You are here
Home > World News > LEO TOLSTOY HRINGNUN LEH A THUKHAWCHANG – Familia Fanai Lalţansanga

LEO TOLSTOY HRINGNUN LEH A THUKHAWCHANG – Familia Fanai Lalţansanga

LEO TOLSTOY HRINGNUN  LEH A THUKHAWCHANG – Familia Fanai Lalţansanga

Kum 1828-a piang, kum 1910-a boral ta Leo Tolstoy kha Russia lal chhungkua thlah, lal thisen kai  a ni a, ram zau tak leh chhiahhlawh serfs tam tak nei, mi lian chhungkua  aţanga seilian a ni a, a tlangval lai chuan mahni lu zo lutuk mah mah, mipat hmeichhiat kawng pawha serh leh sang nei lo, zu leh sa chen bakah nula sir tlukpui ve rawih, mi rikrap ching, insual hrat khawkheng a ni ve ţhin a.

1fb4f811b11b52ef66b73065e3adb0b2--leo-tolstoy-tolstoy-quotes

‘Indonaah pawh mi eng emaw zat ka kaphlum tawh a, thih thlenga inbei (duel) turin mi eng emaw zat ka cho tawh bawk a, pawisa khelh ka hrat a, sum ka khawhral nasa, ka chhiahhlawhte thi leh thau pawlha kawla nichhuak chhiara an hnathawh hlawhte ka lo eiru tawh ţhin a, ka chhiahhlawhte na tak taka hrem turin an chungah ro ka lo rel tawh ţhin a, ka nun a khawlo va, mi tam tak ka bum bawk a. Chutiang reng reng chuan ka nun hi kum 10 tal tap chu ka lo hmang sual tawh ţhin a ni,” a ti.

ca6a9d3ab304e991db98e9bf6f412106

Chu’ng nun bawlhhlawh leh tenawm zawng zawng atang chuan inthliar fihlimin lal chhungkua a nihna te zawi zawia paihthla zelin nun zahawm, nun dik leh nun ţha lamah siamtharlehna changin a mawl thei ang bera khawsa-in nun zahawm  hlutzia a pawchhuak thei ta a, an lenrual hluite mak tih khawpin a nun a inthlakthleng thei a ni. Khawvel ropuina leh sum leh pai itna te, duhawmna te a hnuchhawn thei ta vek a nih chu!

Lal Isua zirtirna-ah hian a chiangthar ta em em a, Lal Isua zirtirnate zawm thei turin thawnthu mawl leh zirtirna nei ţha tak tak a ziak a ziak ta a, a nupui leh a chhungte chuan chung a thuziak rohlu aţang sum, royalty  hmuh an beisei laiin ani erawh chuan mi rethei zawkte’n a thlawnin chhiar vek thei se a duh em em a, chuvangin a hun tawp lamah an chhungkaw nun leh nupa nun a khawbaw sakso zo ta vek a. Mahni ĩn lûm atanga tei chhuakin khawvawt takah vurin a hmet-hlum ta a ni.

Eng tinnge he mi ropui hi keini kristiante’n a lova engmah ti thei lo anga kan sawi

‘Thlarau thinghlim’ tel lo hian a nun a thlakthleng theih bik chu le? I lo zirho dawn teh ang.

