You are here
Home > CCT Robawm > JINNAH FANU DANI WADIA A THI

JINNAH FANU DANI WADIA A THI

JINNAH FANU DANI WADIA A THI

Pakistan ram leh tuna Banladesh ram lo ni ta sualchhuaktu, pa ropui Muhammad Ali Jinnah fanu neih chhun Dina Wadia, kum 98 mi chu New York khawpuia a chenna inah November ni 2 khan  pneumonia natna avangin a thi.

_98607733_dinawadia

A fapa hi kan hriattheih dan tur chuan Bombay Dyeing neitu hi a ni a,  Dina Wadia  hian a fapa Nusli Wadia, a fanu  Diana Wadia, a tute pahnih  Ness Wadia leh Jehangir Wadia te a kalsan a ni.

Dina Wadia hian a seilenna Bombay hi a khua angin a ngai tlat a, kum 1948-a a pa an vuinaa a kal  hnu khan  Pakistan hi a tlawh duh ngai lo va, a tara lamah  kum 2004 khan a fate nen a pa thlan Karachi khua Jinnah mausoleum a tlawh a, visitor’s note bu-ah chuan  “This has been very sad and wonderful for me. May his dream for Pakistan come true?”tiin a ziak a, thunawi a tam phah hle nghe nghe a. “  Hei hi ka tan thil lungchhiatthlak tak leh lawmawm tak a nihna lai a awm ve ve a, Ka pain Pakistan ram tan a duhthusam chu lo thleng mawlh rawh se” tiin a ziak a, a inti-Pakistani lo ve ţiah ţiah khawp mai a, Pakistan-ho a tithinrim nasa khawp mai.

_98607738_jinnahgrave

Karachi khua Jinnah mausoleum

Anni  pafa,  Muhammad Ali Jinnah leh Dina Wadia te hi an intithei thlawt lo va, Jinnah khan anmahni Islam dan kalhin nupuiah Islam sakhaw zuitu ni lo Parsi hnam a nei a. A fanu hian a pa hniakhnung chiah chiah rawn rap zui ve-in Parsi hnam bawk pasalah a nei a.

A pasal neih dawn hian a pa hian a theih ang tawkin nei lo turin a thlem a thlem a, a pa chuan, “ India ramah  hian Muslim tlangval nuai za tam an awm a, an zinga pakaht hi pasalah nei la, ka lung a awi a ni mai a ti a. Dina Wadia chuan a chhang a, “ A pa, India ramah hian Muslim nula sang sawm aia tam an awm a, eng nga ti nge  chung Muslim nala te chu nupuiah I neih mai loh? engah nge Parsi nula kher nupuiah I neih? tiin a chhuah chhal thung a, A pa chuan rang mangkhengin, “ Kan inneih hnuah Muslim-ah a inlet” tiin a chhang nghal var a ni.

India ram Bombay khawpui chhunga Muhammad Ali Jinnah ĩn, Malabar Hill –a awm, Dina Wadia lo seilenna chu Dina Wadia chuan Bombay Court-ah rochhung turin dilna kum 2007 khan a thehlut a. India sorkar laipui chuan Dina Wadia nĩ, Ms Fatima Jinnah rochun tur zawk a ni tiin tan a khawh a, Mr.Jinnah farnu Fatima Jinnah chu kum 1967 July khan a thi tawh bawk si a ni.

Dina Wadia hi mi tlâng, mi frank tak a ni a, Mahatma Gandhi kha pa ang chiahin a en thei a, Sarkar Patela chu mi rilru tluang tak niin a hmu a, Nehru chu mi fakder chingah a ngai a, a rilru tak ni  lo sawi chingah a puh a, pa angin a ngai thei lo va, Indian Viceroy Mountbatten chu mi rintlak loh tak a ni a ti bawk a ni. A awmzia  chu Partition of India awm phaltu chu  Mountbatten hi a ni a, Dina Wadia hian Mountbatten hi a ngei a ni mai.

