You are here
Home > CCT Robawm > KAN THLEN CHIN AŢANG KHAN HMA I SAWN ZEL ANG U – Pastor Lalsawma (L)

KAN THLEN CHIN AŢANG KHAN HMA I SAWN ZEL ANG U – Pastor Lalsawma (L)

KAN THLEN CHIN AŢANG KHAN HMA I SAWN ZEL ANG U  – Pastor Lalsawma (L)

Mahni tawkah thlen chin nei lo kan awm si lo va, Paula fuihna hian min hmer tel vek chu a ni phawt a. Naupang leh puitling, mipa leh hmeichhia, upa leh tarte nen, tumah pha thei kan awm lo tih chhinchiah phawt ila. Heti hian an sawi thin: Kristian nun chu hmalam pana kal reng tur a ni. Tui hleuh angin hma sawn lo chu hnung tawlh an ni a, an tla hlum mai ţhin, an ti.

 Untitled-1

Tunah rih chuan thuhmahruai tlahlang sei ang reng tak ka’n ziak ang e. A ziaktu lunglen thil mai a ni a, duh chuan chhiar kân theih a ni. Kum 1980 August thlaah khan Sunday School Training neihpui turin Kanghmun kan pan a. Synod motorin Sateekah min va thlah a. Chuta ţang chuan mahni thuamhnaw akin Tlawng kan pan chhuk a. Kan vanneia siamin Darlung Upa Rawna chu empai ruak lian pui phurin kan zingah a kal ve a. “Khawi ka lo phur ang, han dah rawh u” a ti a. Han hnial teh tlat chu… kan ti a. Kan thawmhnaw âh chu min phurhsak ta a nih kha.

 

Pastor Lalsawma (L)
Pastor Lalsawma (L)

Upa C. Sangzuala leh Tv. R. Lalmalsawma nen kan ni a. Tlawngral kan kai a, mel 1 vel kan kal hnu a Bawngthat ram kan han ter chho chu, Favang ni sa hnuaiah kan tlangval, a pa lian ber chu a chau ta tlat mai a. Bawngthat lama kal tur mite an lo kal hlauh a, min lo hmuak turin kan chah a. Keini pawh chu zawi zawiin kan kal ve ta a. Khaw luh hmain nulate’n thingpui nen min lo hmuak mai chu… kan lawm teh e! Thingpui min lumsaktu Upa a hming ka hre ta lo, Kawng chunga awm, pa te deuh a nih kha. Riakah min sawm a, mahse zawi zawiin Darlung kan pansan ta a.

 lsa

Darlungah chuan Kohhran mipuiin min lo lawm hle mai. A hma lawkin Kohhran mite tibuaitu, a hming pawh sawi ila. Ka hriat sual loh chuan Lalzothanga, an tiin ka hria. Ani chuan thu mak tak tak a lo sawi chiam a. Chuvang chuan an buai a ni. Zan inkhawm banah Hall-ah mipui nen kan inkawm ta a. Hetiang zawhnate hi an zawt a.

  1. Kan Kohhran hi Roman nen inzawmin W.C.C. ah a tel tawh em ni?
  2. Zairema chu hmanni lawkah Bombay-ah Roman Pope-in a nemnghet em ni?
  3. Baibula ‘Lalpa’ tih zawng zawng hi ‘Ka pu’ tiin an thlak vek dawn em ni?
  4. Synod Pastor zawng zawng chu W.C.C. thuruk an kawltir vek em nin?
  5. Synod Office ah khian misual hremna tur pindan thim an siam em ni?
  6. Tuna Kohhran chhuahsan lo chu nakinah chuan an chhuak thei dawn lo em ni?

Hengte lo pawh hi a la awm. Kan chhang zel a. Kan chhan tawpah chuan an lungawi loh thu an sawi: ‘Mi in-chhang tawi lutuk a, kan la kham lo a ni,’ an ti a. Keini chuan, ‘Min ngaithiam rawh u, dawt hi sei deuhva chhan kan thiam lo a ni e,’ kan ti a. Kan bang thei ta a ni.

