawimawina an hlan tawh bawk a. Vulmawi Award- Life time Achievement Award hlan a nih bakah Lunglei Award committee chuan chawimawina ropui tak “ Leitlang Nopui” an hlan bawk a ni.

Rev.Dr.C.L.Hminga chanchin hi sawi zel a chakawm mang tak e. An nupaiin kum upa chak lo tak chungin min la dam pui a, Ramzotlanah khawsa-in Zoram rimawi zel turin min dampui zel se tiin duhsakna kan thlan e. “ Tlai ngai lo C.L. Hminga”

C.Lalnunchanga

Mizo zingah hian lehkha zir sang lo, mithiam nih tling pha mi tlem te an awm a. Entrinan, Hrangaia, Laldenga, J.F.Laldailova, James Dokhuma, C.S.Zawna. Chutiang chiah chuan , ţhanthar ziakmi zingah Arsi nit ling zo, lehkha zir sang lo chunga mithiam huanga sengluh phu tak pakhat chu, a chanchin ka sawi tur c.Lalnunchanga aka Taitea hi a ni phawt mai.

dsc_0077-copy-2

C.Lalnunchanga hi May 3, 1970 khan Kolkotta khawpuiah a piang a, a nu Rongaii (L), a pa Lalchawimawia (L) a ni a, unau pali zinga a upa ber dawttu a ni. Electric Veng , Aizawlah zirna bul ţanin Class VIII thleng chauh zirna kalkawng a zawh a ni. Seling nupa Remsangpuii (Tei) d/o Lalpara (L) nen nupa khawpchawi a insiamin fanu pakhat leh fapa pahnih an nei a, Bawngkawn South Aizawlah in leh lo neiin an khawsa mek a ni.

Literary field-a a kutchhuak leh hnuhma hi a hniam lo hle a, Mizo ziakmi zingah hian kut hmui ber pawl a ni ngei ang. A kutchhuakte chu hetiang hian a sawi theih awm e- Novel-7, History-1, Short Play-8, song & Poetry-10,short Story-24, article & Essay -56, Lehkhabu chhuanawm tak tak 13 lai a ziak tawh a, a bua tihchhuah vek a ni. chungte chu – Parteii (1999), Hmangaihna leh Huatna (2004),Ka Mi Huaisen leh Ka Pasalţha (2005), Pasalţhate Ni Hnuhnung (2006), Ruam Rai Thuruk (2007), Lunglenna Thawveng (2008),Indona leh Hmangaihna (2010), Deh Loh Sakei Huai (2011) Vut Duk Kara Meisi( 2011), Ka pi Thawnthu Min Hrilh Chu(2012), Zoram Mihrnagte An Vanglai(2013), An Tia Lawm vol-V (2006,2007,2008,2010), Kawlkil Piah Lamtluang (2015)

A lehkhabute hian an tawng sang hle hlawm a, hetiang hi M.A.L. Book Of The Year thlannaa an dinhmun chu a ni. Ka Mi Huaisen leh Pasalţhate ( Top 3), Pasalthate Ni Hnuhnung ( 2006 Book of the Year), ruam Rai thuruk ( Top 3), Lunglenna Thawveng ( Top 20) Indona leh Hmangaihna ( Top 20),vut duk Kara Meisi ( top 10), zoram Mihrangte An Vanglai ( Top 3), Kawlkil Piah Lamtluang ( 2015 Book of The Year)

Thu leh Hla khawvela a zuan luh hnuah chawimawina leh lawman (Prizes & award) heng zozai hi a dawng tawh bawk.

  1. Tuithiang Br.YMA Essay Writing competiton -2nd Prize (1993)
  2. Tuithiang Br.YMA Song Writing competition-2nd Prize (1994).
  3. Health & Family Welfare Services & M.A.L –Lemchan Tawi Inphuahsiak- consolation prize (1996).
  4. Millenium Celebration committee song writing competition- consolation Prize (2000)
  5. Vulmawi Writer of the Year   (2012).

A kutchhuak lehkhabute hi hetiang hian a ţhen theih awm e, Romance Novel, Christian Novel, Historical Novel, Suspense Romance fiction, Mythology Novel, Adventures, Fairy Tales, Historical Adventure, Fantasy Novel , Essay & Article Collection.

A kutchhuak atanga han thlir vang vang hian ţawngkam tawitea a nihna dik tak sawi dan tur nia lang chu C. lalnunchanga hi Sap-in Born writer an tih ang hi a nih loh vek pawhin gifted writer tiin kan sawi thei awm e. Zofate tan lehkhabu chhiar manhla tak tak ziak zel turin a nunkhua sei mawlh rawh se.

Rev.H.Killuaia

Hla nung tak tak hmanga Pathian kohhranho chawmtu leh awi theitu, lehkhabu sawm chuang zet hmanga Zofate chawm ţhintu, tih awm lama mi chak, mi tlang , mi hneh thiam, ţhian siam thiam tak Rev. H.Killuaia hi kum 1939, august 22-ah chawnhu khuaah a piang a, a pa Upa Mangsaia, a nu Lawngdawhi a ni a, an unau hi 16 zet, hmeichhia 3 leh mi pa 13 an ni. “ Kan unau hi ka nu leh pa rawngbawlna rah a ni ang, Kan vannei hle mai, Pastor leh Upa kan ni vek a, hlaphuah mi 4 lai kan awm bawk,”  a ti.

