You are here
Home > Zoram > LUNGLEI-AH EDUCATION MENTORING PROJECT KALPUI ŢAN

LUNGLEI-AH EDUCATION MENTORING PROJECT KALPUI ŢAN

LUNGLEI-AH EDUCATION MENTORING PROJECT KALPUI ŢAN

Vawiin khan Lunglei District chhunga zirna kawnga hmalakna thar pawimawh tak ‘Education Mentoring Project’ chu kalpui tan a ni.

Lunglei DC, Pi Lalzarmawii, IAS
Lunglei DC, Pi Lalzarmawii, IAS

Education Mentoring Project hnuaiah hian Mizorama hmasa ber ni turin Lunglei District chhunga Department hrang hrang officer-ten zirna school-te tlawhin zirlaite an kaihruai dawn a. Lunglei District chhunga zirlaite rilru chawkphura, zirna kawnga inelna tha (Competitive Spirit) nasa zawka an neih chhoh theihna tura he Project-hi duan a ni.

 

He Education Mentoring Project hnuaia a hmasa ber atan vawiin chawhnu khan Lunglei DC, Pi Lalzarmawii, IAS chuan Government High School, Lunglei a tlawh a. Zirlaite leh zirtirtute nen inkawmhona hun hmangin zirna kawnga hmasawn tura hmalak tul a tih te a sawipui a. Lunglei DC-hi Pi C. Lalremruati, Lunglei District IPRO-in a tawiawm a ni.

Pi C. Lalremruati, Lunglei District IPRO
Pi C. Lalremruati, Lunglei District IPRO

Pi Lalzarmawii chuan taimakna leh tumruhna a pawimawh thu sawiin, “Hlawhtling tur chuan thahnem ngai taka lehkha in zir a, in zirlai in ngaih pawimawh hmasak ber a tul a ni” tiin zirlaite chu an hun awl te hmang tangkaia an zirlai bu bakah Library-a lehkhabu tha tak tak te chhiar thin turin a chah a. Tunlai khawvel changkang chho zelah Spoken English leh Spoken Hindi thiam a pawimawh thu sawiin hemi kawnga thiamna neih chho tura in zir turin zirlaite a fuih a. Zuk leh hmuam laka filhlim turin DC chuan zirlaite a chah a ni.

Headmistress Dengsailovi Sailo
Headmistress Dengsailovi Sailo

Hemi hunah hian Pi C. Lalremruati, DIPRO pawhin thu sawiin zirlaite chu rilru nei tak leh an hma hun thlir ran chungin, an zir laite hriatthiam tum tak tak na rilru nen lehkha zir thin turin a chah a. Mahni tuina zawng mila eizawnna an neih theih dan tur kawng an ngaihtuah tan a tul thu a sawi bawk.

4_1503402039

Education Mentoring Project-hi chak taka kalpui zel tum niin tun dinhmunah Lunglei District chhunga Officer pakua (9) te Mentor ni tura ruat fel an ni tawh a.

Sl No Name of Mentor Name of School
1 Pi Lalzarmawii, DC Govt High School, Lunglei
2 Pu K. Lalrohlua, PD DRDA Baptist High School, Serkawn
3 Dr Malsawmtluanga Fanchun, BDO Govt Zobawk High School
4 Pu Zonun Thara, SDPO RMSA Secondary School, Hrangchalkawn
5 Pu J. Lalthafamkima, SP Sacred Heart School, Lunglei
6 Pu C. Lalnithanga, DAO Govt Venglai High School
7 Dr VLMS Dawngliana CMO Govt Bazar High School
8 Pi C. Lalremruati, DIPRO Govt Haulawng High School
9 Pu H. Lalrinpuia, SDO Govt Leitlangpui High School, Lunglei

 

WRITTEN BY C. LALREMRUATI, MIS, DIPRO LUNGLEI

DATED: 22ND AUGUST 2017, 5:00 PM | LANGUAGE: MIZO

 

Similar Articles

Top