  1. THINLUNG INHAWNG MI A NI; Leo Tolstoy vanneihna leh a thil thlawn pek dawn ropui tak mai chu a thil tawn hriat leh a thil zir atanga a ngaihdan thlakthleng duhna rilru a nei hi a ni, kan ti thei awm e. Kum 1850 chho bawla Crimean indona-a mihring nunna hlu tam tak tihborala a awm lai mit ngeia hmutu a ni a, indona leh tharum thawhna hian thil ţha a tichhuak lo, tih hi thupuiah a neih phah ta hial a ni. Kum 1857 vela Paris khawpuia mi tam tak lutan bunna khawla an bu an tanbung lai leh an lu tanchhumte bawmchhunga awm reiruih a hmuhte chuan a ngaihdan a thlaktir ta hmiah a. State thuneitu, roreltute hi phiarrutu a lo ni thei tih ngaihdan a nei ta a, State hian dan a siam a, mi lian leh thiltitheite hmakhua ngaiin a dan siam chuan mi rethei dai kil kara mite thiam loh chantirin tual an that ta chiam ţhin tih ngaihdan a lo neih phah ta a. Eng sorkar hnuaiah mah hna ka thawk tawh lo vang ti hiala  chhiachhamin a intiam ta a ni.
  2. MI DANGTE HRIATTHIAMNA NEI MI A NI; Lal chhungkaw zinga mi ni mah se, Leo Tolstoy hian a mit leh beng a len a, midangte hriatthiamna a nei thei tlat hi mi danglam bik a nihna a ni a, mi rilru ţha leh rilru thianghlim tak nei mi a ni, kan ti thei awm e. Kum 1860 vel daih atang tawh khan an rama cheng mi hnuaihnung leh a sal, kuthnathawktute thawmhnaw hak ang ha-in an zingah hna a thawk ve a, an in leh lote a sakpui ţhin a ni. A sal leh a chhiahhlawhte a ngai nep ngai lova, an bula chen nuam a ti a, khawpuia intichangkang leh mi zahawm pui pui bula awm aiin mi hnuaihnungte bula khawsak hian an nihna dik tak leh an retheihzia a hriatchian theih a ni tih ngaidan nei mi a ni. Mi ngilnei tak, hmangaihna ngah mi leh pa zaidam tak a ni.
  3. MIHRING A NGAI PAWIMAWH BER.; Khawvel pumhuapa thu leh hla thiam elkhen mi hmingthang a nih tawh hnu pawhin mi hnuaihnung zawkte chhamdawl nan a hun a hmang thei tlat mai hian mi ţha tak a nihzia a lantir a ni, kan ti thei bawk ang. Kum 1873 khan Russia ramah ţam nasa tak a tla hlauh mai a. Leo Toystol chuan a thawnthu ropui Anna Karenina a ziak lai mek kum khat tehtlawng chawlhsanin rilţam mangang, chhuanchhama mei alh en hmabakte chhawmdawlna leh ţanpui nan a hun hlu tak a hmang ral a ni. A chhungkhat laina hnaite leh a ţhiante chuan a thawnthu ziak a chawlhsan ta mai chu atthlak an ti hle a, ani erawh chuan ka suangtuahnaa a changtute chanchin ka ziak aiin heng mi chanhaite ţanpui hi ka tihmakmawkhah ka ngai lo thei lo a ni, a ti. Kum 1891 ţampui mitthi an tuar ţum pawh khan kum 2 chhung thuziak chawlhsanin mi chaihaite tan vehbur khawnin a hun a hmang a ni. Khawvela thuziak thiam ber chuan a vanglai hun kum 3 chu mi chanhaite ţanpui nan a hlan tawp a nih chu!
  4. KHAWSAK AWLSAM LEH ŢHA LEH MAWL, NUN ZAHAWM SI; Kum1870 chho bawr vela rilru lam harsatna namen lo tak a tuar hnu atang khan khawvel sakhua reng reng hi a hnuchhawn ta vek a, a seilenna Orthodox kohhran ngei pawh chhuahsanin Lal Isua zirtirna laimu khelfilha thlarau lam nuna khah leh khawvela intihropui tumna lam reng reng atanga inlakhran a duh ta zawk a. Zu a nghei a, meizial zuk a bansan a, sa a ei tawh lo bawk a. A duhthusam ram leh khawtlang thil neih inţawmtlang veka khawsakho dial dialna ram din a duh ta hial a. He a ngaihdan hian India ram hnampa Mahatma Gandhi rilru pawh a hneh hle nghe nghe a, kum 1910 khan Ashram pakhat Tolstoy Farm tih chu a din phah ta hial reng a ni.

leotolstoy1-2x

He lai thu hi ching-al leh sa-um nen han bawlphuan deuh ta ila; Lal Isua zirtirna ring leh zui ţheuh ţheuh pawl pawl rilru hi a lo lian thei hle mai a, a zirtirna laimu bosal ţhak khawp hian pawl, denomination-ah hian ţhahnem a lo ngaih theih viau mai hi a lo ni a. Pharisai ho khan dan an ziah belh zel a, an dan chu mi mit hmuha mawi hawih-ah an hmang a, an thinlung chu a thianghlim lo ta hle ang khan keini kum 100 lek kohhran kalphungah pawh hian tihdanphung ( ritual practices) hi pathian angin chibai kan buk ka zawk emaw ni aw! tih theihna lai tam tak a lo awm ta a ni. Kohhran kan sawiselna a ni lo va, Mizo hnam tan kohhran pawimawhzia hi sawiin a siak lo a ni hrim a, mihring tlem nak alaia pawl leh pawl rilru kan la lian ta lutuk hi chu setana thangah kan in-awk chiang khawpin a lang a ni.