Rev. H.Killuaia, C.Lalnunchanga, Pu R.K.Lalhluna
Rev. H.Killuaia, C.Lalnunchanga, Pu R.K.Lalhluna

Kum 1969, April 22-ah Nl.Chhunkmi nen inneiin fapa 3 an nei a, tu 10 an  nei tawh. an fate hi an puitling hlawm hle a, Master Degree an nei vek a ni.

Kum 11 mi  a nihin sikul a kal țan a, kum 1953-ah pawl thum a pass a, Serkawr, Țawipui-ah te Middle sikul a zawm a, 1956-ah pawl ruk a zo. Lungleiah High School a zawm a, Lunglei High Schoola a kal lai hian , “ Pawihhoin tihduhdah kan tuar nasa lutuk a, Pawihho zawngin lungthu silfai tur” tih te a ni a. Ka thinin a tuar ta lo, “ Pawihho tiduhdah chu sual zel tur, kan ti a, kum 1957 khan mi 400 dawn chu ka sual a ni,” a ti. Pawl kua atangin Shillongah zirna a chhunzawm a, zirlai 1000 chuang zingah Best Boy a ni zak zak a, under pants nen chauh a che zak zak a, pole vault-ah feet 10 a zuankhahlen.

Pathian kohna changin Chanchin tha hrilin a pen chhuak a, a rawngbawlnaah man a ni a, Pakistan lunginah kum 2 zet a tang. Chumi hnu-ah Pathian kohna dawngin Eastern Theological College, Jorhat-ah  1968 kum khan Pathian thu a zir a, 1972 kumah a zir zo va, pro pastorin Tawipuiah a awm a, 1975 kumah nemngheh a ni a, B.Th leh B.D a zir leh a 1994 kum khan a pension ta a ni. 2008 kum atang khan Tlawng lui hnarah Tawngtaina tlang a buatsaih tan a, tunah hian tawngtaina in cabin 10 a ding tawh a ni.

Rev.H. Killuaia hian lehkhabu hrang hrang 10 lai a ziak tawh a, tunah  hian tihchhuah leh mai tur pathum vel a nei bawk. Pathian hnen atanga a dawn angin Pathian fakna hle leh ram veina hla chi hrang hrang 50 aia tam a phuah tawh a ni.

Heng a kutchhuak hlu tak tak leh a rawngbawlna avang hian heng award hi a dawng tawh a ni. Rashtiya Gaurav Award, Thu leh Hla thiam chawimawina (MAL Jt. Hqrs. Lunglei atangin ) leh Thu leh HLa Kutpuiah Chawimawina ( Mizo Writer Association leh Art & culture Department atangin )

R.K.Lalhluna Padma Shri Awardee

Mizo thu leh hla tihhmasawn kawnga thawhhlawk tak, kum upa nih hnu pawha lehkha ziak leh hla phuah chawl lo va, taima taka kal ngat ngat Pu Ralte Kawlni Helhlah Lalhluna hi France ram kal Kalkhangliana leh Zawlnei hmingthang Darphawka thunu Laithangpuii te karah 1938, October 9 khan Lunglawnah a piang a.  1950 kumah Lunglawn Primary School atangin pawl thun a zo va, High School  a kal hnu-in 1954-ah a zirna a chawlhsan ta a ni. Kum 14 zet zirna a chawlhsan hnu, kum 30 mi a nih hnuin private-in matirc a exam leh a, kum 9 zet a beih hnuin 1977 khan a pass ta a ni. Private bawkin PUC a zo leh a, Private bawkin 1984 kum khan B.A a zo leh a ni.

dsc_0077-copy

July 8, 1970-ah Zobawk nula P.C.Vanlalnghjaki nen an innei a, fanu 2 leh fapa 2 an nei a, tu 5 nei tawhin an chhungkuaiin Lunglawnah an khawsa mek a ni.

Thu leh hla huangah Pu R.K.Lalhluna kutchhuak hi a namai lo khawp mai. Lehkhabu 3i a ziak tawh a, hla 50 vel a phuah tawh a, essay 100 chuang, thufing tawi 6 leh play 4 vel a ziak bawk.

A lehkhabu ziakte; Thlanrawnpa KHuangchawi, Lal Seipuia Pasalțhate, Keimi, Sengkawn Zo, Pipute Arsi Chhuina, Thawnthu Tawi, Staff Notation Zirna, Chawngkhupa, K.Hauthanga, Fam Lalzova, Open air Rawngbawlna, Darphawka, Appolo Munubi, Martar Vanlalliana, R.Lalthanga, Chhailai Di, Staff, Tonic Solfa zirna, Bible Hun Bite Mitthlana, Mahnia Music zirna, Darlenglehi, Bihchianna, St. Joseph Amplified, Zawhna leh Chhanna, Rev.Thankunga, Lawhlei, Rothangpuia, TH Lewin, Mizo History Kamkeuna, Zoțawng Dictionary, Awithangpa, K.Papuia Chanchin, Cinque Foils ( Mizoțawng grammar), Latin-English- Mizo Dictionary  (buatsiah mek). A hawl zau khawp mai- History, Mythology, Fable, Secular, Theology, Biography, Language, Comics, Music, Astrology leh Historical fiction thlengin a huam a ni.

Heng a kutchhuak hlu takte avang hian India ram chawimawina sang Padma Shri ( Literature) March 24, 1991 khan hlan a ni a, Mizo zingah a dawntu pasarihna a ni a, state level leh district levelah chawimawina a dawng nual bawk.

 

 

Similar Articles

Top