You are here
Home > Zoram > KAWȚHALO VANGA THIHNA TIREM TURIN BEIHPUI THLAK DAWN

KAWȚHALO VANGA THIHNA TIREM TURIN BEIHPUI THLAK DAWN

Nimin tlai dar 3 khan Lawngtlai District-a Intensified Diarrhoea Control Fortnight (IDCF) hman dan tur relin District Level Committee chu District Bawrhsap Dr A. Muthamma hovin DC Office Chamber-ah an thu khawm.

Meeting-ah hian kawthalo vanga thihna tirem tura National Health Mission (NHM) hnuaia July ni 11-23, 2016 chhung beihpui thlak dan tur rel a ni a. Committee chuan hlawhtling taka beihpui thlak a nih theih nan theihtawp chhuah ni se, tiin a rel.

IDCF 2016 hman chhunga hma lakna tur hrang hrang rel niin; he hma lakna turah hian primary sikul leh anganwadi centre 10 ve vea kut sil dan a taka entir te, tui thianghlim in tur chhawpsak te leh anganwadi centre leh creche centre-a kawthalo damdawi (ORS-Zinc) pek chhuahna hmun buatsaih te a tel. IDCF 2016 hi July ni 11, 2016 chawhma dar 11-ah DC Conference Hall-ah a hawnna hun hman tum a ni. He chawlhkar hnih chhung hian TV leh chanchinbu kal tlangin a zau thei ang bera hemi chungchang inzirtirna tha theh darh tum a ni bawk.

Intensified Diarrhoea Control Fortnight hi kum 2014 atang khan hman tan niin, kum tin vawi khat hman thin a ni a. A tum ber chu kawthalo vanga naupang kum nga hnuai lam thihna tihrem te, chumi atana kut sil fai leh tui thianghlim in pawimawhzia inzirtir leh kawthatloh chang pawha ORS-Zinc tablet hmanga inenkawl dan inzirtir te a ni.

Similar Articles

Top