You are here
Home > World News > JERUSALEM ISRAEL KHAWPUIA PUAN LEH A SAWHKHAWK

JERUSALEM ISRAEL KHAWPUIA PUAN LEH A SAWHKHAWK

JERUSALEM ISRAEL KHAWPUIA PUAN LEH A SAWHKHAWK

President Donald Trump chuan Jerusalem chu Israel ram khawpuia a pawm thu a puan takah chuan khawvel ram hrang hrang hruaitute’n an ngaihdan an puangchhuak chuah chuah ta hlawm a.

171206130809-trump-jerusalem-large-tease

Israeli Prime Minister Benjamin Netanyahu chuan he ni hi Israel ram leh hnam tan ni chhinchhiahtlak a ni tiin President Trump chungah a lawm ta zet thu a sawi a.

“Israel fate’n Jerusalem hi kan khawpui  ni tura kum 3000 chhung teh meuh kan  beisei,  kan hmathlir leh kan ţawngtaina a ni,” tiin a tweet a ni.

trump-jerusalem-afp_650x400_61512584349

Palestinian President Mahmoud Abbas chuan Donald Trump thu puan chu ‘pawm theih chi ni lo tawp leh dem-awm tak’ a ni a, Israel leh Palestine inremna tur chungchangah US hi palai hna thawk turin a tel thiang tawh lo va, Jerusalem khua hi kum khua leh chatuan pawhin Philistia mite khawpui a ni reng ang,’ a ti a ni.

_99065461_east_jerusalem_detail_624map_v3-2

 TRUMP-A’N ENG TIN CHIAH NGE A SAWI?

White House atanga Jerusalem chu Israel khawpuia a pawm tak thu a puan rualin US president chuan,  “He thuthlukna hi America ram tan a ţha ber tur leh Israel leh Palestinian-te inkara inremna zawnna kawnga ţha ber tur nia ka ngaih a ni a. Tunhmaa US President te khan Israel leh Palestine te inkara inremna siampui an tum thu an sawi an sawi a, an huaisen vang leh an rilru an thlak vang nge, tu mahin engmah an sawi fel tak tak lo va, an tipuitling bawk lo va. Chuvangin keimah hian tihpuitlin ka tum ta a ni, a ti.

Jerusalem hi Israel ram khawpui a ni tih kan pawm hi thu dik awm sa reng a ni a, thil dik tak kan ti a ni mai a ni, a ti.

DONALD TRUMP-A’N ISRAEL RAM KHAWPUI ATAN JERUSALEM A PAWM THU PUANG DAWN

 Palestinian Islamist group Hamas chief Ismail Haniyeh chuan, khawvel pum huapa kan Palestinian unaute hian he phiarrukna hi an pawm theih dawn hauh lo va, an ram leh an hmun thianghlim humhim tur hian engkim tih an inhuam vek a ni, a ti a. Hamas thupuangtu chuan, ‘He thuthlukna hian Middle East-a US hamţhatna tur zawng zawng chu Meidila lut vek turin Meidil kawngkapui  a hawnsak ta a ni, a ti.

 Saudi Arabia lal  King Salman chuan he thil hian  dik lo taka khawvel puma  Muslimte tihthinrimna a thlentir dawn a ni, a ti.

 UN Secretary General Antonio Guterres chuan, ‘Manganna leh  hlauhthawnna hun kan tawng mek a ni a, Israel leh Palestinian inremna tur hian two-state solution bak ruahmanna dang a awm lo,’ a ti.

UK Prime Minister Theresa May chuan US thupuan chu a pawmpui ve loh thu sawiin Middle East-a inremna siam tur kawngah tangkaina a neih a rin loh thu a sawi a, French President Emmanuel Macron pawhin US president thupuan hi an thlawp ve loh thu a sawi a, mi tumah chi-ai mai lo turin a ngen a, EU chief diplomat Federica Mogherini chuan US thupuan chu thil ngaihmawh-awm tak a nih thu a sawi a ni.

German Chancellor Angela Merkel pawhin US thuthlukna hi a thlawp loh thu a sawi a, Pope Francis chuan, “He thil hi ka ngaimawh em a, sawichhuak lovin ka awm thei lo a ni ber a, tun hmaa Jerusalem khawpui dinhmun pangngai ,UN resolution ang kha mi tin hian zah takin vawngnung reng turin ka ngen che u a ni,’ a ti.

 East Jerusalem an tih Jerusalemn khawhlui Old City awmna hi kum 1967 ni ruk indonaah khan Israel hian Jordan ram atangin a laksak a, a luah hlen ta a, Judaism, Islam leh  Christianity sakhaw 3 hmun pawimawh leh hmun thianghlim awmna East Jerusalem hi UN leh khawvel ram dangte hian Israel ramah an la pawmpui ngai lo va, kum 1993 Israel-Palestinian peace accords-ah pawh khan inbiakrem dan azirin la sawifel tur tiin thu an dah a ni.

United Nations Security Council member 15 zinga member ram 8-te chuan US thupuan chungchang ngaituah tura urgent meeting neih an rawt a ni.

 

Similar Articles

Top