Zoram khawvar hun nghaktu pawl intite  hian he lai thu hi an sawi thawi det det-in a lang a, Pu Saikhuma inlarna an dawnsawn dan leh an hrilhfiah dan-ah thu thar puakchhuah tur ka hmu lo. Hmana mi bawk kha a ngai reng a la ni. Inlarna hi chunglam thil pek dawng lo tan chuan hrilhfiah chi pawh a ni lo va, miin inlarna an hmu a, thu an dawng a, an sawi a, an puang a nih chuan a ţha e! Aquarium chhunga sangha, Lal Isua mawina pholang turin a tui, Mizoram hi a thianghlim a pawimawh ang bawkin mi zawng zawng hi thianghlim vek tura thlan leh ruat kan ni lem lo bawk! ‘Tuikuk Pathian siam theih loh’ tih ţawngkam a awm a, ka pu Pastor Lalsawma (L) chherchhuah emaw an ti a, a dam lai kha amah  ka zawt a, a lo ni lo! Tuikuk zingah chauh ni lovin hnam tin zingah siam theih loh mihring kan lo awm vek!

Tolstoy chuan helai kan thu chai mek Lal Isua thulaimu hi Two Old Man-ah khan a rawn ziak ngaihnawm hle a. Putar pahnih Efima leh Elisha te chu Jerusalem ngei-ah Pathian chibai buk turin an thawkchhuak ta a, kawngah rei tak an thang hmu chuan Elisha chuan khaw pakhata dam lo chhungkua, chhuanchham mei alh en, dam lohnain a tlakbuak mekte enkawlin a chhawmdawl a, a enkawl dam hnu-ah an intundunna tur a ngaihtuahsak ta vek a. Damlo enkawl nan  pawisa a hman tam avangin Jerusalema thlenna tur a nei daih ta lo va, Pathian chibai buk thei lovin lunghnur takin a haw leh ta poh va!

A ţhianpa Efima erawh chu Jerusalem a thleng thei a, Isua sulhnute tlawhchhuak dapin Holy Sepulchre-ah chuan mipui tam tak hma-ah Elisha chu Pathian chibai bukin a hmu tlat mai a, mi an tam em avagin an inbo leh a. Chutiang reng reng chuan a kalna apiang-a a hma-ah Elisha chu a hmu fo ta mai a. Mak a ti hle a. A haw kawngah a ţhianpa chawlhna ni-a a hriat ĩn chhe takah chuan a chawl  a. Chu mite chhung chuan an mikhual an dam loh laia rawn kantu kha Patian vantirhkoh a nih an rin thu leh rawng a bawlsak dan zawng zawng mai chu hahipin an lo hrilh chiam  a. Efima chuan zan a mutna-ah thil awmdan chu a ngaihtuah vang vang a, ‘Jerusalema Pathian chibai buka ka kal hi Pathianin min pawmsak em ka hre lo va, ka thian pa rawngbawldan chu Pathian chibai bukna dik tak, Pathian pawmtlak a lo ni ngei e” tiin a ngaihtuahchhuak ta a ni.

  1. HMANGAIHNA KARA INDONA.; Chutianga nun zalen leh ţha din a tumna lamah chuan inbeihna leh indona hmachhawn tho a lo ngai leh a. Mi rethei te hmangaihna thu sawitu chu lal chhungkaw zinga mi a nih miau avangin in ţha leh ropui takah chhiahhlawh tam tak nen nuamsa-in a khawsa thei bik si a. Kum 1890 chho vel atang khan a nupui fanaute rem tih loh chung chungin a thu leh hla chhut phalna chu ama mimal hlawkna atan hmang tawh lovin a duh apiang tan chhutchuah theih turin a phalrai ta mai a, an chhungkaw boruak a sat phah ta em em a ni.
  2. KUT HNATHAWH NGAISANG MI; Rilru leh taksa a inbuk tawka hman thiam hi thil ţha ngaihtuahchhuah theihna hmanraw pawimawh tak a ni tih hria-in mi lian chhungkua atanga seilian leh khawvel pum huap mite ngaihsan em em ni mahse,Tolstoy hian a kawlawm dah ţha-in leilet-ah hna a thawk fo mai a. Thuziak mite leh chanchinbu mite’n ţum khat an tlawh ţum pawhin a pheikhawk amah ngeiin a lo siamţha lai an va phawk a ni. India ram hnampa Mahatma Gandhi te nen khan rilru thuhmun pu mi an ni a, mahni kutkawih thil siam an ngaihlu em em a, mawl taka khawsak a, thu ril tak tak ngaihtuah chhuaha mipuite tan lei hringnun zawh dan kawng dik leh ţha puanchhuah leh zirtir an thiam em em a ni.

