You are here
Home > CCT Robawm > JAMES LEH ‘SELF-REALIZATION’

JAMES LEH ‘SELF-REALIZATION’

JAMES LEH ‘SELF-REALIZATION’

Vawiin tlai chu kan inah ngei James Khamliansawma’n min rawn tlawh hlauh mai a, ka lawm hle a ni. Ani hi ka lo chhuang rilru em em a, a chungah pawh beiseina ka nei sang hle a ni.

IMG_20170921_163812_1

James hi  Pu Paul T.K. Donga leh Margaret Zomawii te nupa inkarah kum 1988 khan a lo piang a, kum 2011 khan Kala Bhavana ,Santiniketan atangin BFA (Sculpture) a zir chhuak a, kum 2013 khan University of Hyderabad atangin MFA (Sculpture) a zir zo leh a, Mizo zingah MFA ( Sculpture) zirchhuak hmasa ber a ni a, Vanapa Hall kawta Vanapa lim siamtu hi a ni a. Tun hnai khan DIET, Lungleiah lecturer appointment a hmu hlauh mai a, a hna rawn zawmin vawiin tlai khan min rawn tlawh ta a ni.

11063290_946380872039698_1262026917_n

Ani hi Bengali thu leh hla thiam, Nobel Prize dawng tawh Rabindranath Tagore lo din Santiniketan atanga zirchhuak a ni bawk a, self realization chhungchang kan titi a inman hle mai a, darkar khat deuh thaw kan titi a, ţawng kan inchuh a ni ber mai!

10514991_814597591884694_1829836171_n

Rabindranath Tagore khan mihring tihpuitlin nan hian, khuanu kutchhuak thing leh mau tamna hmun, hmun fianrial-ah mahnia ngawi renga awmin mihring hi eng nge maw a nih a, kei ni eng nge ni ka nih tih inhriatchian tumin mahniin inzir ila, zirna hi a hlimawmin rah ţha a chhuah ber ang tih kha a ring bur mai a. Chu rinna nen chuan ramhnuai sikul a din ta a, kum 1921 khan University angin a kalpui a, kum 1951 khan India ram sorkar laipui chuan a recognize ta kha a ni a. He ramhnuai university atang hian zai thiam, lemziak thiam, lehkha thiam leh scientist tam tak an rawn chhuak ta phawk phawk reng a ni.

Lal Isua chanchin hi ka ngaihtuah ve fo va, fianrialah hun a hmang tam hle mai. Pathian chibai bukna ţha ber pawh hi fianriala ţawngtai a ni tih min zirtir a.

“Tin, in ţawngţaiin, mi vervekte angin in ti tur a ni lo; miin an hmuh theihna `turin, inkhawmna inahte, kawtthler peng takahte, ding chunga tawngtai an ngaina si ţhin a. Tih tak meuhvin ka hrilh a che u, an lawmman chu an hmu zo tawh. Nang erawh chuan i ţawngţaiin, i pindan chhungrilah lut la, i kawng khar la, i Pa aruka awm hnenah chuan ţawngţai rawh; tichuan, i Pa aruka hmu ţhintu chuan a rul ang che. (Matthaia 6; 5-6).

International Flower Expo, Pune ka chhim haw hlimin AIR, Lungleiah “ Ringtu Ţhalai Kristiante chu an intodelh tur a ni” tih thupui min sawitir a, self-realization chungchang hi ka zep tel hlek a, Mizo kristian te salvation camping kan nei tlut tlut a, Evangelistic Team speaker te leh counselor te mit-in Pathian kan hmu a, an bengin Pathian aw kan hria a, camping zawh Tic team an haw hnu lawkah kan piantharna a da vek a, kan zai tui thei lo va, kan ngui a, kan chau leh thin. Eng vang nge tih chuan keimahni mitin Krista kan hmu lo a, keimahni bengin Krista aw kan hre hrek lo va. Pathian kan muhna mit neitu speaker a haw liam a, Pathian aw kan hriatna beng speaker a haw tak vang a ni. Keimahni mit-in Pathian kan hmu lo va, keimahni bengin Pathian aw kan hre lo atin a ni, tih ka sawi a.

AIR Lunglei radio ngaithlatu hi an lo tam khawp mai a, min chhuahchhaktu ka tawng hnem khawp mai.  Mi tlemte chuan I thusawi kha ka ei lutuk a, ka ţhial sawm hman lo va, ka lem duak duak an ti ve thung a ni.  

Mizo theologian ropui, Tribal Theology chherchhuaktu Rev.Dr. K.Thanzauva chuan Mizo kohhran chu Mizo culture angin Pathian chibai kan buk a, a huho zel lo chuan kan tui thei lo, a ti a. A sawi dik hle a ni.

Aizawl Chanmari kawna Dr. R.Zokhuma’n,  Kelkangah I kal ve em? tiin min zawt a, ka kal dawn lo reng reng! ka ti a. I chapo a ni, min ti a. “ Ka chapo a ni lo, Kelkang kalte ka sawi nep a ni lo, thlarau thinghlim hi khawii kipah a awm a, mi anga Pathian hi zawn hmuh ka tum ve lo, Pathian lehkhabu thianghlim Bible ka nei a, keimahin ka zawng mai” ka ti a.