Kanghmunah Sunday School Training neiin kan cham muang a. Hetih lai hian Bial KTP Music Festival an nei bawk a. Khaw hrang hrang thalaite Biak Inah an lo zai a. Kan tlangval chuan, “An Khaw hming chhiat chhiat nen an zai thiam viau mai” a ti.

Khawrihnimah kan haw lamin kan riak a, keini pathum chu Upa Chhawntluanga’n min thleng khawm a. Zan inkhawmah chuan Upa Rotluanga’n ţha takin Kohhran hmingin min lawm a. Banah Kohhran Committee te, KTP te, Hmeichhe lam te nen hlim takin kan inkawm a.

Aizawl thlen hmain Lungdarah leh Ailawngah kan riak leh a, Aizawl thlen ni chuan Synod Motor in Lawipu-ah in lo hmuak leh a ni.

KHAI LE! HMA I SAWN ZEL ANG U

Heta hmasawn tih leh hmun danga ‘ţhang lian’ tih te (Eph. 4:15), ‘puitlin lam pan’ (Heb. 6:1) tih hi thil thuhmun, sawi dan hrangah ngai ila. Hmasawn chu a ţhang lian a, a puitling zel a ni. Ringtu nunah chuan ţhankin a awm lova, ţhanlenna huang a zau va, chatuan huang a ni. Paula’n ‘Krista famkimna lenzia tluka kan zaa kan awm hun’ a sawi (Eph. 4: 11-13). Ringtu hmasawnna kawng sawi tur a tam hle. Tunah chuan kan sawi seng lo ang a. Hmasawn theihna kawng 5 emaw chu lo tarlang diat diat ila.

  1. HMA SAWN TURIN LAWM A TUL

Pathian chunga lawm nachang hria chu aman a chawi kang thin a ni. Samuela chuan ram a lak belh zel hmain Pathianin a lo hruai tawhna avanga lawmthu sawina lungphun EBENEZER a siam a (I Samu. 7:12). Hei leh chen hi Lalpa’n min puih avangin, tiin lawmthu sawina maicham kan siam thin ang. He thilah pawh hian vui chingmi chuan lawman aiin vuina a siam zel a. Pathian lamah hma sawn thei lo.

Pathian chunga lawm tlat thinte hi chu, harsatna tinreng tawk mah se sualin a ti tlawm thei lo a ni. Thu tam tak sawi tur a awm. Heng hla thute hi ngun takin lo zir teh: Sam 1; Hlabu Pui No. 430; Hla Tharbu No. 282

  1. HMA SAWN TURIN TLAWM A ŢUL

Thalrau lal nuna nei ngah tawka inngai te, mite aia thiam leh thei nia inngai te hi chuan hma kan sawn thei lo tlat a ni. Mahni rilru chapo rukna fah tlai tura mite zinga thu han sawi leh thil han tih velte a nuam viau a ni. Thiam pawh kan thianin mi pawhin min dah sang a ni thei e. Mahse keima chhunglam thlarau chu a rovin a tlachham si a. Lal Isuan kan entawn tur a sawi chu “Naupang te” a ni tlat mai. A sawi ngun viau lehnghal (Mt. 18:2; Mk. 10:15; Lk. 18:15, 16, 17). Naupang chuan thil ţha hi a lawm mai a, ama lansarhna a zawng lo.

Senior Pastor Paula induhthawhna hi zir ve ila: Phil. 3:12-16. Ka hmuh leh hriat sa hi ka duh tawk lo. A bak sawn turin ţan ka la reng thin. Chu chu inngaihtlawm a ni.

  1. HMA SAWN TURIN RINAWM A NGAI

Rinawm chu dik leh nghet a ni, a rintlak thin. Rinawmna chu Pathian zia a ni a, amah ringtu chu a mualpho dawn lo a ni (Rom. 9:33). Ka chungchang thu emaw, ka thu sawi emaw mitten sawiho sela engtinnge an tih ang? Ani sawi a nih chuan…ani tih anih chuan…. A rin tlak ang, an ti ang nge, I zawt chiang le hang, an ti dawn em ni? Mi rinawm chu a chiang a, mitten an chhiar ngam thin a ni. Chu chu Pathian zia a ni. Mi chutiang chu an thang lian thin.