Pakistan leh a  hnua Bangladesh ram lo ni ta  dintu Muhammad Ali Jinnah hi ka ngaisang khawp mai a, Mahatma Gandhi leh Jawaharlal Nehru te ang tho hian ka ngaisang a, a hnampui te leh a sakhaw zuipuite tan thil ropui tak a ti a ni.

Hmeichhe thudawnin se se thu han sawi ta mai mai ila.

Larry Collins leh Dominique Lapierrete ziak Freedom at Midnight-ah chuan India rama thuruk inthup pawimawh ber kha lo hre hma hlauh se la chuan India ram phel darhna Partition of India hi a awm lo tur a ni, an ti a. Jinnah khan ngawr natna TB a vei a, kha natna khan a nunna zawi zawiin a la mek a, a dam rei dawn tawh lo tih thuruk kha.

Ali Jinnah enkawltu doctor chuan, a hna thawh hun chhung a tihtlem hle a, zu in leh meizial zuk a sim  vat loh chuan kum khat emaw a rei ber ah kum hnih emaw chauh a dam tawh ang tih an hriattir a. Jinna hi pa namai a ni lo va, a dam rei dawn tawh lo tih a hriat veleh beidawnga indawm kun ta mai lo chuan  hna a thawk ngawrh zual sauh sauh mai a ni. A natna chu thup tlat a ni a, a tawp a tawpah zanlai-ah Pakistan ram zalenna, India ram sahhlek huamna chu  puan a lo ni ta nge nge a ni. Jinnah a ropui e, a ropui ka ti.

Kan ram hruaitute’n kum 20 zalenna an sual ve a, hei hi, ka ram a ni, tia han sawi tur independent ram chu kan nei lo va, India ram bungkhatah lungsi takin kan inziak lut a, Constitution of India hnuaa khua leh tui Indian kan lo ni ta a ni.


“Bawrhsap MacDonald-a’n Ch.Saprawnga hmaiah a beng” tih kha an sawi kan hriat chu a ni a, thu an belh zel a, “ Ţhangtharte’n  I ruhro hi thlan atanga phawrh chhuakin an la hal duh hial ang” tiin a hau zul ni awm takte hian an sawi a.
Thil chiang em em awm erawh chu Bawrhsapin Pu Saprawnga a ben chhan bul ber chu a duh duha a tihkawi ve theih loh vang leh a thuhnuaia a dah ve theih loh vang tih hi a ni a. Ama District Conference siam a hlawhchham chhan berah Pu Ch.Saprawnga kha a puh tlat avangin a biangah a ben phah ta a ni tih hi chu tuman kan pha awm lo ve. Khatih hunlaia Bawrhsap dinhmun kha tunlaia DC (Deputy Commissioner) dinhmun ang hian a khaikhin theih deuh riak ruak a. DC in India ram foreign policy ah thu a neih phak lohzia chu a hretute vek kan ni awm e.

 Serkawn zirtirtu Pu Kara (Rev. H. W. Carter)te-khan anmahni mimal ţhahnem ngaihnain Mizo chu Vai nen hnam nunphung inang lo tak kan nih avangin India rama tel lova, Kumpinu enkawl bik British crown colony lam ngaihven turin thurawnte an lo pe ve ngei mai a. Khang an rinthu an sawi kha Serkawn Pu C.Zaţhuama te ang hi chuan sahuai thingvawnin an la vuan a, thu dik emaw an la ti tlat mai a ni.