THU TLANGKAWMNA; Leo Tolstoy nun atanga zir tur ţha tak chu hetiang hian a hmawr han bawk dawn ta ila: Rul leh rul pawhin an ke an inhmuhsak thei tih thufing a awm a, a awmzia chu – rukrukchingin rukru a kawp tlat a, ruihhlo ngawi vekiin ngawlvei bawk a kawm a, mahni ngaihdan mil pui deuh hlir hi kan lo kawmin kan lo inkawp ţhin a. Chutiang khawvel, keimahni chenna, seilenna leh kan kawtchhuah leh kan ţhenrualte zingah chauh chuan kan taksa leh rilru leh ngaihtuahna te a lo awm ţhin avangin kan khawvel hi a lo zim ta em em mai a, kan ngaihdan chu dik vek emaw kan ti ta ţhin a lo ni. Thingthupui rim na tak pawh tui ti em emin kan ei thei a, Dangpuithu leh Nghapih pawh tui kan ti em em thei a, Japan rama Mizo han awmte tan pawh thinthupui hi a rep talin an la inthawn hram hram ţhin a ni.

Tolstoy chu lal chhungkua atang seilian leh thuziak thiam lutuk mi vantlang chunga leng ni mahse mi hnuaihnung berte dinhmun hre thiam thei turin an peikhawk ang pheikhawk  a bun ve  a, an ngaihtuah leh engto zawng pawh  man thei turin an mar a dek a, a khawvel thlir dan, a rilru sukthlek pawh a thlakthleng theih phah ta a ni. Communist revolution awm tura a meisi chhem alhtu, ‘Mother’ tih lehkhabu ţha zet ziaktu  Maxim Gorky-te pawh khan Russia ram retheihzia leh lal ban an phutna leh eng tia hmalak zel tur nge tih an rawn pawhin Tolstoy chuan thisen chhuah zawng leh tharum thawh zawnga chet kha a duh ngai lo reng reng a ni. Russia lal chhungkua pawh that mang vektu Communist kulhpui a chim hnu hian Leo Tolstoy hi lo tho leh ta se, thuziakmi Maxim Gorky hnenah chuan, “ Kha maw! Ka tih reng kha!” a tih ka ring hial a ni.

Chawngkhum dan tlang huat loh han ti ta ila, PC vanglaia an ruhzia kan hria a, an mahni leh an mahni hlir awmkhawm zingah  an party chakzia an sawi an sawi a, mi dang sawi an ring duh bawk si lo va, anmahni sawi chu anmahni bawk khan an awi tak tak a, ruh takin an ral riai riai ta mai kha a ni a. Pu Zauthauva’n, “Thereng angin an thawm a ring a, anmahni an te hle si a tihte, YMA no angin hlawh lawr an ni a, an kir a piangin no tlang a hek thin,” a tih fiamthute pawh kha dikna chen a awm a ni.

Chutiang deuh chiah chuan Mizote hi ram kilkhawr taka hnam tlemte khawsa kan ni a, kan reading habit hi a chhe em em mai a, mawi leh ţha leh fing hi kan inti em em mai a. Eleven day puanthan vanglai khan inkhawmpuina-ah mi 5 zinga 3-in eleven day puan thui kawr kan ha a, Hara jean ram pum huapin kan ha leh a, Kungfu shoes kan bun deuh vek bawk. Aluminium filter kan intihmuh leh a, tunlai tak hian 6th Pay Revision anga sorkar hnathawkte’n hlawh kan lak hnu hian kan lo ziaawm chho ta hle a, ĩn sakţhat, biak ĩn insak-ropui-siak leh lirthei changkang neih kan intihmuh leh mek a ni. Buhchangrum leh sa bakah zu thlenginkan lo hnianghnar ta hle mai a, mahni insum thei lo leh inthunun thei lote chu, thisen sang, zunthlum leh zu seh-in kan invuiliam zawih zawih ta mai a. A hnu hnung hnung Phung seh tia kan intihţhaih thin ‘Phung seh leh sakei seh’ aiin khawsak nuamsak tak vanga sa leh thau leh mawm ei luat tuar lo leh zu in luat tuar lo leh vaihlo leh a kaihhnawih leh kuhva heh luatna  hian min sehhlum tam ta a ni ta ber mai. Mahni mimal ngaihdan nei hrang deuh hi chu kan khawhran se en hu zel.

