You are here
Home > Zoram > LALRINMAWIA RALTE LEH T. SANGKUNGA’N BÂNNA AN THEHLUT

LALRINMAWIA RALTE LEH T. SANGKUNGA’N BÂNNA AN THEHLUT

Mizoram sorkara minister of state Lalrinmawia Ralte leh Mizoram Youth Commission (MYC) chairman T Sangkunga chuan, nimin tlai khan chief minister Lal Thanhawla hnenah minister aṭang leh MYC chairman aṭanga bânna an thehlut. 

Lalrinmawia Ralte hian nimin thlai dar 4 vel khan Chief Minister hmuin, banna hi a thehlut. A hnu zan dar 6 velah T Sangkunga hian banna hi a thehlut ve leh a ni. Banna thehluh hi pawm an nih dawn leh dawn loh hi hriat a la ni lo.

Hetihlai hian Chief Minister chuan eptu party-te’n báng tura an phût Lalrinmawia Ralte leh T Sangkunga chu amahin a bàn dawn loh thu sawi mah se, bànna an thehluha a pawm dawn leh dawn loh chu a sawi tel loh thu thuthar thehdarhtute a lo hrilh tawh a ni.

Bànna a thehluh zawha thuthar theh­darhtute zawhna chhangin Lalrinmawia Ralte chuan, bànna a thehluh chhan chu tute emaw nawrna leh ngenna vang a nih loh thu leh, thudik hailan a duh vang tih a sawi.

Lalrinmawia Ralte chuan, sum tiching­pena puh a nihnaah Chief Minister pawh a bul tumtua puhnate a awm ta hial tih sawiin, “Thu dik ber pawh hre loin mipui kan awm rei tawh hle a, chuvang chuan, chhui chian kan mamawh a, mipui hian thu dik hriat hi an chanvo a ni vein ka hria. Chuvang chuan, he thil thlenga mawhphurtu nia min ring tak tak a nih chuan minister ni chunga chhui ka har dawn a ni,” a ti.

Department enkawltu ni lo leh nihna nei loa a awm chuan a chhuitute’n zalen takin an chhui thei dawn tih sawiin Lalrinmawia Ralte chuan, “Chuvang chuan Minister of State ka nihna aṭang hian bànna ka thehluh a ni,” a ti a; Chief Minister chu a bànna thehluh pawmsak tura a ngen thu a sawi.

Tarlan tawh angin, NIAS, Kolkata-a zirlai tirh chungchangah MNF-te chuan Labour Employment & Industrial Training minister Lalrinmawia Ralte leh MYC chairman T Sangkunga, MLA-te chu a mawhphurtua puhin báng turin an phût a; an thil phût nawrna atan February 7-10, 2017 chhung khan an pisa kai tur an lo dang tawh a ni.

Lalrinmawia Ralte hi Hachhek bial aṭangin a záwnin term hnih thlan tlin a ni a, Congress sorkar hmasaah parliamentary secretary a ni a, tun sorkar kal mekah minis­ter of state niin, Labour Employment & Indus­trial Training, Environment, Forest and Climate Change, Soil & Water Conservation leh Cooperation department-te a chang a ni.

T Sangkunga chuan, “Pathianin dinhmun sang takah min dah a, MYC Chairman-ah te min dah a, Pathian malsawmna a nasa e. Nimahsela, heti luai luaia buaina a awm takah chuan, chiang taka chhuichhuah a nih theih nan banna ka thehlut a ni,” a ti.

T Sangkunga hi East Tuipui constituency aṭangin kum 2013 inthlanah a ṭum khatna atan MLA aṭanga thlan tlin niin, MYC chairman nihna a chelh zui a ni.

Chief Minister chuan, Lalrinmawia Ralte leh T Sangkunga banna thehluh hi vawiinah ngaihtuah a nih tur thu Vanglaini zawhna chhangin a sawi. 

NIAS-ah sorkarin tihsual a nei Dik lo taka sum hman a ni : CM

Chief minister Lal Than­hawla chuan, Nalanda Institute of Advance Studies (NIAS), Kolkata-ah sorkarin tihsual a neih thu a sawi a, “Sum pawh dik lo takin an lo hmang a ni,” a ti. 

CM Lal Thanhawla hian nimina Vanapa Hall-a Mizo Students Union (MSU)-in an din champha vawi 16-na an lawmnaah thu sawiin, “NIAS-ah an lo tisual hle a ni. A pawi kan ti hle. Sum pawh dik lo takin an lo hmang a ni,” a ti a; sorkarin corruption an duh lo tih sawiin, nasa takin ṭan an la a, sorkar hnathawk sang khat chuang hrem an nih tawh thu a sawi.

Lal Thanhawla chuan, NIAS chung­changa sorkar thil tih dan chu a dik lo tih a hmuhchhuah tawh thu sawiin, “Tuna ka hriat chian ang chuan ka tu leh fate tumah ka tir lo ang ka ti a ni,” a ti a; “Dik lo taka zirlai tawrhtir a nih chuan a ṭul angin sorkarin a tih tur a ti ang,” a ti bawk.

CM Hawla chuan, state pawna ṭhalaite tirh chhuah kawngah fimkhur a ngaih thu leh Workers Welfare Board sum pawh hman fimkhur a ngaih thu a sawi a; Mizoram sorkarin state pawnah ṭhalai ṭhahnem tak hna thawk tur leh zir turin a tír chhuak tawh tih sawiin, “Japan-a kan thawnte erawh chu an him hle niin kan hria,” a ti a; Japan rama kalte chuan an chhungte hnenah pawisa an thawn thei tawh niin a sawi.

Chief Minister chuan, zirlaite chu politics ball-a ṭang lo tura fuihin, “In zir lai chuan politics chungah in léng zawk tur a ni. Tute emaw hmanrua in ni tur a ni lo,” a ti a; zirlai pawlte chu zirlaite hamṭhatna ngaihtuah turin a chah.

CM Lal Thanhawla chuan, Mizo ṭhalai ding chhuakte chu nu leh pa thuawih leh aia upa zah ṭhinte an nih zel thu sawiin, zirlaite chu nu leh pate thu awih a, aia upate zah turin a chah bawk.

MSU hi February 12, 2001-ah din a ni a; nimina an din champha lawmnaah hian an hruaitu hluite chawimawina an hlan bakah, hruaitu thi tawhte sûnna hun an hmang a ni. 

– See more at: http://www.vanglaini.org/tualchhung/67315#sthash.YfHLvLuE.dpuf

Courtesy; Vanglaini

Similar Articles

Top