Hriatlohna hi chu a mawl a ni an tih ang hian hriatlohna avangin Bawrhsap MacDonald Sap leh Ch. Saprawnga te an lo intawng a, hriatlohna avang vawkin British crown colony policy hi kumpinu hian a lo siam emaw an ti bawk a.   Bawrhsap MacDonald Sap leh Ch. Saprawnga chungchang bawk chu MNF hruaitute’n independence movement boruak hlap-alh nan anrawn hmang leh a. A bul ţan dan a dik lo a, a tawpna pawh a zuih ral ta mai reng a ni. Khual thuthang leh ar pan chuk a pun duh an lo timathlawn lovin, “ Mizo ţhanthar chuan  I ruhro hi I thlan aţangin an la rawn phawrh ang a, an la hal duh hialin ka ring a ni” MacDonald-a’n a ti anga sawitu Pu R.Vanlawma leh Pu Laldenga te thu sawi hi chu mena thlak chi a ni a, an phuah belh mai mai a ni.

Politics-a hi chuan Vai leh Kawlte hian min lo finkhalh khawp mai a, Ch. Saprawnga te khan Bawrhsap MacDonald Sap ruahman ang khan thil  lo kalpui pawh ni se, Vallabhbhai Jhaverbhai Patel te lo finfalzia kha tunah keiniin ka hre thar chauh. Tharum hmanga Jammu and KashmirJunagadh, leh Hyderabad te sengluh duh mi a ni a, keini tlangmite pawh hi India rama seng luh vek kha a tum em em ang tihkha hriat mai tur a ni.

General Aung San pawh kha Burma independence chungchang sawi turin London-ah a zuk kal a, Sap-ho chuan Burma ram Frontier Areas-a cheng tlangmite dinhmun tur an lo sawipui a, a lo haw leh thuai a, kum 1947 Febraury thla khan Shan state Panglong khuaah  Burma sorar aiawhin Aung San leh tlangmi te aiawhin d  ShanKachin, leh Zohnahthlak  Chin hnam aiawhte nen thuthlung an ziak chuk chuk a, kum 10 hnuah heng state hi hi Full autonomy in administration tih intiamkamna telin Panglong Agreement hi an ziak ta a. British crown colony kha policy pawh a lo awm lo hrim hrim.Pu.C.Ţhuamluaia’n Dorothy chungchanga a sawina; Lawn lova vana arsi lak tum leh leilawn awm lo zawng an lo intawng mai a lo ni si!” a tih ang kha a ni.

1912 A MIZO LAL TE LEH HNAMCHAWM ZINGA A BER KAI TE

1912 khan Mizoram ah lal 312 an la awm a, Sap hovin min awp tawh avangin chutih laia Bawrhsap chu Hezlett-a a ni. Bawrhsap chuan “Ka ram chhunga lal leh hnamchawm te ho chanchin ka hrechiang duh e,” a ti a. Tichuan, September 1912 khan lal leh hnamchawm ho chu lammualah a ko khawm ta a. Chuta thil thleng chu tamtak chuan kan hre hauh lovang a, pui tak a ni.

Lammual ah chuan Mizo lal te leh hnamchawm mi ropui deuh ho chu an awm hmur mai a. Bawrhsap chu a rawn ding chhuak a, “Lal ho zingah tunge tangka ngah ber,” a rawn ti a, Lianlula thlah Lungleng lal, Khamliana Sailo chu a rawn ding chhuaka, “Lal zingah chuan tangka ka ngah ber ang” a rawn ti a. A pass book(Hei hi Postal savings account a nih hmel) an han en sak a 10000 a lo nei a, tichuan, lal hausa ber nih manah pangparthi awrh tir pah in thutna an pe ta a. Khamliana hi tuna Lungleng lalin sa tu khu a ni.

Chutah lal ho zingah tunge taksa lian ber an zawng leh a, Vuta thlah Khawbung lal Lalbiaka Sailo chu a rawn ding chhuak ve leh a, “Lal zingah chuan ka lian ber ang,” a rawn ti a, Bawrhsap chuan “Midang in awm em” a ti a, an ngawi thup mai a. Lalbiaka banbul chu an han teh ta a, sum 3 lai alo ni a. Lal zinga taksa lian ber nih manah pangparthi leh thutna an pe ve leh a. Chutah, tu nge hmeltha ber a ti leh a, Rahsi ho chuan “Suakbenga thlah, Lalthiauva, Chenkual lal, Khuangpuilam ami hi a hmeltha ber,” an ti a; tichuan, lal hmeltha ber nih manah parthi leh thutna an pe ve leh a.