L.Keivoma’n thliarkar rilru a tih kha kan la pu vek a, kan zirchhuah leh kan hriat aia tam hi titi phunglengin kan sawi kan sawi a, kan pawt kan pawt a. Hnam fing hmasa Greek-ho ang khan mahni chek mil lo deuh thu leh hlate leh  kan rilrem loh zawng deuh ngaihdante pawh kan zir ve zel a hun ta hle a ni. Tuichhunchhuah hlui, tui ti-chipchep awmnaa uchang pakhat awm khan a chenna tui tichipchep chu dil lian ber-ah a ngai tlat a, a aia zau tuifinriat a awm theih a ring lo. Chu ngaihdan zim tak, “A frog in the well attitude” chu kan hluihlawn ngam a hun ta. Chutih rualin thliarkar rilru kan nei hi kan hnam leh sakhaw him nan a pawimawh leh hle rih lawi si a ni.

Kum 1981 khan Rangoon University bul kawngpui sir lehkhabu hlui zawrhnaah ‘Twenty three tales from  Leo Tolstoy’ tih bu hlui tawh tak hi Kyat 10/- in ka lei a, HK Bawichhua ka ziak lehkhabu ‘Nun Dan’ nen hian ka nun kaihruaitu ka lehkhabu roh ber an ni hlen ta! Khawvela novel ţha ber-a an sawi Tolstoy ziak ‘War & Peace’ leh ‘Anna  Karenina’ te hi hman nuna chhiarah ka ti a ţhangkhat lian aia rei  zet ka kawl tawh a, ka la chhiar chhuak hman chuang lem hlei lo va!

He lehkhabu 2, ‘Twenty-three Tales from Leo Tolstoy’ tih leh HK Bawichhuaka ziak ‘Nundan” tih, cheng 10 man leh cheng 5 mante hi ka lehkhazir lai atangin zawhte no nei ang hrima ka insawnna painga ka ken tel ziah lehkhabu ţha an niin nun kawng dika min kaihruaitu leh ngaihdan dik leh ngaihhlut tur dik min kawhhmuhtute an ni a,  ka hringnun kawng bumboh tak tak leh chhuk leh chho ka zawhnnaa  hum sual dai lo tura thinlung rama dai min theusaktute an niin mi êng thâwl, mi vannei leh mi nihlawh takah min lo chherhchhuak ta a, tun thleng hian he lehkhabu pahnih hi ka la roh em em a, ka la vawng ţha khiau a ni.

Ama puala ziak lehkhabu pakhat pawh a tihchhuah hma hmaa India ram chawimawina sang Padma Shree Award dawngtu Pu R.K.Lalhluna hi Chhim lam pa ropui a ni a, “Thu thluaithlum vak vak hi thuziak thiamna emaw an ti a, a ni der si lo va,” tih min hrilh a, ka pawm zawng tak a ni.  Leo Tolstoy hian a thuziak hi a thluaithlum ve ngai lo va, ngaihnawm tak si, pawmnahawm tak si hian a ziak thiam a, mihring kutchhuak thawhthu ziak azawngah ‘Twenty-three Tales from Leo Tolstoy’ hi thawnthu ţha lawtlak-a sawi a ni a. Ernest Hemingway-a ziak ‘Old Man and The Sea’ kha thuziak mawi leh dak ţha dap mai a ni bawk a. Kan u B.Lalthangliana hnenah, “ Old Man and The Sea’ te hi Mizo ţawngin inletling ve leh ngawt pek a, a Sapţawnga a mawina leh hlutna a chanve chanve pawh inphawkchhuak zo lo a nia! Keini chuan he thawnthu hi kumpui lingletin kan zir a, a thu mawizia te leh a flow ţhatzia te leh a chhiartu rilru mitthla-ah a thil sawi reng reng slow motion ang maia fiahfai taka a lan iar iar theih thute ka hrilh a. A hahawlh zawng tak leh a bengkhawn zawng tak ka sawi a ni bawk a, a ngaithla ngun hle a,“A nikhawp ang, a dik khawp ang” a ti ve a ni.

