You are here
Home > CCT Robawm > KRISTIAN VANRAM KAWNGZAWH LETLINGTU, PASTOR CHUAUTERA

KRISTIAN VANRAM KAWNGZAWH LETLINGTU, PASTOR CHUAUTERA

KRISTIAN VANRAM KAWNGZAWH LETLINGTU, PASTOR CHUAUTERA – Rev.Dr.C.L.Hminga

Pastor Chuautera hi Hnahtial bul Aithur khuaa Rualkhuma Chuauhang leh Huali Chhakchhuakte nupa karah kum 1889 khan a lo piang a. A hmingah Chuaukunga an sa. A naupan laia an uipui mit terh chu Chuaukunga chhawnchhaih nan an hmang thin a, Chuautera tia an koh fiam thinna chu hmingah a pu hlen ta a ni. Unau pianpui pakhat , Sina a nei bawk.

British hovin Mizoram an awp țan khan Lungleiah sorkar sikul an din a, zirtirtute pawh Vai vek an ni. Mizoram chhiarpui hmasa ber, 1901 kuma an neih dawn khan khaw chhiarnaa sorkar țanpui thei turin mi engemawzat lai ziak leh chhiat an zirluihtirte zingah a tel va a. Lehkha a thiam theih em avangin chumi hun laia Lunglei Bawrhsap, GP Whalley, Mizote’n “Lalkaia” an tih mai chuan zir zel turin a chelh a, an khaw lalin ama thua haw duh lova ngaiin zui hruai haw a tum a, mahse hawn loh chhan a hriat chuan a hawsan leh ta a ni.

Kum 1903-a Sap Upa leh Pu buanga Lunglei an lo chhuah khan Serkawnah sikul an din nghal a. Lunglei-a sorkar sikula zirlai thenkhat chu Serkawn Mission sikula zir atan Sap Upa chuan Lunglei sap hnenah a dil a, an lo remtihsak a, Serkawn sikula zir tura thlante zingah chuan Chuautera chu a tel ve a.

Zosapte enkawlna hnuaiah Lower Primary Examna hmasa ber 1904 kuma neihah Mark kim 350-ah mark 288 hmuin exam beitu zingah pakhatna a ni. Hei hi chutih lai huna zir theih sang ber a ni. Naupang thiam thei tak a ni a, All India Sunday School Union Examnaah kum 1906 leh 1911-ah medal a dawng a ni.

Hruaitu atan buaisaih zel tumin Sap Upa chuan 1907 kum khan Calcutta Sap sikulah a luhtir a, mahse a hriselna-in khaw lum a ngeih lo va, rei awm lovin a haw leh ta mai a ni. Hemi kum vek hian Sap Upa chuan Challiana nen Sap ramah a hruai a, kum khat zet an zu awm a. Sap Upa nupui kha Calcutta Girls Hostel School zirtirtu ni thin, nu fel tak a ni a, anmahni enkawltu-ah atang a. Mizo Kristiante’n hla zir nan Solfa thiam an mamawh dawn tih hriain Chuautere chu Tonic solfa zirna-ah a kaltir a, amah a phurin a tui bawk a, Zoram a an lo haw leh hnuin Thalai nula leh tlangvalte solfa a zirtir thin a, Kohhranin hla sak thiamna lamah pawh nasa takin hma a sawn phah a, Mizoram kohhranah music lama hmasawna bul țantu a ni kan ti thei ang.

Zosapte’n an thachhang dawl tura an buatsaih zingah Chuautera leh Challiana chu an mahni puitu tur atan an buatsaih a, hlawh pawh Mission atangin an hmu a,in pawh Mission in an sak sak a ni. Chuautera chuan 1912 March ni 14-ah nupui, Hrangnghini a nei a. An inneih hian nupa tuak thum Kristian inneih danin an innei a, a ropui hlein an sawi. A nupui neih atang chuan in hrang a chang ve ta a, Pathian malsawmna changing fapa duhawm tak annei a, vanduaithlak takin kum tling lovin a boral ta mai a, fapa dang nei tawh lovin fanu hlir 6 an nei leh ta a ni. 1914 September thla-ah pastor atan nemngheh a ni a, Mizoram Baptist Kohhrana pastor nemngheh hmasak ber a ni. 1910-ah Kristian Vanram Kawngzawh Thu hi Mizo tawngin a letling zo a ni.

THU LEH HLA LAMA A SULHNUTE

Kohhran lama a sulhnu lam chu ziah kim sen a ni dawn lo va, thu leh hla lama a sulhnu hi bihchiang deuh zawk ta ila:

Mi thu thiam, Zo tawng leh Sap tawng pawh thiam tak a ni. Zosapte tawng zirtirtu ber a ni thin. Chhim lam Zosapte zinga Mizo tawng thiam bera an sawi thin, Rev.A.W.Carter pawhin a rin ber a ni a. A sermon sawi tur Sap tawnga a ziahchhuah chu Zo tawngin a letting thin a ni. A chanchin ziaktu, hun rei tak amah pawh thawhpuia hrechiangtu Upa C.S.Zawna chuan a inzir finna bakah pianpui finna tha tak mei, mi tawngkam thiam, hriatna leh finna zawng zawng a tul hun taka hmang a, sawichhuak thei, Mizo Upate’n “Finna chuangtlai nei” an tih ang mi hi niin a sawi.

“Khawvel thilah leh Kohhran thilah pawh a finna leh remhriatna hmang daihzai thiam tak a ni fo thin. Kohhran lam thilah harsatna leh buaina a lo awm chang pawhin Zosapho leh Kohhranhote pawhin an rinpui ber leh an chelek ber pakhat a ni fo thin. Kohhran rorelnaah mi tangkai tak a ni thin a. Mi Pakhatah chuan hetiang kawngah hian kohhran tana thawh nei nasal eh fakawm ber pawl a nih ka ring tiin Upa C.S.Zawna chuan a ziak bawk a ni.

Mission-in a testimonial an ziakah khan, “ Lusei țawng thu, bu tam tak i hnutchhiah avang leh a bik takin Kristian Vanram Kawngzawh i lehlin avang hian Kristiante hian i chungah kumkhuain lawmthu sawi kan bar eng dawn a ni” an tih kha a dik a, Kristian Vanram Kawngzawh, John Bunyan-a ziah a lehlin hi a Zo țawng mawizia leh mihring leh hmun hming a phuah thiamzia te hi tunlai mithiamte pawhin ngaihsan loh theih a ni lo. Hun rei tak sikul zirlaibu-ah hman a ni a, tunlai leh hun lo la awm zel turah pawh Mizo țawng țha zirna atan hmantlak a ni.

[A fanu upa ber dawttu hi Maymyo Sanapui ziaktu Capt. C.Khuma’n Lunglei thingpui dawr pakhat leh Culcatta thingpui dawr pakhata mak tak maia a tawn, a dam chhunga a theihnghilh theih ngai tawh loh,
Chhingkhual Lungdi tih thawnthu a ziah phahna kha a ni.- ‪#‎Familia‬ Fanai Lalțansanga]

Similar Articles

Top