“Tunge kut chak ber?” Bawrhsap chuan a ti leh a, Rahsi ho bawkin “Vuta thlah Rothianga Sailo lal, Khawlailung khua hi a kut a chak ber,” ang an ti a. Rothianga hian darbel tlang a piai thla thei a ni. Tichuan, kut chak ber lawmman atan parthi an pe a thutna an pe leh a. Tin, hnamchawm ho zinga tangka ngah ber ah Kolasib dawrkai Hnehbana chu an thlang a, cheng 8500 a nei a; tin, a ngah ber dawttu ah Vanhlira Sairang dawrkai an thlang a cheng 8200 a lo nei a, lawmman ah parthi leh thutna an pe leh ve ve a ni.

Bawrhsap chuan lal khawngaihna ngah ber leh zaidam ber, mahni khaw vawng fai ber atan Kairuma Sailo lal Tlaikuang ami a thlanga “Khawi chin nge i lal ram” a ti a. Kairuma chuan,”Thlang lam ah Reng lal nen kan inri a, chhaklam ah Tiau chin” a ti hem mai (Mizoram pum ang a ni. Lal dang an awm ve vek a, huai ve tak a ni). Bawrhsap hian a ngaisang bawk aniang parthi leh thutna pek bakah TUAL VAWI THUM THLENG THAH PHALNA A PE. Hemi tum a Lawman an pek ho hi Medal an pe tel vek bawk a, an mahni zah entir nan leh chibai buk nan Bawrhsap chuan Zemabawk lam hawiin laipui a kah tir a tin Bawrhsap hian sipai ho an mahni tih hlim nan darkar khat a lam tir bawk a tichuan an tin ta a ni.

{ Kairuma lawman dawn tel ‘tual vawithum thah theihna’ permit hi a bawn ka ti ber. Bawrhsap ber in “Tual vawithum i thah thleng in i chunga engmah pawi a awm lovang” a ti mauh mai a ni.}

Mizoram hi Excluded Area a nih laia min awptu Superintendent chuan kum 1946 January ni 16 khan Mizo lalte leh an aiawhte a kokhawm leh a, lal 13 leh mipui aiawh mi 13 an tel a. Kum 1947 April ni 14 han District Conference vawi 4-na koh a ni a, mipuite’n an aiawh turin lal 13 leh mipui aiawh 13 an thlang a, an thurel pawm tlan a ni ta lo.

Advisory Sub-Commiittee-a thu thehluh tur, Mizo Union hotute lo buatsaih chu, thlirhovin ni 16.4.1947-a Ch. Saprawnga te ţhukhawm lai chu, Bawrhsap chuan Vanţhuama nen police a rawn kohtir ta a. DC Bangla kawt zawlah chuan D.A Penn-a te nen Bawrsap chu an lo awm a.Kawtzawl an han thleng chu, engmah sawi lo chuan, MacDonald Sap chuan Saprawnga chu a rawn bei thut mai a, a bekah a rawn beng chawrh mai a. A tlu tur awn chu, a veilamin a rawn beng leh a, Ch.Saprawnga chuan bawrhsap ben chu a kuta a lo inveng leh hram chung pawhin a bêng chhung chu na a ti em em mai a, a lu a hai hle bawk a ni.