Hebrai lehkhathawntu pawh a mangang deuh a ni. A thawnate hi a beisei an tling lo ve bawk a ni ang (5:12-6:3). Hmana fel fe tawh pawh thang lian lova sawngnawi reng mai a lo awm theih a ni. Kan chan tawhsa bawhzui lova, a bak sawnpui kan tum loh chuan kan hnungtawlh a ni ang.

  1. HMASAWN TURIN THIANGHLIM A ŢUL

Lal Isuan a sawi a: ‘Thinlunga thianghlimte chu an eng a thawl e, Pathian an la hmu dawn si a’ tiin (Mt. 5:8). Heta ‘la hmu dawn’ tih hi nakin thil a ni lova, tun atanga dik nghal reng kawk a ni. Tin, ‘thinlunga thianghlim’ hi nungchang tha famkim, a ni lova, ‘fai’ (pure in heart) a ni a. Tui bawlhhlawh leh tui thianghlim kan sawina ţawngkam hian ngai ila. Kan ţawnga “rilru sakhat pu”, kan tih hi a ni.

Mi rilru mumal lo, peng tiai tuai leh thlak zung zung chi hi chu Pathian thuah leh nundanah an ţhanglian lova, hma an sawn thei lo. Achanga ţha fe anga lang, mual lehlama dang leh daih ţhinte hi rilru thianghlim lo kan ni a. Ţhanlen theih a ni lo. Thil ţha pawm tlat a, ţha lo hnawl tlat ţhinte hi Isuan a duhsak a, Pathian an hmu thin. An ţhanglian a, hma an sawn zel ţhin a ni.

  1. VANRAM NGAIIN HMA KAN SAWN ANG (Mt.6:19-21; Lk.10:20; Kol.3:1-4; Heb.13-14)

Thuthlung Thar bu zawng zawng hi vanram hawia ziak vek a ni a; kohhran nun leh thurin zawng zawng pawh chatuan nun kawka inchhunglut vek a ni. Chuvangin chatuan nun engto ngai lo kristian chu a ţhanglian dawn lo va, hma a sawn dawn hek lo. Khawvelah hian fel leh thiam nih a hlawh theih a. Thlaraumi fe ang pawhin a lan theih e; mahse chatuan ram hawia a lunglen tel ngai loh chuan tlakchham a nei a ni. American tlangval, kum 30 mi Lakher rama kawng bova thlam rama riak ta mai khan Paradis a ngai a, hla a phuaha kan sak thin hi:

Chu chuan ka lung a len teh e

Chhiarsenloh awmna khian

Kalvari thihna chawmawite

Pawl ka duh fak ve nan.

Thlam rama phuahah chuan a nep lo ngawt mai.

Thalrau Thinghlimin Mizoram Kristiante a lo hruai dan kha a mak ngawt asin. Chu chu an hla sak leh an hla phuahah khan a lang a. Mizo Kristiante anga vanram ngaia zai tam hi hnam dang an awm dawn em ni aw! Chu thlarau atanga hla an phuah a tam a, kan sawi seng lo ang. Tlemte tar lang ila;-

Chunglam Jerusalem Thar Khi (Patea);

 Ka Va Ngai E Lal Ram Ropui (Hleia);

 Ni Tla Ngai Lo Zion Khawpui (Lianruma);

 Van Chung Sang Taka Lal Isu (Suakliana);

Tunah A Thar Hmangaihna Eng Nuamah (Kamlala);

 Lung Min Len Ka Thlir Ning Dawn Lo (Kamlova).

Heng mite hian an ram ngaih ber chu an thleng tawh a, eng ang taka hlimin awm maw le!

Awle, tunlai khawvel ram hmasawnna kal mup mupah hian, Lal Isua theihnghilh khawpa pawisa leh nawmchenna zawnga mipui kan tlan hum hum lai hian, ţhalaite hi, Pathian leh a Ram hawia ţhang liana puitling turin HMA I SAWN ZEL ANG U. Pathian malsawmna Kohhran leh Thalaite chungah thleng rawh se.

 

 

Similar Articles

Top