Sapţawng thawnthu tawi ziak thiamah rau rau chuan O Henry ţawngkauchheh leh a ţawngkam bungraw ngahzia ngahzia hi a ropui rapthlak tawp a, a thu chheh mawi thiamzia thiamzia chu lunghlu leh rangkachak, Kristal lung mawi inchawih taka chhehmawi ang hi a ni a, a thuchheh mawi hian zawlaidi a nei a, a zunah ka uai a ni ber mai. A thawhthu tawi ziak pakhat Tha Last Leaf kha Mandalay University  atanga M.Sc zirchhuak  kan u, F.Lalbiakmawia khan Mizo ţawngin a letling ve bawk a, Mizoram zirlaibu-ah te pawh thawk khat lai kha chuan a chuang pha ve a.  A thawnthu kha a ngaihnawm hrim rhim e tih mai lovah chuan a Sapţawng thumawi a chheh kual mawina-in a chhiartu rilrua hlimna min pek ang, Kawlţawnga “ Yahtah” an tih ang kha kan chan ta duai mai a ni.

Mizo ţawnga lehlin Hamlet te pawh hi hahipin a ţhatzia kan sawi chiam chiam a, William Shakespeare ziak a English ngeia kumpui linglet a chaia chai a, a khela khel a, a lehkhuba zawr vek khawpa khaltu te tan chuan Mizo Version Hamlet hi a ho ang reng khawp a, a original context a paih hnem lutuk a. Amaherawhchu English version chhiar ve lo tan chuan Mizo thu leh hla rotling, a chhiartute tana tuifinriat anga thu leh ril thu leh hla siamtu  chu a ni leh lawi si a ni.

Lemziak thiam, u Biaklara duh em em Sap thufing “Simple living, high thinking” tih hi Leo Tolstoy leh Mahatma Gandhi leh Scientist ropui Albert Einstein te nun nen hian a inhmeh bik em em a ni. Heng mi ropui pathumte neih ang ngaihdan leh rilru sukthlek ang  kan neih tik ni ni-ah mi rilru puitling leh ropui kan lo ni thei dawn a, hmeithai ân cheh tak anga thunawi te te  khukpui ching nun, midang rel pharna tur ringawt zawng reng nun atang hian kan lo pitchhuak thei dawn a ni.

ISUA KRISTIAN RILRU

Tuna ka han sawi zawng zawngin a tinzawm thinlung ram chu Tirhkoh Paul khan a sawichhuak thiam leh ber mai a, Philippi khuaa mite hnena Trihkoh Pawla lehkhathawn bung 2; chang 1-5-ah hian chiang takin hetiang hian a lo ziak diam a:-

Chutichuan, Kristaah ţanpuina reng reng te, hmangaih thlamuanna reng reng te, Thlarau pawlna reng reng te, lainatna leh khawngaihna reng reng te a awm chuan, rilru hmunkhata awmin, hmangaihna hmunkhat neiin, inthuruala rilru hmunkhata awmin, ka lawmna tifamkim rawh u.

Elrel leh inngaihhlut avanga engmah ti lovin, mi tinin inngaitlawm takin mahni aiin mi dang tha zawkah ruat ţheuh rawh se; mahni ta ta mai en lovin, mi dang ta pawh en ţheuh zawk rawh u.

He rilru, Krista Isua pawha awm bawk kha, nangmahniah awm rawh se;

 

TWENTY-THREE TALES

Table of Contents

Part I. Tales for Children: Published about 1872

  1. God Sees the Truth, but Waits
    2. A Prisoner in the Caucasus

    3. The Bear-Hunt

Part II: Popular Stories

  1. What Men Live By (1881)
    5. A Spark Neglected Burns the House (1885)

    6. Two Old Men (1885)

    7. Where Love Is, God Is (1885)

Part III: A Fairy Tale

  1. The Story of Iván the Fool (1885)

Part IV: Stories Written to Pictures (1885)

  1. Evil Allures, but Good Endures
    10. Little Girls Wiser than Men

    11. Ilyás

Part V: Folk-Tales Retold

  1. The Three Hermits (1886)
    13. The Imp and the Crust (1886)

    14. How Much Land does a Man Need? (1886)

    15. A Grain as Big as a Hen’s Egg (1886)

    16. The Godson (1886)

    17. The Repentant Sinner (1886)

    18. The Empty Drum (1891)

Part VI: Adaptations from the French

  1. The Coffee House of Surat (1893)
    20. Too Dear! (1897)

Part VII: Stories Given to Aid the Persecuted Jews (1903)

  1. Esarhaddon, King of Assyria
    22. Work, Death and Sickness

    23. Three Questions

 

 

Similar Articles

Top