Bawrhsap thinrim chuan, “ Lo kal rawh u” a la ti zui a, Ch, Saprawnga leh Pu Vanţhuamate’n an zui laichuan Ch. Saprawnga chuan a rilru chuan, “ He pa hian min tihlum duh hial dawn a ang mang e aw,”a ti a. “ a duh ang ang chuan min sawisa mai a ni ang chu ,” tiin an zui ringawt mai a. Bangla luh dawn ţep chuan Bawrhsap chu a lo lehhawi thut a, Ch.Saprawnga chuan Bawrhsap hian a beng leh dawn emaw a tihman a, thinur em em hian a han melh leh a. A kiang ding Vanţhuama lukhum chu a han benthlaksak velh ta a,  “ I thiltih avang hian zahna I la tawk ang!,” a ti a. Ch. Saprawnga chuan, “ Ka pu, Eng pawh hi, Pathian rawn chung zela ka tih vek an ni a, ka chunga thil lo thleng chu eng pawh ka huam ve a ni, “ a ti a. Bawrhsap thinrim chuan, “ Kal rawh u” a ti a, Vanthuama nen chuan an haw ta a.

Bawrsap Macdonald khan ama mimal ţhahnem ngaihnain Mizoram kha Crown colony-ah dah a tum tlat a, mahse Kumpinu sorkar bulpui PM Attlee a lo nih tak avangin Home rule pawh an sut leh vek kha a lo ni si a, engmah hre chiang mumal lovin MacDonald leh Ch. Saprawnga te kha an lo insu chiam chiamin kut hial an lo inthlak mai mai chu a ni a, hriat lohna hi chu a mawl teh zawng a ni e.  

Tichuan, Hriatlohna mawlzia bawk han sawi chhunzawm leh ta ila. Mizote khan Kumpinu-in min chhuahsan dawn khan independence emaw, Burma ram zawm emaw, India ram zawm emaw kan duh thuthalin kan thlang thei  emaw kan lo ti a, a lo ni miah si lo a ni.

 

DC Notice No. 7629-30 G of 2.9.1947 thuchhuak hi ngun deuhvin chhiar teh ang.

  1. There can be no question of the Lushais leaving the Indian Union as in law, the Lushais country being an Excluded Area was already part of Assam.
  2. That the Lushais must remain with the Indian Union and connot join either Pakistan or Burma.
  3. That in view of the Constitutional position stated above, the question of opting out after 10 (ten) years does not arise.

Mizote hi hnam mak dangdai tak chu kan ni phawt mai a, thliarkar rilru kan pu a, mahni hi kan indah sang ve hle a, kan chheh vel hnam hi ngaihsan abar  pawh kan nei lem lo. India ram mi kan ni a, mi chawmhlawmtu leh min tuamhlawmtu ber India hi kan han ngaisang lo em em phawt mai a, Sap, Israel leh America hi kan ngaisangin kan ţan em em ringawt mai a.

Politics leh sakhuannaah pawh hian mahni chhia leh ţha hriatna, conscience hman kan tum lo va, mi thusawiah kan innghat tawp mai a, a sawi tlawr thiam thiam kan bawhin kan zuan vak vak mai a, a hniak tam lam lam kan bawh ruih ruih zel mai a, pianthar rei ngaiha pawh a awm lo ang bawk hian, politics-ah pawh hian ideology pawm bik ngelnghet pawh kan nei lo va, thleng tlawr zuan reng reng in kan hun kan hmang ral mek a, tuibel pahnih chhipchuanin lal pahnih rawng kan bawl kawp mek a, a lehlamah sum ngainatna bawihah kan awm a, compensation hnam leh dawt bill siam tam hnam kan ni a. A lehlamah chawlhni kristian hnam, kan kohhrana tan thi leh thau pawlha ţhahnem ngai em em , kan thawhlawh tihpun nan dawt bill pawh siam hreh lo hnam  ka ni lawi bawk si.  

Ze nghet ngei, mi rilru putling Dina Wadia ang hi eng tikah nge kan nih ve theih ang aw tihte ka ngaihtuah mai mai a, a vanglai khan Pakistan ramah politics khel turin an sawm nasa mai a, a duh der lo.

 

 

Similar Articles

Top