A hniak tam lam lam zawh dual dual, a huho hlira thil ti hnam kan nihnaah mi tih ang tih kha mi an-na a ni mai a, Mizo society-ah chuan. Chu chu a ţhatna tam tak a awm rualin a ţhatlohna tam tak a awm bawk a. Fianrialah mahni nihna kan tuichilh ngam lo va, kan chemkalna zawng pawh kan ti tak tak peih lo va, lu pan hna thawh an tih ang, thiam zel zul vek, thiam tak tak nei mang si lo kan lo tam ta em em ringawt mai a, “Jack of all trade, master of none’ an tih ang kha kan lo ni ta  hlawm a ni.

 

Bethel Tawngtaina, Lianhna.
Bethel Tawngtaina, Lianhna.

In leh lo nei ţha leh sorkar thau sawk thei mi hausa tih ang reng ai hian kei chuan mahni rila rah Pathian rochan fanau te enkawl puilting thei nu leh pate hi ka ngaisang em em a, mistiri hna thawk chunga fate enkawl puitling Pu Paul T.K. Donga leh Margaret Zomawii te hi ka ngaisang a, James Khamliansawma u hi mithiam chungchang tak mai BE (Architect) Jerome T.Liansanga a awm bawk a. Ani hi a nupui nen Burma ram Rihkhawdar leh Haimual inkar khaw chengker Lianhna khaw dai  Bethel Centre-ah rawngbawlin an han awm a. An chanchin zirin ka han tlawh a, an chanchin hi eng tia ziah tur nge tih ka la hre lo va, ka la thulkhung ringawt mai a, Pathian thil rel dan hi ka hre thiam lo a ni.

 

Jerome
Jerome
Hnuni & Jerome
Hnuni & Jerome

Leo Tolstoy chuan ‘Art is communication’ a lo tih angin Art hi a lo chhuahna chu chhungril lam, mihring rilru ngaihtuahna leh suangtuahna a ni a. Pu Siamkima Khawlhring chuan, mihring kut chhuak, mita kan hmuh leh benga kan hriat zawng zawngte hi a taktak leh a bul (original)chu rilruah a awm a, mihring kutchhuak  lo ni tate hi chu a lem leh a hlimthla mai chauh a ni a ti a. Chuvangin art lo chhuahna mihring rilru chu a thianghlim tur a ni. Thinghlim han tih hi Lal Isua tlanga a thusawi    “Thinlunga thianghlimte chu an eng a thawl e; Pathian an la hmu dawn si a, tih ziak hi Pathian thu leh thlarau lam thilah kher lo pawh a lo dik reng mai a.

 10913616_951627301515055_108168659_n

 Tirhloh Paula’n,  Lalpa Thlarau awmna apiangah chuan zalenna a awm ţhin a tih pawh hi Art khawvelah pawh a lo dik a, Hmangaih Johana’n, thutak chuan bawih a ban ang che u, a tih hi King James Version ‘The truth shall make you free’ tih zulzuiin ‘Thutak chuan a chhuah zalen ang che u.’ tiin letling ta ila, kan thu chai lai mek nen hian a inlaichin ta vek mai a, ‘thutak’ tih ţawngkam te pawh hi hmu thlarau thil rûn  lo hian dikna leh sual nei lo ti zawngin dah ta ila, thil a nih tur ang thlapa thil awm hi ‘truth’ chu a ni bawk a. Chutin, John Keats hla

“Beauty is truth, truth beauty, —that is all

Ye know on earth, and all ye need to know”

 tih nen pawh khan a insuihfin theih ta vek mai a nih chu.

Kan han tlâk leh ta duah a, Art hi Science aiin a rilin a zau daih zawk a, Mizo culture leh kan pipute sulhnu te hi art form chi hrang hranga  kan express thiam a, hnam dang mithmuha tarlanga khawvel pumhuapa phochhuak thei tur hian Mizo lemziakthiam te, thu ziak thiam te leh milim tuk thiamte hian mawhphurhna kan nei vek hlawm a ni.

James Khamliansawma hian Vangchhia Kawtchhuah ropuia lunga ker milemte pawh Mizoram Governor chenna Raj Bahvan banga tar turin project a nei mek a, Vangchhe khuaa pi leh pute sulhnu laih chhuahah Hindu sakhaw kaihhnawih thil a tel lo tih finfiah a ni tawh a, Mizo rohlu  a ni tawh  mai a ni.

Pipute sulhnu, Mizo ziarang lantir theihna thil tam tak explore tur a awm reng a;-

Ka hmaah luirâl khaw mawi chu a awm,
Thlen ka nghakhlel khawpui mawi chu;
Lungduh zawng zawng an kimna hmun,
Hmuh châk hian ka thlir bâng thei lo.

Aw, kal lai kan ni i chawl lo vang,
Lalpa chakna ringin khawpui mawi i pan ang.

tih hla hi democracy lamtluang kan zawhna hla ang pawhin han ngaihruat ta ila, democracy vawrtawp kan thleng ta ti theia inchhal tu ramah khawvelah an la awm lo va, democracy hi ‘ a process” kal lai reng a ni a, a tawpna “ an end” a ni lo. Chutiang bawkin kristian nun hi kal lai reng a ni a, a famkimna hun tur chu ‘khi tah, khi tah’ niin thlarau thianghlim hriakthih leh a belruat Tirhkoh Paula’n a sawi a ni lo em ni!

 Chutiang bawk chuan mi finga inngai mi fing an awm ngai lo va,  kal chhet chhet artui hlawh hlawh, tih hun aţang khan tungchhova kal mihringte hi tu nge ka nih a, eng ti tura khawvela awm nge ka nih tih hriatchian tumna leh inenfiahna self-realization hi kan neih nitin a ngai a ni.

 

 

Similar Articles

Top